દેવીકાલોત્તરાગમ · શ્લોક 41-60

સર્વાલમ્બનશૂન્યં ચ ધારયિત્વા મનો હૃદિ
યજ્જ્ઞાનં જાયતે સ્પષ્ટં તદભ્યાસપરો ભવેત્ ॥

યે ધ્યાયન્તિ પરં શૂન્યં નિષ્કલં નિરવસ્થિતમ્
તે યાન્તિ પરમં સ્થાનં જન્મમૃત્યુવિવર્જિતમ્ ॥

દેવા દેવ્યસ્તથા ચાન્યે ધર્માધર્મૌ ચ તત્ફલમ્
આશ્રયાશ્રયિવિજ્ઞાનં સંસારસ્ય ચ બન્ધનમ્ ॥

આશ્રયો દ્વન્દ્વમિત્યુક્તં દ્વન્દ્વત્યાગાત્ પરોદયઃ
જીવન્મુક્તસ્તદા યોગી દેહત્યાગાદ્ વિમુચ્યતે ॥

વૈરાગ્યેણ વપુસ્ત્યાગો ન વૈ કાર્યો મનીષિણા
આરમ્ભતઃ ક્રિયાનાશે સ્વયમેવ વિપત્સ્યતે ॥

હૃત્સરોજે હ્યહંરૂપા યા ચિતિર્નિર્મલાચલા
અહઙ્કારપરિત્યાગાત્ સા ચિતિર્મોક્ષદાયિની ॥

સર્વોપાધિવિનિર્મુક્તં ચિદ્રૂપં યન્નિરન્તરમ્
તચ્છિવો ઽહમિતિ ધ્યાત્વા સર્વાસક્તિં વિસર્જયેત્ ॥

દેશજાત્યાદિસમ્બદ્ધાન્ વર્ણાશ્રમસમન્વિતાન્
ભાવાનેતાન્ પરિત્યજ્ય સ્વભાવં ભાવયેદ્બુધઃ ॥

અહમેકો ન મે કશ્ચિન્ નાહમન્યસ્ય કસ્યચિત્
ન તં પશ્યામિ યસ્યાહં તં ન પશ્યામિ યો મમ ॥

અહમેવ પરં બ્રહ્મ જગન્નાથો મહેશ્વરઃ
ઇતિ સ્યાન્નિશ્ચિતો મુક્તો બદ્ધઃ સ્યાદન્યથા પુમાન્ ॥

અશરીરં યદાત્માનં પશ્યતિ જ્ઞાનચક્ષુષા
તદા ભવતિ શાન્તાત્મા સર્વતો વિગતસ્પૃહઃ ॥

યો ઽસૌ સર્વેષુ શાસ્ત્રેષુ પઠ્યતે હ્યજ ઈશ્વરઃ
અકાયો નિર્ગુણો હ્યાત્મા સો ઽહમસ્મિ ન સંશયઃ ॥

વિજ્ઞાપ્તિમાત્રો હિ સદા વિશુદ્ધઃ સર્વત્ર યસ્માત્સતતં વિમુક્તઃ
નાદેયહેયો હ્યહમપ્રતર્ક્યસ્ તસ્માત્સદા બ્રહ્મમયો વિશોકઃ ॥

આમસ્તકં પાદતલાવસાનં સાન્તર્બહિશ્ચર્મપટાવનદ્ધમ્
તત્કૃત્સ્નમેવામૃતરૂપમન્યચ્ ચિદ્રૂપમાત્માનમનન્યસિદ્ધિમ્ ॥

ઈશો ઽહમેવાસ્ય ચરાચરસ્ય પિતા ચ માતા ચ પિતામહશ્ચ
ધ્યાનં સમાસ્થાય પદં ચતુર્થં ધ્યાયન્તિ મામેવ વિમુક્તિકામાઃ ॥

બ્રહ્માદિભિર્દેવમનુષ્યનાગૈર્ ગન્ધર્વયક્ષાપ્સરસાં ગણૈશ્ચ
યજ્ઞૈરનેકૈરહમેવ પૂજ્યો મામેવ સર્વે પ્રતિપૂજયન્તિ ॥

તપોભિરુગ્રૈર્વિવિધૈશ્ચ દાનૈર્ મામેવ સર્વે પ્રતિપૂજયન્તિ
ભૂતાનિ ચાહં સ્થિરજઙ્ગમાનિ યાવન્તિ ચાન્યાન્યહમેવ તાનિ ॥

ન સ્થૂલસૂક્ષ્મો ન ચ શૂન્યરૂપો જ્ઞાનૈકરૂપો જગદેકબન્ધુઃ
નિરન્તરો નિર્મલ ઈશ્વરો ઽહં સ્વપ્નાદ્યવસ્થાચ્યુતિનિષ્પ્રપઞ્ચઃ ॥

અનાદિવિજ્ઞાનમજં પુરાણં ગુહાશયં નિષ્કલમપ્રપઞ્ચમ્
નિરઞ્જનં નિષ્પ્રતિમં નિરીશમ્ અદૃશ્યમગ્રાહ્યમચિન્ત્યરૂપમ્ ॥

સનાતનં બ્રહ્મ નિરન્તરં યત્ પદે પદે સો ઽહમિતિ પ્રપશ્યેત્
યો ભાવતસ્તિષ્ઠતિ નિષ્પ્રકમ્પઃ સ બ્રહ્મભૂતો ઽમૃતતામુપૈતિ ॥