દેવીકાલોત્તરાગમ · શ્લોક 61-80

જ્ઞાનમેવં વરારોહે કથિતં મોક્ષસિદ્ધયે
આચારં કથ્યમાનં તુ સામ્પ્રતં શૃણુ તં મયા ॥

ન સ્નાનં ન જપઃ પૂજા હોમો નૈવ ચ સાધનમ્
અગ્નિકાર્યાદિકાર્યં ચ નૈતસ્યાસ્તિ મહેશ્વરિ ॥

નિયમો ઽપિ ન તસ્યાસ્તિ ક્ષેત્રપીઠે ચ સેવનમ્
નાર્ચનં પિતૃકાર્યાદિ તીર્થયાત્રા વ્રતાનિ ચ ॥

ધર્માધર્મફલં નાસ્તિ ન તિથિર્લૌકિકક્રિયા
સન્ત્યજેત્સર્વકર્માણિ લોકાચારં ચ સર્વશઃ ॥

સમયાચારનિઃશેષાન્ કૃત્યજાતં તુ બન્ધનમ્
સંકલ્પં ચ વિકલ્પં ચ યે ચાન્યે કુલધર્મિકાઃ ॥

સિદ્ધીશ્ચ વિવિધાકારાઃ પાતાલાદિ રસાયનમ્
પ્રત્યક્ષેણાપિ લભ્યેરન્ નૈવ ગૃહ્ણીત સાધકઃ ॥

સર્વે તે પશુબન્ધાઃ સ્યુર્ અધોમાર્ગપ્રદાયકાઃ
એતૈર્નાસ્તિ પરા મુક્તિશ્ ચિદ્રૂપં વ્યાપકં વિના ॥

યેન કેન વિશેષેણ સર્વાવસ્થો ઽપિ યોગધૃક્
ક્ષેત્રપીઠે ચ સન્દેહાદ્ વર્જયેદ્યદિ કૌતુકમ્ ॥

કૃમિકીટપતઙ્ગાશ્ચ તથા દેવિ વનસ્પતીન્
ન નાશયેદ્ બુધો જીવાન્ પરમાર્થમતિર્યતઃ ॥

ન મૂલોત્પાટનં કુર્યાત્ પત્ત્રચ્છેદં વિવર્જયેત્
ભૂતપીડાં ન કુર્વીત પુષ્પાણાં ચ નિકૃન્તનમ્ ॥

સ્વયંપતિતપુષ્પૈસ્તુ કર્તવ્યં શિવપૂજનમ્
મારણોચ્ચાટનાદીનિ વિદ્વેષસ્તમ્ભને તથા ॥

જ્વરભૂતગ્રહાવેશ વશ્યાકર્ષણમોહનમ્
ન કુર્યાત્ ક્ષુદ્રકર્માણિ કાષ્ઠપાષાણપૂજનમ્ ॥

સમો ઽમિત્રે ચ મિત્રે ચ સમો લોષ્ટે ચ કાઞ્ચને
અભિલાષો ન કર્તવ્ય ઇન્દ્રિયાર્થે કદાચન ॥

આત્મારામો ભવેદ્યોગી નિર્ભયો વિગતસ્પૃહઃ
સમનિન્દાપ્રશંસશ્ચ સર્વભૂતસમસ્તથા ॥

સમદૃષ્ટિસ્તુ કર્તવ્યા યથાત્મનિ તથા પરે
વિવાદં લોકગોષ્ઠીં ચ કલહાશ્ચ વિવર્જયેત્ ॥

શાસ્ત્રગોષ્ઠીં ન કુર્વીત કુભાષિતસુભાષિતાન્ ॥

ઈર્ષ્યાં પૈશુન્યદમ્ભે ચ રાગં માત્સર્યમેવ ચ
કામક્રોધૌ ભયં શોકં ત્યજેત્સર્વં શનૈઃ શનૈઃ ॥

સર્વદ્વન્દ્વવિનિર્મુક્તઃ સન્તતં જનવર્જિતઃ
અનેનૈવ શરીરેણ સર્વજ્ઞઃ સન્ પ્રકાશતે ॥

જ્ઞાનેનૈવ યથા મોક્ષસ્ તથા સિદ્ધિર્નિરર્થિકા
તથાપિ ભોગમિચ્છન્તઃ સિદ્ધિમિચ્છન્તિ સાધકાઃ ॥

અણિમાદિગુણાવાપ્તિર્ જાયતાં વા ન જાયતામ્
તથાપિ મુચ્યતે દેહી પતિં વિજ્ઞાય નિર્મલમ્ ॥