બૃહત્પારાશરહોરાશાસ્ત્રમ્ · અધ્યાય 54

અથ કુજદશાન્તર્દશાફલાધ્યાયઃ

કુજે સ્વાન્તર્ગતે વિપ્ર લગ્નાત્કેન્દ્રત્રિકોણગે ।
લાભે વા શુભસંયુક્તે દુષ્ચિક્યે ધનસંયુતે

લગ્નાધિપેન સંયુક્તે રાજાઽનુગ્રહવૈભવમ્ ।
લક્ષ્મીકટોક્ષચિહ્નાનિ નષ્ટરાજ્યાર્થલાભકૃત્

પુત્રોત્સવાદિસન્તોષો ગૃહે ગોક્ષીરસઙ્કલમ્ ।
સ્વોચ્ચે વા સ્વર્ક્ષગે ભૌમે સ્વાંશે વા બલસંયુતે

ગૃહક્ષેત્રાભિવૃદ્ધિશ્ચ ગોમહિષ્યાદિલાભકૃત્ ।
મહારાજપ્રસાદેન સ્વેષ્ટસિદ્ધિઃ સુખાવહા

અથાઽષ્ટમવ્યયે ભૌમે પાપદૃગ્યોગસંયુતે ।
મૂત્રકૃર્ચ્છાદિરોગશ્ચ કષ્ટાધિક્યં વ્રણાદ્ભયમ્

ચૌરાહિરાજપીડા ચ ધનધાન્યપરુક્ષયઃ ।
દ્વિતીયે દ્યૂનનાથે તુ દેહજાડ્યં મનોવ્યથા

તદ્દોષપરિહારાર્થં રુદ્રજાપ્યં ચ કારયેત્ ।
અનડ્વાહં પ્રદદ્વાચ્ચ કુજદોષનિવૃત્તયે

તેન તુષ્ટો ભવેદ્ ભૌમઃ શઙ્કરસ્ય પ્રસાદતઃ ।
આરોગ્યં કુરુતે તસ્ય સર્વસમ્પત્તિદાયકમ્

કુજસ્યાન્તર્ગતે રાહૌ સ્વોચ્ચે મૂલત્રિકોણગે ।
શુભૈર્યુક્તે શુભૈર્દૃષ્ટે કેન્દ્રલાભતૃકોણગે

તત્કાલે રાજસમ્માનં ગૃહભૂમ્યાદિલાભકૃત્ ।
કલત્રપુત્રલાભઃ સ્યાદ્વ્યવસાયાત્ફલાધિકમ્

ગઙ્ગાસ્નાનફલાવાપ્તિં વિદેશગમનં તથા ।
તથાઽષ્ટમવ્યયે રાહૌ પાપયુક્તેઽથ વીક્ષિતે

ચૌરાહિવ્રણભીતિશ્ચ ચતુષ્પાજ્જીવનશનમ્ ।
વાતપિત્તરુજોભીતિઃ કારાગૃહનિવેશનમ્

ધનસ્થાનગતે રાહૌ ધનનાસં મહદ્ભયમ્ ।
સપ્તમસ્થાનગે વાઽપિ હ્યપમૃત્યુભયં મહત્

નાગપૂજાં પ્રકુર્વીત દેવબ્રાહ્મણભોજનં ।
મૃત્યુઞ્જયજપં કુર્યાદાયુરારોગ્યલબ્ધયે

કુજસ્યાન્તર્ગતે જીવે ત્રિકોણે કેન્દ્રગેઽપિ વા ।
લાભે વા ધનસંયુક્તે તુઙ્ગાંશે સ્વાંશગેપિ વા

સત્કીર્તી રાજસમ્માનં ધનધાન્યસ્ય વૃદ્ધિકૃત્ ।
ગૃહે કલ્યાણસમ્પત્તિર્દારપુત્રાદિલાભકૃત્

દાયેશાત્કેન્દ્રરાશિસ્થે ત્રિકોણે લાભગેઽપિ વા ।
ભાગ્યકર્માધિપૈર્યુક્તે વાહનાધિપસંયુતે

લગ્નાધિપસમાયુક્તે શુભાંશે શુભવર્ગગે ।
ગૃહક્ષેત્રાભિવૃદ્ધિશ્ચ ગૃહે કલ્યાણસમ્પદઃ

દેહારોગ્યં મહત્કીર્તિગૃહે ગોકુલસંગ્રહઃ ।
ચતુષ્પાજ્જીવલાભઃ સ્યાદ્વ્યવસાયાત્ફલાધિકમ્

કલપુત્રસૌખ્યં ચ રાજસમ્માનવૈભવમ્ ।
ષષ્ઠાષ્ટમવ્યયે જીવે નીચે વાસ્તંગતે સતિ

પાપગ્રહેણ સંયુક્તે દૃષ્ટે વા દુર્બલે સતિ ।
ચૌરાહિનૃપભીતિશ્ચ પિત્તરોગાદિસમ્ભવમ્

પ્રેતબાધા ભૃત્યનાશઃ સોદરાણાં વિનાશનમ્ ।
દ્વિતીયદ્યૂનનાથે તુ હ્યપમૃત્યુજ્વરાદિકમ્ ।
તદ્દોષપરિહારાર્થં શિવસાહસ્રકં જપેત્

કુજસ્યાન્તર્ગતે મન્દે સ્વર્ક્ષે કેન્દ્રત્રિકોણગે ।
મૂલત્રિકોણકેન્દ્રે વા તુઙ્ગાંશે સ્વાંશગે સતિ

લગ્નાધિપતિના વાપિ શુભદૃષ્ટિયુતેઽસિતે ।
રાજ્યસૌખ્યં યશોવૃદ્ધિઃ સ્વગ્રામે ધાન્યવૃદ્ધિકૃત્

પુત્રપૌત્રસમાયુક્તો ગૃહે ગોધનસંગ્રહઃ ।
સ્વવારે રાજસમ્માનં સ્વમાસે પુત્રવૃદ્ધિકૃત્

નીચાદિક્ષેત્રગે મન્દે તથાઽષ્ટવ્યયરાશિગે ।
મ્લેચ્છવર્ગપ્રભુભયં ધનધન્યાદિનાશનમ્

નિગડે બન્ધનં વ્યાધિરન્તે ક્ષેત્રનાશકૃત્ ।
દ્વિતીયદ્યૂનનાથે તુ પાપયુક્તે મહદ્ભયમ્

ધનનાશશ્ચ સઞ્ચારે રાજદ્વેષો મનોવ્યથા ।
ચૌરાગ્નિનૃપપીડા ચ સહોદરવિનાશનમ્

બન્ધુદ્વેષઃ પ્રમાદ્યૈશ્ચ જીવહાનિશ્ચ જાયતે ।
અકસ્માચ્ચ મૃતેર્ભીતિઃ પુત્રદારાદિપીડનમ્

કારાગૃહાદિભીદિશ્ચ રાજદણ્ડો મહદ્ભયમ્ ।
દાયેશાત્કેન્દ્રરાશિસ્થે લાભસ્થે વા ત્રિકોણગે

વિદેશયાનં લભતે દુષ્કીર્તિર્વિવિધા તથા ।
પાપકર્મરતો નિત્યં બહુજીવાદિહિંસકઃ

વિક્રયઃ ક્ષેત્રહાનિશ્ચ સ્થાનભ્રંશો મનોવ્યથા ।
રણે પરાજયશ્ચૈવ મૂત્રકૃર્ચ્છાન્મહદ્ભયમ્

દાયેશાદથ રન્ધ્રે વા વ્યયે વા પાપસંયુતે ।
તદ્ભુક્તૌ મરણં જ્ઞેયં નૃપચૌરાદિપીડનમ્

વાતપીડા ચ શૂલાદિજ્ઞાતિશ્ત્રુભયં ભવેત્

તદ્દોષપરિહારાર્થં મૃત્યુઞ્જયજપં ચરેત્ ।
તતઃ સુખમવાપ્નોતિ શઙ્કરસ્ય પ્રસાદતઃ

કુજસ્યાન્તર્ગતે સૌમ્યે લગ્નાત્કેન્દ્રત્રિકોણગે ।
સત્કથાશ્ચાઽજપાદાનં ધર્મબુદ્ધિર્મહદ્યશઃ

નીતિમાર્ગપ્રસઙ્ગશ્ચ નિત્યં મિષ્ટાન્નભોજનમ્ ।
વાહનામ્બરપશ્વાદિર્રાજકર્મ સુખાનિ ચ

કૃષિકર્મફલે સિદ્ધિર્વારણામ્બરભૂષણમ્ ।
નીચે વાસ્તઙ્ગતે વાપિ ષષ્ઠાષ્ટવ્યયગેઽપિ વા

હૃદ્રોગં માનહાનિશ્ચ નિગડં બન્ધુનાશનમ્ ।
દારપુત્રાર્થનાશઃ સ્યાચ્ચતુષ્પાજ્જીવનાશનમ્

દશાધિપેન સંયુક્તે શત્રુવૃદ્ધિર્મહદ્ભયમ્ ।
વિદેશગમનં ચૈવ નાનારોગાસ્તથૈવ ચ

રાજદ્વારે વિરોધશ્ચ કલહઃ સ્વજનૈરપિ ।
દાયેશાત્કેન્દ્રત્રિકોણે વા સ્વોચ્ચે યુક્તાર્થલાભકૃત્

અનેકધનનાથત્વં રાજસમ્મનમેવ ચ ।
ભૂપાલયોગં કુરુતે ધનમ્બરવિભૂષણમ્

ભૂરવાદ્યમૃદંગાદિ સેનાપત્યં મહત્સુખમ્ ।
વિદ્યાવિનોદવિમલા વસ્ત્રવાહનભૂષણમ્

દારપુત્રાદિવિભવં ગૃહે લક્ષ્મીઃ કટાક્ષકૃત્ ।
દાયેશાત્ષષ્ઠરિઃફસ્થે રન્ધ્રે વા પાપસંયુતે

તદ્દાયે માનોહાનિઃ સ્યાત્ક્રૂરબુદ્ધિસ્તુ ક્રૂરવાક્ ।
ચૌરાગ્નિનૃપપીડા ચ માર્ગે દસ્યુભયાદિકમ્

અકસ્માત્કલહશ્ચૈવ બુધમુક્તૌ ન સંશયઃ ।
દ્વિતીયદ્યૂનનાથે તુ મહાવ્યાધિર્ભયઙ્કરઃ

અશ્વદાનં પ્રકુર્વીત વિષ્ણોર્નામસહસ્રકમ્ ।
સર્વસમ્પત્પ્રદં વિપ્ર સર્વારિષ્ટપ્રશાન્તયે

કુજસ્યાન્તર્ગતે કેતૌ ત્રિકોણે કેન્દ્રગેઽપિ વા ।
દિશ્ચિક્યે લાભગે વાઽપિ શુભયુક્તે શુભેક્ષિતે

રાજાનુગ્રહશાન્તિશ્ચ બહુસૌખ્યં ધનાગમઃ ।
કિઞ્ચિત્ફલં દશાદૌ તુ ભૂલાભઃ પુત્રલાભકૃત્

રાજસંલાભકાર્યાણિ ચતુષ્પાજ્જીવલાભકૃત્ ।
યોગકારકસંસ્થાને બલવીર્યસમન્વિતે

પુત્રલાભો યશોવૃદ્ધિર્ગૃહે લક્ષ્મીઃ કટાક્ષકૃત્ ।
ભૃત્યવર્ગધનપ્રાપ્તિઃ સેનાપત્યં મહત્સુખમ્

ભૂપાલમિત્રં કુરુતે યાગામ્બરાદિભૂષણમ્ ।
દાયેશાત્ષષ્ઠરિઃફસ્થે રન્ધ્રે વા પાપસંયુતે

કલહો દન્તરોગશ્ચ ચૌરવ્યાઘ્રાદિપીડનમ્ ।
જ્વરાતિસારકુષ્ઠાદિદારપુત્રાદિપીડનમ્

દ્વિતીયસપ્તમસ્થાને દેહે વ્યાધિર્ભવિષ્યતિ ।
અપમાનમનસ્તાપો ધનધાન્યાદિપ્રચ્યુતિમ્

કુજસ્યાન્તર્ગતે શુક્રે કેન્દ્રલાભત્રિકોણગે ।
સ્વોચ્ચે વા સ્વર્ક્ષગે વાઽપિશુભસ્થાનાધિપેઽથવા

રાજ્યલાભો મહત્સૌખ્યં ગજાશ્વામ્બરભૂષણમ્ ।
લગ્નાધિપેન સમ્બન્ધે પુત્રદારાદિવર્ધનમ્

આયુષો વૃદ્ધિરૈશ્વર્યં ભાગ્યવૃદ્ધિસુખં ભવેત્ ।
દાયેશાત્કેન્દ્રકોણસ્થે લાભે વા ધનગેઽપિ વા

તત્કાલે શ્રિયમાપ્નોતિ પુત્રલાભં મહત્સુખમ્ ।
સ્વપ્રભોશ્ચ મહત્સૌખ્યં ધનવસ્ત્રાદિલાભકૃત્

મહારજપ્રસાદેન ગ્રામભૂમ્યાદિલાભદમ્ ।
ભુક્ત્યન્તે ફલમાપ્નોતિ ગીતનૃત્યાદિલાભકૃત્

પુણ્યતીર્થસ્નાનલાભં કર્માધિપસમન્વિતે ।
પુણ્યધર્મદયાકૂપતડાગં કારયિષ્યતિ

દાયેશાદ્રન્ધ્રરિષ્ફસ્થે ષષ્ઠે વા પાપસંયુતે ।
કરોતિ દુઃખબાહુલ્યં દેહપીડાં ધનક્ષયં

રાજચૌરાદિભીતિઞ્ચ ગૃહે કલહમેવ ચ ।
દારપુત્રાદિપીડાં ચ ગોમહિષ્યાદિનાશકૃત્

દ્વિતીયદ્યૂનનાથે તુ દેહબાધા ભવિષ્યતિ ।
શ્વેતાં ગાં મહિષીં દદ્યાદાયુરારોગ્યવૃદ્ધયે

કુજસ્યાન્તર્ગતે સૂર્યે સ્વોચ્ચે સ્વક્ષેત્રકેન્દ્રગે ।
મૂલત્રિકોણલાભે વા ભાગ્યકર્મેશસંયુતે

તદ્ભુક્તૌ વાહનં કીર્તિં પુત્રલાભં ચ વિન્દતિ ।
ધનધાન્યસમૃદ્ધિઃ સ્યાદ્ ગૃહે કલ્યાણસમ્પદઃ

ક્ષેમારોગ્યં મહદ્ધૈર્યં રાજપૂજ્યં મહત્સુખમ્ ।
વ્યવસાયાત્ફલાધિક્યં વિદેશે રાજદર્શનમ્

દાયેશાત્ષષ્ઠરિષ્ફે વા વ્યયે વા પાપસંયુતે ।
દેહપીડા મનસ્તાપઃ કાર્યહાનિર્મહદ્ભયમ્

શિરોરોગો જ્વરાદિશ્ચ અતિસારમથાપિ વા ।
દ્વિતીયદ્યૂનનાથે તુ સર્પજ્વરવિષાદ્ભયમ્

સુતપીડાભયં ચૈવ શાન્તિ કુર્યાદ્યથાવિધિ ।
દેહારોગ્યં પ્રકુરુતે ધનધાન્યચયં તથા

કુજસ્યાન્તર્ગતે ચન્દ્રે સ્વોચ્ચે સ્વક્ષેત્રકેન્દ્રગે ।
ભાર્યવાહનકર્મેશલગ્નાધિપસમન્વિતે

કરોતિ વિપુલં રાજ્યં ગન્ધમાલ્યામ્બરાદિકમ્ ।
તડાગં ગોપુરાદીનાં પુણ્યધર્માદિસંગ્રહમ્

વિવાહોત્સવકર્માણિ દારપુત્રાદિસૌખ્યકૃત્ ।
પિતૃમાતૃસુખાવાપ્તિં ગૃહે લક્ષ્મીઃ કટાક્ષકૃત્

મહારજપ્રસાદેન સ્વેષ્ટસિદ્ધિસુખાદિકમ્ ।
પૂર્ણે ચન્દ્રે પૂર્ણફલં ક્ષીણે સ્વલ્પફલ્ં ભવેત્

નીચારિસ્થઽષ્ટમે ષષ્ઠે દાયેશાદ્રિપુરન્ધ્રકે ।
મરણં દારપુત્રાણાં કષ્ટં ભૂમિવિનાશનમ્

પશુધાન્યક્ષયશ્ચૈવ ચૌરાદિરણભીતિકૃત્ ।
દ્વિતીયદ્યૂનનાથે તુ હ્યપમૃત્યુર્ભવિષ્યતિ

દેહજાડ્યં મનોદુઃખં દુર્ગા લક્ષ્મીજપં ચરેત્ ।
શ્વેતાં ગાં મહિષીં દદ્યાદનેમારોગ્યમાદિશેત્