ગર્ગસંહિતા · અધ્યાય 4.15

માધુર્યખણ્ડઃ - પઞ્ચદશોઽધ્યાયઃ
નાગેન્દ્રકણ્ઠા-સખીગણોપાખ્યાનમ્ -
શ્રીનારદ ઉવાચ -
વ્રજે શોણપુરાધીશો ગોપો નન્દો ધની મહાન્ ।
ભાર્યાઃ પઞ્ચસહસ્રાણિ બભૂવુસ્તસ્ય મૈથિલ

જાતા મત્સ્યવરાત્તાસ્તુ સમુદ્રે ગોપકન્યકાઃ ।
તથાઽન્યાશ્ચ ત્રિવાચાપિ પૃથિવ્યા દોહનાન્નૃપ

બર્હિષ્મતીપુરંધ્ર્યો યા જાતા જાતિસ્મરાઃ પરાઃ ।
તથાઽન્યાપ્સરસોઽભૂવન્ વરાન્નારાયણસ્ય ચ

તથા સુતલવાસિન્યો વામનસ્ય વરાત્સ્ત્રિયઃ ।
તથા નાગેન્દ્રકન્યાશ્ચ જાતાઃ શેષવરાત્પરાત્

તાભ્યો દુર્વાસસા દત્તં કૃષ્ણાપઞ્ચાંગમદ્‌ભુતમ્ ।
તેન સંપૂજ્ય યમુનાં વવ્રિરે શ્રીપતિં વરમ્

એકદા શ્રીહરિસ્તાભિર્વૃન્દારણ્યે મનોહરે ।
યમુનાનિકટે દિવ્યે પુંસ્કોકિલતરુવ્રજે

મધુપધ્વનિસંયુક્તે કૂજત્કોકિલસારસે ।
મધુમાસે મન્દવાયૌ વસન્તલતિકાવૃતે

દોલોત્સવં સમારેભે હરિર્મદનમોહનઃ ।
કદમ્બવૃક્ષે રહસિ કલ્પવૃક્ષે મનોહરે

કાલિન્દીજલકલ્લોલકોલાહલસમાકુલે ।
તદ્દોલાખેલનં ચક્રુઃ તા ગોપ્યઃ પ્રેમવિહ્વલાઃ

રાધયા કીર્તિસુતયા ચન્દ્રકોટિપ્રકાશયા ।
રેજે વૃન્દાવને કૃષ્ણો યથા રત્યા રતીશ્વરઃ

એવં પ્રાપ્તાશ્ચ યાઃ સર્વાઃ શ્રીકૃષ્ણં નંદનંદનમ્ ।
પરિપૂર્ણતમં સાક્ષાત્તાસાં કિં વર્ણ્યતે તપઃ

નાગેન્દ્રકન્યા યાઃ સર્વાઃ ચૈત્રમાસે મનોહરે ।
બલભદ્રં હરિં પ્રાપ્તાઃ કૃષ્ણાતીરે તુ તાઃ શુભા

ઇદં મયા તે કથિતં ગોપીનાં ચરિતં શુભમ્ ।
સર્વપાપહરં પુણ્યં કિં ભૂયઃ શ્રોતુમિચ્છસિ

શ્રીબહુલાશ્વ ઉવાચ -
યમુનાયાશ્ચ પંચાંગં દત્તં દુર્વાસસા મુને ।
ગોપીભ્યો યેન ગોવિન્દઃ પ્રાપ્તસ્તદ્‍બ્રૂહિ માં પ્રભો

શ્રીનારદ ઉવાચ -
અત્રૈવોદાહરન્તીમમિતિહાસં પુરાતનમ્ ।
યસ્ય શ્રવણમાત્રેણ પાપહાનિઃ પરા ભવેત્

અયોધ્યાધિપતિઃ શ્રીમાન્ માંધાતા રાજસત્તમઃ ।
મૃગયાં વિચરન્ પ્રાપ્તઃ સૌભરેરાશ્રમં શુભમ્

વૃન્દાવને સ્થિતં સાક્ષાત્કૃષ્ણાતીરે મનોહરે ।
નત્વા જામાતરં રાજા સૌભરિં પ્રાહ માનદઃ

માંધાતોવાચ -
ભગવન્ સર્વવિત્સાક્ષાત્ત્વં પરાવરવિત્તમઃ ।
લોકાનાં તમસોઽન્ધાનાં દિવ્યસૂર્ય ઇવાપરઃ

ઇહ લોકે ભવેદ્‌રાજ્યં સર્વસિદ્ધિસમન્વિતમ્ ।
અમુત્ર કૃષ્ણસારૂપ્યં યેન સ્યાત્તદ્વદાશુ મે

સૌભરિરુવાચ -
યમુનાયાશ્ચ પઞ્ચાગં વદિષ્યામિ તવાગ્રતઃ ।
સર્વસિદ્ધિકરં શશ્વત્કૃષ્ણસારૂપ્યકારકમ્

યાવત્સૂર્ય ઉદેતિ સ્મ યાવચ્ચ પ્રતિતિષ્ઠતિ ।
તાવદ્‌રાજ્યપ્રદં ચાત્ર શ્રીકૃષ્ણવશકારકમ્

કવચં ચ સ્તવં નામ્નાં સહસ્રં પટલં તથા ।
પદ્ધતિં સૂર્યવંશેન્દ્ર પઞ્ચાંગાનિ વિદુર્બુધાઃ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
શ્રીસૌભરિમાંધાતૃસંવાદે બર્હિષ્મતીપુરંધ્ર્યપ્સરઃ સુતલવાસિની
નાગેન્દ્રકન્યોપાખ્યાનં નામ પઞ્ચદશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા