ગણેશપુરાણમ્ · અધ્યાય 2.36.40

અધ્યાય ૩૬ પ્રારંભ :-
ગૃત્સમદ્ ઉવાચ ।
સહયાદ્રિપર્વતે દેવો ન્યવસદ્ગિરિજાયુતઃ ।
સ્વગણૈર્મુનિભિર્યુક્તઃ પુણ્યક્ષેત્રે મહાબલે

દિદૃક્ષુઃ પ્રયયૌ તત્ર બ્રહ્મા લોકપિતામહઃ ।
પત્નીદ્વયસમાયુક્તો દેવગન્ધર્વકિન્નરૈઃ

દૃષ્ટવા તુ શંકરં પૂજ્ય સ્વાભિપ્રાયં ન્યવેદયત્ ।
આકારયામાસ તદા પરમર્ષીત્સદાશિવઃ

જમદગ્નિં વસિષ્ઠં ચ માર્કણ્ડેયં ચ નારદમ્ ।
કપિલં પુલહં કણ્વં વિશ્વામિત્રં ત્રિતં દ્વિતમ્

ત આયયુઃ શિવાહૂતા અન્યે સર્વે દિદૃક્ષવઃ ।
ઉષઃકાલે મુહૂર્તં તે નિષ્કાશ્ય પ્રારભન્મખમ્

ત્વરાવન્તોઽથ વિસ્મૃત્ય પૂજાં વૈનાયકીં શુભામ્ ।
સાવિત્રીં ગૃહકાર્યેષુ સક્તાં ત્યક્ત્વા મુનીશ્વરાઃ

ગાયત્રીમુપવેશ્યૈવ પુણ્યાહવાચનં ચ તે ।
કારયિત્વાઽભ્યુદયિકં માતૃપૂજનપૂર્વકમ્

અસ્થાપયન્નગ્નિકુણ્ડે યાવદ્વૈશ્વાનરં ચ તે ।
સાવિત્રી તાવદાયાતારમ્ભં દૃષ્ટ્વા રુષાન્વિતા

ઉવાચ ક્રોધરક્તાક્ષી વીક્ષ્ય સર્વાન્સભાસદઃ ।
સાવિત્ર્યુવાચ ।
મામનાદૃત્ય યાગોઽયં સમારબ્ધો ન સેત્સ્યતિ

ઋષિરુવાચ ।
મુઞ્ચન્તી મુખતો જ્વાલા દગ્ધુકામા ચરાચરમ્ ।
શશાપ સા દેવમુનીન્જડા યૂયં ભવિષ્યથ

નિયુક્ત્વાઽનધિકારાં તાં ગાયત્રીં સર્વ એવ યત્ ।
તતો દેવાઃ પ્રણમ્યૌચ્ચૈઃ પ્રાર્થયામાસુરુત્સુકાઃ

સાવિત્રીં સર્વજનની ડલયોરૈક્યતઃ શુભે ।
જલરૂપા ભવિષ્યામો નદીનદસ્વરૂપિણઃ

તથેત્યુક્તે તયા દેવ્યા નદીરૂપત્વમાગતાઃ ।
વેણ્યા નામ્ના મહેશોઽભૂત્કૃષ્ણઃ કૃષ્ણાઽભવન્નદી

તત્તન્નામ્ના બભૂવુસ્તે સરિતઃ સર્વદેવતાઃ ।
યત્ર પૂર્વં વિઘ્નરાજો નાર્ચ્યતે જ્ઞાનદુર્બલૈઃ

તત્ર વિઘ્ના ભવન્ત્યેવં શંકરસ્ય યથા પુરા ।
પુરત્રયવધે જાતા વિઘ્નાસ્તસ્યાપ્રપૂજનાત્

બ્રહ્મા ચિન્તાં પરાં પ્રાપ મખવિઘ્ન ઉપસ્થિતે ।
મન્નિમિત્તં સુરાઃ સર્વે ધુનીરૂપમુપાગતાઃ

વિમાનં સર્વલોકેષુ ગમિતઃ કેન કર્મણા ।
સંકલ્પબાધશ્ચ કથમદ્ય પ્રાપ્તો દુરત્યયઃ

વિઘ્નહર્તા જગન્નાથો ન સ્મૃતો ન ચ વાર્ચિતઃ ।
સર્વેષાં ચૈવ દેવાનાં યતો મોહઃ સમાવિશત્

તં પ્રસન્નં કરિષ્યામિ તતો યજ્ઞો ભવિષ્યતિ ।
એવં યાવચ્ચિન્તયતે બ્રહ્મા તાવત્સુરાંગનાઃ

દેવાન્વૈ તાદૃશાઞ્જ્ઞાત્વા સમીયુર્બ્રહ્મણોઽન્તિકમ્ ।
પુલોમજા ચ ગિરિજા છાયાઽપિ કમલાઽપિ ચ

અન્યા અપિ સમૂચુસ્તં સર્વાસ્તાઃ કમલાનનમ્ ।
કથં યજ્ઞઃ સમારમ્ભિ માન્યા નો માનિતા કથમ્

નાપૂજિ ચ કથં વિઘ્નહર્તા પૂર્વં ગજાનનઃ ।
ત્વયિ વિસ્મરણં ચૈવ ન વાઽસ્મારિ સુરૈઃ કથમ્

કિમસ્માભિરનુષ્ઠેયં દેવૈર્વા જલરૂપિભિઃ ।
કં યામ શરણં દેવ ત્વદૃતે કમલોદ્ભવ

ઇતિ તાસાં વચઃ શ્રુત્વા મા ભયં કુરુતેતિ કઃ ।
તા ઉવાચ યજિષ્યેઽહં યથા સર્વં ભવેચ્છુભમ્

કિમસાધ્યં હિ ભક્તાનાં સુપ્રસન્ને ગજાનને ।
સર્વાઃ કુરુધ્વં તદ્ભક્તિં સ વઃ સર્વપ્રિયં ચરેત્

પ્રસાદયિષ્યેઽહમપિ જગદીશં વિનાયકમ્ ।
અનાદિનિધનં દેવં સર્વકારણકારણમ્

ઇત્યુક્તાસ્તા ગતા દૂરં દેશં કર્ણાટકં શુભમ્ ।
મન્દારમૂલં વિઘ્નેશં સ્થિત્વા ધ્યાતું તદીરિતાઃ

રામેણ સ્થાપિતં પૂર્વં વક્રતુણ્ડેતિ નામતઃ ।
યદ્વરૈર્વિજયી રામો હત્વા રાક્ષસપુંગવાન્

દશાનનં ચ વિખ્યાતં યયૌ પત્ન્યા નિજં પદમ્ ।
તેપુસ્તત્ર તપો ઘોરં સર્વાસ્તાઃ સુરયોષિતઃ

કાચિન્નામજપં ચક્રે કાચિન્મન્ત્રજપં તથા ।
કાચિત્પદ્માસનં તસ્થૌ ધ્યાયન્તી પરમેશ્વરમ્

કાચિદ્વીરાસનગતા નિરાહારા તથાઽપરા ।
સમ્માર્જયન્તી દ્વારાણિ ચત્વરાણિ ગૃહાણિ ચ

પ્રદક્ષિણાનમસ્કારૈઃ કુર્વન્તી ભક્તિમુત્તમામ્ ।
કાચિદેકાંગુષ્ઠગતા તસ્થૌ ધ્યાત્વા વિનાયકમ્

કાચિન્નિમીલ્ય નયને સ્તોત્રાણ્યેવાપઠત્તદા ।
બહુકાલે વ્યતિક્રાન્તે ન તુતોષ વિનાયકઃ

તદા ચિન્તાં પરાં જગ્મુઃ કિં કુર્મ ઇતિ વિહ્વલાઃ ।
તતઃ સુમનસાં ભારાન્દૂર્વાભારાંસ્તથાઽપરા

સમર્પ્ય પુપુજુર્દૈવં ધૂપદીપાન્નકાંચનૈઃ ।
મન્દારપુષ્પૈરન્યાશ્ચ શમીપત્રૈરથાપરાઃ

નભોવાણીં તતઃ શ્રુત્વા શમીપત્રં વિના વિભુઃ ।
ન સંતુષ્યેદિતિ તદા સર્વા એવ શમીદલૈઃ

પુપૂજુઃ પરયા ભક્ત્યા દેવદેવં ગજાનનમ્ ।
તતઃ પરમકારુણ્યાત્સુપ્રસન્નઃ શમીદલૈઃ

આવિરાસીત્પુરસ્તાસાં લસચ્ચારુચતુર્ભુજઃ ।
કિરીટકેયૂરધરો હારકુણ્ડલમણ્ડિતઃ

લમ્બકર્ણો લસદ્ગંડો વિષાણદ્વયમણ્ડિતઃ ।
સિદ્ધિબુદ્ધિયુતશ્ચાખુવાહનઃ પીતવસ્ત્રવાન્

સર્વાસ્તા દદૃશુર્દેવં કોટિસૂર્યસમપ્રભમ્ ।
નિમીલ્ય નયને નેમુર્દણ્ડવત્પૃથિવીતલે

તુષ્ટુવુસ્તાઃ કરપુટં કૃત્વા સૌમ્ય મહાવ્રતમ્ ।
અતિપ્રસન્નવદનાઃ પરમાનન્દનિર્ભરાઃ

(૧૬૨૯)
ઇતિ શ્રીગણેશપુરાણે ક્રીડાખંડે બાલચરિતે ષટ્ત્રિંશત્તમોઽધ્યાયઃ

અધ્યાય ૩૭ પ્રારંભ –
કીર્તિરુવાચ ।
કથં સ્તુતિઃ કૃતા તાભિસ્તાં મે વદ મહામુને ।
મુનિરુવાચ ।
શ્રૂયતાં સા સ્તુતિઃ કીર્તે શૃણુષ્વાવહિતા ચ તામ્

તા ઊચુઃ ।
નમસ્તે સર્વરૂપાય સર્વાન્તર્યામિણે નમઃ ।
નમઃ સર્વકૃતે તુભ્યં સર્વદાત્રે કૃપાલવે

નમઃ સર્વ વિનાશાય નમસ્તેઽનન્તશક્તયે ।
નમઃ સર્વપ્રબોધાય સર્વપાત્રેઽખિલાદયે

પરબ્રહ્મસ્વરૂપાય નિર્ગુણાય નમો નમઃ ।
ચિદાનન્દસ્વરૂપાય વેદાનામપ્યગોચર

માયાશ્રયાયામેયાય ગુણાતીતાય તે નમઃ ।
સત્યાયાસત્યરૂપાય ગુણાવિક્ષોભકારિણે

શરણાગતપાલાય દૈત્યદાનવભેદિને ।
નમો નાનાવતારાય વિશ્વરક્ષણતત્પર

અનેકાયુધહસ્તાય સર્વશત્રુનિબર્હણ ।
અનેકવરદાત્રે તે ભક્તાનાં હિતકારક

ક ઉવાચ ।
એવં સ્તુત્વા પુનર્નત્વા યાચન્તિ સ્મ વરાન્બહૂન ।
દેવાનાં જલરૂપાણાં સ્વરૂપાણિ પ્રયચ્છ ભોઃ

નાસ્મૃતિઃ સર્વદા તે સ્યાત્તથા કર્તુમિહાર્હસિ ।
ગણેશ ઉવાચ ।
દદામિ વાંછિતં વોઽહમનુષ્ઠાનવશીકૃતઃ

સ્તુત્યાઽનયાશુ સંતુષ્ટસ્તથાઽસ્તુ વચનં તુ વઃ ।
સાવિત્ર્યા વચનાજ્જાતા જલભૂતાઃ સુરાઃ શુભાઃ

તદ્વાક્યમન્યથા કર્તું ન હિ શક્તઃ પિતામહઃ।
નિજં સ્વરૂપં યાસ્યન્તિ સ્થિત્વાંશેન તથાવિધાન્

સ્વાધિકારાન્પ્રપત્સ્યન્તે નાન્યથા ભાષિતં મમ ।
શમીપત્રૈઃ પૂજયન્તૂ યૂયં દેવાસ્તુ મામિહ

યેનર્પિતં શમીપત્રં ભુવનં તેન ચાર્પિતમ્ ।
સુવર્ણશતભારાણાં ફલં પ્રાપ્તં ન સંશયઃ

ક ઉવાચ ।
એવં બ્રુવતિ વિઘ્નેશે સ્વરૂપધારિણઃ સુરાઃ ।
સ્થિતા અંશાન્નદીરૂપા દદૃશુસ્તે વિનાયકમ્

તેઽપિ સંપ્રાર્થયામાસુર્નત્વા સ્તુત્વા ગજાનનમ્ ।
ક્ષમાપરાધં નો દેવ બુદ્ધિમોહવ્યપાશ્રયાત્

ત્યક્ત્વા જ્યેષ્ઠાં ભવન્તં ચ પ્રારભામો યજિં ચ તામ્ ।
દૃષ્ટં તુ તત્ફલં સદ્યઃ પ્રસાદાત્તે પુનર્નવાઃ

જાતાઃ સ્મ પરમાનન્દં પ્રાપ્તાઃ સ્મ કૃપયા તવ ।
એવમુક્ત્વા પુપૂજૂસ્તે શમીપત્રૈર્વિનાયકમ્

સોઽપિ તાન્પ્રતિનન્દ્યાથ પિદધે વિઘ્નનાશનઃ ।
તતસ્તે સુન્દરાં મૂર્તિં કૃત્વા પાષાણતઃ શુભામ્

ચતુર્ભુજાં કરિકરાનનાં હેરમ્બનામતઃ ।
પ્રાસાદં પરમં કૃત્વા સ્થાપયામાસુરાદરાત્

ઊચુશ્ચ સર્વલોકાનામુપકારાય તે સુરાઃ ।
ઇમં યઃ પૂજયેદ્ભક્ત્યા વિદ્યાધીશં સુપત્તને

તસ્ય પ્રસન્નો ભગવાન્સર્વાન્કામાન્પ્રદાસ્યતિ ।
વન્દનાત્સ્મરણાદ્વાપિ નમનાન્નાત્ર સંશયઃ

યા તત્રાસીન્મહામૂતિર્મન્દારતરુનિર્મિતા।
તાં ગૃહીત્વા યયાવિન્દ્રઃ સ્વપુરં પરમર્દ્ધિમત્

સપત્નીકઃ પૂજયતે ભક્ત્યેદાનીમપિ પ્રભુઃ ।
સર્વે દેવાઃ સ્વસ્વપદે તતો મન્દારવૃક્ષજામ્

કૃત્વા મૂર્તિં ગણેશસ્ય શમીપત્રૈરપૂજયન્ ।
મુદં પ્રાપુઃ સ્વયોષિદ્ભિરાપુઃ કામાનનુત્તમાન્

બ્રહ્મા દ્વાદશવર્ષાણિ તપઃ કૃત્વા મહત્તરમ્ ।
કૃત્વા પ્રસન્નં વિઘ્નેશં પુનર્યાગમકારયત્

સોઽપિ મન્દારજાં મૂર્તિં પુપૂજે પરમાદરાત્ ।
વિઘ્નરાજસ્ય વરદાં શમીપત્રૈરનેકધા

સ્વર્ણપત્રૈશ્ચ દૂર્વાભિર્મન્દારૈઃ કેતકૈરપિ ।
શ્વેતદૂર્વાંકુરૈશ્ચાપિ સર્વકામફલપ્રદામ્

ગૃત્સમદ ઉવાચ ।
એવં તે વર્ણિતો માતર્મહિમા લેશતઃ શુભે ।
મન્દારસ્ય ચ શમ્યાશ્ચ શ્રવણાત્પાપનાશનઃ

તતઃપ્રભૃતિ દેવસ્ય પ્રિયાઽત્યન્તં શમી શુભા ।
અપૂજિ સ ત્વયાઽજ્ઞાનાત્તેનાસૌ પુત્ર ઉત્થિતઃ

મન્દારસ્યાપિ મહિમા મયા સમ્યઙ્નિરૂપિતઃ ।
ઇદાનીમનુજાનીહિ ગમિષ્યે નિજમન્દિરમ્

ક ઉવાચ ।
શ્રુત્વા ચ મહિમાનં સા શમીમન્દારસંભવમ્ ।
પ્રણિપત્ય મુનિં પુત્રજીવનં વિસસર્જ હ

શ્રુત્વેદમાખ્યાનવરં ગણેશપ્રીતિવર્દ્ધનમ્ ।
ન સ સંકષ્ટમાપ્નોતિ સર્વાંકામૉલ્લભેન્નરઃ

યઃ સ્મરેત્પ્રાતરુત્થાય શમીં મન્દારમેવ ચ ।
ગણેશં ચ સદા ભક્ત્યા નિષ્પાપઃ સ સુખી ભવેત્

( ૧૬૬૨ )
ઇતિ શ્રીગણેશપુરાણે ક્રીડાખંડે બાલચરિતે શમીમન્દારમાહાત્મ્યં નામ સપ્તત્રિંશોઽધ્યાયઃ

અધ્યાય ૩૮ પ્રારંભ :-
કીર્તિરુવાચ ।
સમ્યગુક્તં ત્વયા બ્રહ્મંશમીમાહાત્મ્યમાદરાત્ ।
મન્દારસ્યાપિ કથિતં તેન મે તુષ્યતે મનઃ

જીવિતશ્ચ કુમારોઽયમુપદિષ્ટઃ ષડક્ષરમ્ ।
ન ચોચ્ચારયિતું શક્યં બાલભાવાન્મુનીશ્વર

સુગમં સુપ્રસાદં ચ સ્વરાજ્યપ્રાપકં મુને ।
જપ્તં શક્યં બાલકેન મન્ત્રમસ્મૈ દિશાધુના

મુનિરુવાચ ।
સમ્યગ્દૃષ્ટા તવ મતિર્ગજાનનપદામ્બુજે ।
અતોઽહમસ્ય દાસ્યામિ નિજં મન્ત્રં સુખપ્રદમ્

સર્વસ્ય જગતો હેતુર્નામ યચ્ચતુરક્ષરમ્ ।
શુભાશુભસ્ય ચ દ્રષ્ટર્દુષ્ટદૈત્યહરસ્ય
ચ

સર્વધર્મપરિત્રાતુર્દિવોદાસોપકારિણઃ ।
દ્વિજરૂપધરસ્યાપિ વારાણસ્યાં સ્થિતસ્ય હ

વિશ્વેશ્વરસ્યાવિમુક્તપ્રાપ્ત્યૈ યત્નં પ્રકુર્વતઃ ।
સર્વાન્તર્યામિણશ્ચાપિ વિશ્વેશ્વરનુતસ્ય હ

જગતઃ પાલનાર્થાય જનાર્દનનુતસ્ય ચ ।
ધ્યાતસ્ય પૂજિતસ્યાપિ બ્રહ્મણા સૃષ્ટિહેતવે

અર્ચિતસ્ય શિવેનાપિ સર્વસંહારહેતવે ।
પુલોમજાધવેનાપિ પૂજિતસ્ય સુભક્તિતઃ

દૈત્યાનાં નિધનાર્થાય દેવરાજ્યસુખાપ્તયે ।
સૂર્યેણ વરુણેનાપિ શશિના ચ યમેન ચ

અગ્નિના વાયુના સ્વસ્વગુણોત્કર્ષાય પૂજિતાઃ।
બૃહસ્પત્યુશનોભ્યાં ચ સ્વસ્વોત્કર્ષાય પૂજિતઃ

શેષેણારાધિતો ઢુણ્ઢિર્ધરાધરણહેતવે ।
ગન્ધર્વકિન્નરા યક્ષાઃ સિદ્ધચારણરાક્ષસાઃ ।
ઋષયઃ પશવઃ સર્વે સ્થાવરા જંગમાઃ શુભાઃ

આરાધયન્તિ વિશ્વેશં સ્વસ્વકાર્યાર્થસિદ્ધયે ।
અપારગુણપારોઽયં ઢુણ્ઢિરાજોઽખિલેશ્વરઃ

ગુણાન્તં ન યયુર્યસ્ય બ્રહ્મવિષ્ણુશિવાદયઃ ।
તસ્મિંસ્તુ પૂજિતે ભક્ત્યા શમીપત્રેણ ભાવતઃ

પુત્રસ્તે ભવિતા રાજ્યભાગી શત્રુનિબર્હણઃ ।
કીર્તિરુવાચ ।
શ્રુતો મે મહિમા બ્રહ્મન્ઢુણ્ઢિરાજાશ્રયોઽખિલઃ

કિંકર્મા કથમુત્પન્નઃ કસ્યાંશઃ કિંપરાક્રમઃ ।
કેનાસ્ય ચ કૃતં નામ કેનાસૌ પૂજિતઃ પુરા

ઇમં મે સંશયં બ્રહ્મંશ્છેત્તુમર્હસ્યશેષતઃ ।
મુનિરુવાચ ।
સમ્યક્પૃષ્ટં ત્વયા ભદ્રે જ્ઞાનાધિકતયા શુભે

ભક્ત્યા નિવેદિતશ્ચાયં સંશયસ્મં નુદામિ તે ।
યથા દુરાસદો દૈત્યો હતોઽનેન તુ રાક્ષસાઃ

માયાવતારો મોહાય યાતો દિવોદાસં નૃપમ્ ।
અવિમુક્તં સમાનીતો યથા વિશ્વેશ્વરો હરઃ

ઢુણ્ઢિરાજેતિ નામાસ્ય યેન જાતં નૃપાંગને ।
તત્સર્વં કથયિષ્યામિ યથા સ્કન્દાચ્રુ૧૯તં મયા

અગસ્ત્યાય કથયતા શૃણુશ્વૈકમનાઃ શુભે ।
સ્કન્દ ઉવાચ ।
શૃણુષ્વાવહિતો બ્રહ્મન્નવિમુક્તાશ્રયાં કથામ્

યસ્યાઃ શ્રવણમાત્રેણ સર્વપાપૈઃ પ્રમુચ્યતે ।
કશ્યપાય હરિઃ પ્રાહ સૃજ નાનાવિધાઃ પ્રજાઃ

પ્રરૂઢનપસા સોઽથ સસૃજે જારજા પ્રજાઃ ।
એકવિંશતિસાહસ્રમણ્ડજાઃ સ્વેદજાસ્તદા

ઉદ્ભિજ્જાશ્ચૈવ તાવન્ત્યો માનુષ્યં તાસુ દુર્લભમ્ ।
પુણ્યેન લભતે તચ્ચ બ્રાહ્મણ્યં બહુપુણ્યતઃ

તચ્ચેત્સંરક્ષિતં સમ્યગ્ધર્માધર્મવ્યવસ્થયા।
દદાતિ પરમં સ્થાનં યદ્ગત્વા ન નિર્વતતે

ચતુરાશીતિલક્ષેષુ નો ચેત્પતિતજન્મસુ ।
દુરાચારા નરા યામ્યયાતનાસુ પતન્તિ વૈ

કર્મક્ષયે તતો જાતે બહુકાલેન તે પુનઃ ।
મૃત્યુલોકં સમાયાન્તિ કાણાઃ કુબ્જા દરિદ્રિણઃ

તદેષામનુકમ્પાર્થં બ્રહ્મેશાનાદયઃ સુરાઃ ।
ઋષયશ્ચ મહાભાગા નાનાતીર્થાનિ ચક્રિરે

ક્ષેત્રાણિ ચ મહાર્હાણિ પ્રાણિપાપહરાણિ ચ ।
વિલયન્તઃ સ્થિઆતાસ્તત્ર પાપં દેવર્ષયસ્તદા

યત્ર સ્થિતાનાં જન્તૂનાં પાપસ્ય વિલયો ભવેત્ ।
જન્તૂન્પાપાત્પરિત્રાતું સ્થિતા દેવર્ષયઃ સદા

સર્વશ્રેષ્ઠાં સર્વગુણાં ભુક્તિમુક્તિપ્રદાં શુભામ્।
વિશ્વેશ્વરો નિર્મમેઽથ ધ્યાતૃજ્ઞાતૃવિમુક્તિદામ્

સર્વતીર્થમયીં રમ્યાં નામ્ના વારાણસીં પુરીમ્ ।
યત્ર ચક્રે સરઃ ખ્યાતં વિષ્ણુના પ્રભવિષ્ણુના

તપસ્યતા કૃતં ચારુ સ્નાનમાત્રેણ મુક્તિદમ્ ।
યદ્દૃષ્ટ્વા કન્ધરાકમ્પાચ્છિવસ્ય કુણ્ડલાન્મણિઃ

પતિતસ્તત્ર સંજાતા નામ્ના સા મણિકર્ણિકા ।
તતો ભગીરથાહૂતા જાતા ભાગીરથી નદી

અત્ર કીટપતંગાનાં મુક્તિર્મરણતો ભવેત્ ।
ત્રિવારનામસ્મરણાત્કાશીવાસફલપ્રદા

ધન્યાસ્તા વીરુધો વલ્લ્યસ્તૃણવૃક્ષા ન ચાન્યતઃ।
ગચ્છન્તિ કમઠા મત્સ્યા ભૂકૈલાસં વિહાય તત્

નિત્યં યત્ર સ્થિતો શમ્ભુર્નાનારૂપોઽથ રૂપવાન્ ।
રવિઃ શશી હરિર્બ્રહ્મા સ એવ ગિરિજાપતિઃ

વિનાયકઃ શક્તિરૂપઃ કારણં જગતોઽપિ સઃ ।
પ્રલયેઽપિ ત્રિશૂલાગ્રે ધ્રિયતે યેન કાશિકા

એકોઽયં પંચધા જાતો લોકાનુગ્રહકામ્યયા ।
ભક્તો યાં યાં ધ્યાતિ મૂર્તિં સા તેન ધ્રિયતે ક્ષણાત્

અત્ર યો મનુતે ભેદં સોઽવીચીર્લભતે નરઃ ।
સ્તુતિમેકત્ર નિન્દાં વા પરત્ર યઃ સમાચરેત્

સ યાતિ નરકાનેકવિંશતિં બહુવત્સરમ્ ।
અતો ભસ્માસુરસુતઃ ખ્યાતો નામ્ના દુરાસદઃ

સ શુક્રમુપસંગમ્ય વિદ્યાં પંચાક્ષરીમગાત્ ।
દિવ્યવર્ષસહસ્રં સ એકાંગુષ્ઠસ્થિતોઽભવત્

નિરાહારઃ કાષ્ઠભૂતઃ સવલ્મીકોઽસ્થિશેષવાન્ ।
નેત્રમાત્રાવશિષ્ટોઽસૌ જજાપ પરમં મનુમ્

આયયૌ તં વરં દાતું તત્ક્લેશપરિતોષિતઃ ।
દશબાહુઃ પંચવક્ત્રો રુણ્ડમાલાવિભૂષિતઃ

ત્રિશૂલં ડમરું બિભ્રજ્જટાજૂટવિભૂષિતઃ ।
ગંગાધરસ્ત્રિનયનશ્ચિતાભસ્માંગલેપનઃ

વૃષધ્વજો વૃષારૂઢઃ શશિરેખાવિભૂષિતઃ ।
અપર્ણાંક કૃપાવિષ્ટો જગાદ દૈત્યપુંગવમ્

શિવ ઉવાચ ।
ઉત્તિષ્ઠોત્તિષ્ઠ ભદ્રં તે તપસા ક્લેશિતો ભૃશમ્ ।
ઈપ્સિતં તે પ્રદાસ્યામિ વરયસ્વ હૃદિ સ્થિતમ્

ક ઉવાચ ।
તત ઉન્મીલ્ય નયને બદ્ધ્વાંજલિપુટોઽસુરઃ।
પ્રણમ્ય પરિતુષ્ટાવ વરદં તં મહેશ્વરમ્

ત્વં જગત્કારણં દેવ પરમાનન્દવિગ્રહઃ ।
ક્ષરાક્ષરાતીતતનુર્ગુણત્રયવિકારકૃત્

ગુણાતીતો જ્ઞાનમયો વ્યક્તાવ્યક્તવિધાનવિત્ ।
મુનિધ્યેયતનુઃ સર્વભક્તાનુગ્રહકારકઃ

બ્રહ્માણ્ડાનામનન્તાનાં હેતુઃ શ્રેયસ્કરઃ સતામ્ ।
અખણ્ડાનન્દપૂર્ણસ્ત્વમમોઘફલદાયકઃ

સર્વાધારઃ સર્વસહઃ સર્વશક્ત્યુપબૃંહિતઃ।
પૃથિવીવાયુસલિલવહ્નિતેજઃ સ્વરૂપવાન્

અદ્ય ધન્યં તપો નેત્રે પિતરૌ જન્મ તે યતઃ ।
દૃષ્ટં સ્વરૂપં સાક્ષાન્મે ગતં પાપં લયં પરમ્

યોગિહૃચ્છ્રુતિવાચો યો ગોચરો ન કદાચન ।
ઇદાનીં વરયે દેવ તન્મે ત્વં દાતુમર્હસિ ।
શિવ ઉવાચ।
નિઃશંક વરયાશુ ત્વં સર્વં દાસ્યેઽતિદુર્લભમ્

સ્તોત્રેણ તપસા ચૈવ પ્રણયેન સુતોષિતઃ ।
મુનિરુવાચ ।
તતો વવ્રેઽભયં દેવાત્સુપ્રસન્નાત્સદાશિવાત્

ચતુરાકરજેભ્યો મે મા મૃત્યુઃ સંભવેદિતિ ।
યક્ષરક્ષઃપિશાચેભ્યો દેવદાનવકિન્નરાત્

મુનિમાનવગન્ધર્વસર્પેભ્યો હિ વનેચરાત્ ।
દૃષ્ટ્વા રૂપં મદીયં તુ ત્રસેયૂ રણમૂર્દ્ધનિ

સર્વે દેવા મહાભાગ સુરરાજ્યં ચ યચ્છ મે ।
સંસ્મૃતિશ્ચરણે નિત્યં ભક્તિસ્તેઽવ્યભિચારિણી

શિવ ઉવાચ ।
એકાં શક્તિં વિના સર્વં દેવ્યેભ્યોઽદાયિ તેઽભયમ્ ।
શક્તિતેજોદ્ભવઃ કશ્ચિજ્જિત્વા સંજીવયિષ્યતિ

શિરસિ સ્થાપ્ય ચરણં ધરિષ્યતિ નિરન્તરમ્ ।
નિષ્કાશિતો યદા તેન ચરણસ્તે શિરો ગતઃ

તદા પુનસ્ત્રિલોકીં ત્વં બલાજ્જેષ્યસિ તેજસા ।
ભક્તિશ્વ મે દૃઢતરા સ્મૃતિસ્તે વૈ ભવિષ્યતિ

ગૃત્સમદ ઉવાચ ।
એવં દત્ત્વા વરાંસ્તસ્મૈ શિવોઽન્તર્ધાનમન્વગાન્ ।
દુરાસદોઽપિ સ્વગૃહમાયયૌ હર્ષનિર્ભરઃ

ઇદં સ્તોત્રં પઠેદ્યસ્નુ સર્વાન્કામાનવાપ્નુયાત્

(૧૭૨૫) ઇતિ શ્રીગણેશપુરાણે ક્રીડાખંડે બાલચરિતેઽષ્ટત્રિંશોઽધ્યાયઃ

અધ્યાય ૩૯ પ્રારંભ :-
મુનિરુવાચ ।
તતસ્તુ વરગર્વેણ શિવલબ્ધેન દૈત્યરાટ્ ।
ન મમર્ષ નિજાત્માનં મોહિતઃ કેવલં તુ સઃ

ઇયેષ પૃથિવીં જેતું હયારૂઢોઽભવત્પુરા ।
નિબદ્ધકેશહસ્તસ્તુ વિલસત્કર્ણકુણ્ડલઃ

અસિહસ્તો ધનુષ્પાણિર્નિષંગદ્વે શોભિતઃ ।
રત્નમુક્તામણિમયીં બિભ્રન્માલાં મહાધનામ્

કસ્તૂરીતિલકો દિવ્યવસ્ત્રચ્છન્નઃ સુકઞ્ચુકઃ ।
તામ્બૂલવિલસદ્વક્ત્રઃ પ્રકૃતિદ્વયસંયુતઃ

યાભ્યાં સ્વભુજવીર્યેણ જિતા વીરા અનેકશઃ ।
ઉભયોઃ પાર્શ્વયોસ્તસ્ય યૌ ગચ્છેતાં બલાન્વિતૌ

ચતુરંગં તુ તત્સૈન્યં પૃથિવીવિજયોદ્યતમ્ ।
રજસાચ્છાદયદ્વ્યોમ વિસ્તીર્ણં જલધેરિવ

યો યો વીરો ભવેત્સ્ફીતસ્તં તમેવાજયચ્ચ સઃ।
તત આદાય રત્નાનિ દ્રવ્યાણિ ચ સહસ્રશઃ

આસ્થાપયત્સ તત્સ્થાને સ્વીયાનાપ્તાન્મહાબલાન્ ।
નાનાધિકારે બલવાન્વશે કૃત્વાઽખિલાન્નૃપઃ

યે ચાશસ્ત્રાઃ કરાન્સ્થાપ્ય તમેવ શરણં યયુઃ ।
અત્યન્તં ભીરવો યે તુ ત્યક્ત્વા રાજ્યમપીપલન્

દૂતૈરેવ વશે ચક્રે તાનપીત્થં દુરાસદ ।
એવં ભૂમણ્ડલં જિત્વા શક્રં જેતુમિયેષ સઃ

સસૈન્યઃ સહસા પ્રાયાન્નગરીં શક્રપાલિતામ્ ।
જ્ઞાત્વા વરસ્ય સામર્થ્યં તસ્ય દુષ્ટસ્ય દેવરાટ્

પલાય્ય ચ ગુહાં યાતઃ સામરઃ સકુટુમ્બકઃ ।
તસ્મિન્નેવ ક્ષણે વિષ્ણુઃ સ્થાનાત્ક્ષીરાબ્ધિમાયયૌ

અંકે લક્ષ્મ્યાઃ શિરઃ સ્થાપ્ય શેતે સ્મ મધુસૂદનઃ ।
ત્યક્ત્વા કૈલાસશિખરં કાશીં યાતસ્તુ શૂલભૃત્

તેનૈવ સાકમગમશ્ચતુરશ્ચતુરાનનઃ ।
યો યો યાતિ પદં ત્યક્ત્વા તત્ર તત્ર સ દૈત્યરાટ્।

સ્થાપયત્યેવ બલિનં નિજં દૂતં સુહૃત્તમમ્ ।
એવં નિર્જિત્ય વિબુધાન્દર્પેણૈવ મહાબલઃ

કૈવર્તકાનાં વિષયે ન્યવસદ્ભસ્મકે પુરે।
મુકુન્દપુરમિત્યેવ ખ્યાતં લોકેષુ સર્વતઃ

યસ્મિન્ભસ્માસુરો રાજા પૂર્વમાસીદ્બલાન્વિતઃ ।
શંકરેણ વરો યસ્મૈ દત્તં આશ્ચર્યકારકઃ

સ મરિષ્યતિ મૂર્ધ્નિ ત્વં યસ્ય હસ્તં પ્રદાસ્યસિ ।
એવં દત્તવરો દૈત્યો દુષ્ટભાવપ્રચોદિતઃ

પરીક્ષાર્થં વરસ્યાથ વરદાતુસ્તુ મસ્તકે ।
કરં દાતું યયૌ દુષ્ટઃ પપાલ ગિરિજાપતિઃ

સ દૃષ્ટશ્ચક્રહસ્તેન વિષ્ણુના પ્રભવિષ્ણુના ।
સુન્દરં મોહિનીરૂપં ધૃત્વા યાતસ્તદન્તિકમ્

ઉવાચ મમ વાક્યે ચેત્સ્થાસ્યસિ ત્વં નરોત્તમ ।
અંગનાઽહં તદા તે સ્યાં હર્ષાદોમિતિ સોઽબ્રવીત્

નૃત્યતિ સ્મ તદા સા તુ તદ્વાક્યાત્સ નનર્ત હ ।
સા યથાઽદર્શયદ્ભાવં સોઽપિ દર્શયતે તથા

તયાઽસ્થાપિ સ્વશિરસિ હસ્તસ્તેનાપિ તત્ક્ષણાત્ ।
ભસ્મસાદભવદ્દૈત્યો દુષ્ટચેષ્ટિતમન્તકૃત્

મુકુન્દોઽપિ સ્થિતસ્તત્ર તન્નામ્ના પપ્રથે પુરમ્ ।
અનુષ્ઠાનવતાં નૃણાં સદ્યઃ પરમસિદ્ધિદમ્

સા મોહિની સર્વકામાન્દદાતિ ભક્તિતો નૃણામ્ ।
તત્ર સ્થિત્વા ત્રિભુવનં શાસ્તિ ગર્વાદ્દુરાસદઃ

ઉવાચ મન્ત્રિણો ગર્વાત્કથં ત્રિભુવનં મયા।
આક્રાન્તં સ્વપ્રતાપેન જયતાઽસુરવૈરિણઃ

તતોઽમાત્યાઃ સમૂચુસ્તે વિમુક્તં ન જિતં ત્વયા ।
દશમં ખણ્ડમિતિ તત્તુલ્યં નાસ્તિ હિ કુત્રચિત્

યત્રાત્તે શંકરઃ સર્વસુરૈરપિ ચ સેવ્યતે ।
ન જિતં યત્પુરં યાવત્તાવત્તે પૌરુષં વૃથા

ઇતિ તદ્વાક્યમાકર્ણ્ય મુદં લેભે રણપ્રિયઃ ।
ઉવાચ તાન્સદ્ય એવ યામિ તાં વૈ સસૈનિકઃ

વિમાનવરમાસ્થાય ક્ષણાદ્યાતઃ સ કાશિકામ્ ।
પ્રવિષ્ટમાત્રે દૈત્યેન્દ્રે હાહાકારઃ પુરેઽભવત્

તત્ર યે વિબુધા આસન્સર્વે ચાન્તર્દધુસ્તદા ।
શિવસ્તુ નિજભક્તત્વાન્ન ચુકોપાથ કિઞ્ચન

દત્તં રાજ્યં કિયંત્કાલમિત્યુક્ત્વા પરિવારવાન્ ।
કેદારક્ષેત્રમગમન્મુનયોઽપિ પલાયિતાઃ

જૈગીષવ્યં વિના સર્વે ક્ષેત્રસંન્યાસિનં શુભે ।
તતો બભંજ મૂર્તિં સ મોહાવિષ્ટો દુરાસદઃ

પ્રાસાદાન્મહતો ભંક્ત્વા મમુદે જ્ઞાનદુર્બલઃ ।
કોઽપિ ચેત્સ્મરતે દેવં તં તાડ્ય કુરુતે બહિઃ

ન સ્વાહા ન વષટ્કારઃ સ્વધાકારો ન ચ ક્વચિત્ ।
ન વેદાધ્યયનં ક્વાપિ ન શાસ્ત્રાધ્યયનં ક્વચિત્

ન પુરાણં દેવપૂજા ન વ્રતં ન પ્રદક્ષિણાઃ ।
દુરાસદે દુષ્ટમતૌ તત્ર રાજ્યં પ્રશાસતિ

કર્મમાર્ગે વિલુપ્તે તુ ધર્મોઽપિ લયમાયયૌ।
નષ્ટે ધર્મે સુરાઃ કીર્તે આસન્સર્વે બુભુક્ષિતાઃ

( ૧૭૬૨ )
ઇતિ શ્રીગણેશપુરાણે ક્રીડાખંડે બાલચરિતે દુરાસદોપાખ્યાનં નામ એકોનચત્વારિંશોઽઽધ્યાયઃ

અધ્યાય ૪૦ પ્રારંભ :-
ગૃત્સમદ ઉવાચ ।
તતઃ કેદારમગમન્સર્વે દેવર્ષયસ્તદા ।
વ્યજિજ્ઞપુઃ પદ્મભવં સશિવં સર્વવિત્તમમ્

પ્રણમ્ય શિરસા સર્વે વાગીન્દ્રાગ્નિપુરઃસરાઃ ।
દેવર્ષય ઊચુઃ ।
પદભ્રષ્ટા વયં દેવાઃ સ્વાચારન્મુનયોઽપિ ચ

દુરાસદભિયા દેવ સ્નાનં કર્તું ન ચ ક્ષમાઃ।
કેનાસ્મૈ હિ વરો દત્તો યેનાસૌ ભુવનેશ્વરઃ

જાતો દુષ્ટો વધશ્ચાસ્ય કસ્માદેતદ્વિચિન્ત્યતામ્ ।
યેનૈવ સૌખ્યં લોકાનાં તત્કર્તવ્યં દયાલુભિઃ

ક ઉવાચ ।
ઇતિ તદ્વચનં શ્રુત્વા પ્રોવાચ ચતુરાનનઃ ।
ઉપાયં કથયિષ્યામિ તદ્વધાય સુરર્ષયઃ

યદા તેન તપસ્તપ્તં દારુણં બહુવાસરમ્ ।
દદાવસ્મૈ વરાન્દેવો હ્યનન્તાનમ્બિકાપતિઃ

એનં યો ઘાતયેદ્દેવઃ સ નાસ્તિ ભુવનત્રયે ।
કદાચિદ્દેવદેવોઽસૌ ગુણત્રયવિભાગકૃત્

અહં શિવશ્ચ વિષ્ણુશ્ચ ત્રેધા જાતા યદાજ્ઞયા ।
ગુણત્રયવિભાગાત્સ ગુણેશ ઇતિ પપ્રથે

વિશ્વવ્યાપી ચ માયાવી વિશ્વકર્તાઽપહારકઃ ।
ગુણાતીતો ગણેશશ્ચ પરાત્પરતરઃ શિવઃ

બિભૃયાત્સોઽવતારં ચેત્પાર્વત્યા જઠરે વિભુઃ ।
તદૈવ તસ્ય નાશઃ સ્યાન્નાન્યથા સુરસત્તમઃ ।
સ્તુવન્તુ સર્વે તસ્માત્તં વિશ્વચિન્તાકરં પ્રભુમ્ ।
આદૌ કુરુત તાં દેવીં પ્રસન્નાં ભવવલ્લભામ્

તત્તેજઃસંભવો બાલો દુરાસદવધે ભવેત્ ।
એવમેવ વરસ્તેન શંકરેણ કૃતોઽસ્ય હ

મુનિરુવાચ।
એવં વાક્યં બ્રહ્મમુખાચ્છુત્વા દેવા જહર્ષિરે।
તુષ્ટુવુર્ભવકાન્તાં તાં ભવાનીં ભક્તવત્સલામ્

દેવર્ષય ઊચુઃ ।
નતાઃ સ્મ હે ત્વાં જગદેકહેતું પરાત્પરાં વિશ્વવિચિત્રશક્તિમ્ ।
અચિન્ત્યરૂપાં ત્રિદશૈરશેષૈરશેષવન્દ્યાં ત્રિગુણાં ગુણેશામ્

ધરાધરાં ત્વાં ધરણીસ્વરૂપામાધારભૂતાં સ્થિરજંગમાનામ્ ।
ત્રૈલોક્યસારાં ત્રિગુણાદિભૂતાં ત્રયીતનું તાં ત્રિદશસ્વરૂપામ્

નતાઃ સ્મ હે દેવિ વરપ્રદાંત્વાં વિષ્ણોર્વિમોહાં પદદાં સુરાણામ્ ।
ભક્તાર્તિહન્ત્રીં સકલાર્થદાત્રીં ત્રૈલોક્યકર્તીં નિખિલાર્થગોપ્ત્રીમ્

એવં સ્તુતા તદા દેવી જગાદ સુરસત્તમાન્ ।
વૃણુધ્વં વાંછિતં દેવાઃ સ્તોત્રેણાનેન તોષિતા

દદામિ સકલાન્કામાન્ભવતાં યે મનોગતાન્ ।
તત ઊચુઃ સુરાઃ સર્વે વૃત્તાંતં બ્રહ્મણેરિતમ્

તત ઊચે ચ તાન્દેવી સ્તુવન્તુ ગણનાયકમ્ ।
શુભાશુભસ્ય યઃ કર્તા સર્વાસિદ્ધિકરો વિભુઃ

અવાપ્તસર્વકામાર્થઃ સર્વસ્ય જગતઃ પિતા ।
તતસ્તે તુષ્ટુવુર્દેવં ભક્ત્યા સર્વે વિનાયકમ્

દેવર્ષય ઊચુઃ ।
નતાઃ સ્મો વિઘ્નકર્તારં દયાલું સર્વપાલકમ્ ।
સર્વસ્ય જગતો હેતું સર્વવ્યાપિનમીશ્વરમ્

અનેકશક્તિસંયુક્તં સર્વકામપ્રપૂરકમ્ ।
દીનાનુકમ્પિનં દેવં સર્વજ્ઞં કરુણાનિધિમ્

સ્વેચ્છોપાત્તાકૃતિં નાના હ્યવતારરતં સદા ।
ગુણાતીતં ગુણક્ષોભં ચરાચરગુરું વિભુમ્

એકદન્તં દ્વિદન્તં ચ ત્રિનેત્રં દશહસ્તકમ્ ।
શુંડાદંડમુખં વિઘ્નનાશનં પાપહારકમ્

ભક્તાનાં વરદં નિત્યં સૃષ્ટિસ્થિત્યન્તકારકમ્ ।
અનાદિમધ્યનિધનં ભૂતાદિ ભૂતવર્ધનમ્

ત્રિલોકેશં સુરાધીશં દુષ્ટદાનવમર્દનમ્ ।
લમ્બકર્ણં બૃહદ્ભાનું વ્યાલભૂષાધરં શુભમ્

એવં સ્તુત્વા તુ તં દેવં ગણેશં સર્વસિદ્ધિદમ્ ।
શુશ્રુવુસ્તે નભોવાણીં માભૂદ્વો માનસો જ્વરઃ

દુરાસદં મહાવીર્યં હનિષ્યામિ ભયંકરમ્ ।
ઇતિ શ્રુત્વા નભોવાણીં પુનઃ શંકરમાયયુઃ ।
ધ્યાનનિષ્ઠં ચ તે દૃષ્ટ્વા પ્રણમ્યોચુશ્ચ પાર્વતીમ્

દેવા ઊચુઃ ।
ન જાનીમો નભોવાણીં કેનેમામીરિતાં શુભે ।
હરસ્ય ધ્યાનનિષ્ઠાત્વાત્કથં કુર્મોઽખિલેશ્વરિ

દેવ્યુવાચ ।
દૈત્યો દેવા ઇદાનીં યો નિશ્ચરં સ મરિષ્યતિ ।
તસ્યાઃ ક્રોધેન તપ્તાયા નિશ્વસન્ત્યાઃ પુનઃપુનઃ

આસ્યાન્નાસાપુટાન્નેત્રાન્નિઃસૃતં તેજ ઉત્તમમ્ ।
જ્વાલામાલાકુલં દગ્ધું બ્રહ્માણ્ડમિવ ચોદ્યતમ્

પ્રત્યાહતદૃશઃ સર્વે દદૃશુર્જ્ઞાનચક્ષુષા।
વૈનાયકીં મહામૂર્તિં દશહસ્તાં તમોનુદામ્

બિભ્રતીં મુકુટં રત્નકોટિસૂર્યસમપ્રભામ્ ।
વિદ્યુત્પ્રભામહારત્નકુણ્ડલે રદનં શુભમ્

દિવ્યામ્બરે ચ સિન્દૂરમાયુધાનિ દશૈવ ચ ।
કસ્તૂરીતિલકં ભાલે માલાં હૃદિ ફલાન્વિતામ્

યત્તેજો વ્યાનશે વિશ્વં પ્રલયાનલસન્નિભમ્ ।
વ્યાલયજ્ઞોપવીતં ચ જ્ઞાત્વા નેમુઃ સુરાસ્તદા

પ્રાર્થયામાસુરથ તે આનન્દઘનમીશ્વરમ્ ।
દૃષ્ટોઽતિ યોગગમ્યસ્ત્વમપ્રતર્ક્યોઽવ્યયઃ સ્વરાટ્

નિરામયો નિરાભાસો નિર્વિકલ્પોજરોઽમરઃ ।
સર્વસ્વરૂપઃ સર્વેશઃસ્વપ્રકાશો જગન્મયઃ

અવ્યક્તો જગદાધારો બ્રહ્મરૂપોઽખિલાર્થદૃક્।
પુરાણપુરુષો જ્ઞાનમૂર્તિર્વાચામગોચરઃ

વયં ધન્યા વયં ધન્યા દૃષ્ટ્વા તં નનૃતુઃ સુરાઃ ।
મુનિરુવાચ ।
યથા દેવૈર્વણિતોઽસૌ તેજોરૂપી વિનાયકઃ

એવમેવ જગન્માતા પ્રશશંસ ગજાનનમ્ ।
નિર્ગુણં યન્નિરાકારમવ્યક્તં સર્વગં પરમ્

ધ્યાનગમ્યં ચિદાભાસં સચ્ચિદાનન્દવિગ્રહમ્ ।
સર્વવ્યાપી જગદ્ધેતુરદ્યયાવદ્વિચિન્તિતમ્

વિનાયકસ્વરૂપેણ સાકારં દૃષ્ટમદ્ય યત્ ।
અવતીર્ણં મમ ગૃહે હન્તુ દૈત્યાનનેકશઃ

જગતામુપકારાય પાતું વિશ્વં ચરાચરમ્ ।
પુપૂજ પાર્વતીભક્ત્યા દદૌ સિંહં સ્વવાહનમ્

વક્રતુણ્ડેતિ નામાસ્ય દધ્રે સર્વાર્થદં નૃણામ્ ।
દુરાસદસ્ય ચ વધં પ્રાર્થયામાસ તં તદા

દેવાનાં ચ પદપ્રાપ્તિં નિઃસપત્નામયાચયત્

(૧૮૦૬)
ઇતિ શ્રીગણેશપુરાણે ક્રીડાખંડે બાલચરિતે ચત્વારિંશોઽધ્યાયઃ