દેવી ભાગવત પુરાણ · અધ્યાય 10.10

સુરથનૃપતિવૃમત્તવર્ણનમ્
શ્રીનારાયણ ઉવાચ
સપ્તમો મનુરાખ્યાતો મનુર્વૈવસ્વતઃ પ્રભુઃ ।
શ્રાદ્ધદેવઃ પરાનન્દભોક્તા માન્યસ્તુ ભૂભુજામ્

સ ચ વૈવસ્વતમનુઃ પરદેવ્યાઃ પ્રસાદતઃ ।
તથા તત્તપસા ચૈવ જાતો મન્વન્તરાધિપઃ

અષ્ટમો મનુરાખ્યાતઃ સાવર્ણિઃ પ્રથિતઃ ક્ષિતૌ ।
સ જન્માન્તર આરાધ્ય દેવીં તદ્વરલાભતઃ

જાતો મન્વન્તરપતિઃ સર્વરાજન્યપૂજિતઃ ।
મહાપરાક્રમી ધીરો દેવીભક્તિપરાયણઃ

નારદ ઉવાવ
કથં જન્માન્તરે તેન મનુનારાધનં કૃતમ્ ।
દેવ્યાઃ પૃથિવ્યુદ્‍ભવાયાસ્તન્મમાખ્યાતુમર્હસિ

શ્રીનારાયણ ઉવાચ
ચૈત્રવંશસમુદ્‌ભૂતો રાજા સ્વારોચિષેઽન્તરે ।
સુરથો નામ વિખ્યાતો મહાબલપરાક્રમઃ

ગુણગ્રાહી ધનુર્ધારી માન્યઃ શ્રેષ્ઠઃ કવિઃ કૃતી ।
ધનસંગ્રહકર્તા ચ દાતા યાચકમણ્ડલે

અરીણાં મર્દનો માની સર્વાસ્ત્રકુશલો બલી ।
તસ્યૈકદા બભૂવુસ્તે કોલાવિધ્વંસિનો નૃપાઃ

શત્રવઃ સૈન્યસહિતાઃ પરિવાર્યેનમૂર્જિતાઃ ।
રુરુધુર્નગરીં તસ્ય રાજ્ઞો માનધનસ્ય હિ

તદા સ સુરથો નામ રાજા સૈન્યસમાવૃતઃ ।
નિર્યયૌ નગરાત્સ્વીયાત્સર્વશત્રુનિબર્હણઃ

તદા સ સમરે રાજા સુરથઃ શત્રુભિર્જિતઃ ।
અમાત્યૈર્મન્ત્રિભિશ્ચૈવ તસ્ય કોશગતં ધનમ્

હૃતં સર્વમશેષેણ તદાતપ્યત ભૂમિપઃ ।
નિષ્કાસિતશ્ચ નગરાત્સ રાજા પરમદ્યુતિઃ

જગામાશ્વમથારુહ્ય મૃગયામિષતો વનમ્ ।
એકાકી વિજનેઽરણ્યે બભ્રામોદ્‌ભ્રાન્તમાનસઃ

મુનેઃ કસ્યચિદાગત્ય સ્વાશ્રમં શાન્તમાનસઃ ।
પ્રશાન્તજન્તુસંયુક્તં મુનિશિષ્યગણૈર્યુતમ્

ઉવાસ કઞ્ચિત્કાલં સ રાજા પરમશોભને ।
આશ્રમે મુનિવર્યસ્ય દીર્ઘદૃષ્ટેઃ સુમેધસઃ

એકદા સ મહીપાલો મુનિં પૂજાવસાનકે ।
કાલે ગત્વા પ્રણમ્યાશુ પપ્રચ્છ વિનયાન્વિતઃ

મુને મમ મનોદુઃખં બાધતે ચાધિસમ્ભવમ્ ।
જ્ઞાતતત્ત્વસ્ય ભૂદેવ નિષ્પ્રજ્ઞસ્ય ચ સન્તતમ્

શત્રુભિર્નિર્જિતસ્યાપિ હૃતરાજ્યસ્ય સર્વશઃ ।
તથાપિ તેષુ મનસિ મમત્વં જાયતે સ્ફુટમ્

કિં કરોમિ ક્વ ગચ્છામિ કથં શર્મ લભે મુને ।
ત્વદનુગ્રહમાશાસે વદ વેદવિદાં વર

મુનિરુવાચ
આકર્ણય મહીપાલ મહાશ્ચર્યકરં પરમ્ ।
દેવીમાહાત્મ્યમતુલં સર્વકામપ્રદં પરમ્

જગન્મયી મહામાયા વિષ્ણુબ્રહ્મહરોદ્‍ભવા ।
સા બલાદપહૃત્યૈવ જન્તૂનાં માનસાનિ હિ

મોહાય પ્રતિસંયચ્છેદિતિ જાનીહિ ભૂમિપ ।
સા સૃજત્યખિલં વિશ્વં સા પાલયતિ સર્વદા

સંહારે હરરૂપેણ સંહરત્યેવ ભૂમિપ ।
કામદાત્રી મહામાયા કાલરાત્રિર્દુરત્યયા

વિશ્વસંહારિણી કાલી કમલા કમલાલયા ।
તસ્યાં સર્વં જગજ્જાતં તસ્યાં વિશ્વં પ્રતિષ્ઠિતમ્

લયમેષ્યતિ તસ્યાં ચ તસ્માત્સૈવ પરાત્પરા ।
તસ્યા દેવ્યાઃ પ્રસાદશ્ચ યસ્યોપરિ ભવેન્નૃપ ।
સ એવ મોહમત્યેતિ નાન્યથા ધરણીપતે

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે સુરથનૃપતિવૃમત્તવર્ણનં નામ દશમોઽધ્યાયઃ