બ્રહ્મવૈવર્ત પુરાણ · અધ્યાય 3.29

નારાયણ ઉવાચ ॥
બ્રહ્મણો વચનં શ્રુત્વા પ્રણમ્ય ચ જગદ્ગુરુમ્॥
સ્ફીતસ્તસ્માદ્વરં પ્રાપ્ય શિવલોકં જગામ સઃ

લક્ષયોજનમૂર્ધ્વં ચ બ્રહ્મલોકાદ્વિલક્ષણમ્ ॥
અનિર્વાચ્યસુશોભાઢ્યં વાય્વાધારં મનોહરમ્

વૈકુણ્ઠં દક્ષિણે યસ્ય ગૌરીલોકશ્ચ વામતઃ ॥
યદધો ધુવલોકશ્ચ સર્વલોકાત્પરઃ સ્મૃતઃ

તેષામૂર્ધ્વં ચ ગોલોકઃ પઞ્ચાશત્કોટિયોજનઃ ॥
અત ઊર્ધ્વં ન લોકશ્ચ સર્વોપરિ ચ સ સ્મૃતઃ

મનોયાયી સ યોગીન્દ્રઃ શિવલોકં દદર્શ હ ॥
ઉપમાનોપમેયાભ્યાં રહિતં મહદદ્ભુતમ્

યોગીન્દ્રાણાં વરેણ્યૈશ્ચ સિદ્ધવિદ્યાવિશારદૈઃ॥
કોટિકલ્પતપઃપૂતૈઃ પુણ્યવદ્ભિર્નિષેવિતમ્

વેષ્ટિતં કલ્પવૃક્ષાણાં સમૂહૈર્વાઞ્છિતપ્રદૈઃ ॥
સમૂહૈઃ કામધેનૂનામસંખ્યાનાં વિરાજિતમ્

પારિજાતતરૂણાં ચ વનરાજિવિરાજિતમ્ ॥
પુષ્પોદ્યાનાયુતૈર્યુક્તં સદા ચાતિસુશોભિતમ્

મણીન્દ્રસારરચિતૈઃ શોભિતૈર્મણિવેદિભિઃ ॥
રાજમાર્ગશતૈર્દિવ્યૈઃ સર્વતઃ પરિભૂષિતમ્

મણીન્દ્રાસારનિર્માણશતકોટિગૃહૈર્યુતમ્ ॥
નાનાચિત્રવિચિત્રાઢ્યૈર્મણીન્દ્રકલશોજ્જ્વલૈઃ

તન્મધ્યદેશે રમ્યે ચ દદર્શ શઙ્કરાલયમ્ ॥
મણીન્દ્રસારરચિતપ્રાકારં સુમનોહરમ્

અત્યૂર્ધ્વમમ્બરસ્પર્શિ ક્ષીરનીરનિભં પરમ્ ॥
ષોડશદ્વારસંયુક્તં શોભિતં શતમન્દિરૈઃ

અમૂલ્યરત્નરચિતૈ રત્નસોપાનભૂષિતૈઃ ॥
રત્નસ્તમ્ભકપાટૈશ્ચ હીરકેણ પરિષ્કૃતૈઃ

માણિક્યજાલમાલાભિઃ સદ્રત્નકલશોજ્જ્વલૈઃ ॥
નાનાવિચિત્રચિત્રેણ ચિત્રિતૈઃ સુમનોહરૈઃ

આલયસ્ય પુરસ્તત્ર સિંહદ્વારં દદર્શ સઃ ॥
રત્નેન્દ્રસારખચિતકપાટૈશ્ચ વિરાજિતૈઃ

શોભિતં વેદિકાભિશ્ચ બાહ્યાભ્યન્તરતઃ સદા ॥
રચિતાભિઃ પદ્મરાગૈર્મહામરકતૈર્ગૃહમ્

નાનાપ્રકારચિત્રેણ ચિત્રિતં સુમનોહરમ્ ॥
કરાલરૂપાવદ્રાક્ષીદ્ દ્વારપાલૌ ભયંકરૌ ॥

મહાકરાલદન્તાસ્યૌ વિરક્તૌ રક્તલોચનૌ ॥
દગ્ધશૈલપ્રતીકાશૌ મહાબલપરાક્રમૌ

વિભૂતિભૂષિતાંગૌ ચ વ્યાઘ્રચર્મામ્બરૌ વરૌ ॥
પિઙ્ગલાક્ષૌ વિશાલાક્ષૌ જટિલૌ ચ ત્રિલોચનૌ

ત્રિશૂલપટ્ટિશધરૌ જ્વલન્તૌ બ્રહ્મતેજસા ॥
તૌ દૃષ્ટ્વા મનસા ભીતસ્ત્રસ્તઃ કિઞ્ચિદુવાચ હ

વિનયેન વિનીતશ્ચ દુર્વિનીતૌ મહાબલૌ ॥
આત્મનઃ સર્વવૃત્તાન્તં કથયામાસ તત્પુરઃ ॥

વિપ્રસ્ય વચનં શ્રુત્વા કૃપાયુક્તૌ બભૂવતુઃ ॥
ગૃહીત્વાઽઽજ્ઞાં ચરદ્વારા શંકરસ્ય મહાત્મનઃ

પ્રવેષ્ટુમાજ્ઞાં દદતુરીશ્વરાનુચરૌ વરૌ ॥
ભૃગુસ્તદાજ્ઞામાદાય પ્રવિવેશ હરિં સ્મરન્

પ્રત્યેકં ષોડશ દ્વારો દદર્શ સુમનોહરાઃ ॥
દ્વારપાલૈર્નિયુક્તાશ્ચ નાનાચિત્રવિચિત્રિતાઃ

દૃષ્ટ્વા તા મહદાશ્ચર્ય્યાદપશ્યચ્છૂલિનઃ સભામ્ ॥
નાનાસિદ્ધગણાકીર્ણાં મહર્ષિગણસેવિતામ્

પારિજાતસુગન્ધાઢ્યવાયુના સુરભીકૃતામ્ ॥
દદર્શ તત્ર દેવેશં શઙ્કરં ચન્દ્રશેખરમ્

ત્રિશૂલપટ્ટિશધરં વ્યાઘ્રચર્મામ્બરં પરમ્॥
વિભૂતિભૂષિતાંગં તં નાગયજ્ઞોપવીતિનમ્ ॥
રત્નસિંહાસનસ્થં ચ રત્નભૂષણભૂષિતમ્

મહાશિવં શિવકરં શિવબીજં શિવાશ્રયમ્॥
આત્મારામં પૂર્ણકામં સૂર્ય્યકોટિસમપ્રભમ્

ઈષદ્ધાસ્યં પ્રસન્નાસ્યં ભક્તાનુગ્રહકાતરમ્ ॥
શશ્વજ્જ્યોતિસ્સ્વરૂપં ચ લોકાનુગ્રહવિગ્રહમ્

ધૃતવન્તં જટાજાલં દક્ષકન્યાસમન્વિતમ્ ॥
તપસાં ફલદાતારં દાતારં સર્વસમ્પદામ્

શુદ્ધસ્ફટિકસંકાશં પઞ્ચ વક્ત્રં ત્રિલોચનમ્ ॥
ગુહ્યં બ્રહ્મ પ્રવોચન્તં શિષ્યેભ્યસ્તત્ત્વમુદ્રયા

સ્તૂયમાનં ચ યોગીન્દ્રૈઃ સિદ્ધેન્દ્રૈઃ પરિસેવિતમ્ ॥
પાર્ષદપ્રવરૈશ્શશ્વત્સેવિતં શ્વેતચામરૈઃ

ધ્યાયમાનં પરં બ્રહ્મ પરિપૂર્ણતમં પરમ્॥
સ્વેચ્છામયં ગુણાતીતં જરામૃત્યુહરં પરમ્

જ્યોતીરૂપં ચ સર્વાદ્યં શ્રીકૃષ્ણં પ્રકૃતેઃ પરમ્ ॥
ધ્યાયન્તં પરમાનન્દં પુલકાઞ્ચિતવિગ્રહમ્ ॥
સુસ્વરં સાશ્રુનેત્રં તમુદ્ગાયન્તં ગુણાર્ણવમ્

ભૂતેન્દ્રૈર્વૈ રુદ્રગણૈઃ ક્ષેત્રપાલૈશ્ચ વેષ્ટિતમ્ ॥
મૂર્ધ્ના નનામ પરશુરામો દૃષ્ટ્વા તમાદરાત્

તદ્વામે કાર્ત્તિકેયં ચ દક્ષિણે ચ ગણેશ્વરમ્ ॥
નન્દીશ્વરં મહાકાલં વીરભદ્રં ચ તત્પુરઃ ॥
અંકે દદર્શ કાન્તાં તાં ગૌરીં શૈલેન્દ્રકન્યકામ્

નનામ સર્વાન્મૂર્ધ્ના ચ ભક્ત્યા ચ પરયા મુદા ॥
દૃષ્ટ્વા હરં પરં તોષાત્સ્તોતું સમુપચક્રમે

સગદ્ગદપદં દીનસ્સાશ્રુનેત્રોઽતિકાતરઃ ॥
કૃતાઞ્જલિપુટઃ શાન્તઃ શોકાર્તઃ શોકનાશનમ્

પરશુરામ ઉવાચ ॥
ઈશ ત્વાં સ્તોતુમિચ્છામિ સર્વથા સ્તોતુમક્ષમઃ ॥
અક્ષરાક્ષયબીજં ચ કિં વા સ્તૌમિ નિરીહકમ્

ન યોજનાં કર્ત્તુમીશો દેવેશં સ્તૌમિ મૂઢધીઃ ॥
વેદા ન શક્તા યં સ્તોતું કસ્ત્વાં સ્તોતુમિહેશ્વરઃ ॥

વાગ્બુદ્ધિમનસાં દૂરં સારાત્સારં પરાત્પરમ્ ॥
જ્ઞાનમાત્રેણ સાધ્યં ચ સિદ્ધં સિદ્ધૈર્નિષેવિતમ્

યમાકાશમિવાદ્યન્તમધ્યહીનં તથાઽવ્યયમ્ ॥
વિશ્વતન્ત્રમતન્ત્રં ચ સ્વતન્ત્રં તન્ત્રબીજકમ્

ધ્યાનાસાધ્યં દુરારાધ્યમતિસાધ્યં કૃપાનિધિમ્ ॥
ત્રાહિ માં કરુણાસિન્ધો દીનબન્ધોઽતિદીનકમ્

અદ્ય મે સફલં જન્મ જીવિતં ચ સુજીવિતમ્ ॥
સ્વપ્નેઽપ્યદૃષ્ટં ભક્તૈશ્ચાધુના પશ્યામિ ચક્ષુષા

શક્રાદયઃ સુરગણાઃ કલયા યસ્ય સમ્ભવાઃ ॥
ચરાચરાઃ કલાંશેન તં નમામિ મહેશ્વરમ્

સ્ત્રીરૂપં ક્લીબરૂપં ચ પૌરુષં ચ બિભર્તિ યઃ ॥
સર્વાધારં સર્વરૂપં તં નમામિ મહેશ્વરમ્

યં ભાસ્કરસ્વરૂપં ચ શશિરૂપં હુતાશનમ્ ॥
જલરૂપં વાયુરૂપં તં નમામિ મહેશ્વરમ્

અનન્તવિશ્વસૃષ્ટીનાં સંહર્તારં ભયંકરમ્ ॥
ક્ષણેન લીલામાત્રેણ તં નમામિ મહેશ્વરમ્

યઃ કાલઃ કાલકાલશ્ચ કલિર્બીજં ચ કાલજઃ॥
અજઃ પ્રજશ્ચ યઃ સર્વસ્તં નમામિ મહેશ્વરમ્

ઇત્યેવમુક્ત્વા સ ભૃગુઃ પપાત ચરણામ્બુજે ॥
આશિષં ચ દદૌ તસ્મૈ સુપ્રસન્નો બભૂવ સઃ

જામદગ્ન્યકૃતં સ્તોત્રં યઃ પઠેદ્ભક્તિસંયુતઃ ॥
સર્વપાપવિનિર્મુક્તઃ શિવલોકં સ ગચ્છતિ

ઇતિ શ્રીબ્રહ્મવૈવર્તે મહાપુરાણે તૃતીયે ગણપતિખણ્ડે નારદનારાયણસંવાદે પરશુરામસ્ય કૈલાસગમનનામૈકોનત્રિંશોઽધ્યાયઃ