બ્રહ્મવૈવર્ત પુરાણ · અધ્યાય 3.30

શંકર ઉવાચ ॥
કસ્ત્વં વટો કસ્ય પુત્રઃ ક્વ વાસઃ સ્તવનં કથમ્ ॥
કિં વા તેઽહં કરિષ્યામિ વાઞ્છિતં વદ સામ્પ્રતમ્

પાર્વત્યુવાચ ॥
શોકાકુલં ત્વાં પશ્યામિ વિમનસ્કં સુવિસ્મિતમ્ ॥
વયસાઽતિશિશું શાન્તં ગુણેન ગુણિનાં વરમ્॥૨।]
ભૃગુરુવાચ ॥
જમદગ્નિસુતોઽહં ચ ભૃગુવંશસમુદ્ભવઃ॥
રેણુકાઽમ્બા મે પરશુરામોઽહં નામતઃ પ્રભો

ક્રીણીહિ માં દયાસિન્ધો વિદ્યાપણ્યેન કિંકરમ્ ॥
ત્વામીશઃ શરણાપન્નં રક્ષ માં દીનવત્સલ

મૃગયામાગતં ભૂપં પિતા મે ચોપવાસિનમ્॥
ચકારાતિથ્યમાનીય કપિલાદત્તવસ્તુના

રાજા તં કપિલાલોભાદ્ઘાતયામાસ મન્દધીઃ ॥
કપિલા તં મૃતં દૃષ્ટ્વા ગોલોકં ચ જગામ સા

માતાઽનુગમનં ચક્રે હ્યનાથોઽહં ચ સામ્પ્રતમ્ ॥
ત્વં મે પિતા શિવા માતા રક્ષ માં પુત્રવત્પ્રભો

મયા કૃતા પ્રતિજ્ઞા ચ શોકેનૈવાતિદુષ્કરા ॥
ત્રિસ્સપ્તકૃત્વો નિર્ભૂપાં કરિષ્યામિ મહીમિતિ

કાર્તવીર્ય્યં હનિષ્યામિ સમરે તાતઘાતકમ્ ॥
ઇત્યેતત્પરિપૂર્ણં મે ભગવાન્કર્તુમર્હતિ

બ્રાહ્મણસ્ય વચઃ શ્રુત્વા દૃષ્ટ્વા દુર્ગામુખં હરઃ ॥
બભૂવાનમ્રવક્ત્રશ્ચ સા ચ શુષ્કૌષ્ઠતાલુકા

પાર્વત્યુવાચ ॥
તપસ્વિન્વિપ્રપુત્રસ્ત્વં નિર્ભૂપાં કર્તુમિચ્છસિ ॥
ત્રિસ્સપ્તકૃત્વઃ કોપેન સાહસસ્તે મહાન્બટો

હન્તુમિચ્છસિ નિઃશસ્ત્રઃ સહસ્રાર્જુનમીશ્વરમ્ ॥
ભ્રૂભઙ્ગલીલયા યસ્ય રાવણસ્ય પરાજયઃ

તસ્મૈ પ્રદત્તં દત્તેન શ્રીહરેઃ કવચં બટો ॥
શક્તિરવ્યર્થરૂપા ચ યયા તે હિંસિતઃ પિતા

હરેર્મ્મન્ત્રં સંસ્તવનં યઃ પઠેચ્ચ દિવાનિશમ્ ॥
કો વા શક્નોતિ તં હન્તું ન પશ્યામીહ ભૂતલે

અયે વિપ્ર ગૃહં ગચ્છ કિં કરિષ્યતિ શંકરઃ ॥
અન્યે ભૂપાશ્ચ મદ્ભૃત્યાઃ કા ભીસ્તેષાં મયિ સ્થિતે

કાલ્યુવાચ॥
અયે વિપ્ર બટો જાલ્મ નિર્ભૂપાન્કર્તુમિચ્છસિ॥
યથા હિ વામનશ્ચન્દ્રં કરેણાહર્તુમિચ્છતિ

કૃતયજ્ઞાન્મહાપુણ્યાન્મહાબલપરાક્રમાન્ ॥
દિગમ્બરસહાયેન મદ્ભૃત્યાન્હન્તુમિચ્છસિ

સ તયોર્વચનં શ્રુત્વા રુરોદોચ્ચૈશ્ચ શોકતઃ ॥
સહસા પુરતસ્તેષાં પ્રાણાંસ્ત્યક્તું સમુદ્યતઃ

વિપ્રસ્ય રોદનં શ્રુત્વા શંકરઃ કરુણાનિધિઃ ॥
પશ્યન્દુર્ગાં ચ કાલીં ચ જ્ઞાત્વાઽઽશયમથો વિભુઃ

તયોરનુમતિં પ્રાપ્ય સર્વેશો ભક્તવત્સલઃ ॥
જમદગ્નિસુતં સદ્યઃ પ્રવક્તુમુપચક્રમે

શંકર ઉવાચ ॥
અદ્યપ્રભૃતિ હે વત્સ ત્વં મે પુત્રસમો મહાન્ ॥
દાસ્યામિ મન્ત્રં ગુહ્યં તે ત્રિષુ લોકેષુ દુર્લ્લભમ્

એવંભૂતં ચ કવચં દાસ્યામિ પરમાદ્ભુતમ્ ॥
લીલયા મત્પ્રસાદેન કાર્ત્તવીર્યં હનિષ્યસિ

ત્રિસ્સપ્તકૃત્વો નિર્ભૂપાં કરિષ્યસિ મહીં દ્વિજ ॥
જગત્તે યશસા પૂર્ણં ભવિષ્યતિ ન સંશયઃ

ઇત્યુક્ત્વા શંકરસ્તસ્મૈ દદૌ મન્ત્રં સુદુર્લભમ્ ॥
ત્રૈલોક્યવિજયં નામ કવચં પરમાદ્ભુતમ્

સ્તવં પૂજાવિધાનં ચ પુરશ્ચરણપૂર્વકમ્ ॥
મન્ત્રસિદ્ધેરનુષ્ઠાનં યથાવન્નિયમક્રમમ્

સિદ્ધિસ્થાનં કાલસંખ્યં કથયામાસ નારદ ॥
વેદવેદાઙ્ગાદિકં ચ પાઠયામાસ તત્ક્ષણમ્

નાગપાશં પાશુપતં બ્રહ્માસ્ત્રં ચ સુદુર્લભમ્ ॥
નારાયણાસ્ત્રમાગ્નેયં વાયવ્યં વારુણં તથા

ગાન્ધર્વં ગારુડં ચૈવ જૃમ્ભણાસ્ત્રં તથૈવ ચ ॥
ગદાં શક્તિં ચ પરશું શૂલમવ્યર્થમુત્તમમ્

નાનાપ્રકારશસ્ત્રાસ્ત્રમન્ત્રં ચ વિધિપૂર્વકમ્ ॥
શસ્ત્રાસ્ત્રાણાં ચ સંહારં તૂણી ચાક્ષયસાયકૌ

આત્મરક્ષણસન્ધાનં સંગ્રામવિજયક્રમમ્ ॥
માયાયુદ્ધં ચ વિવિધં હુંકારં મન્ત્રપૂર્વકમ્

રક્ષણં ચ સ્વસૈન્યાનાં પરસૈન્યવિમર્દનમ્ ॥
નાનાપ્રકારમતુલમુપાયં રણસંકટે ॥
સંહારે મોહિનીં વિદ્યાં દદૌ મૃત્યુહરાં હરઃ

સ્થિત્વા ચિરં ગુરોર્વાંસે સર્વવિદ્યાં વિબોધ્ય સઃ ॥
તીર્થે કૃત્વા મન્ત્રસિદ્ધિં તાંશ્ચ નત્વા જગામ સઃ

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે પરશુરામસ્ય શિવદત્તાસ્ત્રશસ્ત્રાદિપ્રાપ્તિવર્ણનં નામ ત્રિંશત્તમોઽધ્યાયઃ