Dharmasamuccaya · અધ્યાય 28

॥ ઇતિ પ્રજ્ઞાવર્ગઃ સપ્તવિંશઃ ॥
(28) નિર્વાણવર્ગઃ
ક્લેશક્ષય એવ નિર્વાણમાર્ગઃ
ક્લેશક્ષયાત્ પરં સૌખ્યં કથયન્તિ મનીષિણઃ ।
એષ નિર્વાણગો માર્ગઃ કથિતસ્તત્ત્વદર્શકૈઃ

તત્પદં શાશ્વતં જુષ્ટં કથયન્તિ તથાગતાઃ ।
યત્ર જન્મ ન મૃત્યુર્ન વિદ્યતે દુઃખસમ્ભવઃ

વિભૂતસ્યાપ્રમત્તસ્ય શાન્તસ્ય વનચારિણઃ ।
અલોલુપસ્ય વીરસ્ય નિર્વાણસ્ય વિભૂતયઃ

વિષયેષ્વપ્રમત્તો નિર્વાણં નાતિચિરં પ્રાપ્નોતિ
મિત્રામિત્રપ્રહીણસ્ય ભવરાગવિવર્જિનઃ ।
વિષયેષ્વપ્રમત્તસ્ય નિર્વાણં નાતિદૂરતઃ

શુભકર્ત્તૃ નિર્વાણં પ્રાપ્નોતિ
શુભકાર્યેષુ સક્તસ્ય મૈત્રીકારુણ્યભાવિનઃ ।
સંસારભયભીતસ્ય નિર્વાણં નાતિદૂરતઃ

કૌસીદ્યવિરહિતઃ ત્વરિતં નિર્વાણં યાતિ
ક્લેશક્ષયવિધિજ્ઞસ્ય નૈરાત્મ્યસ્યાપિ તસ્ય ચ ।
કૌસીદ્યાચ્ચૈવ મુક્તસ્ય નિર્વાણં નાતિદૂરતઃ

વશ્યેન્દ્રિયસ્ય શાન્તસ્ય નિર્વાણં સમીપતરમ્
ચતુઃસત્યવિધિજ્ઞસ્ય ત્રિદોષવધસેવિનઃ ।
વશ્યેન્દ્રિયસ્ય શાન્તસ્ય નિર્વાણં નાતિદૂરતઃ

સુખદુઃખપાશૈર્મુક્તો મુનિઃ પારગ ઉચ્યતે
સુખદુઃખમયૈઃ પાશૈર્યસ્ય ચેતો ન હન્યતે ।
સ દોષભયનિર્મુક્તઃ પારગો મુનિરુચ્યતે

શુભાન્વેષી નિર્વાણમધિગચ્છતિ
પુરુષો ઽપાયભીરુશ્ચ પ્રમાદબલવર્જકઃ ।
શુભકારી શુભાન્વેષી નિર્વાણમધિગચ્છતિ