બ્રહ્મવૈવર્ત પુરાણ · અધ્યાય 3.13

નારાયણ ઉવાચ ॥
અથ વિષ્ણુઃ શુભે કાલે દેવૈશ્ચ મુનિભિઃ સહ ॥
પૂજયામાસ તં બાલમુપહારૈરનુત્તમૈઃ

સર્વાગ્રે તવ પૂજા ચ મયા દત્તા સુરોત્તમ ॥
સર્વપૂજ્યશ્ચ યોગીન્દ્રો ભવ વત્સેત્યુવાચ તમ્

વનમાલાં દદૌ તસ્મૈ બ્રહ્મજ્ઞાનં ચ મુક્તિદમ્ ॥
સર્વસિદ્ધિં પ્રદાયૈવ ચકારાત્મસમં હરિઃ

દદૌ દ્રવ્યાણિ ચારૂણિ ચોપચારાંશ્ચ ષોડશ ॥
નામભિઃ સ્તવનં ચક્રે મુનિભિશ્ચ સમં સુરૈઃ

વિઘ્નેશશ્ચ ગણેશશ્ચ હેરમ્બશ્ચ ગજાનનઃ ॥
લમ્બોદરશ્ચૈકદન્તઃ શૂર્પકર્ણો વિનાયકઃ

એતાન્યષ્ટૌ ચ નામાનિ સર્વસિદ્ધિપ્રદાનિ ચ ॥
આશિષં દાપયામાસ ચાનયામાસ તાન્મુનીન્

સિદ્ધાસનં દદૌ ધર્મસ્તસ્મૈ બ્રહ્મા કમણ્ડલુમ્ ॥
શઙ્કરો યોગપટ્ટં ચ તત્ત્વજ્ઞાનં સુદુર્લભમ્

રત્નસિંહાસનં શક્રઃ સૂર્ય્યશ્ચ મણિકુણ્ડલે ॥
માણિક્યમાલાં ચન્દ્રશ્ચ કુબેરશ્ચ કિરીટકમ્

વહ્નિશુદ્ધં ચ વસનં દદૌ તસ્મૈ હુતાશનઃ ॥
રત્નચ્છત્રં ચ વરુણો વાયૂ રત્નાંગુલીયકમ્

ક્ષીરોદોદ્ભવસદ્રત્નરચિતં વલયં વરમ્ ॥
મઞ્જીરં ચાપિ કેયૂરં દદૌ પદ્માલયા મુને

કણ્ઠભૂષાં ચ સાવિત્રી ભારતી હારમુજ્જ્વલમ્ ॥
ક્રમેણ સર્વદેવાશ્ચ દેવ્યશ્ચ યૌતકં દદુઃ

મુનયઃ પર્વતાશ્ચૈવ રત્નાનિ વિવિધાનિ ચ ॥
વસુન્ધરા દદૌ તસ્મૈ વાહનાય ચ મૂષકમ્

ક્રમેણ દેવા દેવ્યશ્ચ મુનયઃ પર્વતાદયઃ॥
ગન્ધર્વાઃ કિન્નરા યક્ષા મનવો માનવાસ્તથા

નાનાવિધાનિ દ્રવ્યાણિ સ્વાદૂનિ મધુરાણિ ચ ॥
પૂજાં ચક્રુશ્ચ તે સર્વે ક્રમાદ્વૈ ભક્તિપૂર્વકમ્

પાર્વતી જગતાં માતા સ્મેરાનનસરોરુહા ॥
રત્નસિંહાસને પુત્રં વાસયામાસ નારદ

સર્વતીર્થોદકૈ રત્નકલશાવર્જિતૈઃ સ્તુતૈઃ ॥
સ્નાપયામાસ વેદોક્તમન્ત્રેણ મુનિભિસ્તદા ॥
અગ્નિશુદ્ધે ચ વસને દદૌ તસ્મૈ સતી મુદા

ગોદાવર્યુદકૈઃ પાદ્યમર્ઘ્યં ગંગોદકેન ચ ॥
દૂર્વાભિરક્ષતાપુષ્પૈશ્ચન્દનેન સમન્વિતમ્

પુષ્કરોદકમાનીય પુનરાચમનીયકમ્ ॥
મધુપર્કં રત્નપાત્રૈરાસવં શર્કરાન્વિતમ્

સ્નાનીયં વિષ્ણુતૈલં ચ સ્વર્વૈદ્યાભ્યાં વિનિર્મિતમ્ ॥
અમૂલ્યરત્નરચિતં ચારુભૂષાકદમ્બકમ્

પારિજાતપ્રસૂનાનામન્યેષાં શતકાનિ ચ ॥
માલતીચમ્પકાદીનાં પુષ્પાણિ વિવિધાનિ ચ ॥
પૂજાર્હાણિ ચ પત્રાણિ તુલસીસહિતાનિ ચ

ચન્દનાગુરુકસ્તૂરી કુંકુમાનિ ચ સાદરમ્ ॥
રત્નપ્રદીપનિકરં ધૂપં ચ પરિતો દદૌ

નૈવેદ્યં તત્પ્રિયં ચૈવ તિલલડ્ડુકપર્વતાન્ ॥
યવગોધૂમચૂર્ણાનાં લડ્ડુકાનાં ચ પર્વતાન્

પક્વાન્નાનાં પર્વતાશ્ચ સુસ્વાદુસુમનોહરાન્ ॥
પર્વતાન્સ્વસ્તિકાનાં ચ સુસ્વાદુશર્કરાન્વિતાન્

ગુડાક્તાનાં ચ લાજાનાં પૃથુકાનાં ચ પર્વતાન્ ॥
શાલ્યન્નાનાં પિષ્ટકાનાં પર્વતાન્વ્યઞ્જનૈઃ સહ ॥
પયોભૃત્કલશાનાં ચ લક્ષાણિ પ્રદદૌ મુદા

લક્ષાણિ દધિપૂર્ણાનાં કલશાનાં ચ પૂજને ॥
મધુભૃત્કલશાનાં ચ ત્રિલક્ષાણિ ચ સુન્દરી

સર્પિસ્સુવર્ણકુમ્ભાનાં પંચલક્ષાણિ સાદરમ્ ॥
દાડિમાનાં શ્રીફલાનામસંખ્યાનિ ફલાનિ ચ

ખર્જૂરાણાં કપિત્થાનાં જમ્બૂનાં વિવિધાનિ ચ ॥।
આમ્રાણાં પનસાનાં ચ કદલીનાં ચ નારદ ॥
ફલાનિ નારિકેલાનામસંખ્યાનિ દદૌ મુદા

અન્યાનિ પરિપક્વાનિ કાલદેશોદ્ભવાનિ ચ ॥
દદૌ તાનિ મહાભાગ સ્વાદૂનિ મધુરાણિ ચ

સ્વચ્છં સુનિર્મલં ચૈવ કર્પૂરાદિસુવાસિતમ્ ॥
ગઙ્ગાજલં ચ પાનાર્થં પુનરાચમનીયકમ્

તામ્બૂલં ચ વરં રમ્યં કર્પૂરાદિસુવાસિતમ્ ॥
સુવર્ણપાત્રશતકં ભક્ષ્યપૂર્ણં ચ નારદ

શૈલરાજપ્રિયા માત્યાઃ પુપૂજુઃ શૈલજાત્મજમ્

ૐ શ્રીં હ્રીં ક્લીં ગણેશ્વરાય બ્રહ્મરૂપાય ચારવે ॥
સર્વસિદ્ધિપ્રદેશાય વિઘ્નેશાય નમો નમઃ

ઇત્યનેનૈવ મન્ત્રેણ દત્ત્વા દ્રવ્યાણિ ભક્તિતઃ॥
સર્વે પ્રમુદિતાસ્તત્ર બ્રહ્મવિષ્ણુશિવાદયઃ

દ્વાત્રિંશદક્ષરો માલામન્ત્રોઽયં સર્વકામદ॥
ધર્માર્થકામમોક્ષાણાં ફલદઃ સર્વસિદ્ધિદઃ

પઞ્ચલક્ષજપેનૈવ મન્ત્રસિદ્ધિસ્તુ મન્ત્રિણઃ॥
મન્ત્રસિદ્ધિર્ભવેદ્યસ્ય સ ચ વિષ્ણુશ્ચ ભારતે

વિઘ્નાનિ ચ પલાયન્તે તન્નામસ્મરણેન ચ ॥
મહાવાગ્ગ્મી મહાસિદ્ધિઃ સર્વસિદ્ધિસમન્વિતઃ

વાક્પતિર્ગુરુતાં યાતિ તસ્ય સાક્ષાત્સુનિશ્ચિતમ્ ॥
મહાકવીન્દ્રો ગુણવાન્વિદુષાં ચ ગુરોર્ગુરુઃ

સંપૂજ્યાનેન મન્ત્રેણ દેવા આનન્દસંપ્લુતાઃ ॥
નાનાવિધાનિ વાદ્યાનિ વાદયામાસુરુત્સવે

બ્રાહ્મણાન્ભોજયામાસુઃ કારયામાસુરુત્સવમ્ ॥
દદુર્દાનાનિ તેભ્યશ્ચ બન્દિભ્યશ્ચ વિશેષતઃ

નારાયણ ઉવાચ ॥
અથ વિષ્ણુઃ સભામધ્યે તં સમ્પૂજ્ય ગણેશ્વરમ્ ॥
તુષ્ટાવ પરયા ભક્ત્યા સર્વવિઘ્નવિનાશકમ્

ઈશ ત્વાં સ્તોતુમિચ્છામિ બ્રહ્મજ્યોતિઃ સનાતનમ્ ॥
નૈવ વર્ણયિતું શક્તોઽસ્ત્યનુરૂપમનીહકમ્

પ્રવરં સર્વદેવાનાં સિદ્ધાનાં યોગિનાં ગુરુમ્ ॥
સર્વસ્વરૂપં સર્વેશં જ્ઞાનરાશિસ્વરૂપિણમ્

અવ્યક્તમક્ષરં નિત્યં સત્યમાત્મસ્વરૂપિણમ્ ॥
વાયુતુલ્યં ચ નિર્લિપ્તં ચાક્ષતં સર્વસાક્ષિણમ્

સંસારાર્ણવપારે ચ માયાપોતે સુદુર્લભે ॥
કર્ણધારસ્વરૂપં ચ ભક્તાનુગ્રહકારકમ્

વરં વરેણ્યં વરદં વરદાનામપીશ્વરમ્ ॥
સિદ્ધં સિદ્ધિસ્વરૂપં ચ સિદ્ધિદં સિદ્ધિસાધનમ

ધ્યાનાતિરિક્તં ધ્યેયં ચ ધ્યાનાસાધ્યં ચ ધાર્મિકમ્ ॥
ધર્મસ્વરૂપં ધર્મજ્ઞં ધર્માધર્મફલપ્રદમ્

બીજં સંસારવૃક્ષાણામંકુરં ચ તદાશ્રયમ્ ॥
સ્ત્રીપુંનપુંસકાનાં ચ રૂપમેતદતીન્દ્રિયમ્

સર્વાદ્યમગ્રપૂજ્યં ચ સર્વપૂજ્યં ગુણાર્ણવમ્ ॥
સ્વેચ્છયા સગુણં બ્રહ્મ નિર્ગુણં સ્વેચ્છયા પુનઃ

સ્વયં પ્રકૃતિરૂપં ચ પ્રાકૃતં પ્રકૃતેઃ પરમ્ ॥
ત્વાં સ્તોતુમક્ષમોઽનન્તઃ સહસ્રવદનૈરપિ

ન ક્ષમઃ પઞ્ચવક્ત્રશ્ચ ન ક્ષમશ્ચતુરાનનઃ ॥
સરસ્વતી ન શક્તા ચ ન શક્તોઽહં તવ સ્તુતૌ ॥
ન શક્તાશ્ચ ચતુર્વેદાઃ કે વા તે વેદવાદિનઃ

ઇત્યેવં સ્તવનં કૃત્વા મુનીશસુરસંસદિ ॥
સુરેશશ્ચ સુરૈઃ સાર્દ્ધં વિરરામ રમાપતિઃ

ઇદં વિષ્ણુકૃતં સ્તોત્રં ગણેશસ્ય ચ યઃ પઠેત્ ॥
સાયં પ્રાતશ્ચ મધ્યાહ્ને ભક્તિયુક્તઃ સમાહિતઃ

તદ્વિઘ્નનાશં કુરુતે વિઘ્નેશઃ સતતં મુને ॥
વર્દ્ધતે સર્વકલ્યાણં કલ્યાણજનકઃ સદા

યાત્રાકાલે પઠિત્વા યો યાતિ તદ્ભક્તિપૂર્વકમ્ ॥
તસ્ય સર્વાભીષ્ટસિદ્ધિર્ભવત્યેવ ન સંશયઃ

તેન દૃષ્ટં ચ દુસ્સ્વપ્નં સુસ્વપ્નમુપજાયતે ॥
કદાઽપિ ન ભવેત્તસ્ય ગ્રહપીડા ચ દારુણા

ભવેદ્વિનાશઃ શત્રૂણાં બન્ધૂનાં ચાપિ વર્દ્ધનમ્ ॥
શશ્વદ્વિઘ્નવિનાશશ્ચ શશ્વત્સમ્યગ્વિવર્દ્ધનમ્

સ્થિરા ભવેદ્ગૃહે લક્ષ્મીઃ પુત્રપૌત્રવિવર્દ્ધનમ્ ॥
સર્વૈશ્વર્ય્યમિહ પ્રાપ્ય હ્યન્તે વિષ્ણુપદં લભેત્

ફલં ચાપિ ચ તીર્થાનાં યજ્ઞાનાં યદ્ભવેદ્ધ્રુવમ્ ॥
મહતાં સર્વદાનાનાં તદ્ગણેશપ્રસાદત

નારદ ઉવાચ ॥
શ્રુતં સ્તોત્રં ગણેશસ્ય પૂજનં ચ મનોહરમ્ ॥
કવચં શ્રોતુમિચ્છામિ સામ્પ્રતં ભવતારણમ્

નારાયણ ઉવાચ ॥
પૂજાયાં સુનિવૃત્તાયાં સભામધ્યે શનૈશ્ચરઃ ॥
ઉવાચ વિષ્ણું સર્વેષાં તારકં જગતાં ગુરુમ્

શનૈશ્ચર ઉવાચ ॥
સર્વદુઃખવિનાશાય પાપપ્રશમનાય ચ ॥
કવચં વિઘ્નનિઘ્નસ્ય વદ વેદવિદાંવર

બભૂવ નો વિવાદશ્ચ શક્ત્યા વૈ માયયા સહ ॥
તદ્વિઘ્નપ્રશમાર્થં ચ કવચં ધારયામ્યહમ્

શ્રીવિષ્ણુરુવાચ ॥
વિનાયકસ્ય કવચં ત્રિષુ લોકેષુ દુર્લભમ્ ॥
સુગોપ્યં ચ પુરાણેષુ દુર્લભં ચાગમેષુ ચ

ઉક્તં કૌથુમશાખાયાં સામવેદે મનોહરમ્ ॥
કવચં વિઘ્નનાથસ્ય સર્વવિઘ્નહરં પરમ્

રાજ્યં દેયં શિરો દેયં પ્રાણા દેયાશ્ચ સૂર્ય્યજ ॥
એવમ્ભૂતં ચ કવચં ન દેયં પ્રાણસઙ્કટે

આવિર્ભાવસ્તિરોભાવઃ સ્વેચ્છયા યસ્ય માયયા ॥
નિત્યોઽયમેકદન્તશ્ચ કવચં ચાસ્ય વત્સક

પૂજાઽસ્ય નિત્યા સ્તોત્રં ચ કલ્પે કલ્પેઽસ્તિ સન્તતમ્॥
અસ્ય વૈ જન્મનઃ પૂર્વં મુનયશ્ચ સિષેવિરે

યથા મદવતારેષુ જન્મવિગ્રહધારણમ્ ॥
તથા ગણેશ્વરસ્યાપિ જન્મ શૈલસુતોદરે

યદ્ધૃત્વા મુનયઃ સર્વે જીવન્મુક્તાશ્ચ ભારતે ॥
નિશ્શઙ્કાશ્ચ સુરાઃ સર્વે શત્રુપક્ષવિમર્દકાઃ

કવચં બિભ્રતાં મૃત્યુર્ન ભિયા યાતિ સન્નિધિમ્ ॥
નાયુર્વ્યયો નાશુભં ચ બ્રહ્માણ્ડે ન પરાજયઃ

દશ લક્ષજપેનૈવ સિદ્ધં તુ કવચં ભવેત્ ॥
યો ભવેત્સિદ્ધકવચો મૃત્યું જેતું સ ચ ક્ષમઃ

સુસિદ્ધકવચો વાગ્મી ચિરંજીવી મહીતલે ॥
સર્વત્ર વિજયી પૂજ્યો ભવેદ્ગ્રહણમાત્રતઃ

માલામન્ત્રમિમં પુણ્યં કવચં મઙ્ગલં શુભમ્ ॥
બિભ્રતાં સર્વપાપાનિ પ્રણશ્યન્તિ સુનિશ્ચિતમ્

ભૂતપ્રેતપિશાચાશ્ચ કૂષ્માણ્ડા બ્રહ્મરાક્ષસાઃ ॥
ડાકિનીયોગિનીયક્ષવેતાલા ભૈરવાદયઃ

બાલગ્રહા ગ્રહાશ્ચૈવ ક્ષેત્રપાલાદયસ્તથા ॥
વર્મણઃ શબ્દમાત્રેણ પલાયન્તે ચ ભીરવઃ

આધયો વ્યાધયશ્ચૈવ શોકાશ્ચૈવ ભયાવહાઃ ॥
ન યાન્તિ સન્નિધિં તેષાં ગરુડસ્ય યથોરગાઃ

ઋજવે ગુરુભક્તાય સ્વશિષ્યાય પ્રકાશયેત્ ॥
ખલાય પરશિષ્યાય દત્ત્વા મૃત્યુમવાપ્નુયાત્

સંસારમોહકસ્યાસ્ય કવચસ્ય પ્રજાપતિઃ ॥
ઋષિશ્છન્દશ્ચ બૃહતી દેવો લમ્બોદરઃ સ્વયમ્॥
ધર્માર્થકામમોક્ષેષુ વિનિયોગઃ પ્રકીર્ત્તિતઃ

સર્વેષાં કવચાનાં ચ સારભૂતમિદં મુને ॥
ૐ ગં હું શ્રીગણેશાય સ્વાહા મે પાતુ મસ્તકમ્ ॥
દ્વાત્રિંશદક્ષરો મન્ત્રો લલાટં મે સદાઽવતુ

ૐ હ્રીં ક્લીં શ્રીં ગમિતિ વૈ સતતં પાતુ લોચનમ્ ॥
તાલુકે પાતુ વિઘ્નેશઃ સતતં ધરણીતલે

ૐ હ્રીં શ્રીં ક્લીમિતિ પરં સન્તતં પાતુ નાસિકામ્ ॥
ૐ ગૌં ગં શૂર્પકર્ણાય સ્વાહા પાત્વધરં મમ ॥
દન્તાંશ્ચ તાલુકાં જિહ્વાં પાતુ મે ષોડશાક્ષરઃ

ૐ લં શ્રીં લમ્બોદરાયેતિ સ્વાહા ગણ્ડં સદા ઽવતુ ॥
ૐ ક્લીં હ્રીં વિઘ્નનાશાય સ્વાહા કર્ણં સદાઽવતુ

ૐ શ્રીં ગં ગજાનનાયેતિ સ્વાહા સ્કન્ધં સદાઽવતુ॥
ૐ હ્રીં વિનાયકાયેતિ સ્વાહા પૃષ્ઠં સદાઽવતુ

ૐ ક્લીં હ્રીમિતિ કઙ્કાલં પાતુ વક્ષઃસ્થલં પરમ્ ॥
કરૌ પાદૌ સદા પાતુ સર્વાંગં વિઘ્નનાશકૃત્

પ્રાચ્યાં લમ્બોદરઃ પાતુ ચાગ્નેય્યાં વિઘ્નનાયકઃ ॥
દક્ષિણે પાતુ વિશ્વેશો નૈરૃત્યાં તુ ગજાનનઃ

પશ્ચિમે પાર્વતીપુત્રો વાયવ્યાં શંકરાત્મજઃ ॥
કૃષ્ણસ્યાંશશ્ચોત્તરે ચ પરિપૂર્ણતમસ્ય ચ

ઐશાન્યામેકદન્તશ્ચ હેરમ્બઃ પાતુ ચોર્ધ્વતઃ ॥
અધો ગણાધિપઃ પાતુ સર્વપૂજ્યશ્ચ સર્વતઃ ॥
સ્વપ્ને જાગરણે ચૈવ પાતુ માં યોગિનાં ગુરુઃ

ઇતિ તે કથિતં વત્સ સર્વમન્ત્રૌઘવિગ્રહમ્ ॥
સંસારમોહનં નામ કવચં પરમાદ્ભુતમ્

શ્રીકૃષ્ણેન પુરા દત્તં ગોલોકે રાસમણ્ડલે ॥
વૃન્દાવને વિનીતાય મહ્યં દિનકરાત્મજ

મયા દત્તં ચ તુભ્યં ચ યસ્મૈ કસ્મૈ ન દાસ્યસિ ॥
પરં વરં સર્વપૂજ્યં સર્વસંકટતારણમ્

ગુરુમભ્યર્ચ્ય વિધિવત્કવચં ધારયેત્તુ યઃ ॥
કણ્ઠે વા દક્ષિણે બાહૌ સોઽપિ વિષ્ણુર્ન સંશયઃ

અશ્વમેધસહસ્રાણિ વાજપેયશતાનિ ચ ॥
ગ્રહેન્દ્ર કવચસ્યાસ્ય કલાં નાર્હન્તિ ષોડશીમ્

ઇદં કવચમજ્ઞાત્વા યો ભજેચ્છંકરાત્મજમ્ ॥
શતલક્ષપ્રજપ્તોઽપિ ન મન્ત્રઃ સિદ્ધિદાયકઃ

ઇતિ સંસારમોહનં નામ કવચમ્ ॥
દત્ત્વેદં સૂર્ય્યપુત્રાય વિરરામ સુરેશ્વરઃ ॥
પરમાનન્દસંયુક્તા દેવાસ્તસ્થુઃ સમીપતઃ

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે ગણેશપૂજાસ્તવકવચકથનં નામ ત્રયોદશોઽધ્યાયઃ