બૃહત્પારાશરહોરાશાસ્ત્રમ્ · અધ્યાય 29

અથ પદાધ્યાયઃ

કથ્યામ્યથા ભાવાનાં ખેટાનાં ચ પદં દ્વિજ।
તદ્વિશેષફલં જ્ઞાતું યથોક્તં પ્રાઙ્‌ મહર્ષિભિઃ

લગ્નાદ્‌ યાવતિથે રાશૌ તિષ્ઠેલ્લગ્નેશ્વરઃ ક્રમાત્‌।
તતસ્તાવતિથે રાશૌ લગ્નસ્ય પદમુચ્યતે

સર્વેષામાપ ભાવાનાં જ્ઞેયમેવં પદં દ્વિજ।
તનુભાવપદં તત્ર બુધા મુખ્યપદં વિદુઃ

સ્વસ્થાનં સપ્તમં નૈવં પદં ભવિતુમર્હતિ।
તસ્મિન્‌ પદત્વે વિજ્ઞેયં મધ્યં તુર્યં ક્રમાત્‌ પદમ્‌

યથા તુર્યસ્થિતે નાથે તુર્યમેવ પદં ભવેત્‌।
સપ્તમે ચ સ્થિતે નાથે વિજ્ઞેયં દશમં પદમ્‌

યસ્માદ્‌ યાવતિથે રાશૌ ખેટાત્‌ તદ્‌ભવનં દ્વિજ।
તતસ્તાવતિથં રાશિં ખેટારૂઢં પ્રચક્ષતે

દ્વિનાથદ્વિભયોરેવં વિજ્ઞેયં સબલાવધિ।
વિગણય્ય પદં વિપ્ર તતસ્તસ્ય ફલં વદેત્‌

અથાઽહં પદમાશ્રિત્ય ફલં કિઞ્ચિદ્‌ બ્રુવે દ્વિજ।
પદાદેકાદશે સ્થાને ગ્રહૈર્યુક્તોઽથવેક્ષિતે

ધનવાન્‌ જાયતે બાલસ્તથા સુખસમન્વિતઃ।
શુભયોગાત્‌ સુમાર્ગેણ ધનાપ્તિઃ પાપતોઽન્તથા

મિશ્રૈર્મિશ્રં ફલં જ્ઞેયં સ્વોચ્ચમિત્રાદિગેહગૈઃ।
બહુધા જાયતે લાભો બહુધા ચ સુખાગમઃ

પદાલ્લાભગૃહં યસ્ય પશ્યન્તિ સકલા ગ્રહાઃ।
રાજા વા રાજતુલ્યો વા સ જાતો નાત્ર સંશયઃ

પદાલ્લાભગૃહં પશ્યેદ્‌ વ્યયં કશ્ચિન્ન પશ્યતિ।
અવિધ્નેન સદા લાભો જાયતે દ્વિજસત્તમ

ગ્રહદૃગ્‌યોગબાહુલ્યે પદાદેકાદશે દ્વિજ।
સાર્ગલે ચાપિ તત્રાપિ બહ્વર્ગલસમાગમે

શુભગ્રહાર્ગલે વિપ્ર તત્રાપ્યુચ્ચગ્રહાર્ગલે।
શુભેન સ્વામિના દૃષ્ટે લગ્નભાગ્યાદિગેન વા

જાતસ્ય ભાગ્યપ્રાબલ્યં નિર્દિશેદુત્તરોત્તરમ્‌।
ઉક્તયોગેષુ ચેત્‌ ખેટે દ્વાદશં નૈવ પશ્યતિ

પદસ્થાનાદ્‌ વ્યયે વિપ્ર શુભપાપયુતેક્ષિતે।
વ્યયબાહુલ્યમિત્યેવં વિશેષોપાર્જનાત્‌ સદા

શુભગ્રહે સુમાર્ગેણ કુમાર્ગાત્‌ પાપખેચરે।
મિશ્રે મિશ્રફલં વાચ્યમેવં લાભોઽપિ લાભગે

પદારૂઢાદ્‌ વ્યયે શુક્રભાનુસ્વર્ભાનુભિર્યુતે।
રાજમૂલાદ્‌ વ્યયો વાચ્યશ્ચન્દ્રદૃષ્ટ્‌યા વિશેષતઃ

પદારૂઢાદ્‌ વ્યયે સૌમ્યે શુભખેટયુતેક્ષિતે।
જ્ઞાતિમધ્યે વ્યયો નિત્યં પાપદૃક્‌ કલહાદ્‌ વ્યયઃ

પદાદ્‌ વ્યયે સુરાચાર્યે વીક્ષિતે ચાન્યખેચરૈઃ।
કરમૂલાદ્‌ વ્યયો વાચ્યઃ સ્વસ્યૈવ દ્વિજસત્તમ

આરૂઢાદ્‌ દ્વાદશે સૌરે ધરાપુત્રેણ સંયુતે।
અન્યગ્રહેક્ષિતે વિપ્ર ભ્રાતૃવર્ગાદ્‌ ધનવ્યયઃ

આરૂઢાદ્‌ દ્વાદશે સ્થાને યે યોગાઃ કથિતા યથા।
લાભભાવે ચ તે યોગા લાભયોગકરાસ્તથા

આરૂઢાત્‌ સપ્તમે રાહુરથવા સંસ્થિતઃ શિખી।
કુક્ષિવ્યથાયુતો બાલઃ શિખિના પીડિતોથ વા

આરૂધાત્‌ સપ્તમે કેતુઃ પાપખેટયુતેક્ષિતઃ।
સાહસી શ્વેતકેશી ચ વૃદ્ધલિઙ્ગી ભવેન્નરઃ

પદાત્તુ સપ્તમે સ્થાને ગુરુશુક્રનિશાકરાઃ।
ત્રયો દ્વયમથૈકોઽપિ લક્ષ્મીવાન્‌ જાયતે જનઃ

સ્વતુઙ્ગે સપ્તમે ખેટઃ શુભો વાઽપ્યશુભઃ પદાત્‌।
શ્રીમાન્‌ સોઽપિ ભવેન્નુનં સત્કીર્તિસહિતો દ્વિજ

યે યોગાઃ સપ્તમે સ્થાને પદાશ્ચ કથિતા મયા।
ચિન્ત્યાસ્તથૈવ તે યોગા દ્વિતીયેઽપિ સદા દ્વિજ

ઉચ્ચસ્થો રૌહિણેયો વા જીવો વા શુક્ર એવ વા।
એવો બલી ધનગતઃ શ્રિયં દિશતિ દેહિનઃ

યે યોગાશ્ચ પદે લગ્ને યથાવદ્‌ ગદિતા મયા।
તે યોગાઃ કારકાંશેઽપિ વિજ્ઞેયા બાંધવર્જિતાઃ

આરૂઢાદ્‌ વિત્તભે સૌમ્યે સર્વદેશાધિપો ભવેત્‌।
સર્વજ્ઞો યદિ વા સ સ્યાત્‌ કવિર્વાદી ચ ભાર્ગવે

આરૂધાત્‌ કેન્દ્રકોણેષુ સ્થિતે દારપદે દ્વિજ।
લગ્નજાયાપદે વાપિ સબલગ્રહસંયુતે

સ્રીમાંશ્ચ જાયતે નૂનં દેશે વિખ્યાતિમાન્‌ ભવેત્‌।
ષષ્ઠેષ્ટમે વ્યયસ્થાને જાતો દારપદેઽધનઃ

પદે તત્સપ્તમે વાપિ કેન્દ્રે વૃદ્ધૌ ત્રિકોણકે।
સુવીર્યઃ સંસ્થિતઃ ખેતઃ ભાર્યાભર્તૃસુખપ્રદઃ

પદાદ્‌દારપદે ચૈવં કેન્દ્રે કોણે ચ સંસ્થિતે।
દ્વયોર્મૈત્રી ભવેન્નૂનં ત્રિકે વૈરં ન સંશયઃ

એવં લગ્નપદાદ્‌ વિપ્ર તનયાદિપદે સ્થિતે।
મિત્રામિત્રે વિજાનીયાલ્લાભાલાભૌ વિચક્ષણઃ

લગ્નદારપદે વિપ્ર મિથઃ કેન્દ્રગતે યદિ।
ત્રિલાભયોસ્ત્રિકોણે વા તથા રાજા ધરાધિપઃ

એવં લગ્નપદાદેવ ધનાદિપદતો દ્વિજ।
સ્થાનદ્વયં સમાલોક્ય જાતકસ્ય ફલં વદેત્‌