બ્રહ્મવૈવર્ત પુરાણ · અધ્યાય 3.9

નારાયણ ઉવાચ ॥
હરૌ તિરોહિતે શર્વાણી દુર્ગા શંકરસ્તદા ॥
બ્રાહ્મણાન્વેષણં કૃત્વા બભ્રામ પરિતો મુને

પાર્વત્યુવાચ ॥
અયે વિપ્રેન્દ્રાતિવૃદ્ધ ક્વ ગતોઽસિ ક્ષુધાઽઽતુરઃ ॥
હે તાત દર્શનં દેહિ પ્રાણાન્વૈ રક્ષ મે વિભો

શિવ શીઘ્રં સમુત્તિષ્ઠ બ્રાહ્મણાન્વેષણં કુરુ ॥
ક્ષણમુન્મનસોરેષ ગતઃ પ્રત્યક્ષમાવયોઃ

અગૃહીત્વા ગૃહાત્પૂજાં ગૃહિણોઽતિથિરીશ્વર ॥
યદિ યાતિ ક્ષુધાઽઽર્ત્તશ્ચ તસ્ય કિં જીવનં વૃથા

પિતરસ્તન્ન ગૃહ્ણન્તિ પિણ્ડદાનં ચ તર્પણમ્ ॥
તસ્યાહુતિં ન ગૃહ્ણાતિ વહ્નિઃ પુષ્પં જલં સુરાઃ

હવ્યં પુષ્પં જલં દ્રવ્યમશુચેશ્ચ સુરાસમમ્ ॥
અમેધ્યસદૃશઃ પિણ્ડઃ સ્પર્શનં પુણ્યનાશનમ્

એતસ્મિન્નન્તરે તત્ર વાગ્ બભૂવાશરીરિણી ॥
કૈવલ્યયુક્તા સા દુર્ગા તાં શુશ્રાવ શુચાઽઽતુરા

શાન્તા ભવ જગન્માતસ્સ્વસુતં પશ્ય મન્દિરે ॥
કૃષ્ણં ગોલોકનાથં તં પરિપૂર્ણતમં પરમ્

સુપુણ્યકવ્રતતરોઃ ફલરૂપં સનાતનમ્ ॥
યત્તેજો યોગિનઃ શશ્વદ્ધ્યાયન્તિ સન્તતં મુદા

ધ્યાયન્તિ વૈષ્ણવા દેવા બ્રહ્મવિષ્ણુશિવાદયઃ ॥
યસ્ય પૂજ્યસ્ય સર્વાગ્રે કલ્પે કલ્પે ચ પૂજનમ્

યસ્ય સ્મરણમાત્રેણ સર્વવિઘ્નો વિનશ્યતિ ॥
પુણ્યરાશિસ્વરૂપં ચ સ્વસુતં પશ્ય મન્દિરે

કલ્પે કલ્પે ધ્યાયસિ યં જ્યોતીરૂપં સનાતનમ્ ॥
પશ્ય ત્વં મુક્તિદં પુત્રં ભક્તાનુગ્રહવિગ્રહમ્

તવ વાઞ્છાપૂર્ણબીજં તપઃકલ્પતરોઃ ફલમ્॥
સુન્દરં સ્વસુતં પશ્ય કોટિકન્દર્પનિન્દકમ્

નાયં વિપ્રઃ ક્ષુધાઽઽર્ત્તશ્ચ વિપ્રરૂપી જનાર્દનઃ ॥
કિં વા વિલાપં કુરુષે ક્વ વા વૃદ્ધઃ ક્વ ચાતિથિઃ ॥
સરસ્વતી ત્વેવમુક્ત્વા વિરરામ ચ નારદ

ત્રસ્તા શ્રુત્વાઽઽકાશવાણીં જગામ સ્વાલયં સતી ॥
દદર્શ બાલં પર્ય્યઙ્કે શયાનં સસ્મિતં મુદા

પશ્યન્તં ગેહશિખરં શતચન્દ્રસમપ્રભમ્ ॥
સ્વપ્રભાપટલેનૈવ દ્યોતયન્તં મહીતલમ્

કુર્વન્તં ભ્રમણં તલ્પે પશ્યન્તં સ્વેચ્છયા મુદા ॥
ઉમેતિ શબ્દં કુર્વન્તં રુદન્તં તં સ્તનાર્થિનમ્

દૃષ્ટ્વા તદદ્ભુતં રૂપં ત્રસ્તા શંકરસન્નિધિમ્ ॥
ગત્વા સોવાચ ગિરિશં સર્વમઙ્ગલમઙ્ગલા

પાર્વત્યુવાચ ॥
ગૃહમાગચ્છ સર્વેશ તપસાં ફલદાયકમ્ ॥
કલ્પે કલ્પે ધ્યાયસિ યં તં પશ્યાગત્ય મન્દિરમ્

શીઘ્રં પુત્રમુખં પશ્ય પુણ્યબીજં મહોત્સવમ્ ॥
પુન્નામનરકત્રાણકારણં ભવતારણમ્

સ્નાનં ચ સર્વતીર્થેષુ સર્વયજ્ઞેષુ દક્ષિણમ્ ॥
પુત્રસંદર્શનસ્યાસ્ય કલાં નાર્હતિ ષોડશીમ્

સર્વદાનેન યત્પુણ્યં ક્ષ્માપ્રદક્ષિણતશ્ચ યત્ ॥
પુત્રદર્શનપુણ્યસ્ય કલાં નાર્હતિ ષોડશીમ્

સર્વૈસ્તપોભિર્યત્પુણ્યં દેવાનશનૈર્વ્રતૈઃ ॥
સત્પુત્રોદ્ભવપુણ્યસ્ય કલાં નાર્હતિ ષોડશીમ્

યદ્વિપ્રભોજનૈઃ પુણ્યં યદેવ સુરસેવનૈઃ ॥
સત્પુત્રપ્રાપ્તિપુણ્યસ્ય કલાં નાર્હતિ ષોડશીમ્

પાર્વત્યા વચનં શ્રુત્વા શિવઃ સંહૃષ્ટમાનસઃ ॥
આજગામ સ્વભવનં ક્ષિપ્રં વૈ કાન્તયા સહ ॥
દદર્શ તલ્પે સ્વસુતં તપ્તકાઞ્ચનસન્નિભમ્

હદયસ્થં ચ યદ્રૂપં તદેવાતિમનોહરમ્ ॥
દુર્ગાતલ્પાત્સમાદાય કૃત્વા વક્ષસિ તં સુતમ્॥
ચુચુમ્બાનન્દજલધૌ નિમગ્ના સેત્યુવાચ તમ્

સંપ્રાપ્યામૂલ્યરત્નં ત્વાં પૂર્ણમેવ સનાતનમ્ ॥
યથા મનો દરિદ્રસ્ય સહસા પ્રાપ્ય સદ્ધનમ્

કાન્તે સુચિરમાયાતે પ્રોષિતે યોષિતો યથા ॥
માનસં પરિપૂર્ણં ચ બભૂવ ચ તથા મમ

સુચિરં ગતમાયાતમેકપુત્રા કથા સુતમ્ ॥
દૃષ્ટ્વા તુષ્ટા યથા વત્સ તથાઽહમપિ સામ્પ્રતમ્

સદ્રત્નં સુચિરં ભ્રષ્ટં પ્રાપ્ય હૃષ્ટો યથા જનઃ ॥
અનાવૃષ્ટૌ સુવૃષ્ટિં ચ સંપ્રાપ્યાહં તથા સુતમ્

યથા સુચિરમન્ધાનાં સ્થિતાનાં ચ નિરાશ્રયે ॥
ચક્ષુસ્સુનિર્મ્મલં પ્રાપ્ય મનઃ પૂર્ણં તથૈવ મે

દુસ્તરે સાગરે ઘોરે પતિતસ્ય ચ સંકટે ॥
અનૌકસ્ય પ્રાપ્ય નૌકાં મનઃ પૂર્ણં તથા મમ

તૃષ્ણયા શુષ્કકણ્ઠાનાં સુચિરાચ્ચ સુશીતલમ્॥
સુવાસિતં જલં પ્રાપ્ય મનઃ પૂર્ણં તથા મમ

દાવાગ્નિપતિતાનાં ચ સ્થિતાનાં ચ નિરાશ્રયે ॥
નિરગ્નિમાશ્રયં પ્રાપ્ય મનઃ પૂર્ણં તથા મમ

ચિરં બુભુક્ષિતાનાં ચ વ્રતોપોષણકારિણામ્

સદન્નં પુરતો દૃષ્ટ્વા મનઃ પૂર્ણં તથા મમ ॥
ઇત્યુક્ત્વા પાર્વતી તત્ર ક્રોડે કૃત્વા સ્વબાલકમ્

પ્રીત્યા સ્તનં દદૌ તસ્મૈ પરમાનન્દમાનસા ॥
ક્રોડે ચકાર ભગવાન્બાલકં હૃષ્ટમાનસઃ

ચુચુમ્બ ગણ્ડે વેદોક્તં યુયુજે ચાશિષં મુદા

ઇતિ શ્રીબ્રહ્મવૈવર્ત્તે મહાપુરાણ તૃતીયે ગણપતિ ખણ્ડે નારદનારાયણસંવાદે બાલગણેશદર્શનં નામ નવમોઽધ્યાયઃ