ચન્દ્રાલોક · અધ્યાય 4

શ્લેષો વિઘટમાનાર્થ ઘટમાનત્વવર્ણનમ્
સ તુ શાબ્દઃ સજાતીયૈઃ શબ્દૈર્ બન્ધઃ સુખાવહઃ ॥

ઉલ્લસત્તનુતાં નીતે ઽનન્તે પુલકકણ્ટકૈઃ
ભીતયા માનવત્યૈવ શ્રિયાશ્લિષ્ટં હરિં સ્તુમઃ ॥

યસ્માદ્ અન્તઃસ્થિતઃ સર્વઃ સ્વયમ્ અર્થો ઽવભાસતે
સલિલસ્યેવ સૂક્તસ્ય સ પ્રસાદ ઇતિ સ્મૃતઃ ॥

સમતાલ્પસમાસત્વં વર્ણાદ્યૈસ્ તુલ્યતાથ વા
શ્યામલા કોમલા બાલા રમણં શરણં ગતા ॥

સમાધિર્ અર્થમહિમા લસદ્ઘનરસાત્મના
સ્યાદ્ અન્તર્વિશતા યેન ગાત્રમઙ્કુરિતં સતામ્ ॥

માધુર્યં પુનરુક્તસ્ય વૈચિત્ર્યં ચારુતાવહમ્
વયસ્ય પશ્ય પશ્યાસ્યાશ્ ચઞ્ચલં લોચનાઞ્ચલમ્ ॥

ઓજઃ સ્યાત્ પ્રૌઢિર્ અર્થસ્ય સંક્ષેપો વાતિભૂયસઃ
રિપું હત્વા યશઃ કૃત્વા ત્વદસિઃ કોશમ્ આવિશત્ ॥

સૌકુમાર્યમ્ અપારુષ્યં પર્યાયપરિવર્તનાત્
સ કથાશેષતાં યાતઃ સમાલિઙ્ગ્ય મરુત્સખમ્ ॥

ઉદારતા તુ વૈદગ્ધ્યમ્ અગ્રામ્યત્વાત્ પૃથઙ્મતા
માનં મુઞ્ચ પ્રિયે કિંચિલ્ લોચનાન્તમ્ ઉદઞ્ચય ॥

શૃઙ્ગારે ચ પ્રસાદે ચ કાન્ત્યર્થવ્યક્તિસંગ્રહઃ
અમી દશ ગુણાઃ કાવ્યે પુંસિ શૌર્યાદયો યથા ॥

તિલકાદ્યમ્ ઇવ સ્ત્રીણાં વિદગ્ધહૃદયઙ્ગમમ્
વ્યતિરિક્તમ્ અલઙ્કારં પ્રકૃતેર્ ભૂષણં ગિરામ્ ॥

વિચિત્રલક્ષણો ન્યાસો નિર્વાહઃ પ્રૌઢિર્ ઔચિતી
શાસ્ત્રાન્તરરહસ્યોક્તિઃ સંગ્રહો દિક્ પ્રદર્શિતા ॥

મહાદેવઃ સત્રપ્રમુખમખવિદ્યૈકચતુરઃ સુમિત્રા તદ્ભક્તિપ્રણિહિતમતિર્ યસ્ય પિતરૌ
ચતુર્થસ્ તેનાસૌ સુકવિજયદેવેન રચિતે ચિરં ચન્દ્રાલોકે સુખયતુ મયૂખઃ સુમનસઃ ॥