દેવી ભાગવત પુરાણ · અધ્યાય 10.13

ભ્રામરીચરિત્રવર્ણનમ્
શ્રીનારાયણ ઉવાચ
અથાતઃ શ્રૂયતાં શેષમનૂનાં ચિત્રમુદ્‍ભવમ્ ।
યસ્ય સ્મરણમાત્રેણ દેવીભક્તિઃ પ્રજાયતે

આસન્વૈવસ્વતમનોઃ પુત્રાઃ ષડ્ વિમલોદયાઃ ।
કરૂષશ્ચ પૃષધ્રશ્ચ નાભાગો દિષ્ટ એવ ચ

શર્યાતિશ્ચ ત્રિશઙ્‌કુશ્ચ સર્વ એવ મહાબલાઃ ।
તતઃ ષડેવ તે ગત્વા કાલિન્દ્યાસ્તીરમુત્તમમ્

નિરાહારા જિતશ્વાસાઃ પૂજાં ચક્રુસ્તતઃ સ્થિતાઃ ।
દેવ્યા મહીમયીં મૂર્તિં વિનિર્માય પૃથક્પૃથક્

વિવિધૈરુપચારૈસ્તાં પૂજયામાસુરાદૃતાઃ ।
તતશ્ચ સર્વ એવૈતે તપઃસારા મહાબલાઃ

જીર્ણપર્ણાશના વાયુભક્ષણાસ્તોયજીવનાઃ ।
ધૂમ્રપાના રશ્મિપાનાઃ ક્રમશશ્ચ બહુશ્રમાઃ

તતસ્તેષામાદરેણારાધનં કુર્વતાં સદા ।
વિમલા મતિરુત્પન્ના સર્વમોહવિનાશિની

બભૂવુર્મનુપુત્રાસ્તે દેવીપાદૈકચિન્તનાઃ ।
મત્યા વિમલયા તેષામાત્મન્યેવાખિલં જગત્

દર્શનં સઞ્જગામાશુ તદદ્‍ભુતમિવાભવત્ ।
એવં દ્વાદશવર્ષાન્તે તપસા જગદીશ્વરી

પ્રાદુર્બભૂવ દેવેશી સહસ્રાર્કસમદ્યુતિઃ ।
તાં દૃષ્ટ્વા વિમલાત્માનો રાજપુત્રાઃ ષડેવ તે

તુષ્ટુવુર્ભક્તિનમ્રાન્તઃકરણા ભાવસંયુતાઃ ।
રાજપુત્રા ઊચુઃ
મહેશ્વરિ જયેશાનિ પરમે કરુણાલયે

વાગ્ભવારાધનપ્રીતે વાગ્ભવપ્રતિપાદિતે ।
ક્લીંકારવિગ્રહે દેવિ ક્લીંકારપ્રીતિદાયિનિ

કામરાજમનોમોદદાયિનીશ્વરતોષિણિ ।
મહામાયે મોદપરે મહાસામ્રાજ્યદાયિનિ

વિષ્ણ્વર્કહરશક્રાદિસ્વરૂપે ભોગવર્ધિનિ ।
એવં સ્તુતા ભગવતી રાજપુત્રૈર્મહાત્મભિઃ

પ્રસાદસુમુખી દેવી પ્રોવાચ વચનં શુભમ્ ।
દેવ્યુવાચ
રાજપુત્રા મહાત્માનો ભવન્તસ્તપસા યુતાઃ

નિષ્કલ્મષાઃ શુદ્ધધિયો જાતા વૈ મદુપાસનાત્ ।
વરં મનોગતં સર્વં યાચધ્વમવિલમ્બિતમ્

પ્રસન્નાહં પ્રદાસ્યામિ યુષ્માકં મનસિ સ્થિતમ્ ।
રાજપુત્રા ઊચુઃ
દેવિ નિષ્કણ્ટકં રાજ્યં સન્તતિશ્ચિરજીવિની

ભોગા અવ્યાહતા કામં યશસ્તેજો મતિશ્ચ હ ।
અકુણ્ઠિતત્વં સર્વેષામેષ એવ વરો હિતઃ

દેવ્યુવાચ
એવમસ્તુ ચ સર્વેષાં ભવતાં યન્મનોગતમ્ ।
અથાન્યદપિ મે વાક્યં ભૂયતામાદરાદિદમ્

ભવન્તઃ સર્વ એવૈતે મન્વન્તરપતીશ્વરાઃ ।
સન્તત્યા દીર્ઘયા ભોગૈરનેકૈરપિ સઙ્‌ગમઃ

અખણ્ડિતબલૈશ્વર્યં યશસ્તેજોવિભૂતયઃ ।
ભવિતારો મત્પ્રસાદાદ્‌રાજપુત્રાઃ ક્રમેણ તુ

શ્રીનારાયણ ઉવાચ
એવં તેભ્યો વરાન્દત્ત્વા ભ્રામરી જગદમ્બિકા ।
અન્તર્ધાનં જગામાશુ ભક્ત્યા તૈઃ સંસ્તુતા સતી

તે રાજપુત્રાઃ સર્વેઽપિ તસ્મિઞ્જન્મન્યનુત્તમમ્ ।
રાજ્યં મહીગતાન્ભોગાન્બુભુજુશ્ચ મહૌજસઃ

સન્તતિં ચાખણ્ડિતાં તે સમુત્પાદ્ય મહીતલે ।
વંશં સંસ્થાપ્ય સર્વેઽપિ મનૂનાં પતયોઽભવન્

ભવાન્તરે ક્રમેણૈવ સાવર્ણિપદભાગિનઃ ।
પ્રથમો દક્ષસાવર્ણિર્નવમો મનુરીરિતઃ

અવ્યાહતબલો દેવ્યાઃ પ્રસાદાદભવદ્વિભુઃ ।
દ્વિતીયો મેરુસાવર્ણિર્દશમો મનુરેવ ચ

બભૂવ મન્વન્તરપો મહાદેવીપ્રસાદતઃ ।
તૃતીયો મનુરાખ્યાતઃ સૂર્યસાવર્ણિનામકઃ

એકાદશો મહોત્સાહસ્તપસા સ્વેન ભાવિતઃ ।
ચતુર્થશ્ચન્દ્રસાવર્ણિર્દ્વાદશો મનુરાડ્ વિભુઃ

દેવીસમારાધનેન જાતો મન્વન્તરેશ્વરઃ ।
પઞ્ચમો રુદ્રસાવર્ણિસ્ત્રયોદશમનુઃ સ્મૃતઃ

મહાબલો મહાસત્ત્વો બભૂવ જગદીશ્વરઃ ।
ષષ્ઠશ્ચ વિષ્ણુસાવર્ણિશ્ચતુર્દશમનુઃ કૃતી

બભૂવ દેવીવરતો જગતાં પ્રથિતઃ પ્રભુઃ ।
ચતુર્દશૈતે મનવો મહાતેજોબલૈર્યુતાઃ

દેવ્યારાધનતઃ પૂજ્યા વન્દ્યા લોકેષુ નિત્યશઃ ।
મહાપ્રતાપિનઃ સર્વે ભ્રામર્યાસ્તુ પ્રસાદતઃ

નારદ ઉવાચ
કેયં સા ભ્રામરી દેવી કથં જાતા કિમાત્મિકા ।
તદાખ્યાનં વદ પ્રાજ્ઞ વિચિત્રં શોકનાશકમ્

ન તૃપ્તિમધિગચ્છામિ પિબન્દેવીકથામૃતમ્ ।
અમૃતં પિબતાં મૃત્યુર્નાસ્ય શ્રવણતો યતઃ

શ્રીનારાયણ ઉવાચ
શૃણુ નારદ વક્ષ્યામિ જગન્માતુર્વિચેષ્ટિતમ્ ।
અચિન્ત્યાવ્યક્તરૂપાયા વિચિત્રં મોક્ષદાયકમ્

યદ્યચ્ચરિત્રં શ્રીદેવ્યાસ્તત્સર્વં લોકહેતવે ।
નિર્વ્યાજયા કરુણયા પુત્રે માતુર્યથા તથા

પૂર્વં દૈત્યો મહાનાસીદરુણાખ્યો મહાબલઃ ।
પાતાલે દૈત્યસંસ્થાને દેવદ્વેષી મહાખલઃ

સ દેવાઞ્જેતુકામશ્ચ ચકાર પરમં તપઃ ।
પદ્મસમ્ભવમુદ્દિશ્ય સ નસ્ત્રાતા ભવિષ્યતિ

ગત્વા હિમવતઃ પાર્શ્વે ગઙ્‌ગાજલસુશીતલે ।
પક્વપર્ણાશનો યોગી સન્નિરુધ્ય મરુદ્‌ગણમ્

ગાયત્રીજપસંસક્તઃ સકામસ્તમસા યુતઃ ।
દશવર્ષસહસ્રાણિ તતો વારિકણાશનઃ

દશવર્ષસહસ્રાણિ તતઃ પવનભોજનઃ ।
દશવર્ષસહસ્રાણિ નિરાહારોઽભવત્તતઃ

એવં તપસ્યતસ્તસ્ય શરીરાદુત્થિતોઽનલઃ ।
દદાહ જગતીં સર્વાં તદદ્‍ભુતમિવાભવત્

કિમિદં કિમિદં ચેતિ દેવાઃ સર્વે ચકમ્પિરે ।
સન્ત્રસ્તાઃ સકલા લોકા બ્રહ્માણં શરણં યયુઃ

વિજ્ઞાપિતં દેવવરૈઃ શ્રુત્વા તત્ર ચતુર્મુખઃ ।
ગાયત્રીસહિતો હંસસમારૂઢો યયૌ મુદા

પ્રાણમાત્રાવશિષ્ટં તં ધમનીશતસઙ્‌કુલમ્ ।
શુષ્કોદરં ક્ષામગાત્રં ધ્યાનમીલિતલોચનમ્

દદર્શ તેજસા દીપ્તં દ્વિતીયમિવ પાવકમ્ ।
વરં વરય ભદ્રં તે વત્સ યન્મનસિ સ્થિતમ્

શ્રુતિમાત્રેણ સન્તોષકારકં વાક્યમૂચિવાન્ ।
શ્રુત્વા બ્રહ્મમુખાદ્વાણીં સુધાધારામિવારુણઃ

ઉન્મીલિતાક્ષઃ પુરતો દદર્શ જલજોદ્‍ભવમ્ ।
ગાયત્રીસહિતં દેવં ચતુર્વેદસમન્વિતમ્

અક્ષસ્રક્કુણ્ડિકાહસ્તં જપન્તં બ્રહ્મ શાશ્વતમ્ ।
દૃષ્ટ્વોત્થાય નનામાથ સ્તુત્વા ચ વિવિધૈઃ સ્તવૈઃ

વરં વવ્રે સ્વબુદ્ધિસ્થં મા ભવેન્મૃત્યુરિત્યપિ ।
શ્રુત્વારુણવચો બ્રહ્મા બોધયામાસ સાદરમ્

બ્રહ્મવિષ્ણુમહેશાદ્યા મૃત્યુના કવલીકૃતાઃ ।
તદાન્યેષાં તુ કા વાર્તા મરણે દાનવોત્તમ

વરં યોગ્યં તતો બ્રૂહિ દાતું યઃ શક્યતે મયા ।
નાત્રાગ્રહં પ્રકુર્વન્તિ બુદ્ધિમન્તો જનાઃ ક્વચિત્

ઇતિ બ્રહ્મવચઃ શ્રુત્વા પુનઃ પ્રોવાચ સાદરમ્ ।
ન યુદ્ધે ન ચ શસ્ત્રાસ્ત્રાન્ન પુંભ્યો નાપિ યોષિતઃ

દ્વિપાદ્‍ભ્યો વા ચતુષ્પાદ્‍ભ્યો નોભયાકારતસ્તથા ।
ભવેન્મે મૃત્યુરિત્યેવં દેવ દેહિ વરં પ્રભો

બલં ચ વિપુલં દેહિ યેન દેવજયો ભવેત્ ।
ઇતિ તસ્ય વચઃ શ્રુત્વા તથાસ્ત્વિતિ વચોઽબ્રવીત્

દત્ત્વા વરં જગામાશુ પદ્મજઃ સ્વં નિકેતનમ્ ।
તતોઽરુણાખ્યો દૈત્યસ્તુ પાતાલાત્સ્વાશ્રયસ્થિતાન્

દૈત્યાનાકારયામાસ બ્રહ્મણો વરદર્પિતઃ ।
આગત્ય તેઽસુરાઃ સર્વે દૈત્યેશં તં પ્રચક્રિરે

દૂતં ચ પ્રેષયામાસુર્યુદ્ધાર્થમમરાવતીમ્ ।
દૂતવાક્યં તદા શ્રુત્વા દેવરાડ્ ભયકમ્પિતઃ

દેવૈઃ સાર્ધં જગામાશુ બ્રહ્મણઃ સદનં પ્રતિ ।
બ્રહ્મવિષ્ણૂ પુરસ્કૃત્ય જગ્મુસ્તે શઙ્‌કરાલયમ્

વિચારં ચક્રિરે તત્ર વધાર્થં તે સુરદ્રુહામ્ ।
એતસ્મિન્સમયે તત્ર દૈત્યસેનાસમાવૃતઃ

અરુણાખ્યો દૈત્યરાજો જગામાશુ ત્રિવિષ્ટપમ્ ।
સૂર્યેન્દુયમવહ્નીનામધિકારાન્પૃથક્પૃથક્

સ્વયં ચકાર તપસા નાનારૂપધરો મુને ।
સ્વસ્વસ્થાનચ્યુતાઃ સર્વે જગ્મુઃ કૈલાસમણ્ડલમ્

શશંસુઃ શઙ્‌કરં દેવાઃ સ્વસ્વદુઃખં પૃથક્પૃથક્ ।
મહાન્ વિચારસ્તત્રાસીત્કિં કર્તવ્યમતઃ પરમ્

ન યુદ્ધેન ચ શસ્ત્રાસ્ત્રૈર્ન પુંભ્યો નાપિ યોષિતઃ ।
દ્વિપાદ્‍ભ્યો વા ચતુષ્પાદ્‍ભ્યો નોભયાકારતોઽપિ વા

મૃત્યુર્ભવેદિતિ બ્રહ્મા પ્રોવાચ વચનં યતઃ ।
ઇતિ ચિન્તાતુરાઃ સર્વે કર્તું કિઞ્ચિન્ન ચ ક્ષમાઃ

એતસ્મિન્સમયે તત્ર વાગભૂદશરીરિણી ।
ભજધ્વં ભુવનેશાનીં સા વઃ કાર્યં વિધાસ્યતિ

ગાયત્રીજપસંસક્તો દૈત્યરાડ્ યદિ તાં ત્યજેત્ ।
મૃત્યુયોગ્યસ્તદા ભૂયાદિત્યુચ્ચૈસ્તોષકારિણી

શ્રુત્વા દૈવીં તથા વાણીં મન્ત્રયામાસુરાદૃતાઃ ।
બૃહસ્પતિં સમાહૂય વચનં પ્રાહ દેવરાટ્

ગુરો ગચ્છ સુરાણાં તુ કાર્યાર્થમસુરં પ્રતિ ।
યથા ભવેચ્ચ ગાયત્રીત્યાગસ્તસ્ય તથા કુરુ

અસ્માભિઃ પરમેશાની સેવ્યતે ધ્યાનયોગતઃ ।
પ્રસન્ના સા ભગવતી સાહાય્યં તે કરિષ્યતિ

ઇત્યાદિશ્ય ગુરું સર્વે જગ્મુર્જામ્બૂનદેશ્વરીમ્ ।
સાસ્માન્દૈત્યભયત્રસ્તાન્ પાલયિષ્યતિ શોભના

તત્ર ગત્વા તપશ્ચર્યાં ચક્રુઃ સર્વે સુનિષ્ઠિતાઃ ।
માયાબીજજપાસક્તા દેવીમખપરાયણાઃ

બૃહસ્પતિસ્તદા શીઘ્રં જગામાસુરસન્નિધૌ ।
આગતં મુનિવર્યં તં પપ્રચ્છાથ સ દૈત્યરાટ્

મુને કુત્રાગમઃ કસ્માત્કિમર્થમિતિ મે વદ ।
નાહં યુષ્મત્પક્ષપાતી પ્રત્યુતારાતિરેવ ચ

ઇતિ તસ્ય વચઃ શ્રુત્વા પ્રોવાચ મુનિનાયકઃ ।
અસ્મત્સેવ્યા ચ યા દેવી સા ત્વયા પૂજ્યતેઽનિશમ્

તસ્માદસ્મત્પક્ષપાતી ન ભવેસ્ત્વં કથં વદ ।
ઇતિ તસ્ય વચઃ શ્રુત્વા મોહિતો દેવમાયયા

તત્યાજ પરમં મન્ત્રમભિમાનેન સત્તમ ।
ગાયત્રીત્યાગતો દૈત્યો નિસ્તેજસ્કો બભૂવ હ

કૃતકાર્યો ગુરુસ્તસ્માત્સ્થાનાન્નિર્ગતવાન્પુનઃ ।
તતો વૃત્તાન્તમખિલં કથયામાસ વજ્રિણે

સંતુષ્ટાસ્તે સુરાઃ સર્વે ભેજિરે પરમેશ્વરીમ્ ।
એવં બહુગતે કાલે કસ્મિંશ્ચિત્સમયે મુને

પ્રાદુરાસીજ્જગન્માતા જગન્મઙ્‌ગલકારિણી ।
કોટિસૂર્યપ્રતીકાશા કોટિકન્દર્પસુન્દરી

ચિત્રાનુલેપના દેવી ચિત્રવાસોયુગાન્વિતા ।
વિચિત્રમાલ્યાભરણા ચિત્રભ્રમરમુષ્ટિકા

વરાભયકરા શાન્તા કરુણામૃતસાગરા ।
નાનાભ્રમરસંયુક્તપુષ્પમાલાવિરાજિતા

ભ્રામરીભિર્વિચિત્રાભિરસંખ્યાભિઃ સમાવૃતા ।
ભ્રમરૈર્ગાયમાનૈશ્ચ હ્રીંકારમનુમન્વહમ્

સમન્તતઃ પરિવૃતા કોટિકોટિભિરમ્બિકા ।
સર્વશૃઙ્‌ગારવેષાઢ્યા સર્વવેદપ્રશંસિતા

સર્વાત્મિકા સર્વમયી સર્વમઙ્‌ગલરૂપિણી ।
સર્વજ્ઞા સર્વજનની સર્વા સર્વેશ્વરી શિવા

દૃષ્ટ્વા તાં તરલાત્માનો દેવા બ્રહ્મપુરોગમાઃ ।
તુષ્ટુવુર્હૃષ્ટમનસો વિષ્ટરશ્રવસાં શિવામ્

દેવા ઊચુઃ
નમો દેવિ મહાવિદ્યે સૃષ્ટિસ્થિત્યન્તકારિણિ ।
નમઃ કમલપત્રાક્ષિ સર્વાધારે નમોઽસ્તુ તે

સવિશ્વતૈજસપ્રાજ્ઞવિરાટ્સૂત્રાત્મિકે નમઃ ।
નમો વ્યાકૃતરૂપાયૈ કૂટસ્થાયૈ નમો નમઃ

દુર્ગે સર્ગાદિરહિતે દુષ્ટસંરોધનાર્ગલે ।
નિરર્ગલપ્રેમગમ્યે ભર્ગે દેવિ નમોઽસ્તુ તે

નમઃ શ્રીકાલિકે માતર્નમો નીલસરસ્વતિ ।
ઉગ્રતારે મહોગ્રે તે નિત્યમેવ નમો નમઃ

નમઃ પીતામ્બરે દેવિ નમસ્ત્રિપુરસુન્દરિ ।
નમો ભૈરવિ માતઙ્‌ગિ ધૂમાવતિ નમો નમઃ

છિન્નમસ્તે નમસ્તેઽસ્તુ ક્ષીરસાગરકન્યકે ।
નમઃ શાકમ્ભરિ શિવે નમસ્તે રક્તદન્તિકે

નિશુમ્ભશુમ્ભદલનિ રક્તબીજવિનાશિનિ ।
ધૂમ્રલોચનનિર્ણાશે વૃત્રાસુરનિબર્હિણિ

ચણ્ડમુણ્ડપ્રમથિનિ દાનવાન્તકરે શિવે ।
નમસ્તે વિજયે ગઙ્‌ગે શારદે વિકચાનને

પૃથ્વીરૂપે દયારૂપે તેજોરૂપે નમો નમઃ ।
પ્રાણરૂપે મહારૂપે ભૂતરૂપે નમોઽસ્તુ તે

વિશ્વમૂર્તે દયામૂર્તે ધર્મમૂર્તે નમો નમઃ ।
દેવમૂર્તે જ્યોતિમૂર્તે જ્ઞાનમૂર્તે નમોઽસ્તુ તે

ગાયત્રિ વરદે દેવિ સાવિત્રિ ચ સરસ્વતિ ।
નમઃ સ્વાહે સ્વધે માતર્દક્ષિણે તે નમો નમઃ

નેતિ નેતીતિ વાક્યૈર્યા બોધ્યતે સકલાગમૈઃ ।
સર્વપ્રત્યક્સ્વરૂપાં તાં ભજામઃ પરદેવતામ્

ભ્રમરૈર્વેષ્ટિતા યસ્માદ્‌ ભ્રામરી યા તતઃ સ્મૃતા ।
તસ્યૈ દેવ્યૈ નમો નિત્યં નિત્યમેવ નમો નમઃ

નમસ્તે પાર્શ્વયોઃ પૃષ્ઠે નમસ્તે પુરતોઽમ્બિકે ।
નમ ઊર્ધ્વં નમશ્ચાધઃ સર્વત્રૈવ નમો નમઃ

કૃપાં કુરુ મહાદેવિ મણિદ્વીપાધિવાસિનિ ।
અનન્તકોટિબ્રહ્માણ્ડનાયિકે જગદમ્બિકે

જય દેવિ જગન્માતર્જય દેવિ પરાત્પરે ।
જય શ્રીભુવનેશાનિ જય સર્વોત્તમોત્તમે

કલ્યાણગુણરત્‍નાનામાકરે ભુવનેશ્વરિ ।
પ્રસીદ પરમેશાનિ પ્રસીદ જગતોરણે

શ્રીનારાયણ ઉવાચ
ઇતિ દેવવચઃ શ્રુત્વા પ્રગલ્ભં મધુરં વચઃ ।
ઉવાચ જગદમ્બા સા મત્તકોકિલભાષિણી

દેવ્યુવાચ
પ્રસન્નાહં સદા દેવા વરદેશશિખામણિઃ ।
બ્રુવન્તુ વિબુધાઃ સર્વે યદેવ સ્યાચ્ચિકીર્ષિતમ્

દેવીવાક્યં સુરાઃ શ્રુત્વા પ્રોચુર્દુઃખસ્ય કારણમ્ ।
દુષ્ટદૈત્યસ્ય ચરિતં જગદ્બાધાકરં પરમ્

દેવબ્રાહ્મણવેદાનાં હેલનં નાશનં તથા ।
સ્થાનભ્રંશં સુરાણાં ચ કથયામાસુરાદૃતાઃ

બ્રહ્મણો વરદાનં ચ યથાવત્તે સમૂચિરે ।
શ્રુત્વા દેવમુખાદ્વાણીં મહાભગવતી તદા

પ્રેરયામાસ હસ્તસ્થાન્ભ્રમરાન્ભ્રામરી તદા ।
પાર્શ્વસ્થાનગ્નભાગસ્થાન્નાનારૂપધરાંસ્તથા

જનયામાસ બહુશો યૈર્વ્યાપ્તં ભુવનત્રયમ્ ।
મટચીયૂથવત્તેષાં સમુદાયસ્તુ નિર્ગતઃ

તદાન્તરિક્ષં તૈર્વ્યાપ્તમન્ધકારઃ ક્ષિતાવભૂત્ ।
દિવિ પર્વતશૃઙ્‌ગેષુ દ્રુમેષુ વિપિનેષ્વપિ

ભ્રમરા એવ સઞ્જાતાસ્તદદ્‌ભુતમિવાભવત્ ।
તે સર્વે દૈત્યવક્ષાંસિ દારયામાસુરુદ્‌ગતાઃ

નરં મધુહરં યદ્વન્મક્ષિકાઃ કોપસંયુતાઃ ।
ઉપાયો ન ચ શસ્ત્રાણાં તથાસ્ત્રાણાં તદાભવત્

ન યુદ્ધં ન ચ સમ્ભાષા કેવલં મરણં ખલુ ।
યસ્મિન્યસ્મિન્સ્થલે યે યે સ્થિતા દૈત્યા યથા યથા

તત્રૈવ ચ તથા સર્વે મરણં પ્રાપુરુત્સ્મયાઃ ।
પરસ્પરં સમાચારો ન કસ્યાપ્યભવત્તદા

ક્ષણમાત્રેણ તે સર્વે વિનષ્ટા દૈત્યપુઙ્‌ગવાઃ ।
કૃત્વેત્થં ભ્રમરાઃ કાર્યં દેવીનિકટમાયયુઃ

આશ્ચર્યમેતદાશ્ચર્યમિતિ લોકાઃ સમૂચિરે ।
કિં ચિત્રં જગદમ્બાયા યસ્યા માયેયમીદૃશી

તતો દેવગણાઃ સર્વે બ્રહ્મવિષ્ણુપુરોગમાઃ ।
નિમગ્ના હર્ષજલધૌ પૂજયામાસુરમ્બિકામ્

નાનોપચારૈર્વિવિધૈર્નાનોપાયનપાણયઃ ।
જયશબ્દં પ્રકુર્વાણા મુમુચુઃ સુમનાંસિ ચ

દિવિ દુન્દુભયો નેદુર્નનૃતુશ્ચાપ્સરોગણાઃ ।
પેઠુર્વેદાન્મુનિશ્રેષ્ઠા ગન્ધર્વાદ્યા જગુસ્તથા

મૃદઙ્‌ગમુરજાવીણાઢક્કાડમરુનિઃસ્વનૈઃ ।
ઘણ્ટાશઙ્‌ખનિનાદૈશ્ચ વ્યાપ્તમાસીજ્જગત્ત્રયમ્

નાનાસ્તોત્રૈસ્તદા સ્તુત્વા મૂર્ધ્ન્યાધાયાજ્જલીંસ્તથા ।
જય માતર્જયેશાનીત્યેવં સર્વે સમૂચિરે

તતસ્તુષ્ટા મહાદેવી વરાન્દત્ત્વા પૃથક્પૃથક્ ।
સ્વસ્મિંશ્ચ વિપુલાં ભક્તિં પ્રાર્થિતા તૈર્દદૌ ચ તામ્

પશ્યતામેવ દેવાનામન્તર્ધાનં ગતા તતઃ ।
ઇતિ તે સર્વમાખ્યાતં ભ્રામર્યાશ્ચરિતં મહત્

પઠતાં શૃણ્વતાં ચૈવ સર્વપાપપ્રણાશનમ્ ।
શ્રુતમાશ્ચર્યજનકં સંસારાર્ણવતારકમ્

એવં મનૂનાં સર્વેષાં ચરિતં પાપનાશનમ્ ।
દેવીમાહાત્મ્યસંયુક્તં પઠઞ્શૃણ્વઞ્શુભપ્રદમ્

યશ્ચૈતત્પઠતે નિત્યં શૃણુયાદ્યોઽનિશં નરઃ ।
સર્વપાપવિનિર્મુક્તો દેવીસાયુજ્યમાપ્નુયાત્

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં
દશમસ્કન્ધે ભ્રામરીચરિત્રવર્ણનં નામ ત્રયોદશોઽધ્યાયઃ