બ્રહ્મવૈવર્ત પુરાણ · અધ્યાય 3.22

નારદ ઉવાચ ॥
આવિર્ભૂય હરિસ્તસ્મૈ કિં સ્તોત્રં કવચં દદૌ ॥
મહાલક્ષ્મ્યાશ્ચ લક્ષ્મીશસ્તન્મે બ્રૂહિ તપોધન

નારાયણ ઉવાચ॥
પુષ્કરે ચ તપસ્તપ્ત્વા વિરરામ સુરેશ્વરઃ ॥
આવિર્બભૂવ તત્રૈવ ક્લિષ્ટં દૃષ્ટ્વા હરિઃ સ્વયમ્

તમુવાચ હૃષીકેશો વરં વૃણુ યથેપ્સિતમ્ ॥
સ ચ વવ્રે વરં લક્ષ્મીમીશસ્તસ્મૈ દદૌ મુદા

વરં દત્ત્વા હૃષીકેશઃ પ્રવક્તુમુપચક્રમે ॥
હિતં સત્યં ચ સારં ચ પરિણામસુખાવહમ્

શ્રીમધુસૂદન ઉવાચ ॥
ગૃહાણ કવચં શક્ર સર્વદુઃખવિનાશનમ્ ॥
પરમૈશ્વર્ય્યજનકં સર્વશત્રુવિમર્દનમ્

બ્રહ્મણે ચ પુરા દત્તં વિષ્ટપે ચ જલપ્લુતે ॥
યદ્ધૃત્વા જગતાં શ્રેષ્ઠઃ સર્વૈશ્વર્ય્યયુતો વિધિઃ

બભૂવુર્મનવઃ સર્વે સર્વૈશ્વર્યયુતા યતઃ ॥
સર્વૈશ્વર્ય્યપ્રદસ્યાસ્ય કવચસ્ય ઋષિર્વિધિઃ

પઙ્ક્તિશ્છન્દશ્ચ સા દેવી સ્વયં પદ્માલયા વરા ॥
સિદ્ધ્યૈશ્વર્ય્યસુખેષ્વેવ વિનિયોગઃ પ્રકીર્ત્તિતઃ ॥
યદ્ધૃત્વા કવચં લોકઃ સર્વત્ર વિજયી ભવેત્

મસ્તકં પાતુ મે પદ્મા કણ્ઠં પાતુ હરિપ્રિયા ॥
નાસિકાં પાતુ મે લક્ષ્મીઃ કમલા પાતુ લોચને

કેશાન્કેશવકાન્તા ચ કપાલં કમલાલયા ॥
જગત્પ્રસૂર્ગણ્ડયુગ્મં સ્કન્ધં સમ્પત્પ્રદા સદા ॥

ૐ શ્રીં કમલવાસિન્યૈ સ્વાહા પૃષ્ઠં સદાઽવતુ ॥
ૐ હ્રીં શ્રીં પદ્માલયાયૈ સ્વાહા વક્ષઃ સદાઽવતુ ॥
પાતુ શ્રીર્મમ કઙ્કાલં બાહુયુગ્મં ચ તે નમઃ

ૐ હ્રીં શ્રીં લક્ષ્મ્યૈ નમઃ પાદૌ પાતુ મે સંતતં ચિરમ્ ॥
ૐ હ્રીં શ્રીં નમઃ પદ્માયૈ સ્વાહા પાતુ નિતમ્બકમ્

ૐ શ્રીં મહાલક્ષ્મ્યૈ સ્વાહા સર્વાઙ્ગં પાતુ મે સદા ॥
ૐ હ્રીં શ્રીં ક્લીં મહાલક્ષ્મ્યૈ સ્વાહા માં પાતુ સર્વતઃ

ઇતિ તે કથિતં વત્સ સર્વસમ્પત્કરં પરમ્ ॥
સર્વૈશ્વર્ય્યપ્રદં નામ કવચં પરમાદ્ભુતમ્

ગુરુમભ્યર્ચ્ય વિધિવત્કવચં ધારયેત્તુ યઃ॥
કણ્ઠે વા દક્ષિણે બાહૌ સ સર્વવિજયી ભવેત્

મહાલક્ષ્મીર્ગૃહં તસ્ય ન જહાતિ કદાચન ॥
તસ્ય ચ્છાયેવ સતતં સા ચ જન્મનિ જન્મનિ

ઇદં કવચમજ્ઞાત્વા ભજેલ્લક્ષ્મીં સ મન્દધીઃ ॥
શતલક્ષપ્રજાપેઽપિ ન મન્ત્રઃ સિદ્ધિદાયકઃ

નારાયણ ઉવાચ ॥
દત્ત્વા તસ્મૈ ચ કવચં મન્ત્રં વૈ ષોડશાક્ષરમ્ ॥
સન્તુષ્ટશ્ચ જગન્નાથો જગતાં હિતકારણમ્

ૐ હ્રીં શ્રીં ક્લીં નમો મહાલક્ષ્મ્યૈ સ્વાહા॥
દદૌ તસ્મૈ ચ કૃપયા ચેન્દ્રાય ચ મહામુને

ધ્યાનં ચ સામવેદોક્તં ગોપનીયં સુદુર્લભમ્ ॥
સિદ્ધૈર્મુનીન્દ્રૈર્દુષ્પ્રાપ્યં ધ્રુવં સિદ્ધિપ્રદં શુભમ્

શ્વેતચમ્પકવર્ણાભાં શતચન્દ્રસમપ્રભામ્ ॥
વહ્નિશુદ્ધાંશુકાધાનાં રત્નભૂષણભૂષિતામ્

ઈષદ્ધાસ્યપ્રસન્નાસ્યાં ભક્તાનુગ્રહકારિકામ્ ॥
સહસ્રદલપદ્મસ્થાં સ્વસ્થાં ચ સુમનોહરામ્

શાન્તાં ચ શ્રીહરેઃ કાન્તાં તાં ભજેજ્જગતાં પ્રસૂમ્

ધ્યાનેનાનેન દેવેન્દ્રો ધ્યાત્વા લક્ષ્મીં મનોહરામ્ ॥
ભક્ત્યા સંપૂજ્ય તસ્યૈ ચ ચોપચારાંસ્તુ ષોડશ

સ્તુત્વાઽનેન સ્તવેનૈવ વક્ષ્યમાણેન વાસવ ॥
નત્વા વરં ગૃહીત્વા ચ લભિષ્યસિ ચ નિર્વૃતિમ્

સ્તવનં શૃણુ દેવેન્દ્ર મહાલક્ષ્મ્યાઃ સુખપ્રદમ્॥
કથયામિ સુગોપ્યં ચ ત્રિષુ લોકેષુ દુર્લભમ્

નારાયણ ઉવાચ॥
દેવિ ત્વાં સ્તોતુમિચ્છામિ ન ક્ષમાઃ સ્તોતુમીશ્વરાઃ ॥
બુદ્ધેરગોચરાં સૂક્ષ્માં તેજોરૂપાં સનાતનીમ્ ॥
અનિવાર્ય્યગુણાઢ્યાં ચ કો વા નિર્વક્તુમીશ્વરઃ

સ્વેચ્છામયીં નિરાકારાં ભક્તાનુગ્રહવિગ્રહામ્ ॥
સ્તૌમિ વાઙ્મનસાપારાં કિં વાઽહં જગદમ્બિકે

પરાં ચતુર્ણાં વેદાનાં પારબીજં ભવાર્ણવે ॥
સર્વસસ્યાધિદેવીં ચ સર્વાસામપિ સમ્પદામ્

યોગિનાં ચૈવ યોગાનાં જ્ઞાનાનાં જ્ઞાનિનાં તથા ॥
વેદાનાં વૈ વેદવિદાં જનનીં વર્ણયામિ કિમ્

યયા વિના જગત્સર્વમબીજં નિષ્ફલં ધ્રુવમ્ ॥
યયા સ્તનંધયાનાં ચ વિના માત્રા સુખં ભવેત્

પ્રસીદ જગતાં માતા રક્ષાસ્માનતિકાતરાન્ ॥
વયં ત્વચ્ચરણામ્ભોજે પ્રપન્નાઃ શરણં ગતાઃ

નમઃ શક્તિસ્વરૂપાયૈ જગન્માત્રે નમો નમઃ ॥
જ્ઞાનદાયૈ બુદ્ધિદાયૈ સર્વદાયૈ નમો નમઃ

હરિભક્તિપ્રદાયિન્યૈ મુક્તિદાયૈ નમો નમઃ॥
સર્વજ્ઞાયૈ સર્વદાયૈ મહાલક્ષ્મ્યૈ નમો નમઃ

કુપુત્રાઃ કુત્રચિત્સન્તિ ન કુત્રાપિ કુમાતરઃ॥
કુત્ર માતા પુત્રદોષં તં વિહાય ચ ગચ્છતિ

સ્તનન્ધયેભ્ય ઇવ મે હે માતર્દેહિ દર્શનમ્ ॥
કૃપાં કુરુ કૃપાસિન્ધો ત્વમસ્માન્ભક્તવત્સલે

ઇત્યેવં કથિતં વત્સ પદ્માયાશ્ચ શુભાવહમ્ ॥
સુખદં મોક્ષદં સારં શુભદં સમ્પદઃપ્રદમ્

ઇદં સ્તોત્રં મહાપુણ્યં પૂજાકાલે ચ યઃ પઠેત્ ॥
મહાલક્ષ્મીર્ગૃહં તસ્ય ન જહાતિ કદાચન

ઇત્યુક્ત્વા શ્રીહરિસ્તં ચ તત્રૈવાન્તરધીયત ॥
દેવો જગામ ક્ષીરોદં સુરૈઃ સાર્દ્ધં તદાજ્ઞયા

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે લક્ષ્મીસ્તવકવચપૂજા કથનં નામ દ્વાવિંશતિતમોઽધ્યાયઃ