દેવી ભાગવત પુરાણ · અધ્યાય 10.5

શ્રીવિષ્ણુના દેવેભ્યો વરપ્રદાનમ્
સૂત ઉવાચ
તે ગત્વા દેવદેવેશં રમાનાથં જગદ્‌ગુરુમ્ ।
વિષ્ણું કમલપત્રાક્ષં દદૃશુઃ પ્રભયાન્વિતમ્

સ્તોત્રેણ તુષ્ટુવુર્ભક્ત્યા ગદ્‌ગદસ્વરસત્કૃતાઃ ।
દેવા ઊચુઃ
જય વિષ્ણો રમેશાદ્ય મહાપુરુષ પૂર્વજ

દૈત્યારે કામજનક સર્વકામફલપ્રદ ।
મહાવરાહ ગોવિન્દ મહાયજ્ઞસ્વરૂપક

મહાવિષ્ણો ધ્રુવેશાદ્ય જગદુત્પત્તિકારણ ।
મત્સ્યાવતારે વેદાનામુદ્ધારાધારરૂપક

સત્યવ્રત ધરાધીશ મત્સ્યરૂપાય તે નમઃ ।
જયાકૂપાર દૈત્યારે સુરકાર્યસમર્પક

અમૃતાપ્તિકરેશાન કૂર્મરૂપાય તે નમઃ ।
જયાદિદૈત્યનાશાર્થમાદિસૂકરરૂપધૃક્

મહ્યુદ્ધારકૃતોદ્યોગકોલરૂપાય તે નમઃ ।
નારસિંહં વપુઃ કૃત્વા મહાદૈત્યં દદાર યઃ

કરજૈર્વરદૃપ્તાઙ્‌ગં તસ્મૈ નૃહરયે નમઃ ।
વામનં રૂપમાસ્થાય ત્રૈલોક્યૈશ્વર્યમોહિતમ્

બલિં સઞ્છલયામાસ તસ્મૈ વામનરૂપિણે ।
દુષ્ટક્ષત્રવિનાશાય સહસ્રકરશત્રવે

રેણુકાગર્ભજાતાય જામદગ્ન્યાય તે નમઃ ।
દુષ્ટરાક્ષસપૌલસ્ત્યશિરશ્છેદપટીયસે

શ્રીમદ્દાશરથે તુભ્યં નમોઽનન્તક્રમાય ચ ।
કંસદુર્યોધનાદ્યૈશ્ચ દૈત્યૈઃ પૃથ્વીશલાઞ્છનૈઃ

ભારાક્રાન્તાં મહીં યોઽસાવુજ્જહાર મહાવિભુઃ ।
ધર્મં સંસ્થાપયામાસ પાપં કૃત્વા સુદૂરતઃ

તસ્મૈ કૃષ્ણાય દેવાય નમોઽસ્તુ બહુધા વિભો ।
દુષ્ટયજ્ઞવિઘાતાય પશુહિંસાનિવૃત્તયે

બૌદ્ધરૂપં દધૌ યોઽસૌ તસ્મૈ દેવાય તે નમઃ ।
મ્લેચ્છપ્રાયેઽખિલે લોકે દુષ્ટરાજન્યપીડિતે

કલ્કિરૂપં સમાદધ્યૌ દેવદેવાય તે નમઃ ।
દશાવતારાસ્તે દેવ ભક્તાનાં રક્ષણાય વૈ

દુષ્ટદૈત્યવિઘાતાય તસ્માત્ત્વં સર્વદુઃખહૃત્ ।
જય ભક્તાર્તિનાશાય ધૃતં નારીજલાત્મસુ

રૂપં યેન ત્વયા દેવ કોઽન્યસ્ત્વત્તો દયાનિધિઃ ।
ઇત્યેવં દેવદેવેશં સ્તુત્વા શ્રીપીતવાસસમ્

પ્રણેમુર્ભક્તિસહિતાઃ સાષ્ટાઙ્‌ગં વિબુધર્ષભાઃ ।
તેષાં સ્તવં સમાકર્ણ્ય દેવઃ શ્રીપુરુષોત્તમઃ

ઉવાચ વિબુધાન્સર્વાન્ હર્ષયચ્છ્રીગદાધરઃ ।
શ્રીભગવાનુવાચ -
પ્રસન્નોઽસ્મિ સ્તવેનાહં દેવાસ્તાપં વિમુઞ્ચથ

ભવતાં નાશયિષ્યામિ દુઃખં પરમદુઃસહમ્ ।
વૃણુધ્વં ચ વરં મત્તો દેવાઃ પરમદુર્લભમ્

દદામિ પરમપ્રીતઃ સ્તવસ્યાસ્ય પ્રસાદતઃ ।
ય એતત્પઠતે સ્તોત્રં કલ્ય ઉત્થાય માનવઃ

મયિ ભક્તિં પરાં કૃત્વા ન તં શોકઃ સ્પૃશેત્કદા ।
અલક્ષ્મીઃ કાલકર્ણી ચ નાક્રામેત્તદ્‌‍ગૃહં સુરાઃ

નોપસર્ગા ન વેતાલા ન ગ્રહા બ્રહ્મરાક્ષસાઃ ।
ન રોગા વાતિકાઃ પૈત્તાઃ શ્લેષ્મસમ્ભવિનસ્તથા

નાકાલમરણં તસ્ય કદાપિ ચ ભવિષ્યતિ ।
સન્તતિશ્ચિરકાલસ્થા ભોગાઃ સર્વે સુખાદયઃ

સમ્ભવિષ્યન્તિ તન્મર્ત્યગૃહે યઃ સ્તોત્રપાઠકઃ ।
કિં પુનર્બહુનોક્તેન સ્તોત્રં સર્વાર્થસાધકમ્

એતસ્ય પઠનાનૄણાં ભુક્તિમુક્તી ન દૂરતઃ ।
દેવા ભવત્સુ યદ્દુઃખં કથ્યતાં તદસંશયમ્

નાશયામિ ન સન્દેહશ્ચાત્ર કાર્યોઽણુરેવ ચ ।
એવં શ્રીભગવદ્વાક્યં શ્રુત્વા સર્વે દિવૌકસઃ ।
પ્રસન્નમનસઃ સર્વે પુનરૂચુર્વૃષાકપિમ્

ઇતિ શ્રીમદ્દેવીભાગવતે મહાપુરાણેઽષ્ટાદપ્તસાહસ્ર્યાં સંહિતાયાં દશમસ્કન્ધે શ્રીવિષ્ણુના દેવેભ્યો વરપ્રદાનં નામ પઞ્ચમોઽધ્યાયઃ