ગર્ગસંહિતા · અધ્યાય 3.11

ગિરિરાજખણ્ડ - એકાદશોઽધ્યાયઃ
ગિરિરાજપ્રભાવવર્ણને સિદ્ધમોક્ષવર્ણનમ્ -
શ્રીનારદ ઉવાચ -
ઇતિ શ્રુત્વા સિદ્ધવાક્યં બ્રાહ્મણો વિસ્મયં ગતઃ।
પુનઃ પપ્રચ્છ તં રાજન્ ગિરિરાજપ્રભાવવિત્

બ્રાહ્મણ ઉવાચ -
પુરા જન્મનિ કસ્ત્વં ભોસ્ત્વયા કિં કલુષં કૃતમ્ ।
સર્વં વદ મહાભાગ ત્વં સાક્ષાદ્દિવ્યદર્શનઃ

સિદ્ધ ઉવાચ -
પુરા જન્મનિ વૈશ્યોઽહં ધની વૈશ્યસુતો મહાન્ ।
આબાલ્યાદ્દ્યુતનિરતો વિટગોષ્ઠીવિશારદઃ

વેશ્યારતઃ કુમાર્ગોઽહં મદિરામદવિહ્વલઃ ।
માત્રા પિત્રા ભાર્યયાપિ ભર્ત્સિતોઽહં સદા દ્વિજ

એકદા તુ મયા વિપ્ર પિતરૌ ગરદાનતઃ ।
મારિતૌ ચ તથા ભાર્યા ખડ્‍ગેન પથિ મારિતા

ગૃહીત્વા તદ્ધનં સર્વં વેશ્યયા સહિતઃ ખલઃ ।
દક્ષિણાશાં ચ ગતવાન્ દસ્યુકર્માઽતિનિર્દયઃ

એકદા તુ મયા વેશ્યા નિઃક્ષિપ્તા હ્યંધકૂપકે ।
દસ્યુના હિ મયા પાશૈર્મારિતાઃ શતશો નરાઃ

ધનલોભેન ભો વિપ્ર બ્રહ્મહત્યાશતં કૃતમ્ ।
ક્ષત્રહત્યા વૈશ્યહત્યાઃ શૂદ્રહત્યાઃ સહસ્રશઃ

એકદા માંસમાનેતું મૃગાન્ હન્તું વને ગતમ્ ।
સર્પોઽદશત્પદા સ્પૃષ્ટો દુષ્ટં માં નિધનં ગતમ્

સંતાડ્ય મુદ્‌ગરૈર્ઘોરૈર્યમદૂતા ભયંકરાઃ ।
બદ્‌ધ્વા માં નરકં નિન્યુર્મહાપાતકિનં ખલમ્

મન્વન્તરં તુ પતિતઃ કુમ્ભીપાકે મહાખલે ।
કલ્પૈકં તપ્તસૂર્મૌ ચ મહાદુઃખં ગતઃ ખલઃ

ચતુરશીતિલક્ષાણાં નરકાણાં પૃથક્ પૃથક્ ।
વર્ષં વર્ષં નિપતિતો નિર્ગતોઽહં યમેચ્છયા

તતસ્તુ ભારતે વર્ષે પ્રાપ્તોઽહં કર્મવાસનામ્ ।
દશવારં સૂકરોઽહં વ્યાઘ્રોઽહં શતજન્મસુ

ઉષ્ટ્રોઽહં જન્મશતકં મહિષઃ શતજન્મસુ ।
સર્પોઽહં જન્મસાહસ્રં મારિતો દુષ્ટમાનવૈઃ

એવં વર્ષાયુતાંતે તુ નિર્જલે વિપિને દ્વિજ ।
રાક્ષસશ્ચેદૃશો જાતો વિકરાલો મહાખલઃ

કસ્ય શૂદ્રસ્ય દેહં વૈ સમારુહ્ય વ્રજં ગતઃ ।
વૃન્દાવનસ્ય નિકટે યમુના નિકટાચ્છુભાત્

સમુત્થિતા યષ્ટિહસ્તાઃ શ્યામલાઃ કૃષ્ણપાર્ષદાઃ ।
તૈસ્તાડિતો ધર્ષિતોઽહં વ્રજભૂમૌ પલાયિતઃ

બુભિક્ષિતો બહુદિનૈસ્ત્વાં ખાદિતુમિહાગતઃ ।
તાવત્ત્વયા તાડિતોઽહં ગિરિરાજાશ્મના મુને

શ્રીકૃષ્ણકૃપયા સાક્ષાત્કલ્યાણં મે બભૂવ હ ।
શ્રીનારદ ઉવાચ -
એવં પ્રવદતસ્તસ્ય ગોલોકાચ્ચ મહારથઃ

સહસ્રાદિત્યસંકાશો હયાયુતસમન્વિતઃ

સહસ્રચક્રધ્વનિભૃલ્લક્ષપાર્ષદમણ્ડિતઃ ।
મંજીરકિંકિણીજાલો મનોહરતરો નૃપ

પશ્યતસ્તસ્ય વિપ્રસ્ય તમાનેતું સમાગતઃ ।
તમાગતં રથં દિવ્યં નેમતુર્વિપ્રનિર્જરૌ

તતઃ સમારુહ્ય રથં સ સિદ્ધો
વિરંજયન્મૈથિલ મણ્ડલં દિશામ્ ।
શ્રીકૃષ્ણલોકં પ્રયયૌ પરાત્પરં
નિકુંજલીલાલલિતં મનોહરમ્

વિપ્રોઽપિ તસ્માત્ પુનરાગતો ગિરિં
ગોવર્ધનં સર્વગિરિન્દ્રદૈવતમ્ ।
પ્રદક્ષિણીકૃત્ય પુનઃ પ્રણમ્ય તં
યયૌ ગૃહં મૈથિલ તત્પ્રભાવિત્

ઇદં મયા તે કથિતં પ્રચણ્ડં
સુમુક્તિદં શ્રીગિરિરાજખણ્ડમ્ ।
શ્રુત્વા જનઃ પાપ્યપિ ન પ્રચણ્ડં
સ્વપ્નેઽપિ પશ્યેદ્યમમુગ્રદણ્ડમ્

યઃ શૃણોતિગિરિરાજ યશસ્યં
ગોપરાજ નવકેલિરહસ્યમ્ ।
દેવરાજ ઇવ સોઽત્ર સમેતિ
નન્દરાજ ઇવ શાન્તિમમુત્ર

ઇતિ શ્રીગર્ગસંહિતાયાં ગિરિરાજખણ્ડે શ્રીનારદબહુલાશ્વસંવાદે
ગિરિરાજપ્રભાવપ્રસ્તાવવર્ણને સિદ્ધમોક્ષ નામ એકાદશોઽધ્યાયઃ

ઇતિ શ્રીગિરિરાજખણ્ડઃસમાપ્તઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા