બૃહત્પારાશરહોરાશાસ્ત્રમ્ · અધ્યાય 5

અથાહં સમ્પ્રવક્ષ્યામિ તવાગ્રે દ્વિજસત્તમ।
ભાવહોરાઘટીસંજ્ઞલગ્નાનીતિ પૃથક્‌ પૃથક્‌

સૂર્યોદયં સમારભ્ય ઘટિકાનાં તુ પંચકમ્‌।
પ્રયાતિ જન્મપર્યન્તં ભાવલગ્નં તદેવ હિ

ઇષ્ટં ઘટ્યાદિકં ભક્ત્વા પંચભિર્ભાદિજં ફલમ્‌।
યોજ્યમૌદયિકે સૂર્યે ભાવલગ્નં સ્ફુટં ચ તત્‌

તથા સાર્ધદ્વિઘટિકામિતાદર્કોદયાદ્‌ દ્વિજ।
પ્રયાતિ લગ્નં તન્નામ હોરાલગ્નં પ્રચક્ષતે

ઇષ્ટઘટ્યાદિકં દ્વિઘ્નં પઞ્ચાપ્તં ભાદિકં ચ યત્‌।
યોજ્યમૌદયિકે ભાનૌ હોરાલગ્નં સ્ફુટં હિ તત્‌

કથયામિ ઘટીલગ્નં સૃનુ ત્વં દ્વિજસત્તમ।
સૂર્યોદયત્‌ સમારભ્ય જન્મકાલાવધિ ક્રમાત્‌

એકૈકઘટિકામાનાત્‌ લગ્નં યદ્યાતિ ભાદિકમ્‌।
તદેવ ઘટિકાલગ્નં કથિતં નારદાદિભિઃ

રાશયસ્તુ ઘટીતુલ્યાઃ પલાર્ધપ્રમિતાંશકાઃ।
યોજ્યમૌદયિકે ભનૌ ઘટીલગ્નં સ્ફુટં હિ તત્‌

ક્રમાદેષાં ચ લગ્નાનાં ભાવકોષ્ઠં પૃથક્‌ લિખેત્‌।
યે ગ્રહા યત્ર ભે તત્ર તે સ્થાપ્યા રાશિલગ્નવત્‌

વર્ણદાખ્યદશાં ભાનાં કથયામ્યથ તેઽગ્રતઃ।
યસ્ય વિજ્ઞાનમાત્રેણ વદેદાયુર્ભવં ફલમ્‌

ઓજલગ્નપ્રસૂતાનાં મેષાદેર્ગણયેત્‌ ક્રમાત્‌।
સમલગ્નપ્રસૂતાનામ્ મીનાદેરપસવ્યતઃ

મેષમીનાદિતો જન્મલગ્નાન્તં ગણયેત્‌ સુધીઃ।
તથૈવ હોરાલગ્નાન્તં ગણયિત્વા તતઃ પરમ્‌

ઓજત્વેન સમત્વેન સયાતીયે ઉભે યદિ।
તર્હિ સંખ્યે યોજયીત વૈજાત્યે તુ વિયોજયેત્‌

મેષમીનાદિતઃ પશ્ચાદ્યો રાશિઃ સ તુ વર્ણદઃ।
એતત્પ્રયોજનં વક્ષ્યે સૃણુ ત્વં દ્વિજપુંગવઃ।
હોરાલગ્નભયોર્નેયા સબલાદ્‌વર્ણદા દશા

યત્‌સંખ્યે વર્ણદો લગ્નાત્‌ તત્તત્સંખ્યાક્રમેણ તુ।
ક્રમયુત્ક્રમભેદેન દશા સ્યાદોજયુગ્મયો

પાપદૃષ્ટિઃ પાપયોગો વર્ણ્દસ્ય ત્રિકોણકે।
યદિ સ્યાત્‌ તર્હિ તદ્રાશિપર્યન્તં તસ્ય જીવનં

રુદ્રશૂલે યથૈવાયુર્મરણાદિ નિરૂપ્યતે।
તથૈવ વર્ણદસ્યપિ ત્રિકોણે પાપસંગમે

વર્ણદાદપિ ભો વિપ્ર લગ્નવચ્ચિન્તયેત્‌ ફલમ્‌।
વર્ણદાત્‌ સપ્તમાદ્‌ ભાવત્‌ કલત્રાયુર્વિચિન્તયેત્‌

એકાદશાદગ્રજસ્ય તૃતીયાત્તુ યવીયસઃ।
સુતસ્ય પંચમે વિદ્યાન્માતુશ્ચતુર્થભાવત્‌

પિતુશ્ચ નવમાદ્‌ ભાવાદયુરેવં વિચિન્તયેત્‌।
શૂલરાશિદશાયાં વૈ પ્રવલાયામરિષ્ટકમ્‌

એવં તન્વાદિભાવાનાં કર્તવ્યા વર્ણા દશા।
પૂર્વવચ્ચ ફલં જ્ઞેયં દેહિનાં ચ શુભાશુભમ્‌

ગ્રહનાં વર્ણદા નૈવ રાશીનાં વર્ણ્દા દશા।
કૃત્વાર્કધા રાશિદશાં ક્રમાદન્તર્દશાં વદેત્‌

એવમન્તર્દશાદિં ચ કૃત્વા તેન ફલં વદેત્‌।
ક્રમવ્યુત્ક્રમભેદેન લિખેદન્તર્દશામપિ

સ્વસ્વદેશોદ્‌ભવં લગ્નં જન્મલગ્નમિમિહોચ્યતે।
ભાવહોરાદિલગ્નાનાં સર્વત્રૈવ સમક્રિયા