બ્રહ્મવૈવર્ત પુરાણ · અધ્યાય 4.49

॥ શ્રીકૃષ્ણ ઉવાચ ॥
સૂર્યઃ પ્રણમ્ય બ્રહ્માણં મુદાયુક્તસ્તદાજ્ઞયા ॥
ચકાર વિનયં પ્રીત્યા તેજસ્વી ત્રિગુણાત્મકઃ

અથ વહ્નેરુપાખ્યાનં સાવધાનં નિશામય ॥
ગોપનીયં પુરાણેષુ કર્ણપીયૂષમુત્તમમ્

ત્રૈલોક્યં ભસ્મસાત્કર્તુમેકદાઽગ્નિઃ સમુદ્યતઃ॥
શતતાલપ્રમાણાન્તાં શિખાં કૃત્વા ભયાનકીમ્

ક્ષુભિતઃ કુપિતશ્ચૈવ ભૃગોઃ શાપસ્ય કારણાત્ ॥
સ્વં ચ તેજસ્વિનં મત્વા તુચ્છં મત્વાઽન્યમાત્મનઃ

એતસ્મિન્નન્તરે વિષ્ણુરાજગામાવલીલયા॥
વહ્નેસ્તાં દાહિકીં શક્તિં તાં જહાર પુરઃ સ્થિતઃ

માયયા શિશુરૂપી ચ તમુવાચ જનાર્દનઃ ॥
સસ્મિતો વિનયં કૃત્વા ભક્તિનમ્રાત્મકન્ધરઃ

શિશુરુવાચ ॥
કથં રુષ્ટોઽસિ ભગવન્ભવાન્માં કારણં વદ ॥
ત્રૈલોક્યં ભસ્મસાત્કર્તુમુદ્યતોઽસિ નિરર્થકમ્

ત્વમેવ ભૃગુણા શપ્તો ભૃગોશ્ચ દમનં કુરુ ॥
એકાપરાધાત્ત્રૈલોક્યં ભસ્મીકર્તું ન ચાર્હસિ

વિશ્વં ચ બ્રહ્મણા સૃષ્ટં તસ્ય પાતા સ્વયં હરિઃ ॥
સંહર્તા ભગવાન્રુદ્ર એવમેવ ક્રમો ભવેત્

તત્કથં ભસ્મસાત્કર્તુમીશ્વરે શંકરે સ્થિતે ॥
રક્ષિતારં હરિં જિત્વા સંહારં કુરુ સત્વરમ્

ઇત્યુક્ત્વા બ્રાહ્મણબટુઃ શરપત્રં પુરઃ સ્થિતમ્ ॥
અતિશુષ્કં કરે ધૃત્વા દગ્ધં કર્તું દદૌ મુદા

દૃષ્ટ્વા શુષ્કેન્ધનો વહ્નિર્લેલિહાનો ભયાનકઃ ॥
સ વવ્રે શિખયા વિપ્રં મેઘેન શશિનં યથા

ન ચ દગ્ધં શુષ્કપત્રં લોમૈકં ચ શિશોસ્તથા ॥
દૃષ્ટ્વા વ્રીડાયુતો વહ્નિર્નિસ્તબ્ધો હિ શિશોઃ પુરઃ

કૃત્વા વહ્નેર્દર્પભઙ્ગમન્તર્ધાનં ચકાર સઃ ॥
વહ્નિઃ સ્વમૂર્તિં સંહૃત્ય સ્વસ્થાનં ભીતવદ્યયૌ

ઉક્તો વહ્નેર્દર્પભઙ્ગઃ પરં વૈ શ્રોતુમિચ્છસિ ॥
નિત્યનૂતનમાખ્યાનં દેવાનાં દર્પમોચનમ્

શ્રીરાધિકોવાચ ॥
શેષાણાં દર્પભંગં ચ ક્રમેણ કથય પ્રભો ॥
કથાપીયૂષધારાંતે શ્રુત્વા તૃપ્યેત કો ભુવિ

શ્રીનારાયણ ઉવાચ ॥
રાધિકાવચનં શ્રુત્વા સસ્મિતો ભગવાન્પ્રભુઃ ॥
કથાં કથિતુમારેભે શ્રુત્વા રમ્યાં પુરાતનીમ્

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે અગ્નિદર્પમોચનં નામૈકોનપઞ્ચાશત્તમોઽધ્યાયઃ