બૃહત્પારાશરહોરાશાસ્ત્રમ્ · અધ્યાય 40

અથ રાજસમ્બન્ધયોગાધ્યાયઃ

રાજ્યનાથે જનુર્લગ્નાદમાત્યેશયુતેક્ષિતે।
અમાત્યકારકેણાપિ પ્રધાનત્વં નૃપાલયે

લાભેશવીક્ષિતે લાભે પાપદૃગ્યોગવર્જિતે।
રાજ્યભાવે તદા વિપ્ર પ્રધાનત્વં નૃપાલયે

અમાત્યકારકેણાપિ કારકેન્દ્રેણ સંયુતે।
તીવ્રબુદ્ધિયુતો બાલો રાજમન્ત્રી ભવેદ્‌ ધ્રુવમ્‌

અમાત્યકારકે વિપ્ર સબલે શુભસંયુતે।
સ્વક્ષેત્રેસ્વોચ્ચગે વાપિ રાજમન્ત્રી ભવેદ્‌ ધ્રુવમ્‌

અમાત્યકારકે લગ્ને પઞ્ચમે નવમેઽપિ વા।
રાજમન્ત્રી ભવેદ્‌ બાલો વિખ્યાતો નાઽત્રસંશયઃ

આત્મકારકતઃ કેન્દ્રે કોણે વાઽમાત્યકારકે।
તદા રાજકૃપાયુક્તો જાતો રાજાશ્રિતઃ સુખી

કારકાચ્ચ તથારૂઢાત્‌ લગ્નાચ્ચ દ્વિજસત્તમ।
તૃતીયે ષષ્ઠભે પાપૈઃ સેનાધીશઃ પ્રજાયતે

કારકે કેન્દ્રે કોણેષુ સ્વતુઙ્ગે વા સ્વભે સ્થિતે।
ભાગ્યપેન યુતે દૃષ્ટે રાજમન્ત્રી ભવેદ્‌ ધ્રુવમ્‌

કારકે જન્મરાશીશે લગ્નગે શુભસંયુતે।
મન્ત્રિત્વે મુખ્યયોગોઽયં વાર્ધકેનાઽત્ર સંશયઃ

કારકે શુભસંયુક્તે પઞ્ચમે સપ્તમેઽપિ વા।
દશમે નવમે વાઽપિ ધનં રાજાશ્રયાદ્‌ ભવેત્‌

ભાગ્યભાવપદે લગ્ને કારકે નવમેઽપિ વા।
રાજસમ્બન્ધયોગોઽયં નિર્વિશંકં દ્વિજોત્તમ

લાભેશે લાભભાવસ્થે પાપદૃષ્ટિવિવર્જિતે।
કારકે શુભસંયુક્તે લાભસ્તસ્ય નૃપાલયાત્‌

લગ્નેશે રાજ્યભાવસ્થે રાજ્યેશે લગ્નસંસ્થિતે।
પ્રબલો રાજસમ્બન્ધયોગોઽયં પરિકીર્તિતઃ

કારકાત્‌ તુર્યંભાવસ્થૌ સિતેન્દૂ દ્વિજસત્તમ।
યસ્ય જન્મનિ જાતોઽયં રાજચિહ્નેન સંયુતઃ

લગ્નેશે કારકે વાઽપિ પઞ્ચમેશેન સંયુતે।
કેન્દ્રે કોણે સ્થિતે તસ્મિન્‌ રાજમિત્રં ભવેન્નરઃ