બ્રહ્મવૈવર્ત પુરાણ · અધ્યાય 4.12

શ્રીનારાયણ ઉવાચ ॥ ॥
એકદા મંદિરે નન્દપત્ની સાઽઽનંદપૂર્વકમ્ ॥
કૃત્વા વક્ષસિ ગોવિંદં ક્ષુધિતં ચ સ્તનં દદૌ

એતસ્મિન્નંતરે ગોપ્ય આજગ્મુર્નંદમંદિરમ્ ॥
સ્થવિરાશ્ચ વયસ્યાશ્ચ બાલિકા બાલકાન્વિતાઃ

અતૃપ્તં બાલકં શીઘ્રં સંન્યસ્ય શયને સતી ॥
પ્રણનામ સમુત્થાય કર્મણ્યૌત્થાનિકે મુદા

તૈલસિંદૂરતાંબૂલં દદૌ તાભ્યો મુદાઽન્વિતા॥
મિષ્ટવસ્તૂનિ વસ્ત્રાણિ ભૂષણાનિ ચ ગોપિકા

એતસ્મિન્નન્તરે કૃષ્ણો રુરોદ ક્ષુધિતસ્તદા ॥
પ્રેરયિત્વા સ ચરણં માયેશો માયયા વિભુઃ

પપાત ચરણં તસ્ય પ્રવીણે શકટે મુને ॥
વિશ્વંભરપદાઘાતાત્તચ્ચ ચૂર્ણં બભૂવ હ

બભંજ શકટં પેતુર્ભગ્નકાષ્ઠાનિ તત્ર વૈ ॥
પપાત દધિ દુગ્ધં ચ નવનીતં ઘૃતં મધુ

દૃષ્ટ્વાઽઽશ્ચર્યં ગોપિકાશ્ચ દુદ્રુવુર્બાલકં ભયાત્॥
દદૃશુર્ભગ્નશકટમિંધનાભ્યંતરે શિશુમ્

ભગ્નભાંડસમૂહં ચ પતિતં બહુગોરસમ્ ॥
પ્રેરયિત્વા તુ કાષ્ઠાનિ જગ્રાહ બાલકં ભિયા

માયારક્ષિતસર્વાંગં રુદિતં ક્ષુધિતં ક્ષુધા॥
સ્તનં દદૌ યશોદા તં રુરોદ ચ ભૃશં શુચા

પપ્રચ્છુર્બાલકાન્ગોપા બભંજ શકટં કથમ્ ॥
કિંચિદ્ધેતું ન પશ્યામઃ સહસેતિ કિમદ્ભુતમ્

ઇત્યૂચુર્બાલકાઃ સર્વે ગોપાઃ શૃણુત મદ્વચઃ ॥
શ્રીકૃષ્ણસ્ય પદાઘાતાદ્બભંજ શકટં ધ્રુવમ્

શ્રુત્વા તદ્વચનં ગોપા ગોપ્યશ્ચ જહસુર્મુદા ॥
ન હિ જગ્મુઃ પ્રતીતિં ચ મિથ્યેત્યૂચુર્વ્રજે પ્રજાઃ

શિશોઃ સ્વસ્ત્યયનં કાર્યં ચક્રુર્બ્રાહ્મણપુંગવાઃ ॥
હસ્તં દત્ત્વા શિશોર્ગાત્રે પપાઠ કવચં દ્વિજઃ

વદામિ તત્તે વિપ્રેન્દ્ર કવચં સર્વરક્ષણમ્ ॥
યદ્દત્તં માયયા પૂર્વં બ્રહ્મણે નાભિપંકજે

નિદ્રિતે જગતીનાથે જલે ચ જલશાયિનિ ॥
ભીતાય સ્તુતિકર્ત્રે ચ મધુકૈટભયોર્ભયાત્

યોગનિદ્રોવાચ ॥
દૂરીભૂતં કુરુ ભયં ભયં કિં તે હરૌ સ્થિતે ॥
સ્થિતાયાં મયિ ચ બ્રહ્મન્સુખી તિષ્ઠ જગત્પતે

શ્રીહરિઃ પાતુ તે વક્ત્રં મસ્તકં મધુસૂદનઃ ॥
શ્રીકૃષ્ણશ્ચક્ષુષી પાતુ નાસિકાં રાધિકાપતિઃ

કર્ણયુગ્મં ચ કણ્ઠં ચ કપાલં પાતુ માધવઃ ॥
કપોલં પાતુ ગોવિન્દઃ કેશાંશ્ચ કેશવઃ સ્વયમ્

અધરોષ્ઠં હૃષીકેશો દંતપંક્તિં ગદાગ્રજઃ ॥
રાસેશ્વરશ્ચ રસનાં તાલુકં વામનો વિભુઃ

વક્ષઃ પાતુ મુકુન્દશ્ચ જઠરં પાતુ દૈત્યહા ॥
જનાર્દનઃ પાતુ નાભિં પાતુ વિષ્ણુશ્ચ મેહનમ્

નિતંબયુગ્મં ગુહ્યં ચ પાતુ તે પુરુષોત્તમઃ ॥
જાનુયુગ્મે જાનકીશઃ પાતુ તે સર્વદા વિભુઃ

હસ્તયુગ્મં નૃસિંહશ્ચ પાતુ સર્વત્ર સંકટે ॥
પાદયુગ્મં વરાહશ્ચ પાતુ તે કમલોદ્ભવઃ

ઊર્ધ્વં નારાયણઃ પાતુ હ્યધસ્તાત્કમલાપતિઃ ॥
પૂર્વસ્યાં પાતુ ગોપાલઃ પાતુ વહ્નૌ દશાસ્યહા

વનમાલી પાતુ યામ્યાં વૈકુંઠઃ પાતુ નૈરૃતૌ ॥
વારુણ્યાં વાસુદેવશ્ચ સતો રક્ષાકરઃ સ્વયમ્

પાતુ તે સંતતમજો વાયવ્યાં વિષ્ટરશ્રવાઃ ॥
ઉત્તરે ચ સદા પાતુ તેજસા જલજાસનઃ

ઐશાન્યામીશ્વરઃ પાતુ પાતુ સર્વત્ર શત્રુજિત્ ॥
જલે સ્થલે ચાંતરિક્ષે નિદ્રાયાં પાતુ રાઘવઃ

ઇત્યેવં કથિતં બ્રહ્મન્કવચં પરમાદ્ભુતમ્ ॥
કૃષ્ણેન કૃપયા દત્તં સ્મૃતેનૈવ પુરા મયા

શુંભેન સહ સંગ્રામે નિર્લક્ષ્યે ઘોરદારુણે ॥
ગગને સ્થિતયા સદ્યઃ પ્રાપ્તિમાત્રેણ સો જિતઃ

કવચસ્ય પ્રભાવેણ ધરણ્યાં પતિતો મૃતઃ॥
પૂર્વં વર્ષશતં ખે ચ કૃત્વા યુદ્ધં ભયાવહમ્

મૃતે શુંભે ચ ગોવિન્દઃ કૃપાલુર્ગગનસ્થિતઃ ॥
માલાં ચ કવચં દત્ત્વા ગોલોકં સ જગામ હ

કલ્પાંતરસ્ય વૃત્તાંતં કૃપયા કથિતં મુને ॥
અભ્યંતરભયં નાસ્તિ કવચસ્ય પ્રભાવતઃ

કોટિશઃ કોટિશો નષ્ટા મયા દૃષ્ટાશ્ચ વેધસઃ ॥
અહં ચ હરિણા સાર્દ્ધં કલ્પેકલ્પે સ્થિરા સદા

ઇત્યુક્ત્વા કવચં દત્ત્વા સાઽન્તર્ધાનં ચકાર હ ॥
નિઃશઙ્કો નાભિકમલે તસ્થૌ સ કમલોદ્ભવઃ

સુવર્ણગુટિકાયાં ચ કૃત્વેદં કવચં પરમ્ ॥
કણ્ઠે વા દક્ષિણે બાહૌ બધ્નીયાદ્યઃ સુધીઃ સદા

વિષાગ્નિજલશત્રુભ્યો ભયં તસ્ય ન જાયતે ॥
જલે સ્થલે ચાંતરિક્ષે નિદ્રાયાં રક્ષતીશ્વરઃ

સંગ્રામે વજ્રપાતે ચ વિપત્તૌ પ્રાણસંકટે ॥
કવચસ્મરણાદેવ સદ્યો નિઃશઙ્કતાં વ્રજેત્

બદ્ધ્વેદં કવચં કણ્ઠે શંકરસ્ત્રિપુરં પુરા ॥
જઘાન લીલામાત્રેણ દુરંતમસુરેશ્વરમ્

બદ્ધ્વેદં કવચં કાલી રક્તબીજં ચખાદ સા ॥
સહસ્રશીર્ષા ધૃત્વેદં વિશ્વં ધત્તે તિલં યથા

આવાં સનત્કુમારશ્ચ ધર્મસાક્ષી ચ કર્મણામ્ ॥
કવચસ્ય પ્રભાવેણ સર્વત્ર જયિનો વયમ્

તસ્ય નન્દશિશોઃ કણ્ઠે ચકાર કવચં દ્વિજઃ ॥
આત્મનઃ કવચં કણ્ઠે દધાર ચ સ્વયં હરિઃ

પ્રભાવઃ કથિતઃ સર્વઃ કવચસ્ય હરેસ્તથા ॥
અનન્તસ્યાચ્યુતસ્યૈવ પ્રભાવમતુલં મુને

ઇતિ શ્રીબ્રહ્મવૈવર્તે મહાપુરાણે શ્રીકૃષ્ણજન્મખણ્ડે નારાયણનારદસંવાદે શકટભંજનયોગનિદ્રોક્તકવચન્યાસો નામ દ્વાદશોઽધ્યાયઃ