દેવી ભાગવત પુરાણ · અધ્યાય 12.14

શ્રીમદ્દેવીભાગવતમહાપુરાણ-શ્રવણફલવર્ણનમ્
સૂત ઉવાચ
અર્ધશ્લોકાત્મકં યત્તુ દેવીવક્ત્રાબ્જનિર્ગતમ્ ।
શ્રીમદ્‍ભાગવતં નામ વેદસિદ્ધાન્તબોધકમ્

ઉપદિષ્ટં વિષ્ણુવે યદ્વટપત્રનિવાસિને ।
શતકોટિપ્રવિસ્તીર્ણં તત્કૃતં બ્રહ્મણા પુરા

તત્સારમેકતઃ કૃત્વા વ્યાસેન શુકહેતવે ।
અષ્ટાદશસહસ્રં તુ દ્વાદશસ્કન્ધસંયુતમ્

દેવીભાગવતં નામ પુરાણં ગ્રથિતં પુરા ।
અદ્યાપિ દેવલોકે તદ્‌બહુવિસ્તીર્ણમસ્તિ હિ

નાનેન સદૃશં પુણ્યં પવિત્રં પાપનાશનમ્ ।
પદે પદેઽશ્વમેધસ્ય ફલમાપ્નોતિ માનવઃ

પૌરાણિકં પૂજયિત્વા વસ્ત્રાદ્યાભરણાદિભિઃ ।
વ્યાસબુદ્ધ્યા તન્મુખાત્તુ શ્રુત્વૈતત્સમુપોષિતઃ

લિખિત્વા નિજહસ્તેન લેખકેનાથવા મુને ।
પ્રૌષ્ઠપદ્યાં પૌર્ણમાસ્યાં હેમસિંહસમન્વિતમ્

દદ્યાત્પૌરાણિકાયાથ દક્ષિણાં ચ પયસ્વિનીમ્ ।
સાલઙ્‌કૃતાં સવત્સાં ચ કપિલાં હેમમાલિનીમ્

ભોજયેદ્બ્રાહ્મણાનન્તેઽપ્યધ્યાયપરિસમ્મિતાન્ ।
સુવાસિનીસ્તાવતીશ્ચ કુમારીર્બટુકૈઃ સહ

દેવીબુદ્ધ્યા પૂજયેત્તાન્વસનાભરણાદિભિઃ ।
પાયસાન્નવરેણાપિ ગન્ધસ્રક્કુસુમાદિભિઃ

પુરાણદાનેનૈતેન ભૂદાનસ્ય ફલં લભેત્ ।
ઇહલોકે સુખી ભૂત્વાપ્યન્તે દેવીપુરં વ્રજેત્

નિત્યં યઃ શૃણુયાદ્‍ભક્ત્યા દેવીભાગવતં પરમ્ ।
ન તસ્ય દુર્લભં કિઞ્ચિત્કદાચિત્ક્વચિદસ્તિ હિ

અપુત્રો લભતે પુત્રાન્ધનાર્થી ધનમાપ્નુયાત્ ।
વિદ્યાર્થી પ્રાપ્નુયાદ્વિદ્યાં કીર્તિમણ્ડિતભૂતલઃ

વન્ધ્યા વા કાકવન્ધ્યા વા મૃતવન્ધ્યા ચ યાઙ્‌ગના ।
શ્રવણાદસ્ય તદ્દોષાન્નિવર્તેત ન સંશયઃ

યદ્‌ગેહે પુસ્તકં ચૈતત્પૂજિતં યદિ તિષ્ઠતિ ।
તદ્‌ગેહં ન ત્યજેન્નિત્યં રમા ચૈવ સરસ્વતી

નેક્ષન્તે તત્ર વેતાલડાકિનીરાક્ષસાદયઃ ।
જ્વરિતં તુ નરં સ્પૃષ્ટ્વા પઠેદેતત્સમાહિતઃ

મણ્ડલાન્નાશમાપ્નોતિ જ્વરો દાહસમન્વિતઃ ।
શતાવૃત્ત્યાસ્ય પઠનાત્ક્ષયરોગો વિનશ્યતિ

પ્રતિસન્ધ્યં પઠેદ્યસ્તુ સન્ધ્યાં કૃત્વા સમાહિતઃ ।
એકૈકમસ્ય ચાધ્યાયં સ નરો જ્ઞાનવાન્ભવેત્

શકુનાંશ્ચૈવ વીક્ષેત કાર્યાકાર્યેષુ ચૈવ હિ ।
તત્પ્રકારઃ પુરસ્તાત્તુ કથિતોઽસ્તિ મયા મુને

નવરાત્રે પઠેન્નિત્યં શારદીયેઽતિભક્તિતઃ ।
તસ્યામ્બિકા તુ સન્તુષ્ટા દદાતીચ્છાધિકં ફલમ્

વૈષ્ણવૈશ્ચૈવ શૈવૈશ્ચ રમોમા પ્રીયતે સદા ।
સૌરૈશ્ચ ગાણપત્યૈશ્ચ સ્વેષ્ટશક્તેશ્ચ તુષ્ટયે

પઠિતવ્યં પ્રયત્‍નેન નવરાત્રચતુષ્ટયે ।
વૈદિકૈર્નિજગાયત્રીપ્રીતયે નિત્યશો મુને

પઠિતવ્યં પ્રયત્‍નેન વિરોધો નાત્ર કસ્યચિત્ ।
ઉપાસના તુ સર્વેષાં શક્તિયુક્તાસ્તિ સર્વદા

તચ્છક્તેરેવ તોષાર્થં પઠિતવ્યં સદા દ્વિજૈઃ ।
સ્ત્રીશૂદ્રો ન પઠેદેતત્કદાપિ ચ વિમોહિતઃ

શૃણુયાદ્‌દ્વિજવક્ત્રાત્તુ નિત્યમેવેતિ ચ સ્થિતિઃ ।
કિં પુનર્બહુનોક્તેન સારં વક્ષ્યામિ તત્ત્વતઃ

વેદસારમિદં પુણ્યં પુરાણં દ્વિજસત્તમાઃ ।
વેદપાઠસમં પાઠે શ્રવણે ચ તથૈવ હિ

સચ્ચિદાનન્દરૂપાં તાં ગાયત્રીપ્રતિપાદિતામ્ ।
નમામિ હ્રીંમયીં દેવીં ધિયો યો નઃ પ્રચોદયાત્

ઇતિ સૂતવચઃ શ્રુત્વા નૈમિષીયાસ્તપોધનાઃ ।
પૂજયામાસુરત્યુચ્ચૈઃ સૂતં પૌરાણિકોત્તમમ્

પ્રસન્નહૃદયાઃ સર્વે દેવીપાદામ્બુજાર્ચકાઃ ।
નિર્વૃતિં પરમાં પ્રાપ્તાઃ પુરાણસ્ય પ્રભાવતઃ

નમશ્ચક્રુઃ પુનઃ સૂતં ક્ષમાપ્ય ચ મુહુર્મુહુઃ ।
સંસારવારિધેસ્તાત પ્લવોઽસ્માકં ત્વમેવ હિ

ઇતિ સ મુનિવરાણામગ્રતઃ શ્રાવયિત્વા
સકલનિગમગુહ્યં દૌર્ગમેતત્પુરાણમ્ ।
નતમથ મુનિસઙ્‌ઘં વર્ધયિત્વાઽઽશિષામ્બા-
ચરણકમલભૃઙ્‌ગો નિર્જગામાથ સૂતઃ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દ્વાદશસ્કન્ધે
શ્રીમદ્દેવીભાગવતમહાપુરાણ-શ્રવણફલવર્ણનં નામ ચતુર્દશોઽધ્યાયઃ

અધ્યાય ચવદાવા સમાપ્ત
॥ દ્વાદશઃ સ્કન્ધઃ સમાપ્તઃ ॥
॥ શ્રીમદ્દેવીભાગવતમહાપુરાણ સંપૂર્ણમ્ ॥
વર્ગઃદેવીભાગવતપુરાણમ્