દશભૂમિકસૂત્ર · અધ્યાય 3

2 વિમલા નામ દ્વિતીયા ભૂમિઃ ।
ઉપક્રમગાથાઃ ।
શ્રુત્વૈતદુત્તમં સ્થાનં ભૂમ્યાઃ શ્રેષ્ઠં મનોરમમ્ ।
પ્રસન્નમનસંકલ્પહર્ષિતાઃ સુગતાત્મજાઃ

અભ્યુત્થિતા આસનેભ્ય અભ્યુદ્ગમ્ય ખગપથે ।
અભ્યોકિરન્તિ કુસુમૈઃ સાધ્વિતિ વ્યાહરી ગિરા

સાધુ સાધુ મહાપ્રાજ્ઞ વજ્રગર્ભ વિશારદ ।
યન્નિર્દિષ્ટા ત્વયા ભૂમિ બોધિસત્ત્વાન યા ચરી

પર્ષદ્ધિ વિપ્રસન્ના તુ વિમુક્તિચન્દ્રઃ પૃચ્છતિ ।
ઉત્તરિં કીર્તિયા ભૂમિં દ્વિતીયાં સુગતાત્મજાઃ

કીદૃશા મનસંકલ્પા દ્વિતીયામભિલક્ષતઃ ।
પ્રવ્યાહર મહાપ્રાજ્ઞ શ્રોતુકામા જિનાત્મજાઃ

ઉપસંહારગાથાઃ ।
તે માર્દવાર્જવમૃદૂકર્મણીયચિત્તાઃ કલ્યાણ-આશય દમાશયતાભ્યુપેતાઃ ।
સંસર્ગપેક્ષવિગતાશ્ચ ઉદારબુદ્ધિ માહાત્મ્ય આશયવિદ્ દ્વિતીયાક્રમન્તિ

અત્ર સ્થિતા ગુણધરાઃ કુશલોપપેતાઃ પ્રાણાતિપાતવિગતા અવિહિંસચિત્તાઃ ।
અદત્તદાનપગતાઃ પરદારતાં ચ સત્યાન્વિતા અપિશુનઃ પુરુષપ્રધાનાઃ

પરભોગભિદ્યવિગતા વિદુ મૈત્રચિત્તાઃ સમ્યક્પથે ઉપગતા અશઠજ્ઞકાશ્ચ ।
નિર્માણકાયગ્રહણાશ્ચ સુપેશલાશ્ચ રક્ષન્તિ શાસ્તુશરણં સદ અપ્રમત્તાઃ

દુઃખાનિ યાનિ નિરયે તથ તિર્યગ્યોનૌ યમશાસને જ્વલિત-આશ્રયનિત્યુપેતાઃ ।
સર્વે તિ પાપપતિતાક્ષલાઃ પ્રભોન્તિ હન્તા વિવર્જિય ઉપેમહિ સત્યધર્મમ્

આદૌ ચ કૃત્વ મનુજાનુપપત્તિમિષ્ટાં યાવદ્ભવાગ્રમરણાશયધ્યાનુ શિક્ષામ્ ।
પ્રત્યેકયાનમથ શ્રાવકબુદ્ધયાનં સર્વે ઇતો દશભિ શુક્લપથૈઃ પ્રભૂતમ્

એવં વિદિત્વ સતતં વિદુ અપ્રમત્તાઃ શીલેષુ સંસ્થિત પરાનપિ સ્થાપયન્તિ ।
ભૂયોત્તરે કરુણ-આશયતાભ્યુપેતાઃ સત્ત્વાન્ વિદિત્વ દુખિતાન્ કૃપ સંજનેન્તિ

હન્તો વિદૃષ્ટિપતિતા ઇમિ બાલબુદ્ધી ક્રોધોપનાહદ્રુતચિત્ત વિવાદપ્રાપ્તાઃ ।
સતતં અતૃપ્ત વિષયે ભુયુ પ્રાર્થયન્તિ ત્રિનિદાન સત્ત્વ પરિમોચયિતવ્ય એતે

મહ-અન્ધકારતમસાવૃત મોહછન્નાઃ કાન્તારમાર્ગપતિતા મહદૃષ્ટિજાલે ।
સંસારપઞ્જરગતા રિપુ ધર્ષયન્તિ મોક્ષામ્યહં નમુચિપઞ્જરમધ્યપ્રાપ્તાન્

ક્લેશોર્મિભિહ્રિયત ઓઘચતુર્નિમગ્ના ત્રૈધાતુકે દુખશતૈઃ પરિપીડ્યમાનાઃ ।
સ્કન્ધાલયાભ્યુપગતા વૃત-આત્મસંજ્ઞા તેષાર્થિ યુજ્યમિ અહં દુખમોચનાર્થમ્

અવસૃજ્ય શ્રેષ્ઠપ્રવરં ઇમ બુદ્ધજ્ઞાનં સતિ એવ નિઃસરણિ હીનમતિં જનેન્તિ ।
સ્થાપેમિ તાન્ વિમલજ્ઞાનિ તથાગતાનાં વીર્યારભન્તિ અતુલં વિદુ બોધિહેતોઃ

અત્ર સ્થિતા ગુણશતોપચિતા મહર્ષિ પશ્યન્તિ નૈકસુગતાનપિ પૂજયન્તિ ।
તેષાં શુભં ભુયુ ઉત્તપ્યતિ કલ્પકોટ્યાં કાસીસકાઞ્ચનવરં ચ યથા નિક્ષિપ્તમ્

અત્ર સ્થિતા જિનસુતા નૃપચક્રવર્તિ ભૂત્વા પ્રણેન્તિ દશભિઃ કુશલેભિ સત્ત્વાન્ ।
યચ્ચૈવ સંચિ શુભસંચય સંચિનન્તિ ત્રાતા ભવેમ જગતો દશભિર્બલાઢ્યૈઃ

આકાઙ્ક્ષમાણ વિજહિત્વ ચ રજભોગાન્ પ્રવ્રજ્ય શાસનવરે ઉપગમ્ય ધીરાઃ ।
વીર્યાન્વિતા લભિય શ્રેષ્ઠવરં સમાધિં બુદ્ધા સહસ્ર પરિપૂર્ણ ક્ષેણે દૃશન્તિ

એવંવિધા ગણનયા ભુયુ અન્ય નેકા આદર્શયન્તિ વૃષભી સ્થિત અત્ર ભૂમૌ ।
અત ઉત્તરિ પ્રણિધિજ્ઞાનવરાભ્યુપેતા નૈકા વિકુર્વિતવિધૌ વિનયન્તિ સત્ત્વાન્

ઇત્યેષા દ્વિતિયા ભૂમિર્નિર્દિષ્ટા સુગતાત્મજાઃ । સર્વલોકહિતૈષીણાં બોધિસત્ત્વાનનુત્તમા