બ્રહ્મવૈવર્ત પુરાણ · અધ્યાય 3.26

નારાયણ ઉવાચ ॥
હરિં સ્મરન્મુનિશ્રેષ્ઠો વાક્યં શ્રુત્વા ચ ભૂભૃતઃ ॥
હિતં સત્યં નીતિસારં પ્રવક્તુસુપચક્રમે

મુનિરુવાચ ॥
ગૃહં ગચ્છ મહાભાગ રક્ષ ધર્મં સનાતનમ્ ॥
સર્વસમ્પત્સ્થિરા શશ્વત્સ્થિતે ધર્મે સુનિશ્ચિતમ્

ત્વાં ચ દૃષ્ટ્વા નિરાહારં સમાનીય ગૃહં નૃપ॥
તવ પૂજામકરવં યથાશક્તિ વિધાનતઃ॥।
સામ્પ્રતં મૂર્છિતં દૃષ્ટ્વા પાદરેણું શુભાશિષમ્ ॥
અદદાં ચેતયાઞ્ચક્રે વક્તુમેવોચિતં ન ચ

નૃપસ્તદ્વચનં શ્રુત્વા પ્રણમ્ય મુનિપુંગવમ્ ॥
રથમન્યં ત્વારુરોહ યુદ્ધં દેહીત્યુવાચ હ

મુનિઃ કૃત્વા ચ સન્નાહં તં યોદ્ધુમુપચક્રમે ॥
રાજા તં યુયુધે તત્ર કોપેનાહતચેતનઃ

કપિલાદત્તશસ્ત્રેણ ન્યસ્તશસ્ત્રં ચકાર તમ્ ॥
કપિલાદત્તયા શક્ત્યા પુનર્મૂર્ચ્છામવાપ ચ

પુનશ્ચ ચેતનાં પ્રાપ્ય રાજા રાજીવલોચનઃ ॥
મુનિના યુયુધે તત્ર કોપેન પુનરેવ ચ

આગ્નેયં યોજયામાસ સમરે નૃપપુંગવઃ ॥
મુનિર્નિર્વાપયામાસ વારુણેન ચ લીલયા

નૃપેન્દ્રો વારુણાસ્ત્રં ચ ચિક્ષેપ સમરે મુનૌ ॥
વાયવ્યાસ્ત્રેણ સ મુનિઃ શમયામાસ લીલયા

વાયવ્યાસ્ત્રં નૃપશ્રેષ્ઠશ્ચિક્ષેપ સમરે તદા ॥
ગાન્ધર્વેણ મુનિશ્રેષ્ઠઃ શમયામાસ તત્ક્ષણમ્

નાગાસ્ત્રં ચ નૃપશ્રેષ્ઠશ્ચિક્ષેપ રણમૂર્દ્ધનિ ॥
ગારુડેન મુનિશ્રેષ્ઠો નિજઘાન ક્ષણાન્મુદા

માહેશ્વરં મહાસ્ત્રં ચ શતસૂર્ય્યસમપ્રભમ્ ॥
ચિક્ષેપ નૃપતિશ્રેષ્ઠો દ્યોતયન્તં દિશો દશ

વૈષ્ણવાસ્ત્રેણ દિવ્યેન ત્રિલોકવ્યાપકેન ચ ॥
મુનિર્નિર્વાપયામાસ બહુયત્નેન નારદ

મુનિર્નારાયણાસ્ત્રં ચ ચિક્ષિપે મન્ત્રપૂર્વકમ્ ॥
શસ્ત્રં દૃષ્ટ્વા મહારાજો નનામ શરણં યયૌ

ઊર્ધ્વં ચ ભ્રમણં કૃત્વા ક્ષણં દીપ્ત્વા દિશો દશ ॥
પ્રલયાગ્નિસમં તત્ર સ્વયમન્તરધીયત

જૃમ્ભણાસ્ત્રં ચ સ મુનિશ્ચિક્ષેપ રણમૂર્દ્ધનિ ॥
નિદ્રાં પ્રાપત્તેન રાજા સુષ્વાપ ચ મૃતો યથા

દૃષ્ટ્વા નૃપં નિદ્રિતં તં ચાર્દ્ધચન્દ્રેણ તત્ક્ષણમ્ ॥
ચિચ્છેદ સારથિં યાનં ધનુર્બાણં મુનિસ્તદા

મુકુટં ચ ક્ષુરપ્રેણ ચ્છત્રં સન્નાહમેવ ચ ॥
અસ્ત્રં તૃણં વાજિગણં વિવિધે ન ચ ભૂભૃતઃ

મુનિસ્તત્સચિવાન્સર્વાન્નાગાસ્ત્રેણૈવ લીલયા ॥
નિબધ્ય સ્થાપયામાસ પ્રહસ્ય સમરસ્થલે

મુનિસ્તં બોધયામાસ સુમન્ત્રેણૈવ લીલયા ॥
નિબદ્ધસર્વામાત્યાનાં દર્શયામાસ ભૂમિપમ્

દર્શયિત્વા નૃપં તાંશ્ચ મોચયામાસ તત્ક્ષણમ્॥
નૃપેન્દ્રમાશિષં કૃત્વા ગૃહં ગચ્છેત્યુવાચ હ

રાજા કોપાત્સમુત્થાય શૂલમુદ્યમ્ય યત્નતઃ ॥
ચિક્ષેપ તં મુનિશ્રેષ્ઠં મુનિઃ શક્ત્યા જઘાન તમ્

એતસ્મિન્નન્તરે બ્રહ્મા સમાગત્ય રણસ્થલમ્ ॥
સ પ્રીતિં જનયામાસ સુનીત્યા ચ પરસ્પરમ્

મુનિર્નનામ બ્રહ્માણં સન્તુષ્ટશ્ચ રણસ્થલે ॥
રાજા નત્વા વિધિં ચર્ષિં સ્વપુરં પ્રયયૌ તદા

મુનિર્યયૌ સ્વાશ્રમં ચ સ્વ લોકં કમલોદ્ભવઃ ॥
ઇત્યેવં કથિતં કિંચિદપરં કથયામિ તે

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણ સંવાદે જમદગ્નિકાર્તવીર્યયુદ્ધોપશમવર્ણનં નામ ષડ્વિંશોઽધ્યાયઃ