બૃહત્પારાશરહોરાશાસ્ત્રમ્ · અધ્યાય 96

અથ પ્રસવવિકારશાન્ત્યધ્યાયઃ

અથાઽહં સમ્પ્રવક્ષ્યામિ વિકારં પ્રસવોદ્ભવમ્ ।
યેનાઽરિષ્ટં સમસ્તસ્ય ગ્રામસ્ય ચ કુલસ્ય ચ

અત્યલ્પે વાઽધિકે કાલે પ્રસવો યદિ જાયતે ।
હીનાઙ્ગોવાઽધિકાઙ્ગો વા વિશિરા દ્વિશિરાસ્તથા

નાર્યા પશ્વાકૃતિર્વાપિ પશુષ્વપિ નરાકૃતિઃ ।
પ્રસવસ્ય વિકારોઽયં વિનાશાયોપજાયતે

યસ્ય સ્ત્રિયાઃ પશુનાં વા વિકારાઃ પ્રસવોદ્ભવઃ ।
અનિષ્ટં ભવને તસ્ય કુલેઽપિ ચ મહદ્ ભવેત્

તદ્દોષપરિહારાર્થં શાન્તિઃ કાર્યા પ્રયત્નતઃ ।
સ્ત્રી વા ગૌવંડવા વાપિ પરિત્યાજ્યા હિતાર્થિના

નાર્યાઃ પઞ્ચદશે વર્ષે જન્મતઃ ષોડશોઽપિ વા ।
ગર્ભો વા પ્રસવો વાઽપિ ન શુભાય પ્રજાયતે

સિંહરાશિસ્થિતેઽર્ક ગૌનક્રસ્થે મહિષી તથા ।
પ્રસૂતા સ્વામિનં હન્તિ સ્વયં ચાપિ વિનશ્યતિ

બ્રાહ્મણાય પ્રદદ્યાત્ તાં શાન્તિં વાપિ સમાચરેત્ ।
બ્રહ્મવિષ્ણુમહેશાનાં ગ્રહાણાં ચૈવ પૂજનમ્

સર્વં હોમાદિકં કર્મ કુર્યાત્ ત્રિતરશાન્તિવત્ ।
તતો ગૃહો સુખી ભૂત્વા સર્વપાપૈઃ પ્રમુચ્યતે

એવં ત્વરિષ્ટે સમ્પ્રાપ્તે નરઃ શાન્તિં કરોતિ યઃ ।
સર્વાન્ કામાનવાપ્નોતિ ચિરજીવી સુખી ચ સઃ