બૃહત્પારાશરહોરાશાસ્ત્રમ્ · અધ્યાય 90

અથ સંક્રાન્તિજન્મશાન્ત્યધ્યાયઃ

ઘોરાધ્વાંક્ષીમહોદર્યો મન્દા મન્દાકિની તથા ।
મિશ્રા ચ રાક્ષસી સૂર્યસંક્રાન્તિઃ સૂર્યવાસરાત્

સંક્રાન્તૌ ચ નરો જાતો ભવેદ્ દારિદ્ર્ય દુઃખભાક્ ।
શાન્ત્યા સુખમવાપ્નોતિ તતઃ શાન્તિવિધિ બ્રુવે

નવગ્રહમખં કુર્યાત્ તસ્ય દોષોપશાન્તયે ।
ગૃહસ્ય પૂર્વદિગ્ભાગે ગોમયેનોપલિપ્ય ચ

સ્વલંકૃતપ્રદેશે તુ બ્રીહિરાશિં પ્રકલ્પયેત્ ।
પઞ્ચદ્રોણમિતં ધાન્યૈસ્તદર્ધં તણ્ડુલૈસ્તથા

તદર્ધં ચ તિલૈઃ કુર્યાદ્રાશિં ચ દ્વિજસત્તમ ।
પૃથક્ ત્રિતયરાશૌ તુ લિખેદષ્ટદલં બુધૈઃ

પુણ્યાહં વાચયિત્વા તુ આચાર્યં વૃણુયાત્ પુરા ।
ધર્મજ્ઞં મન્ત્રતત્ત્વજ્ઞં શાન્તિકર્મણિ કોવિદમ્

રાશિષુ સ્થાપયેત્ કુમ્ભાનવ્રણાન્ સુમનોહરાન્ ।
તીર્થોદકેન સમ્પૂર્ય સમૃદૌષધપલ્લવમ્

પંચગવ્યં ક્ષિપેત્તત્ર વસ્ત્રયુગ્મેન વેષ્ટયેત્ ।
કુમ્ભોપરિ ન્યસેત્ પાત્રં સૂક્ષ્મવસ્ત્રેણ વેષ્ટિતમ્

પ્રતિમાં સ્થાપયેત્ તત્ર સાધિપ્રત્યધિદૈવતામ્ ।
અધિદૈવં ભવેત્ સૂર્યશ્ચન્દ્રઃ પ્રત્યધિદૈવતમ્

ચન્દ્રાદિત્યાકૃતી પાર્શ્વે મધ્યે સંક્રાન્તિમર્ચયેત્ ।
પ્રતિમાં પૂજને પૂર્વં વસ્ત્રયુગ્મં નિવેદયેત્

તતો વ્યાહૃતિપૂર્ર્વેણ તત્તન્મન્ત્રેણ પૂજયેત્ ।
ત્રૈયમ્બકેણ મન્ત્રેણ પ્રધાનપ્રતિભાં પૂજયેત્

ઉત્સૂર્ય ઇતિ મન્ત્રેણ સૂર્યપૂજાં સમાચરેત્ ।
આપ્યાયસ્વેતિ મન્ત્રેણ ચન્દ્રપૂજાં સમાચરેત્

ઉપચારૈઃ ષોડશભિર્યદ્વા પઞ્ચોપચારકૈઃ ।
મૃત્યુંજયન મન્ત્રેણ પ્રધાનપ્રતિમાં સ્પૃશન્

અષ્ટોત્તરસહસ્રં ચાઽપ્યષ્ટોત્તરશતં જપેત્ ।
અથાઽષ્ટાવિંશતિં વાપિ જપેન્મન્ત્રં સ્વશક્તિતઃ

કુમ્ભેભ્યઃ પશ્ચિમે દેશે સ્થણ્ડિલેઽગ્નિં પ્રકલ્પયેત્ ।
સ્વગૃહ્યોક્તવિધાનેન કારયેત્ સંસ્કૃતાનલમ્

ત્રયમ્બકેન મન્ત્રેણ સમિદાજ્યચરૂન્ હુનેત્ ।
અષ્ટોત્તરસહસ્રં વા અષ્ટોત્તરશતં યથા

અષ્ટવિંશતિમેવાપિ કુર્યાદ્ હોમં સ્વશક્તિતઃ ।
મૃત્યુંજયેન મન્ત્રેણ તિલહોમશ્ચ કારયેત્

તતઃ સ્વિષ્ટકૃતં હુત્વાઅભિષેકં ચ કારયેત્ ।
બ્રહ્મણાન્ ભોજયેત્ પશ્ચાદેવં શાન્તિમવાપ્નુયાત્