બ્રહ્મવૈવર્ત પુરાણ · અધ્યાય 4.54

નારદ ઉવાચ ॥
અતઃ પરં કિં રહસ્યં બભૂવ મુનિસત્તમ ॥
કથં જગામ ભગવાન્મથુરાં નન્દમન્દિરાત્

નન્દો દધાર પ્રાણાંશ્ચ વિચ્છેદેન હરેઃ કથમ્ ॥
ગોપાઙ્ગના યશોદા વા કૃષ્ણૈકતાનમાનસાઃ

ચક્ષુર્નિમેષવિચ્છેદાદ્યા રાધા ન હિ જીવતિ ॥
કથં દધાર સા દેવી પ્રાણાન્પ્રાણેશ્વરં વિના

યેયે તત્સઙ્ગિનો ગોપાઃ શયનાસનભોગતઃ ॥
કથં વિસસ્મરુસ્તે ચ તાદૃશં બાંધવં વ્રજે

શ્રીકૃષ્ણો મથુરાં ગત્વા કિં કિં કર્મ ચકાર સઃ ॥
સ્વર્ગારોહણપર્યન્તં તદ્ભવાન્વક્તુમર્હતિ

શ્રીનારાયણ ઉવાચ ॥
કંસશ્ચકાર યજ્ઞં ચ સમાહૂતો ધનુર્મખમ્ ॥
જગામ તત્ર ભગવાંસ્તેન રાજ્ઞા નિમન્ત્રિતઃ

રાજા પ્રસ્થાપયામાસ ચાક્રૂરં ભગવત્પ્રિયમ્ ॥
અક્રૂરઃ પ્રેરિતો રાજ્ઞા ગત્વા ચ નન્દમન્દિરમ્

શ્રીકૃષ્ણં ચ ગૃહીત્વા સ સગણં મથુરાં ગતઃ ॥
કૃષ્ણઃ શ્રીમથુરાં ગત્વા જઘાન નૃપતિં મુને

જઘાન રજકં ચૈવ ચાણૂરં મુષ્ટિકં ગજમ્ ॥
ચકાર પિત્રોરુદ્ધારં બાન્ધવાનાં ચ બાન્ધવઃ

કુબ્જયા સહ શૃઙ્ગારં કૃત્વા ચ કૌતુકેન ચ ॥
તં ચ પ્રસ્થાપયામાસ ગોલોકં ગોપિકાપતિઃ

ચકાર કૃપયા વિષ્ણુર્માલાકારસ્ય મોક્ષણમ્ ॥
કૃપયા ચોદ્ધવદ્વારા બોધયામાસ ગોપિકાઃ

તદોપનીતો ભગવાનવન્તીનગરં યયૌ ॥
ચકાર વિદ્યાગ્રહણં મુનેઃ સાંદીપનેર્ગુરોઃ

તતો જિત્વા જરાસન્ધં નિહત્ય યવનેશ્વરમ્ ॥
ઉગ્રસેનં ચ નૃપતિં ચકાર વિધિપૂર્વકમ્

ગત્વા સમુદ્રનિકટં નિર્માય દ્વારકાં પુરીમ્ ॥
જહાર રુક્મિણીં દેવીં જિત્વા નૃપતિસંઘકમ્

કાલિંદીં લક્ષ્મણાં શૈબ્યાં સત્યાં જાંબવતીં સતીમ્ ॥
મિત્રવિંદાં નાગ્નજિતીં સમુદ્વાહં ચકાર સઃ

નિહત્ય નરકં ભૂપં રણેન દારુણેન ચ ॥
પત્નીષોડશસાહસ્રં વિહારં ચ ચકાર સઃ

જહાર પારિજાતં ચ જિત્વા શક્રં ચ લીલયા ॥
ચિચ્છેદ બાણહસ્તાંશ્ચ જિત્વા ચ ચન્દ્રશેખરમ્

પૌત્રસ્ય મોક્ષણં કૃત્વા પુનરાગત્ય દ્વારકામ્ ॥
આત્માનં દર્શયામાસ લોકાંશ્ચ પ્રતિમન્દિરમ્

યોગે ચ વસુદેવસ્ય તીર્થયાત્રાપ્રસંગતઃ ॥
પ્રાણાધિષ્ઠાતૃદેવીં ચ દદર્શ તત્ર રાધિકામ્

પૂર્ણે ચ શતવર્ષે ચ સુદામ્નઃ શાપમોક્ષણે ॥
પુનર્યયૌ તયા સાર્દ્ધં પુણ્યં વૃન્દાવનં વનમ્

પુનશ્ચતુર્દશાબ્દં ચ તયા સાર્ધં જગત્પતિઃ ॥
ચકાર રાસં રાસે ચ પુણ્યક્ષેત્રે ચ ભારતે

પૂર્ણમેકાદશાબ્દં ચ નિવૃત્ય નન્દમંદિરે ॥
મથુરાયાં દ્વારકાયાં પૂર્ણમબ્દશતં વિભુઃ

ચકાર ભારહરણં પૃથિવ્યાં પૃથુવિક્રમઃ॥
પંચવિંશતિવર્ષે ચ શતવર્ષાધિકં મુને

તિષ્ઠઞ્જગામ ગોલોકં પૃથિવ્યાં ચ પુરાતનઃ ॥
યશોદાયૈ ચ નન્દાય વૃષભાનાય ધીમતે

રાધામાત્રે કલાવત્યૈ દદૌ સામીપ્યમોક્ષણમ્ ॥
કૃષ્ણેન સાર્દ્ધં ગોપી ચ રાધિકા ચ કુતૂહલાત્

નિબધ્ય ધર્મસેતું ચ વેદોક્તં ચ યુગે યુગે ॥
ઇત્યેવં કથિતં સર્વં સમાસેન મહામુને

શ્રીકૃષ્ણચરિતં રમ્યં ચતુર્વર્ગફલપ્રદમ્ ॥
બ્રહ્માદિસ્તમ્બપર્યન્તં સર્વં નશ્વરમેવ ચ

ભજ તં પરમાનન્દં સાનન્દં નન્દનન્દનમ્ ॥
સ્વેચ્છામયં પરં બ્રહ્મ પરમાત્માનમીશ્વરમ્

પરમવ્યયમવ્યક્તં ભક્તાનુગ્રહવિગ્રહમ્ ॥
સત્ય નિત્યં સ્વતંત્રં ચ સર્વેશં પ્રકૃતેઃ પરમ્

નિર્ગુણં ચ નિરીહં ચ નિરાકારં નિરઞ્જનમ્

ઇતિ શ્રીબ્રહ્મૈવવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે શ્રીકૃષ્ણરાધિકાસંવાદો નામ ચતુષ્પઞ્ચાશત્તમોઽધ્યાયઃ

॥
શ્રીકૃષ્ણાર્પણમસ્તુ ॥
॥ પૂર્વાર્દ્ધં સમાપ્તમ્ ॥ ॥
॥ શુભં ભવતુ ॥
ઇદં પુસ્તકં મુમ્બય્યાં શ્રીકૃષ્ણદાસાત્મજેન ક્ષેમરાજેન સ્વકીયે શ્રીવેઙ્કટેશ્વર ( સ્ટીમ્ ) મુદ્રણયન્ત્રાલયેઽઙ્કયિત્વા પ્રકાશિતમ્ ।
સંવત્ ૧૯૮૮, શકાબ્દાઃ ૧૮૫૩