દેવી ભાગવત પુરાણ · અધ્યાય 10.4

રુદ્રપ્રાર્થનમ્
સૂત ઉવાચ
તતઃ સર્વે સુરગણા મહેન્દ્રપ્રમુખાસ્તદા ।
પદ્મયોનિં પુરસ્કૃત્ય રુદ્રં શરણમન્વયુઃ

ઉપતસ્થુઃ પ્રણતિભિઃ સ્તોત્રૈશ્ચારુવિભૂતિભિઃ ।
દેવદેવં ગિરિશયં શશિલોલિતશેખરમ્

દેવવા ઊચુઃ
જય દેવ ગણાધ્યક્ષ ઉમાલાલિતપઙ્‌કજ ।
અષ્ટસિદ્ધિવિભૂતીનાં દાત્રે ભક્તજનાય તે

મહામાયાવિલસિતસ્થાનાય પરમાત્મને ।
વૃષાઙ્‌કાયામરેશાય કૈલાસસ્થિતિશાલિને

અહિર્બુધ્ન્યાય માન્યાય મનવે માનદાયિને ।
અજાય બહુરૂપાય સ્વાત્મારામાય શમ્ભવે

ગણનાથાય દેવાય ગિરિશાય નમોઽસ્તુ તે ।
મહાવિભૂતિદાત્રે તે મહાવિષ્ણુસ્તુતાય ચ

વિષ્ણુહૃત્કઞ્જવાસાય મહાયોગરતાય ચ ।
યોગગમ્યાય યોગાય યોગિનાં પતયે નમઃ

યોગીશાય નમસ્તુભ્યં યોગાનાં ફલદાયિને ।
દીનદાનપરાયાપિ દયાસાગરમૂર્તયે

આર્તિપ્રશમનાયોગ્રવીર્યાય ગુણમૂર્તયે ।
વૃષધ્વજાય કાલાય કાલકાલાય તે નમઃ

સૂત ઉવાચ
એવં સ્તુતઃ સ દેવેશો યજ્ઞભુગ્ભિર્વૃષધ્વજઃ ।
પ્રાહ ગમ્ભીરયા વાચા પ્રહસન્વિબુધર્ષભાન્

શ્રીભગવાનુવાચ
પ્રસન્નોઽહં દિવિષદઃ સ્તોત્રેણોત્તમપૂરુષાઃ ।
મનોરથં પૂરયામિ સર્વેષાં દેવતર્ષભાઃ

દેવા ઊચુઃ
સર્વદેવેશ ગિરિશ શશિમૌલિવિરાજિત ।
આર્તાનાં શઙ્‌કરસ્ત્વં ચ શં વિધેહિ મહાબલ

પર્વતો વિન્ધ્યનામાસ્તિ મેરુદ્વેષ્ટા મહોન્નતઃ ।
ભાનુમાર્ગનિરોદ્ધા હિ સર્વેષાં દુઃખદોઽનઘ

તદવૃદ્ધિં સ્તમ્ભયેશાન સર્વકલ્યાણકૃદ્‍ભવ ।
ભાનુસઞ્ચારરોધેન કાલજ્ઞાનં કથં ભવેત્

નષ્ટે સ્વાહાસ્વધાકારે લોકે કઃ શરણં ભવેત્ ।
અસ્માકં ચ ભયાર્તાનાં ભવાનેવ હિ દૃશ્યતે

દુઃખનાશકરો દેવ પ્રસીદ ગિરિજાપતે ।
શ્રીશિવ ઉવાચ
નાસ્માકં શક્તિરસ્તીહ તદ્‌વૃદ્ધિસ્તમ્ભને સુરાઃ

ઇમમેવં વદિષ્યામો ભગવન્તં રમાધવમ્ ।
સોઽસ્માકં પ્રભુરાત્મા ચ પૂજ્યઃ કારણરૂપધૃક્

ગોવિન્દો ભગવાન્વિષ્ણુઃ સર્વકારણકારણઃ ।
તં ગત્વા કથયિષ્યામઃ સ દુઃખાન્તો ભવિષ્યતિ

ઇત્યેવમાકર્ણ્ય ગિરીશભાષિતં
દેવાશ્ચ સેન્દ્રાઃ સપયોજસમ્ભવાઃ ।
રુદ્રં પુરસ્કૃત્ય ચ વેપમાના
વૈકુણ્ઠલોકં પ્રતિજગ્મુરઞ્જસા

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે રુદ્રપ્રાર્થનં નામ ચતુર્થોઽધ્યાયઃ