બૃહત્પારાશરહોરાશાસ્ત્રમ્ · અધ્યાય 28

અથેષ્ટકષ્ટાધ્યાયઃ

અથ ચેષ્ટમનિષ્ટં ચ ગ્રહાનાં કથયામ્યહમ્‌।
યદ્‌વશાચ્ચ પ્રયચ્છન્તિ શુભાઽશુભદશાફલમ્‌

સ્વનીચોનો ગ્રહ શોધ્યઃ ષડ્‌ભાધિક્યે ભમણ્ડલાત્‌।
સૈકો રાશિર્ભવેદુચ્ચરશ્મિર્દ્વિઘ્નાંશસંયુતઃ

ચેષ્ટાકેન્દ્રાચ્ચ તદ્રશ્મિં સાધયેદુચ્ચરશ્મિવત્‌।
ચેષ્ટાકેન્દ્રં કુજાદીનાં પૂર્વમુક્તં મયા દ્વિજ

સાયનાર્કસ્ત્રિભોઽર્કસ્ય વ્યર્કેન્દુશ્ચ વિધોસ્તથા।
ચેષ્ટાકેન્દ્રં રસાલ્પં તચ્ચક્રાચ્છોધ્યં રસાધિકે

ચેષ્ટોચ્ચરશ્મિયોગાર્ધં શુભરશ્મિઃ પ્રકીર્ત્યતે।
અષ્ટભ્યશ્ચ વિશુદ્ધોઽસાબશુભાખ્યશ્ચ કથ્યતે

ઉચ્ચચેષ્ટાકરાન્‌ વ્યેકાન્‌ દિગ્ભિર્હત્વા તુ યોજયેત્‌।
તદર્ધમિષ્ટસંજ્ઞં સ્યાત્‌ કષ્ટં તત્ષષ્ટિતશ્ચ્યુતમ્‌

સ્વોચ્ચે મૂલત્રિકોણે ચ સ્વભેઽધિસુહૃદીષ્ટભે।
સમભે શત્રુભે ચાધિશત્રુભે નીચભે ક્રમાત્‌

ષષ્ટિરિષ્વબ્ધયસ્ત્રિંશદાકૃતિસ્તિથયો ગજાઃ।
ચત્વારો દ્વૌ ચ શૂન્યં ચ શુભમેતત્ફલં ગૃહે

ષષ્ટિતઃ પતિતં ચૈતચ્છેષં સ્યાદશુભં ગૃહે।
તદર્ધમન્યવર્ગેષુ જ્ઞેયં વિપ્ર શુભાઽશુભમ્‌

પઞ્ચસ્વિષ્ટફલં ચાદ્યાત્‌ સમં ષષ્ઠે તતઃ પરમ્‌।
અશુભં ત્રિષુ વિજ્ઞેયમિતિ શાસ્ત્રેષુ નિશ્ચિતમ્‌

દિગ્‌બલં દિક્‌ફલં તસ્ય તથા દિનફલં ભવેત્‌।
તયોઃ ફલં શુભં પ્રોક્તમશુભં ષષ્ટિતશ્ચ્યુતમ્‌

શુભેઽધિકે શુભં જ્ઞેયમશુભં ત્વશુભેઽધિકે।
દશાફલં નભોગસ્ય તથા ભાવફલં દ્વિજ

બલૈઃ ષડ્‌ભિઃ સમોધિત્વા બલૈક્યેન ભજેત્‌ પૃથક્‌।
તત્તદ્‌બલફલાનિ સ્યુરશુભાનિ શુભાનિ ચ

શુભપાપફલાભ્યાં ચ હન્યાદ્‌ દૃષ્ટિં બલં તથા।
દૃષ્ટી તે શુભપાપાખ્યે બલે સ્યાતાં તદાહ્વયે

ભાવાનાં ચ ફલે પ્રોક્તે પતીનાં ચ ફલે ઉભે।
રાશૌ શુભનભોગશ્ચેદ્‌ ભાવસાધનસંભવમ્‌

ફલં તસ્ય શુભે યુઞ્જ્યાદશુભે વર્જયેત્‌ તથા।
પાપશ્ચેદન્યથા ચૈવં બલે દૃષ્ટ્યાં તથૈવ ચ

યુઞ્જ્યાદુચ્ચાદિગે ખેટે ફલં નીચાદિગે ત્યજેત્‌।
એવં શુભાઽશુભં જ્ઞાત્વા જાતકસ્ય ફલં વદેત્‌

અષ્ટવર્ગફલં ચૈવં સ્થાને ચ કરણેઽન્યથા।
રાશિદ્વયગતે ભાવે તદ્રાશ્યધિપતેઃ ક્રિયા

સ્થાનાધિકેન ભાવેન ભાવલાભઃ પ્રકીર્તિતઃ।
તત્સમાને ચ તદ્‌ભાવે તદાનીં સ્થાનદાન્‌ ગ્રહાન્‌

સંયોજ્યે સ્થાનસંખ્યાયા દલમેતત્સમં ફલં।
એવં સખેટભાવાનાં ફલં જ્ઞેયં શુભાઽશુભમ્‌