Devi Bhagavata Purana · Chapter 10.4

rudraprārthanam
sūta uvāca
tataḥ sarve suragaṇā mahendrapramukhāstadā /
padmayoniṃ puraskṛtya rudraṃ śaraṇamanvayuḥ

upatasthuḥ praṇatibhiḥ stotraiścāruvibhūtibhiḥ /
devadevaṃ giriśayaṃ śaśilolitaśekharam

devavā ūcuḥ
jaya deva gaṇādhyakṣa umālālitapaṅ‌kaja /
aṣṭasiddhivibhūtīnāṃ dātre bhaktajanāya te

mahāmāyāvilasitasthānāya paramātmane /
vṛṣāṅ‌kāyāmareśāya kailāsasthitiśāline

ahirbudhnyāya mānyāya manave mānadāyine /
ajāya bahurūpāya svātmārāmāya śambhave

gaṇanāthāya devāya giriśāya namo'stu te /
mahāvibhūtidātre te mahāviṣṇustutāya ca

viṣṇuhṛtkañjavāsāya mahāyogaratāya ca /
yogagamyāya yogāya yogināṃ pataye namaḥ

yogīśāya namastubhyaṃ yogānāṃ phaladāyine /
dīnadānaparāyāpi dayāsāgaramūrtaye

ārtipraśamanāyogravīryāya guṇamūrtaye /
vṛṣadhvajāya kālāya kālakālāya te namaḥ

sūta uvāca
evaṃ stutaḥ sa deveśo yajñabhugbhirvṛṣadhvajaḥ /
prāha gambhīrayā vācā prahasanvibudharṣabhān

śrībhagavānuvāca
prasanno'haṃ diviṣadaḥ stotreṇottamapūruṣāḥ /
manorathaṃ pūrayāmi sarveṣāṃ devatarṣabhāḥ

devā ūcuḥ
sarvadeveśa giriśa śaśimaulivirājita /
ārtānāṃ śaṅ‌karastvaṃ ca śaṃ vidhehi mahābala

parvato vindhyanāmāsti merudveṣṭā mahonnataḥ /
bhānumārganiroddhā hi sarveṣāṃ duḥkhado'nagha

tadavṛddhiṃ stambhayeśāna sarvakalyāṇakṛd‍bhava /
bhānusañcārarodhena kālajñānaṃ kathaṃ bhavet

naṣṭe svāhāsvadhākāre loke kaḥ śaraṇaṃ bhavet /
asmākaṃ ca bhayārtānāṃ bhavāneva hi dṛśyate

duḥkhanāśakaro deva prasīda girijāpate /
śrīśiva uvāca
nāsmākaṃ śaktirastīha tad‌vṛddhistambhane surāḥ

imamevaṃ vadiṣyāmo bhagavantaṃ ramādhavam /
so'smākaṃ prabhurātmā ca pūjyaḥ kāraṇarūpadhṛk

govindo bhagavānviṣṇuḥ sarvakāraṇakāraṇaḥ /
taṃ gatvā kathayiṣyāmaḥ sa duḥkhānto bhaviṣyati

ityevamākarṇya girīśabhāṣitaṃ
devāśca sendrāḥ sapayojasambhavāḥ /
rudraṃ puraskṛtya ca vepamānā
vaikuṇṭhalokaṃ pratijagmurañjasā

iti śrīmaddevībhāgavate mahāpurāṇe'ṣṭādaśasāhasryāṃ saṃhitāyāṃ daśamaskandhe rudraprārthanaṃ nāma caturtho'dhyāyaḥ