બ્રહ્મવૈવર્ત પુરાણ · અધ્યાય 3.10

નારાયણ ઉવાચ ॥
તૌ દમ્પતી બહિર્ગત્વા પુત્રમઙ્ગલહેતવે॥
વિવિધાનિ ચ રત્નાનિ દ્વિજેભ્યો દદતુર્મુદા

બન્દિભ્યો ભિક્ષુકેભ્યશ્ચ દાનાનિ વિવિધાનિ ચ ॥
નાનાવિધાનિ વાદ્યાનિ વાદયામાસ શઙ્કરઃ

હિમાલયશ્ચ રત્નાનાં દદૌ લક્ષં દ્વિજાતયે ॥
સહસ્રં ચ ગજેન્દ્રાણામશ્વાનાં ચ ત્રિલક્ષકમ્

દશલક્ષં ગવાં ચૈવ પઞ્ચલક્ષં સુવર્ણકમ્ ॥
મુક્તામાણિક્યરત્નાનિ મણિશ્રેષ્ઠાનિ યાનિ ચ

અન્યાન્યપિ ચ દાનાનિ વસ્ત્રાણ્યાભરણાનિ ચ ॥
સર્વાણ્યમૂલ્યરત્નાનિ ક્ષીરોદોત્પત્તિકાનિ ચ

બ્રાહ્મણેભ્યો દદૌ વિષ્ણુઃ કૌસ્તુભં કૌતુકાન્વિતઃ ॥
બ્રહ્મા વિશિષ્ટદાનાનિ વિપ્રાણાં વાઞ્છિતાનિ ચ ॥
સુદુર્લભાનિ સૃષ્ટૌ ચ બ્રાહ્મણેભ્યો દદૌ મુદા

ધર્મઃ સૂર્ય્યશ્ચ શક્રશ્ચ દેવાશ્ચ મુનયસ્તથા ॥
ગન્ધર્વાઃ પર્વતા દેવ્યો દદુર્દાનં ક્રમેણ ચ

માણિક્યાનાં સહસ્રાણિ રત્નાનાં ચ શતાનિ ચ ॥
શતાનિ કૌસ્તુભાનાં ચ હીરકાણાં શતાનિ ચ

હરિદ્વર્ણમણીન્દ્રાણાં સહસ્રાણિ મુદાઽન્વિતાઃ ॥
ગવાં રત્નાનિ લક્ષાણિ ગજરત્નસહસ્રકમ્ ॥
અમૂલ્યાન્યન્યરત્નાનિ શ્વેતવર્ણાનિ કૌતુકાત્

શતલક્ષં સુવર્ણાનાં વહ્નિશુદ્ધાંશુકાનિ ચ ॥
બ્રાહ્મણેભ્યો દદૌ બ્રહ્મા તત્ર ક્ષીરોદધિર્મુદા

હારં ચામૂલ્યરત્નાનાં ત્રિષુ લોકેષુ દુર્લભમ્ ॥
અતીવ નિર્મલં સારં સૂર્ય્યભાનુવિનિન્દકમ્

પરિષ્કૃતં ચ માણિક્યૈર્હીરકૈશ્ચ વિરાજિતમ્ ॥
રમ્યં કૌસ્તુભમધ્યસ્થં દદૌ દેવી સરસ્વતી॥

ત્રૈલોક્યસારં હારં ચ સદ્રત્નગણનિર્મિતમ્ ॥
ભૂષણાનિ ચ સર્વાણિ સા સાવિત્રી દદૌ મુદા

લક્ષં સુવર્ણલોષ્ટાનાં ધનાનિ વિવિધાનિ ચ ॥
શતાન્યમૂલ્યરત્નાનાં કુબેરશ્ચ દદૌ મુદા

દાનાનિ દત્ત્વા વિપ્રેભ્યસ્તે સર્વે દદૃશુઃ શિશુમ્ ॥
પરમાનન્દસંયુક્તાઃ શિવપુત્રોત્સવે મુને

ભારં વોઢુમશક્તાશ્ચ બ્રાહ્મણા બન્દિનસ્તથા ॥
સ્થાયંસ્થાયં ચ ગચ્છન્તો ધનાનિ પથિ કાતરાઃ

કથયન્તિ કથાઃ સર્વે વિશ્રાન્તાઃ પૂર્વદાયિનામ્ ॥
બુદ્ધાઃ શૃણ્વન્તિ મુદિતા યુવાનો ભિક્ષુકા મુને

વિષ્ણુઃ પ્રમુદિતસ્તત્ર વાદયામાસ દુન્દુભિમ્ ॥
સંગીતં પાયયામાસ કારયામાસ નર્તનમ્ ॥
વેદાંશ્ચ પાઠયામાસ પુરાણાનિ ચ નારદ

મુનીન્દ્રાનાનયામાસ પૂજયામાસ તાન્મુદા ॥
આશિષં દાપયામાસ કારયામાસ મઙ્ગલમ્॥
સાર્દ્ધં દેવશ્ચૈ દેવીભિર્દદૌ તસ્મૈ શુભાશિષઃ ॥

વિષ્ણુરુવાચ ॥
શિવેન તુલ્યં જ્ઞાનં તે પરમાયુશ્ચ બાલક ॥
પરાક્રમે મયા તુલ્યઃ સર્વસિદ્ધીશ્વરો ભવ

બ્રહ્મોવાચ ॥
યશસા તે જગત્પૂર્ણં સર્વપૂજ્યો ભવાચિરમ્ ॥
સર્વેષાં પુરતઃ પૂજા ભવત્વતિસુદુર્લભા

ધર્મ્મ ઉવાચ ॥
મયા તુલ્યઃ સુધર્મિષ્ઠો ભવાન્ભવતુ દુર્લભઃ ॥
સર્વજ્ઞશ્ચ દયાયુક્તો હરિભક્તો હરેઃ સમઃ

મહાદેવ ઉવાચ ॥
દાતા ભવ મયા તુલ્યો હરિભક્તશ્ચ બુદ્ધિમાન્॥
વિદ્યાવાન્પુણ્યવાઞ્છાન્તો દાન્તશ્ચ પ્રાણવલ્લભ

લક્ષ્મીરુવાચ ॥
મમ સ્થિતિશ્ચ ગેહે તે દેહે ભવતુ શાશ્વતી ॥
પતિવ્રતા મયા તુલ્યા શાન્તા કાન્તા મનોહરા

સરસ્વત્યુવાચ ॥
મયા તુલ્યા સુકવિતા ધારણાશક્તિરેવ ચ ॥
સ્મૃતિર્વિવેચનાશક્તિર્ભવત્વતિતરાં સુત

સાવિત્ર્યુવાચ ॥
વત્સાહં વેદજનની વેદજ્ઞાની ભવાચિરમ્ ॥
મન્મન્ત્રજપશીલશ્ચ પ્રવરો વેદવાદિનામ્ ॥

હિમાલય ઉવાચ ॥
શ્રીકૃષ્ણેઽતિમતિઃ શશ્વદ્ભક્તિર્ભવતુ શાશ્વતી ॥
શ્રીકૃષ્ણતુલ્યો ગુણવાન્ભવ કૃષ્ણપરાયણઃ

મેનકોવાચ ॥
સમુદ્રતુલ્યો ગામ્ભીર્ય્યે કામતુલ્યશ્ચ રૂપવાન્ ॥
શ્રીયુક્તઃ શ્રીપતિસમો ધર્મ્મે ધર્મસમો ભવ

વસુન્ધરોવાચ ॥
ક્ષમાશીલો મયા તુલ્યઃ શરણ્યઃ સર્વરત્નવાન્ ॥
નિર્વિઘ્નો વિઘ્નનિઘ્નશ્ચ ભવ વત્સ શુભાશ્રયઃ

પાર્વત્યુવાચ ॥
તાતતુલ્યમહાયોગી સિદ્ધઃ સિદ્ધિપ્રદઃ શુભઃ ॥
મૃત્યુઞ્જયશ્ચ ભગવાન્ભવત્વતિવિશારદઃ

ઋષયો મુનયઃ સિદ્ધાઃ સર્વે યુયુજુરાશિષઃ॥
બ્રાહ્મણા બન્દિનશ્ચૈવ યુયુજુઃ સર્વમઙ્ગલમ્

સર્વં તે કથિતં વત્સ સર્વમઙ્ગલમઙ્ગલમ્ ॥
ગણેશજન્મકથનં સર્વવિઘ્નવિનાશનમ્

ઇમં સુમંગલાધ્યક્ષં યઃ શૃણોતિ સુખં યતઃ ॥
સર્વમંગલસંયુક્તઃ સ ભવેન્મંગલાલયઃ

અપુત્રો લભતે પુત્રમધનો લભતે ધનમ્॥
કૃપણો લભતે સત્ત્વં શશ્વત્સમ્પત્પ્રદાયિ ચ

ભાર્ય્યાર્થી લભતે ભાર્ય્યાં પ્રજાર્થી લભતે પ્રજામ્ ॥
આરોગ્યં લભતે રોગી સૌભાગ્યે દુર્ભગા લભેત્

ભ્રષ્ટપુત્રં નષ્ટધનં પ્રોષિતં ચ પ્રિયં લભેત્ ॥
શોકાવિષ્ટઃ સદાઽઽનન્દં લભતે નાત્ર સંશયઃ

યત્પુણ્યં લભતે મર્ત્યો ગણેશાખ્યાનકશ્રુતૌ ॥
તત્ફલં લભતે નૂનમધ્યાયશ્રવણાન્મુને

અયં ચ મઙ્ગલાધ્યાયો યસ્ય ગેહં ચ તિષ્ઠતિ ॥
સદા મઙ્ગલસંયુક્તઃ સ ભવેન્નાત્ર સંશયઃ

યાત્રાકાલે ચ પુણ્યાહે યઃ શૃણોતિ સમાહિતઃ ॥
સર્વાભીષ્ટં સ લભતે શ્રીગણેશપ્રસાદતઃ

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણેશખણ્ડે નારદનારાયણસંવાદે ગણેશોદ્ભવમંગલં નામ દશમોઽધ્યાયઃ