બ્રહ્મવૈવર્ત પુરાણ · અધ્યાય 4.48

શ્રીરાધિકોવાચ ॥
કથિતો ભવતા મહ્યં દર્પભઙ્ગઃ શ્રુતો હરેઃ ॥
દર્પભઙગં રવેશ્ચાપિ શ્રોતુમિચ્છામિ તત્ત્વતઃ

શ્રીકૃષ્ણ ઉવાચ ॥
એકદૈવોદયં કૃત્વા રવિરસ્તં જગામ હ ॥
માલી સુમાલી દૈત્યેન્દ્રૌ દીપ્તિં કર્તું સમુદ્યતૌ

મહાસંપન્મદોન્મત્તૌ શંકરસ્ય વરેણ ચ ॥
તયોશ્ચ પ્રભયા રાત્રિર્ન ભવેદિતિ સુન્દરિ

રુષ્ટઃ સૂર્યઃ સ્વશૂલેન તૌ જઘાનાવલીલયા॥
પતિતૌ સૂર્યશૂલેન મૂર્ચ્છિતૌ ધરણીતલે

ભક્તાપાયં ચ વિજ્ઞાય શંકરો ભક્તવત્સલઃ ॥
આગત્ય જીવયામાસ મહાજ્ઞાનેન તૌ વિભુઃ

તૌ ચ નત્વા શિવં ભક્ત્યા જગ્મતુર્નિજમન્દિરમ્ ॥
દુદ્રાવ ચ મહાદેવઃ સૂર્યં હન્તું રુષા જ્વલન્

દૃષ્ટ્વા સંહારકર્તારં જિઘાંસન્તં હરં રવિઃ ॥
ભિયા પલાયમાનશ્ચ બ્રહ્માણં શરણં યયૌ

દુદ્રાવ ચ મહાદેવો બ્રહ્મણો નિલયં રુષા ॥
શૂલમત્યર્થમુદ્યમ્ય કાલકાલો વિધેર્વિધિઃ

દૃષ્ટ્વા બ્રહ્મા હરં રુષ્ટં તુષ્ટાવ પરમેશ્વરમ્ ॥
ચતુર્વક્ત્રેણ વેદોક્તસ્તોત્રેણ જગતાં પતિઃ

બ્રહ્મોવાચ ॥
પ્રસીદ દક્ષયજ્ઞઘ્ન સૂર્યં મચ્છરણાગતમ્ ॥
ત્વયૈવ સૃષ્ટં સૃષ્ટેશ્ચ સમારમ્ભે જગદ્ગુરો

આશુતોષ મહાભાગ પ્રસીદ ભક્તવત્સલ ॥
કૃપયા ચ કૃપાસિન્ધો રક્ષ રક્ષ દિવાનિશમ્

બ્રહ્મસ્વરૂપ ભગવન્સૃષ્ટિસ્થિત્યન્તકારણ ॥
સ્વયં રવિં ચ નિર્માય સ્વયં સંહર્તુમિચ્છસિ

સ્વયં બ્રહ્મા સ્વયં શેષો ધર્મઃ સૂર્યો હુતાશનઃ ॥
ઇન્દ્રચંદ્રાદયો દેવાસ્ત્વત્તો ભીતાઃ પરાત્પર

ઋષયો મુનયશ્ચૈવ ત્વાં નિષેવ્ય તપોધનાઃ ॥
તપસાં ફલદાતા ત્વં તપસ્ત્વં તપસાં ફલમ્

ઇત્યેવમુક્ત્વા બ્રહ્મા તં સૂર્યમાનીય ભક્તિતઃ ॥
પ્રીત્યા સમર્પયામાસ શઙ્કરે દીનવત્સલે

શંભુસ્તમાશિષં કૃત્વા વિધિં નત્વા જગદ્વિધિઃ ॥
પ્રસન્નવદનઃ શ્રીમાનાલયં પ્રયયૌ મુદા

ઇતિ ધાતૃકૃતં સ્તોત્રં સંકટે યઃ પઠેન્નરઃ ॥
ભયાત્પ્રમુચ્યતે ભીતો બદ્ધો મુચ્યેત બન્ધનાત્

રાજદ્વારે શ્મશાને ચ મગ્નપોતે મહાર્ણવે ॥
સ્તોત્રસ્મરણમાત્રેણ મુચ્યતે નાત્ર સંશયઃ

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે શ્રીકૃષ્ણરાધાસંવાદે અષ્ટચત્વારિંશોઽધ્યાયઃ