દિવ્યાવદાન · અધ્યાય 11

ઇતિ।
084.019. કિં મન્યધ્વે ભિક્ષવો યો ઽસૌ ગૃહપતિર્ગૃહપતિપત્ની ગૃહપતિપુત્રો ગૃહપતિસ્નુષા ગૃહપતિદાસો ગૃહપતિદાસી, અયમેવ મેણ્ઢકો ગૃઃપતિર્ મેણ્ઢકપત્ની મેણ્ઢકપુત્રો મેણ્ઢકસ્નુષા મેણ્ઢકદાસો મેણ્ઢકદાસી ચ।
084.021. યદેભિઃ પ્રત્યેકબુદ્ધે કારાન્ કૃત્વા પ્રણિધાનં કૃતમ્, તસ્ય કર્મણો વિપાકેન ષડ્ મહાપુણ્યા જાતાઃ, મમાન્તિકે દૃષ્ટસત્યાનિ।
084.022. અહં ચૈભિઃ પ્રત્યેકબુદ્ધકોટિશતસહસ્રેભ્યઃ પ્રતિવિશિષ્ટઃ શાસ્તા આરાગિતો ન વિરાગિતઃ।
084.023. ઇતિ હિ ભિક્ષવ એકાન્તકૃષ્ણાનાં કર્મણામેકાન્તકૃષ્ણો વિપાકઃ, એકાન્તશુક્લાનાં કર્મણામેકાન્તશુક્લઃ, વ્યતિમિશ્રાણાં વ્યતિમિશ્રઃ।
084.025. તસ્માત્તર્હિ એવં શિક્ષિતવ્યમ્, યદેકાન્તકૃષ્ણાનિ કર્માણ્યપાસ્ય વ્યતિમિશ્રાણિ ચ, એકાન્તશુક્લેષ્વેવ કર્મસ્વાભોગઃ કરણીયઃ।
084.026. ઇત્યેવં વો ભિક્ષવઃ શિક્ષિતવ્યમ્॥
084.027. ઇદમવોચદ્ભગવાન્।
084.027. આત્તમનસસ્તે ભિક્ષવો ભગવતો ભાષિતમભ્યનન્દન્॥
084.028. ઇતિ શ્રીદિવ્યાવદાને મેણ્ઢકાવદાનં દશમમ્॥
********** અવદાન 11 **********
085.001. દિવ્11 અશોકવર્નાવદાનમ્।
085.002. એવં મયા શ્રુતમ્।
085.002. એકસ્મિન્ સમયે ભગવાન્ સત્કૃતો ગુરુકૃતો માનિતઃ પૂજિતો રાજભી રાજમાત્રૈર્ધનિભિઃ પૌરૈઃ શ્રેષ્ઠિભિઃ સાર્થવાહૈર્દેવૈર્ નાગૈરસુરૈર્યક્ષૈર્ગૌડૈઃ કિન્નરૈર્મહોરગૈરિતિ દેવનાગયક્ષાસુરગરુડકિન્નરમહોરગાભ્યર્ચિતો બુદ્ધો ભગવાઞ્ જ્ઞાતો મહાપુણ્યો લાભી ચીવરપિણ્ડપાતશયનાસનગ્લાનપ્રત્યયભૈષજ્યપરિષ્કારાણાં સશ્રાવકસંઘો વૈશાલ્યાં વિહરતિ સ્મ મર્કટસહસ્રદતીરે કૂટાગારશાલાયામ્।
085.006. તેન ખલુ સમયેન વૈશાલિકા લિચ્છવય ઇદમેવમ્રૂપં ક્રિયાકારમકાર્ષુહ્--પઞ્ચદશ્યાં ભવન્તઃ પક્ષસ્ય અષ્ટમ્યાઅં ચતુર્દશ્યાં ચ પ્રાણિનો હન્તવ્યા યત્કારણમેયુર્મનુષ્યા માંસમન્વેષન્ત ઇતિ।
085.008. તેન ખલુ સમયેન અન્યતમો ગોઘાતકો મહાન્તં વૃષભમાદાય નગરાન્નિષ્ક્રમતિ પ્રઘાતયિતુમ્।
085.009. તમેનં મહાજનકાયઃ પૃષ્ઠતઃ પૃષ્ઠતઃ સમનુબદ્ધો માંસાર્થી કથયતિ--શીઘ્રમેનં વૃષં ઘાતય, વયં માંસેનાર્થિન ઇતિ।
085.010. સ કથયતિ--એવં કરિષ્યામિ, કિં તુ મુહૂર્તમુદીક્ષધ્વમિતિ।
085.011. તતો વૃષ ઈદૃશમનાર્યં વચો દુરુક્તં શ્રુત્વા ભીતસ્ત્રસ્તઃ સંવિગ્નહ્ આહૃષ્ટરોમકૂપ ઇતશ્ચામુતશ્ચ સંભ્રાન્તો નિરીક્ષતે, ચિન્તયતિ ચ--કો માં કૃચ્છ્રસંકટસમ્બાધપ્રાપ્તમત્રાણમશરણમિષ્ટેન જીવિતેનાચ્છાદયેદિતિ।
085.013. સ ચૈવં વિહ્વલવદનસ્ત્રાણાન્વેષી તિષ્ઠતિ।
085.014. ભગવાંશ્ચ પૂર્વાહ્ણે નિવાસ્ય પાત્રચીવરમાદાય ભિક્ષુગણપરિવૃતો ભિક્ષુસંઘપુરસ્કૃતો વૈશાલીં પિણ્ડાય પ્રાવિશત્।
085.015. અથાસૌ દદર્શ બુદ્ધં ભગવન્તં દ્વાત્રિંશતા મહાપુરુષલક્ષણૈઃ સમલંકૃતમશીત્યાનુવ્યઞ્જનૈર્વિરાજિતગાત્રં વ્યામપ્રભાલંકૃતં સૂર્યસહસ્રાતિરેકપ્રભં જઙ્ગમમિવ રત્નપર્વતં સમન્તતો ભદ્રકમમ્।
085.017. સહદર્શનૈશ્ચાસ્ય ભગવતો ઽન્તિકે ચિત્તમભિપ્રસન્નમ્।
085.017. પ્રસન્નચિત્તશ્ચ સંલક્ષયતિ--પ્રાસાદિકો ઽયં સત્ત્વવિશેષઃ।
085.018. શક્ષ્યત્યેષો મમ પ્રાણપરિત્રાણં કર્તુમ્।
085.019. યન્ન્વહમેનમુપસંક્રમેયમિતિ।
085.019. અથ સ વૃષો ભગવત્યવેક્ષાવાન્ પ્રતિબદ્ધચિત્તહ્ એષો મે શરણમિતિ સહસૈવ તાનિ દૃઢાનિ વરત્રકાણિ બન્ધનાનિ ચ્છિત્ત્વા પ્રધાવન્ યેન ભગવાંસ્તેનોપસંક્રાન્તઃ।
085.021. ઉપસંક્રમ્યોભાભ્યાં જાનુભ્યાં ભગવતઃ પાદયોર્ નિપત્ય પાદૌ જિહ્વયા નિલેઢુમારબ્ધઃ।
085.022. સ ચાસ્ય રૌદ્રકર્મા ગોઘાતકઃ પૃષ્ઠતઃ પૃષ્ઠતઃ સમનુબદ્ધ એવ શસ્ત્રવ્યગ્રહસ્તઃ।
085.022. તતો ભગવાંસ્તં રૌદ્રકર્માણં ગોઘાતકમિદમવોચત્--કુરુષ્વ ત્વં ભોઃ પુરુષ અનેન ગોવૃષભેણ સાર્ધં સાત્મ્યમ્।
085.024. જીવિતેનાચ્છાદયેતિ।
085.024. સ કથયતિ--નાહં ભદન્ત પ્રભવાભ્યેનં જીવિતેનાચ્છાદયિતુમ્।
085.024. તત્કસ્ય હેતોહ્? મયા એષ બહુના મૂલ્યેન ક્રીતઃ।
085.025. પુત્રદારં ચ મે બહુ પોષિતવ્યમિતિ।
085.025. ભગવાનાહ---યદિ મૂલ્યં દીયતે, પ્રતિમુઞ્ચસીતિ?।
085.026. સ કથયતિ--પ્રતિમોક્ષ્યામિ ભગવન્નિતિ।
085.026. અથ ભગવામ્લ્લૌકિકચિત્તમુત્પાદયતિ--અહો બત શક્રો દેવેન્દ્રસ્ત્રીણિ કાર્ષાપણસહસ્રાણ્યાદાયાગચ્છેદિતિ।
085.028. સહચિત્તોત્પાદાદ્ભગવતઃ શક્રો દેવેન્દ્રઃ કાર્ષાપણસહસ્રત્રયમાદાય ભગવતઃ પુરસ્તાદસ્થાત્।
085.029. અથ ભગવાઞ્ શક્રં દેવેન્દ્રમિદમવોચત્--અનુપ્રયચ્છ કૌશિક અસ્ય ગોઘાતકસ્ય ત્રિગુણં મૂલ્યમ્।
085.030. અદાચ્છક્રો દેવેન્દ્રસ્તસ્ય ગોઘાતકસ્ય કાર્ષાપણત્રયસહસ્રં વૃષમૂલ્યમ્।
085.030. અથ ગોઘાતકઃ કાર્ષાપણસહસ્રયં વૃષમૂલ્યં ગૃહીત્વા હૃષ્ટસ્તુષ્ટઃ પ્રમુદિતો ભગવતઃ પાદૌ શિરસા વન્દિત્વા તં ગોવૃષં બન્ધનાન્મુક્ત્વા પ્રક્રાન્તઃ।
085.032. શક્રો દેવેન્દ્રો ભગવતઃ પાદૌ શિરસા વન્દિત્વા તત્રૈવાન્તર્હિતઃ॥
086.001. <86>અથ ગોવૃષો ગતપ્રત્યાગતપ્રાણો ભૂયસ્યા માત્રયા ભગવત્યભિપ્રસન્નો ભગવન્તં ત્રિઃ પ્રદક્ષિણીકૃત્ય પૃષ્ઠતઃ પૃષ્ઠતઃ સમનુબદ્ધો ભગવતો મુખં વ્યવલોકયમાનો ઽસ્થાત્।
086.002. અથ ભગવાન્ સ્મિતમકાર્ષીત્।
086.003. ધર્મતા ખલુ યસ્મિન્ સમયે બુદ્ધા ભગવન્તઃ સ્મિતં પ્રાવિષ્કુર્વન્તિ, તસ્મિન્ સમયે નીલપીતલોહિતાવદાતાઃ પુષ્પપરાગપદ્મરાગવજ્રવૈડૂર્યમુઅસારગલ્વાર્કલોહિતકાદક્ષિણાવર્તશઙ્ખશિલાપ્રવાલજાતરૂપરજતવર્ણા અર્ચિષો મુખાન્નિશ્ચાર્ય કાશ્ચિદધસ્તાદ્ગચ્છન્તિ, કાશ્ચિદુપરિષ્ટાદ્ગચ્છન્તિ।
086.006. યા અધસ્તાદ્ગચ્છન્તિ, તાઃ સંજીવં કાલસૂત્રં રૌરવં મહારૌરવં તપનં પ્રતાપનમવીચિમર્બુદં નિરર્બુદમટટં હહવં હુહુવમુત્પલં પદ્મં મહાપદ્મપર્યન્તાન્ નરકાન્ ગત્વા યે ઉષ્ણનરકાસ્તેષુ શીતીભૂત્વા નિપતન્તિ, યે શીતનરકાસ્તેષૂષ્ણીભૂત્વા નિપતન્તિ।
086.008. તેન તેષાં સત્ત્વાનાં કારણાવિશેષાઃ પ્રતિપ્રસ્રભ્યન્તે।
086.009. તેષામેવં ભવતિ--કિં નુ વયં ભવન્ત ઇતશ્ચ્યુતાઃ, આહોસ્વિદન્યત્રોપપન્ના ઇતિ।
086.009. તેષાં પ્રસાદસંજનનાર્થં ભગવાન્ નિર્મિતં વિસર્જયતિ।
086.010. તેષાં નિર્મિતં દૃષ્ટ્વા એવં ભવતિ--ન હ્યેવ વયં ભવન્ત ઇતશ્ચ્યુતાઃ, નાપ્યન્યત્રોપપન્ના ઇતિ।
086.011. અપિ ત્વયમપૂર્વદર્શનઃ સત્ત્વઃ, અસ્યાનુભાવેનાસ્માકં કારણાવિશેષાઃ પ્રતિપ્રસ્રબ્ધા ઇતિ।
086.012. તે નિર્મિતે ચિત્તમભિપ્રસાદ્ય તન્નરકવેદનીયં કર્મ ક્ષપયિત્વા દેવમનુષ્યેષુ પ્રતિસંધિર્ ગૃહ્ણન્તિ યત્ર સત્યાનાં ભાજનભૂતા ભવન્તિ।
086.013. યા ઉપરિષ્ટાદ્ગચ્છન્તિ, તાશ્ચાતુર્મહારાજકાયિકાન્ દેવાંસ્ત્રાયસ્ત્રિંશાન્ યામાંસ્તુષિતાન્ નિર્માણરતીન્ પરનિર્મિતવશવર્તિનો બ્રહ્મકાયિકાન્ બ્રહ્મપુરોહિતાન્ મહાબ્રહ્મણઃ પરીત્તાભાનપ્રમાણાભાનાભાસ્વરાન્ પરીત્તશુભાનપ્રમાણશુભાઞ્ શુભકૃત્સ્નાનનભ્રકાન્ પુણ્યપ્રસવાન્ બૃહત્ફલાનબૃહાનતપાન્ સુદૃશાન્ સુદર્શનાનકનિષ્ઠપર્યન્તાન્ દેવાન્ ગત્વા અનિત્યં દુઃખં શૂન્યમનાત્મેત્યુદ્ધોષયન્તિ।

086.017. ગાથાદ્વયં ભાષન્તે--
086.018. આરભધ્વં નિષ્ક્રામત યુજ્યધ્વં બુદ્ધશાસને।
086.019. ધુનીત મૃત્યુનઃ સૈન્યં નડાગારમિવ કુઞ્જરઃ

086.020. યો હ્યસ્મિન્ ધર્મવિનયે અપ્રમત્તશ્ચરિષ્યતિ।
086.021. પ્રહાય જાતિસંસારં દુઃખસ્યાન્તં કરિષ્યતિ

ઇતિ।
086.022. અથ તા અર્ચિષસ્ત્રિસાહસ્રમહાસાહસ્રં લોકધાતુમન્વાહિણ્ડ્ય ભગવન્તમેવ પૃષ્ઠતઃ પૃષ્ઠતઃ સમનુગચ્છન્તિ।
086.023. તદ્યદિ ભગવાનતીતં કર્મ વ્યાકર્તુકામો ભવતિ, ભગવતઃ પૃષ્ઠતો ઽન્તર્ધીયન્તે।
086.024. અનાગતં વ્યાકર્તુકામો ભવતિ, પુરસ્તાદન્તર્ધીયન્તે।
086.024. નરકોપપત્તિં વ્યાકર્તુકામો ભવતિ, પાદતલે-ન્તર્ધીયન્તે।
086.025. તિર્યગુપપત્તિં વ્યાકર્તુકામો ભવતિ, પાર્ષ્ણ્યામન્તર્ધીયન્તે।
086.025. પ્રેતોપપત્તિં વ્યાકર્તુકામો ભવતિ, પાદાઙ્ગુષ્ઠે ઽન્તર્ધીયન્તે।
086.026. મનુષ્યોપપત્તિં વ્યાકર્તુકામો ભવતિ, જાનુનોરન્તર્ધીયન્તે।
086.027. બલચક્રવર્તિરાજ્યં વ્યાકર્તુકામો ભવતિ, વામે કરતલે ઽન્તર્ધીયન્તે।
086.027. ચક્રવર્તિરાજ્યં વ્યાકર્તુકામો ભવતિ, દક્ષિણે કરતલે ઽન્તર્ધીયન્તે।
086.028. દેવોપપત્તિં વ્યાકર્તુકામો ભવતિ, નાભ્યામન્તર્ધીયન્તે।
086.029. શ્રાવકબોધિં વ્યાકર્તુકામો ભવતિ, આસ્યે ઽન્તર્ધીયન્તે।
086.029. પ્રત્યેકાં બોધિં વ્યાકર્તુકામો ભવતિ, ઊર્ણાયામન્તર્ધીયન્તે।
086.030. અનુત્તરાં સમ્યક્સમ્બોધિં વ્યાકર્તુકામો ભવતિ, ઉષ્ણીષે ઽન્તર્ધીયન્તે।
086.031. અથ તા અર્ચિષો ભગવન્તં ત્રિઃ પ્રદક્ષિણીકૃત્ય ભગવત ઊર્ણાયામન્તર્હિતાઃ॥
086.032. અથાયુષ્માનાનન્દઃ કૃતકરપુટો ભગવન્તં પપ્રચ્છ--
086.033. નાનાવિધો રઙ્ગસહસ્રચિત્રો વક્ત્રાન્તરાન્નિષ્કસિતઃ કલાપઃ।
087.001. <87>અવભાસિતા યેન દિશઃ સમન્તાદ્દિવાકરેણોદયતા યથૈવ

087.003. ગાથાં ચ ભાષિતે--
087.004. વિગતોદ્ભવા દૈન્યમદપ્રહીણા બુદ્ધા જગત્યુત્તમહેતુભૂતાઃ।
087.006. નાકારણં શઙ્ખમૃણાલગૌરં સ્મિતમુપદર્શયન્તિ જિના જિતારયઃ

087.008. તત્કાલં સ્વયમધિગમ્ય ધીર બુદ્ધ્યા શ્રોતૃર્ણાં શ્રમણ જિનેન્દ્ર કાઙ્ક્ષિતાનામ્।
087.010. ધીરાભિર્મુનિવૃષ વાગ્ભિરુત્તમાભિરુત્પન્નં વ્યપનય સંશયં શુભાભિઃ

087.012. નાકસ્માલ્લવણજલાદ્રિરાજધૈર્યાઃ સંબુદ્ધાઃ સ્મિતમુપદર્શયન્તિ નાથાઃ।
087.014. યસ્યાર્થે સ્મિતમુપદર્શયન્તિ ધીરા સ્તં શ્રોતું સમભિલષન્તિ તે જનૌઘાઃ

ઇતિ॥
087.016. ભગવાનાહ--એવમેતદાનન્દ, એવમેતત્।
087.016. નાહેત્વપ્રત્યયમાનન્દ તથાગતા અર્હન્તઃ સમ્યક્સમ્બુદ્ધાઃ સ્મિતં પ્રાવિષ્કુર્વન્તિ।
087.017. દૃષ્ટસ્તે આનન્દ અયં ગોવૃષહ્? દૃષ્ટો ભદન્ત।
087.017. એષ આનન્દ ગોવૃષસ્તથાગતસ્યાન્તિકે પ્રસન્નચિત્તઃ સપ્તમે દિવસે કાલં કૃત્વા ચાત્રુમહારાજિકેષુ દેવેષૂપપત્સ્યતે।
087.019. વૈશ્રવણસ્ય મહારાજસ્ય પુત્રો ભવિષ્યતિ।
087.019. તતશ્ચ્યુત્વા ત્રાયસ્ત્રિંશેષુ દેવેષૂપપત્સ્યતે।
087.020. શક્રસ્ય દેવેન્દ્રસ્ય પુત્રો ભવિષ્યતિ।
087.020. તતશ્ચ્યુત્વા યામેષુ દેવેષૂપપત્સ્યતે।
087.020. યામસ્ય દેવસ્ય પુત્રો ભવિષ્યતિ।
087.021. તતશ્ચ્યુત્વા તુષિતેષુ દેવેષૂપપત્સ્યતે।
087.021. સ તુષિતસ્ય દેવસ્ય પુત્રો ભવિષ્યતિ।
087.022. તતશ્ચ્યુત્વા નિર્માણરતિષુ દેવેષૂપપત્સ્યતે।
087.022. સુનિર્મિતસ્ય દેવપુત્રસ્ય પુત્રો ભવિષ્યતિ।
087.022. તતશ્ચ્યુત્વા પરિનિર્મિતવશવર્તિષુ દેવેષૂપપત્સ્યતે।
087.023. વશવરતિનો દેવપુત્રસ્ય પુત્રો ભવિષ્યતિ।
087.023. તદનયા સંતત્યા નવનવતિકલ્પસહસ્રાણિ વિનિપાતં ન ગમિષ્યતિ।
087.024. તતઃ કામાવચરેષુ દેવેષુ દિવ્યં સુખમનુભૂય પશ્ચિમે ભવે પશ્ચિમે નિકેતે સમુચ્છ્રયે પશ્ચિમે આત્મભાવપ્રતિલમ્ભે મનુષ્યત્વં પ્રતિલભ્ય રાજા ભવિષ્યતિ અશોકવર્ણો નામ ચક્રવર્તી ચતુરર્ણવાન્તવિજેતા ધાર્મિકો ધર્મરાજઃ સપ્તરત્નસમન્વાગતઃ।
087.027. તસ્યેમાન્યેવમ્રૂપાણિ સપ્ત રત્નાનિ ભવિષ્યન્તિ।
087.027. તદ્યથા--ચક્રરત્નં હસ્તિરત્નમશ્વરત્નં મણિરત્નં સ્ત્રીરત્નં ગૃહપતિરત્નં પરિણાયકરત્નમેવ સપ્તમમ્।
087.028. પૂર્ણં ચાસ્ય ભવિષ્યતિ સહસ્રં પુત્રાણાં શૂરાણાં વીરાણાં વરાઙ્ગરૂપિણા પરસૈન્યપ્રમર્દકાનામ્।
087.029. ઇમામેવ સમુદ્રપર્યન્તાં મહાપૃથિવીમખિલામકણ્ટકામનુત્પીડામદણ્ડેનાશસ્ત્રેણ ધર્મ્યેણ સમયેનાભિનિર્જિત્ય અધ્યાવત્સ્યતિ।
087.031. સો ઽપરેણ સમયેન દાનાનિ દત્વા ચક્રવર્તિરાજ્યમપહાય કેશશ્મશ્રૂણ્યવતાર્ય કાષાયાણિ વસ્ત્રાણિ ...ષમ્યગેવ શ્રદ્ધયા અગારાદનગારિકાં પ્રવ્રજ્ય પ્રત્યેકાં બોધિં સાક્ષાત્કરિષ્યતિ, અશોકવર્ણો નામ પ્રત્યેકબુદ્ધો ભવિષ્યતિ।
087.033. અથાયુષ્માનાનન્દઃ કૃતકરપુટો ભગવન્તં પપ્રચ્છ--કિં ભદન્ત અનેન ગોવૃષેણ કર્મ કૃતમ્ યેન તિર્યગ્યોનાવુપપન્નઃ, કિં કર્મ કૃતમ્ યેન દિવ્યમાનુષસુખમનુભૂય <88>પ્રત્યેકાં બોધિમધિગમિષ્યતિ? ભગવાનાહ--અનેનૈવ આનન્દ ગોવૃષેણ કર્માણિ કૃતાન્યુપચિતાનિ લબ્ધસમ્ભારાણિ પરિણતપ્રત્યયાનિ ઓઘવત્પ્રત્યુપસ્થિતાન્યવશ્યમ્ભાવીનિ।
088.002. ગોવૃષેણ કર્માણિ કૃતાન્યુપચિતાનિ।
088.003. કો ઽન્યઃ પ્રત્યનુભવિષ્યતિ? ન હ્યાનન્દ કર્માણિ કૃતાન્યુપચિતાનિ બાહ્યે પૃથિવીધાતૌ વિપચ્યન્તે, નાબ્ધાતૌ, ન તેજોધાતૌ, ન વાયુધાતૌ, અપિ તૂપાત્તેષ્વેવ સ્કન્ધધાત્વાયતનેષુ કર્માણિ કૃતાનિ વિપચ્યન્તે શુભાશુભાનિ ચ।
088.006. ન પ્રણશ્યન્તિ કર્માણિ અપિ કલ્પશતૈરપિ।
088.007. સામગ્રીં પ્રાપ્ય કાલં ચ ફલન્તિ ખલુ દેહિનામ્

088.008. ભૂતપૂર્વમાનન્દ અતીતે ઽધ્વનિ એકનવતે કલ્પે વિપશ્યી નામ સમ્યક્સમ્બુદ્ધો લોક ઉદપાદિ વિદ્યાચરણસમ્પન્નઃ સુગતો લોકવિદનુત્તરઃ પુરુષદમ્યસારથિઃ શાસ્તા દેવમનુષ્યાણાં બુદ્ધો ભગવાન્।
088.010. સ બન્ધુમતીં રાજધાનીમુપનિશ્રિત્ય વિહરતિ, અન્યતમસ્મિન્ વનષણ્ડે।
088.010. તસ્ય નાતિદૂરે ષષ્ટિભિક્ષવઃ પ્રતિવસન્ત્યારણ્યકાઃ પિણ્ડપાતિકાઃ।
088.011. સર્વે ચ વીતરાગા વિગતદ્વેષા વિગતમોહા યાવત્ પઞ્ચમાત્રાણિ ધૂર્તકશતાનિ તેન તેનાહિણ્ડ્યમાનાનિ તં પ્રદેશમનુપ્રાપ્તાનિ।
088.013. તેષામેતદભવત્--એતે હિ પ્રવ્રજિતા મહાત્માનહ્ ઈદૃશેષુ સ્થાનેષ્વભિરમન્તે।
088.013. યદ્યેષાં જીવિતોપચ્છેદં ન કરિષ્યામઃ, ન ભૂય એતસ્મિન્ પ્રદેશે સ્વસ્થૈર્વિહર્તવ્યં ભવિષ્યતિ।
088.014. યદ્યપ્યેતે મહાત્માનઃ સર્વસત્ત્વહિતોદયપ્રવૃત્તા ન પરેષામારોચયિષ્યન્તિ, તથાપ્યેષાં પ્રધાનપુરુષા ઉપસંક્રમિષ્યન્તિ।
088.016. તે ઽસ્માકં રાજ્ઞઃ સમર્પયિષ્યન્તિ।
088.016. તત્રાસ્માભિશ્ચારકાવરુદ્ધૈર્મર્તવ્યં ભવિષ્યતિ।
088.017. કથમત્ર પ્રતિપત્તવ્યમિતિ? એકસ્તત્રૈવ નિર્ઘૃણહૃદયસ્ત્યક્તપરલોકઃ।
088.017. સ કથયતિ--અઘાતયિત્વા એતાન્ કુતઃ ક્ષેમ ઇતિ? તૈસ્તે જીવિતાદ્વ્યપરોપિતાઃ।
088.018. તે ચૈતત્કર્મ કૃત્વા પાપકમકુશલમેકનવતિકલ્પાનપાયેષૂપપન્નાઃ।
088.019. યદ્ભૂયસા તુ નરકેષુ તિર્યગ્યોનૌ ઉપપન્નાશ્ચ સન્તો નિત્યં શસ્ત્રેણ પ્રઘાતિતાઃ।
088.020. તત્ર યો ઽસૌ ચૌરસ્તેષાં સમાદાપકઃ, સ એવાયં ગોવૃષઃ।
088.020. તસ્ય કર્મણો વિપાકેન ઇયન્તં કાલં ન કદાચિત્ સુગતૌ ઉપપન્નઃ।
088.021. યત્પુનરિદાનીં મમાન્તિકે ચિત્તં પ્રસાદિતમ્, તસ્ય કર્મણો વિપાકેન દિવ્યં માનુષં સુખમનુભૂય પ્રત્યેકાં બોધિમધિગમિષ્યતિ।
088.023. એવં હિ આનન્દ તથાગતાનાં ચિત્તપ્રસાદો ઽપ્યચિન્ત્યવિપાકઃ, કિં પુનઃ પ્રણિધાનમ્।
088.024. તસ્માત્તર્હિ આનન્દ એવં શિક્ષિતવ્યમ્ યત્સ્તોકસ્તોકં મુહૂર્તમુહૂર્તમન્તતો ઽચ્છટાસંઘાતમાત્રમપિ તથાગતમાકારતઃ સમનુસ્મરિષ્યામીત્યેવં તે આનન્દ શિક્ષિતવ્યમ્॥
088.026. અથાયુષ્માન્ આનન્દો ભગવતો ભાષિતમભ્યાનન્દ્યાનુમોદ્ય ભિક્ષૂણાં પુરસ્તાદ્ગાથા ભાષતે--
088.027. અહો નાથસ્ય કારુણ્યં સર્વજ્ઞસ્ય હિતૈષિણઃ।
088.028. સુકૃતેનૈવ વાત્સલ્યમ્ યસ્યેદૃશમહોદ્ભુતમ્

088.029. આપન્નો હિ પરં કૃચ્છ્રં ગોવૃષો યેન મોચિતઃ।
088.030. વ્યાકૃતશ્ચ ભવે દિવ્યે પ્રત્યેકશ્ચ જિનો હ્યસૌ