ગર્ગસંહિતા · અધ્યાય 10.27

અશ્વમેધખણ્ડઃ - સપ્તવિંશોઽધ્યાયઃ
યાદવગણકૃતં સેતુબન્ધનમ્ -
ગર્ગ ઉવાચ -
અથાનિરુદ્ધો યદુરાટ્ પ્રાતઃકાલે વિશાં પતે ॥
ઉદ્ધવં તુ સમાહૂય પ્રાહ ગંભીરયા ગિરા

કતિ દૂરં પાંચજન્યં તન્મમાખ્યાહિ સત્તમ ॥
યસ્મિન્મદીયો તુરગો નીતો દૈત્યેન વર્ત્તતે

ઇત્યુદાહૃતમાકર્ણ્ય મંત્રી કૃષ્ણસુહૃત્સખઃ ॥
મનસા કૃષ્ણપાદાબ્જં સ્મૃત્વા પ્રોવાચ માધવમ્

પ્રભો સર્વજ્ઞ ભગવન્નહં ત્વદ્વાક્યગૌરવાત્ ॥
કથયિષ્યામિ લોકેશ યથા માર્ગે શ્રુતં તથા

ત્રિંશદ્યોજનવિસ્તીર્ણાત્સાગરાત્પારમેવ ચ॥
ઉપદ્વીપં પાંચજન્યં દક્ષિણેઽસ્તિ નૃપેશ્વર

ઉદ્ધવસ્ય વચઃ શ્રુત્વાનિરુદ્ધો ધન્વિનાં વરઃ ॥
બલી ધૈર્યધરઃ ક્રુદ્ધો પ્રાહેદં યદુપુંગવાન્

અનિરુદ્ધ ઉવાચ -
અહં યાસ્યામિ પારં વૈ તસ્માદ્યાદવસત્તમાઃ ॥
સેતું કુરુત શીઘ્રં તુ સાગરસ્ય શરૈરપિ

ઇતિ તદ્વચનં શ્રુત્વા યાદવા યુદ્ધકોવિદાઃ ॥
સાગરે મુમુચુર્બાણાન્પ્રહસંતઃ પરસ્પરમ્

તતઃ સર્વે જલચરાસ્તીક્ષ્ણબાણૈઃ પ્રતાડિતાઃ ॥
કોલાહલં પ્રકુર્વંતો દુદ્રુવુસ્તે ચતુર્દિશમ્

ન કેષાં પ્રગતા બાણાઃ પારં વૈ સાગરસ્ય ચ ॥
ઇતિ વૈ કથિતં વાક્યં ખસ્થેન ચ સુરર્ષિણા

તદાક્રૂરો હૃદીકશ્ચ સાત્યકિશ્ચોદ્ધવો બલી ॥
કૃતવર્મા સારણશ્ચ યુયુધાનાદયો નૃપ

હેમાંગદ ઇંદ્રનીલોઽનુશાલ્વાદ્યાશ્ચ ભૂપતે ॥
ગતમાના બભૂવુર્વૈ નારદોક્તં નિશમ્ય ચ

તતોઽનિરુદ્ધો બલવાન્સ્મરન્કૃષ્ણપદાંબુજમ્ ॥
પ્રતિશાર્ઙ્ગં ગૃહીત્વા વૈ દિવ્યાન્બાણાન્મુમોચ હ

તતો દૃષ્ટ્વા ઋષિઃ પ્રાહ હ્યનિરુદ્ધશિલીમુખાઃ ॥
પારં ગત્વા સમુદ્રસ્ય વિવિશુસ્તે ચ તત્તટમ્

ઇતિ શ્રુત્વા ઋષેર્વાક્યં સાંબાદીપ્તિમદાદયઃ ॥
મુમુચુસ્તે શરાન્‌ રાજંસ્તેષાં પારં ગતાઃ શરાઃ

શરેષુ ચ શરા રાજન્કોટિશઃ કોટિશઃ કિલ ॥
વિવિશુર્વીક્ષ્ય સર્વેઽપિ ધન્વિનો વિસ્મયં ગતાઃ

ચક્રુઃ સેતું ચ તે સર્વે ત્રિંશદ્યોજનલંબિતમ્ ॥
દૃઢં જલાચ્ચાંતરિક્ષમેકયોજનવિસ્તૃતમ્

બદ્ધ્વા તતશ્ચ તે સેતું ચતુર્ભિઃ પ્રહરૈરપિ ॥
અનિરુદ્ધાદયો રાત્રૌ સુષુપુઃ શિબિરેષુ વૈ

તસ્માદ્વૈ પુત્રપૌત્રાણાં કૃષ્ણસ્ય પરમાત્મનઃ ॥
શૂરાણાં કૃષ્ણબિંબાનાં કિં બલં કથયામ્યહમ્

ઇતિ શ્રીગર્ગસંહિતાયાં હયમેધખણ્ડે
સેતુબંધનં નામ સપ્તવિંશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા