ગણેશપુરાણમ્ · અધ્યાય 1.91.92

અધ્યાય ૯૧ પ્રારંભ :-
વ્યાસ ઉવાચ ।
અન્યત્ કથય મે દેવ ગણેશસ્ય કથાન્તરમ ।
શૃણ્વતો મે મનોઽત્યન્તમુત્સુકું ભવતિ પ્રભો

બ્રહ્મોવાચ ।
એકદા પ્રલયે વૃત્તેઽજ્ઞાપયન્માં ગજાનનઃ ।
સૃષ્ટિં નાનાવિધાં બ્રહ્મન્ કુરુ ત્વં હિ મમાજ્ઞયા

અહં પ્રકલ્પયામાસ પુત્રાન્ સપ્ત હૃદા તદા ।
તેષાં નામાનિ તે વચ્મિ કશ્યપો ગોતમોઽપિ ચ

જમદગ્નિર્વસિષ્ઠશ્ચ ભરદ્વાજોઽત્રિરેવ ચ।
વિશ્વામિત્રશ્ચ સપ્તૈતૈ સર્વવિદ્યાવિશારદાઃ

સર્વે મામબ્રુવન્ બ્રહ્મન્નાજ્ઞાપય સુરેશ્વર ।
મયા તુ કશ્યપોઽજ્ઞાયિ બુદ્ધિમાંસ્તેષુ ચાધિકઃ

મત્કાર્યં વિવિધાં સૃષ્ટિં કુર્વિત્યાજ્ઞાપિતસ્તદા ।
અસાવોમિતિ મામુક્ત્વા જગામ તપસે વનમ્

જજાપૈકાક્ષરં મન્ત્રં દિવ્યવર્ષસહસ્રકમ્ ।
તતઃ પ્રસન્નો ભગવાન્ દ્વિરદાનન ઈશ્વરઃ

ચતુર્ભુજોઽરવિન્દાક્ષો મહામુકુટમણ્ડિતઃ ।
પાશાંકુશધરો માલાદન્ત હસ્તઃ શુભાંગદઃ ।
સુવર્ણમણિરત્નાઢયઃ મુક્તામાલાલસદ્ગલ:

સર્પોદરઃ કોટિસૂર્ય વિલસદ્દીપ્તિમણ્ડલઃ ।
વિકસન્નેત્ર વિભ્રાજચ્ચારુશુણ્ડાલસન્મુખઃ

આવિરાસીત્ કશ્યપસ્ય પુર એવં ગજાનનઃ ।
ક્ષુદ્રઘણ્ટા નૂપુરાણાં રવાન્ મુખરિતાઙ્ઘ્રિયુક્

દૃષ્ટ્વા નનર્ત તં દેવં કશ્યપો હર્ષનિર્ભરઃ।
નત્વા સમ્પૂજયામાસ નાનામંગલવસ્તુભિઃ

બદ્ધાંજલિરુવાચેદં સુપ્રસન્નો ગજાનનમ્ ।
ધન્યો મે જનકો માતા તપો જ્ઞાનં વપુશ્ચ દૃક્

ધન્યેયં ધરણી તાત વીરૂદ્ વૃક્ષ ફલાનિ ચ ।
ધન્ય એકાક્ષરો મન્ત્રો યેન દૃષ્ટોઽખિલેશ્વરઃ

ગજાનનઃ પ્રસન્નાત્મા પરમાત્મા પરાત્પરઃ ।
યત્ર કુણ્ઠાશ્ચતુર્વેદા વેદાન્તા મૂકતાં ગતઃ

અગોચરો મનસ્તર્કૈ સોઽયં દેવો મયેક્ષિતઃ ।
યસ્માદાવિર્ભવન્તીમે હરેશાગ્નિમુખાઃ સુરાઃ

પાતાલાનિ ચ સપ્તૈવ ભુવનાનિ ચતુર્દશ ।
યત્ર તન્નિલયં યાન્તિ સોયં દેવો મયેક્ષિતઃ

યો નિર્ગુણો નિરાધીશો ગુરુગમ્યો નિરાકૃતિઃ ।
બ્રહ્મેતિ યં વિદુઃ કેચિત્ સોયં દેવો મયેક્ષિતઃ

ક ઉવાચ ।
એવં વાક્યામૃતરસૈઃ પરિતુષ્ટો ગજાનનઃ ।
ઉવાચ કશ્યપં મમ્રં સ્તુવન્તં વિવિધૈઃ સ્તવૈઃ

ગણેશ ઉવાચ ।
ભક્તેઃસ્તવાદનુષ્ઠાનાત્ પ્રીતસ્તેઽહં મુનેઽધુના।
વરં વરય મત્તસ્ત્વં યં યં સ્વવનસેચ્છસિ

કશ્યપ ઉવાચ ।
સૃષ્ટિં નાનાવિધાં કર્તું સામર્થ્યં દેહિ મે પ્રભો ।
ત્વદડ્ઘ્રિકમલે ભક્તિમવિસ્મરણમેવ ચ

યાયાઃ પ્રત્યક્ષતા તત્ર સ્મરેત્ત્વાં યત્ર ચાપ્યહમ્ ।
તાદૃશં દેહિ મે પુત્રં નામ્ના કશ્યપનન્દનમ્

ગણેશ ઉવાચ ।
સર્વં તે વાંછિતં મત્તો ભવિતાઽઽશુ મહામુને ।
ભક્તિર્મેઽવિસ્મૃતિ સ્યાત્તે સંકટે ચાન્તિકં વ્રજે

કરિષ્યસિ વિચિત્રાં ત્વં સૃષ્ટિં મમ પ્રસાદતઃ ।
ક ઉવાચ ।
એવમુક્ત્વા મુનિં દેવસ્તત્રૈવાન્તરધીયત ।
કશ્યપોઽપિ મુદા યુક્તો નિજસ્થાનં તદા યયૌ

કદાચિત્ કશ્યપોઽકસ્માદશરીર પ્રપીડિતઃ ।
ન ચાલભત્ ક્વાપિ શર્મ ગૃહમધ્યં તતોઽગમત્

નિત્યં નૈમિત્તિકં કામ્યં કર્મ ધ્યાનં ચ નાસ્મરત્ ।
તં તથા વિહ્વલં દૃષ્ટ્વા યોષિતોઽસ્ય ચતુર્દશ

દિત્યદિતિર્દનુઃ કદ્રુર્વિનતાદ્યાઃ પુરઃ સ્થિતાઃ ।
બુભુજે ક્રમશસ્તાસ્તુ નાનાગારેષુ કશ્યપઃ

કાલે યથોક્તે સુષુવે દિતાર્દૈત્યાનનેકશઃ।
અદિતિર્દેવગન્ધર્વાન્ દનુશ્ચ દાનવાનથ

ક્રમેણ કિન્નરા યક્ષાઃ સિદ્ધચારણગુહયકઃ ।
પશવશ્ચ તથારણ્યા ગ્રામ્યાશ્ચાસન્નનેકશઃ

પૃથિવી પર્વતા વૃક્ષાઃ સમુદ્રાઃ સરિતો લતા।
ધાન્યાનિ ધાતવો રત્ના મુક્તાઃ કૃમિ પિપીલિકાઃ

સર્પાઃ પક્ષિગણાસ્તાભ્યઃ સર્વમાસીચ્ચરાચરમ્ ।
એવં દૃષ્ટ્વા સ સન્તાનં જાતં નાનાવિધાં તદા

જહર્ષ કશ્યપો ધીમાન્નાનામન્ત્રાન્ સમાદિશત્ ।
શોધાયિત્વા ઋણધનં સિદ્ધારિચક્રમીક્ષ્ય ચ

ષોડશાર્ણં ચ કસ્મૈચિત્તથાઽષ્ટાદશવર્ણકમ્ ।
એકાક્ષરં ચ કસ્મૈચિદન્યસ્મૈ ચ ષડક્ષરમ્

પંચાર્ણમષ્ટાક્ષરં ચ દ્વાદશાક્ષરમેવ ચ ।
કસ્મૈચિચ્ચ મહામન્ત્રં દદૌ સ મુનિપુંગવઃ

કુર્વન્ ત્વનુષ્ઠિતં તાવદ્યાવદ્દેવો નિરીક્ષ્યતે ।
ગજાનનોઽખિલાધારઃ સર્વસિદ્ધિપ્રદાયકઃ ।

એવમાજ્ઞાપયત્તાંશ્ચ તે ચ જગ્મુસ્તદૈવ હિ ।
તપસે બહુશો દેશાન્ જેપુઃ સ્વં સ્વં મનું તદા

આસને ભોજને દેવં નિદ્રાયાં જાગરેઽપિ ચ ।
અનન્યભક્ત્યા દેવેશં સસ્મરુસ્તે ગજાનનમ્

દિવ્યવર્ષસહસ્રાન્તે પરિતુષ્ટો ગજાનનઃ ।
આવિરાસિદનેકાત્મા તત્પુરઃ કરૂણાનિધિઃ

યો યથા ધ્યાતવાન્દેવં તાદૃશસ્તત્પરોઽભવત્ ।
કસ્યચિત્ પુરતશ્ચાસીન્ મેઘાભોઽષ્ટમહાભુજઃ

કસ્યચિત્પુરતસ્ત્વાસીચ્છશિવર્ણશ્ચતુર્ભુજઃ ।
અગ્રે કસ્યચિદારક્તઃ ષડ્ભુજોઽસૌ ગણેશ્વરઃ

સહસ્રનયનસ્તાવદ્ ભુજોઽસાવપિ કસ્યચિત્ ।
ભાતિ બાલસ્વરૂપોઽપિ યુવા વૃદ્ધોઽપિ ભાસતે

દશદ્વાદશદોર્દણ્ડો ધૂમ્રવર્ણો મહન્મહઃ ।
અષ્ટાદશભુજોઽપ્યાસીત્ કોટિસૂર્યસમપ્રભઃ

તેજોરૂપો મહાકાય આખુવાહનપૃષ્ટગઃ ।
સિંહગો બર્હિગો વાપિ ગજાસ્યો નૈકવક્ત્રવાન્

દૃષ્ટ્વા દેવં તુ તે સર્વે નૈકધા તુષ્ટુવુર્મુદા ॥
બદ્ધાંજલિપુટા નમ્રા ભક્ત્યા દેવં ગજાનનમ

સર્વે ઊચુઃ ।
યતોઽનન્તશક્તેરનન્તાશ્ચ જીવા।
યતો નિર્ગુણાદપ્રમેયાદ્ ગુણાસ્તે।
યતો ભાતિ સર્વં ત્રિધા ભેદભિન્નં।
સદા તં ગણેશં નમામો ભજામઃ

યતશ્ચાવિરાસીજ્જગત્ સર્વં વેત્તુ
સ્તથાઽબ્જાસનો વિશ્વગો વિશ્વ ગોપ્તા ।
તથેન્દ્રાદયો દૈત્યસંઘા મનુષ્યાઃ ।
સદા તં ગણેશં નમામો ભજામઃ

યતો વહ્નિ ભાનૂ ભવો ભૂર્જલં ચ ।
યતઃ સાગરાશ્ચન્દ્રમા વ્યોમ વાયુઃ ।
યતઃ સ્થાવરા જંગમા વૃક્ષસંઘાઃ ।
સદા તં ગણેશં નમામો ભજામઃ

યતો દાનવાઃ કિન્નરા યક્ષસંઘા ।
યતશ્ચારણા વારણાઃ શ્વાપદાશ્ચ ।
યતઃ પક્ષિકીટા યતો વીરુધશ્ચ ।
સદા તં ગણેશં નમામો ભજામઃ

યતો બુદ્ધિરજ્ઞાનનાશો મુમુક્ષો।
યતઃ સમ્પદો ભક્તસંતોષકઃ સ્યુઃ ।
યતો વિઘ્નનાશો યતઃ કાર્યસિદ્ધિઃ ।
સદા તં ગણેશં નમામો ભજામઃ

યતઃ પુત્રસમ્પદ્યતો વાંછિતાર્થો ।
યતો ભક્તિવિદ્યાસ્તથાઽનેકરૂપાઃ ।
યતઃ શોકમોહૌ યતઃ કામ એવ ।
સદા તં ગણેશં નમામો ભજામઃ

યતોઽનન્તશક્તિઃ સ શેષો બભૂવ ।
ધરાધારણેઽનેકરૂપે ચ શક્તઃ ।
યતોઽનેકધા સ્વર્ગલોકા હિ નાના।
સદા તં ગણેશં નમામો ભજામઃ

યતો વેદવાચો વિકુણ્ઠા મનોભિઃ।
સદા નેતિ નેતીતિ તા યં ગૃણન્તિ ।
પરબ્રહ્મરૂપં ચિદાનન્દભૂતં ।
સદા તં ગણેશં નમામો ભજામઃ

(૪૦૩૫ )
અધ્યાય ૯૨ પ્રારંભ :-
ક ઉવાચ ।
એવં નત્વા ચ સ્તુત્વા ચ સર્વે તે તુ ગજાનનમ્ ।
પુનરૂચુર્ગણાધ્યક્ષમધ ધન્યતમા વયમ્

ધન્યં તપો નો દાનં ચ જ્ઞાનં યજ્ઞશ્ચ પૂર્વજાઃ ।
અદ્ય નો દૃષ્ટયો ધન્યા યાભિર્દૃષ્ટો ગજાનનઃ

એવં વાક્યામૃતૈસ્તેષાં સ્તુતિભિઃ પરિતોષિતઃ ।
ઉવાચ શૃણ્વન્તાં તેષાં ગામ્ભીર્યાદ્ દ્વિરદાનનઃ

નૈતાદૃશં મયાઽદર્શિ બ્રહ્મવિષ્ણુશિવાદિષુ ।
યત્ સાક્ષાદ્ દૃશ્યતે સર્વં રૂપં મે નિર્ગુણસ્ય યત્

અતિતુષ્ટોઽનયા સ્તુત્યા વરાન્ દાતુમિહાગતઃ ।
યદ્યદ્વો વાંછિતં તત્તદ્ વૃણુધ્વમખિલં તુ યત્

એવમુક્તાસ્તદા તેન વિકટેન મુનીશ્વર ।
યસ્ય યદ્વાંછિતં તત્તદ્વવ્રુસ્તસ્માદ્ ગજાનનાત્

અસંખ્યત્વાત્તદ્વરાણાં નાસ્તિ શક્તિશ્ચતુર્મુખૈઃ ।
ગદિતું સર્વથા તસ્માદુક્તં સંક્ષેપતો મયા

તાંસ્તાન્ દદૌ વરાન્યાન્યાન્ સર્વે વવ્રુર્ગજાનનમ્ ।
પુનરપ્યવદત્ સર્વાનિદં સ્તોત્રં મમ પ્રિયમ્ ।
ત્રિસન્ધ્યં યઃ પઠેદેતદ્ વિદ્યાવાન્ પુત્રવાન્ ભવેત્ ।
આયુરારોગ્યમૈશ્વર્યં યશોવૃદ્ધિ જયોદયમ્ ।
પ્રાપ્નુયાદ્વાંછિતાનર્થાનન્તે ચ પરમં પદમ્ ।
પુનરૂચે ગણાધીશઃ સ્તોત્ર મેતજ્જપેન્નરઃ ।
ત્રિસન્ધ્યં ત્રિદિનં તસ્ય સર્વ કાર્યં ભવિષ્યતિ

યો જપેદષ્ટદિવસં શ્લોકાષ્ટકમિદં શુભમ્ ।
અષ્ટવારં ચતુર્થ્યાં તુ સોઽષ્ટસિદ્ધિમવાપ્નુયાત્

યઃ પઠેન્માસમાત્રં તુ દશવારં દિને દિને ।
સ મોચયેદ્ બન્ધનાત્તં રાજબદ્ધં ન સંશયઃ

વિદ્યાકામો લભેત્ વિદ્યાં પુત્રાર્થી પુત્રમાપ્નુયાત્ ।
વાંછિતં લભતે સર્વમેકવિંશતિ વારતઃ

યો જપેત્ પરયા ભક્ત્યા ગજાનનપરો નરઃ ।
એવમુક્ત્વા તતો દેવઃ સર્વેષામેવ પશ્યતામ્

અન્તર્દધેઽખિલાધારઃ સુમુખોઽસૌ ગજાનનઃ ।
તે ચ ચક્રુસ્તદા મૂર્તિં ગણેશસ્ય શુભાનનામ્

પ્રતિષ્ઠાપ્ય ચ તાં સ્થૂલે પ્રાસાદે રત્નનિર્મિતે ।
સુમુખેતિ ચ તસ્યાસ્તે નામ ચક્રુઃ સુવિશ્રુતમ્

સંપૂજ્ય ચ નમસ્કૃત્વા સ્વં સ્વં સ્થાનં યયુઃ સુરાઃ ।
સર્વૈ તે મુનયો લોકા સર્વકાર્યરતાસ્તદા ॥૧૫
કેચિત્તસ્યા નામ ચક્રુરેકદન્ત ઇતિ સ્ફુટમ્ ।
ગન્ધર્વૈ કિન્નરૈ રમ્યા સ્થાપિતા મૂર્તિરુત્તમા

પ્રાસાદે કાંચને શ્રેષ્ઠેઽનેકધા પરિપૂજ્ય ચ ।
કપિલેતિ ચ નામાસ્યાઃ સ્થાપયામાસુરુત્તમમ્

ગુહયકાશ્ચારણાઃ સિદ્ધા મૂર્તિમન્યા પ્રચક્રિરે ।
મહાલયે પ્રતિષ્ઠાપ્ય નેમુશ્ચ પુપુજુશ્ચ તામ્

ગજકર્ણેતિ નામાસ્યાશ્ચક્રુસ્તે તુ સ્ફુટાર્થકમ્ ।
તત્ પ્રભાવાદ્વિમાનસ્થાઃ સર્વે તે દિવમાક્રમત્

લમ્બોદરેતિ નામ્ના ચ સ્થાપિતા સર્વ માનવૈઃ ।
શ્વાપદૈરખિલૈરન્યા સ્થાપિતા મૂર્તિરુત્તમા

વિકટેતિ ચ નામ્ના તાં પુપૂજુસ્ત્તે યયુર્વનમ્।
ગિરયશ્ચ દ્રુમાશ્ચાંન્યાં મૂર્તિં સ્થાપ્ય પ્રપૂજ્ય ચ

વિઘ્નાશન ઇત્યેવં નામ કૃત્વા સ્થિતાસ્તુ કૌં।
તત્પ્રસાદશ્ચ તે ખ્યાતાઃ પર્વતાશ્ચ દ્રુમાસ્તથા

સર્વૈઃ પક્ષિગણૈર્મૂર્તિઃ સ્થાપિતા રત્નકાંચની।
ગણાધિપેતિ નામ્ના તૈઃ પૂજિતા ચ નમસ્કૃતા

સર્વૈર્વિષધરૈરેકા સ્થાપિતા ગણનાયકી ।
યસ્યા હૂતિઃ કૃતા તૈસ્તુ ધૂમકેતુરિતિ સ્ફુટા

સર્વૈર્જલાશયૈરેકા પ્રતિમા સ્થાપિતા શુભા।
ગણાધ્યક્ષેતિ નામ્ના સા પૂજિતા પરમોત્સવૈઃ

કૃમિકીટાદિનિચયૈર્વનસ્પત્યોષધીગણૈઃ ।
સ્થાપિતા પરમા મૂર્તિર્ભાલચન્દ્રેતિ વિશ્રુતા

અન્યૈઃ સચેતનૈરન્યા રત્નપ્રાસાદમધ્યગા।
વૈનાયકી મહામૂર્તિઃ પૂજિતા ભક્તિભાવતઃ

ગજાનનાખ્યયા ખ્યાતા સર્વેષાં સર્વકામદા ।
તે તે જગત્ત્રયે ખ્યાતાસ્તત્તજ્જાત્યા બભૂવિરે

સુખિનઃ સ્વસ્વકાર્યેષુ દક્ષા દેવ પ્રસાદતઃ ।
પ્રત્યેકનામકથને ન શક્તિર્મમ વર્તતે

સારં સારં પ્રગૃહ્યૈવ કૃતં નામ્ના સહસ્રકમ્ ।
તતોઽપિ સારભૂતાનિ પ્રોક્તાનિ દ્વાદશૈવ તુ

સમુદ્રમથનાદ્યદ્વદ્ રત્નાનીવ ચતુર્દશ ।
એવં સંક્ષેપતો બ્રહ્મન્ મહિમા તેઽભિવર્ણિતઃ

વિસ્તરાદ્ ગદિતું શેષા નેશો નેશોપ્યહં હરિઃ।
ઇન્દ્રાદિમશકાનાં ચ જીવાનાં યક્ષરક્ષસામ્

તત્ર કા ગણના કાર્યા મયા સત્યવતીસુત ।
તસ્માત્ સર્વેષુ કાર્યેષુ પૂજનીયો ગજાનનઃ

યો ન પૂજયતે દેવં દેવવિઘ્નવિનાશનમ્ ।
સ દુરાત્મા પરિત્યાજ્યશ્ચાંડાલ ઇવ દૂરતઃ

મુનિરુવાચ ।
અનુક્રમેણ કથય નામાનિ દ્વાદશૈવ મે ।
શ્રવણાત્ પઠનાદેષાં સર્વં નિર્વિઘ્નતામિયાત્

બ્રહ્મોવાચ ।
સુમુખશ્ચૈકદન્તશ્ચ કપિલો ગજકર્ણકઃ।
લમ્બોદરશ્ચ વિકટો વિઘ્નનાશો ગણાધિપઃ

ધૂમ્રકેતુર્ગણાધ્યક્ષો ભાલચન્દ્રો ગજાનનઃ ।
દ્વાદશૈતાનિ નામાનિ યઃ પઠેચ્છૃણુયાદપિ

વિદ્યારમ્ભે વિવાહે ચ પ્રવેશે નિર્ગમે તથા।
સઙ્ગ્રામે સંકટે ચૈવ વિઘ્નસ્તસ્ય ન જાયતે

શુક્લામ્બરધરં દેવં શશિવર્ણં ચતુર્ભુજમ્ ।
પ્રસન્નવદનં ધ્યાયેત્ સર્વવિઘ્નોપશાન્તયે

કોટિકન્યાપ્રદાનાનિ કોટિયજ્ઞં વ્રતાનિ ચ ।
તપાંસિ યાનિ સર્વાણિ તીર્થાન્યાયતનાનિ ચ

સ્વર્ણભારસહસ્રાણિ કોટિદાનાનિ યાન્યપિ ।
કૃચ્રાસરણિ તપ્તકૃચ્રા ।ણિ પરાકેન્દુવ્રતાનિ ચ

શતાંશમેષાં પુણ્યસ્ય તાનિ નામ્નાં ન યાન્તિ ચ ।
ઇમાનિ પ્રાતરુત્થાય શુચિર્ભૂત્વા સમાહિતઃ

યઃ પઠેન્માનવો ભક્ત્યા વિઘ્ના નો યાંતિ તં નરમ્ ।
સિદ્ધ્યન્તિ સર્વકાર્યાણિ મોક્ષમન્તે વ્રજત્યસૌ

તસ્ય દર્શનતો લોકા દેવાઃ પૂતા ભવન્તિ ચ ।
અતએવ મુને સર્વાઃ શાક્તાઃ શૈવાશ્ચ વૈષ્ણવાઃ

ઉક્ત્વા દ્વાદશ નામાનિ સર્વકાર્યાણિ કુર્વતે ।
ગાણેશા અપિ કુર્વન્તિ કિમત્રાપિ ચ કૌતુકમ્

ન સિદ્ધ્યન્તિ હિ કાર્યાણિ દ્વાદશાન્યતમસ્ય હ ।
ઉચ્ચારણં વિના બ્રહ્મંસ્તસ્માદેકં સમુચ્ચરેત્

દુષ્ટાનાં નાસ્તિકાનાં ચ કાર્યં યદ્યદ્ધિ સિદ્ધ્યતિ ।
તેઽપિ બીજં સમુચ્ચાર્ય મદ્ધ્યાનાદપિ કુર્વતે

એવં તે મહિમા સર્વઃ કથિતો લેશતો મુને ।
ઉપાસનાફલં નાના યથામતિ નિરૂપિતમ્

વિષ્ણૂનાં કથિતં યાવત્ તાવત્તવ નિરૂપિતમ્ ।
સોઽપિ નાન્તં જગામાસ્ય ગણેશોપાસનસ્ય હ

ગણેશનામમહિમા પૂર્ણો જ્ઞાતો ન તેન ચ ।
ભૃગુરુવાચ ।
એવં તે કથિતા રાજન્નદ્ભુતો મહિમા મયા

બ્રહ્મણા સુપ્રસન્નેન યો વ્યાસાય નિરૂપિતઃ ।
ઉપાસનાખંડમિદં વર્ણિતં નૃપતે મયા

યદિ તે શ્રવણે શ્રદ્ધા તદાન્યદપિ વર્ણને ।
ચરિતં ગણનાથસ્ય સોમકાંતાઘનાશનમ્

સૂત ઉવાચ ।
ઇતિ વઃ કથિતં નાનાકથાન્તરસમન્વિતમ્ ।
ઉપાસનં ગણેશસ્ય શૌનકાદ્યા મહર્ષયઃ

વેદવ્યાસાય મુનયે બ્રહ્મણા યત્સમીરિતમ્ ।
ભૃગુણા સોમકાન્તાય વર્ણિતં પાપનાશનમ્

શૃણુયાદ્યો ગણેશસ્ય પુરાણમિદમુત્તમમ્ ।
સ સર્વામાપદં હિત્વા ભુક્ત્વા ભોગાનનેકશઃ

પુત્રપૌત્રસમાયુક્તો જ્ઞાનવિજ્ઞાનસંયુતઃ ।
લભતે પરમાં મુક્તિં ગણેશસ્ય પ્રસાદતઃ

ન તસ્ય પુનરાવૃત્તિઃ કલ્પકોટિશતૈરપિ ।
યઃ શ્રાવયેદ્ મહાભક્ત્યા યથોક્તફલભાગ્ ભવેત્

યથાપ્તં સોમકાન્તેન શૃણ્વતા પરમાદરાત્।
ઇતિ શ્રીગણેશપુરાણ ઉપાસનાખંડે બ્રહ્મવ્યાસ ભૃગુસોમકાન્ત સંવાદે ગજાનનનામનિરૂપણં નામ દ્વિનવતિતમોઽધ્યાયઃ

(૪૦૯૩ )
॥શ્રીમદ્ગજાનનાર્પણમસ્તુ ।
॥ ઇતિ શ્રીગણેશમહાપુરાણે ઉપાસના ખણ્ડં સમાપ્તમ્ ॥