બ્રહ્મવૈવર્ત પુરાણ · અધ્યાય 2.45

નારાયણ ઉવાચ ॥
ઉક્તં દ્વયોરુપાખ્યાનં બ્રહ્મપુત્ર યથાગમમ્॥
શ્રૂયતાં મનસાખ્યાનં યચ્છ્રુતં ધર્મવક્ત્રતઃ

કન્યા ભગવતી સા ચ કશ્યપસ્ય ચ માનસી॥
તેનેયં મનસાદેવી મનસા યા ચ દીવ્યતિ

મનસા ધ્યાયતે યા વા પરમાત્માનમીશ્વરમ્ ॥
તેન સા મનસાદેવી યોગેનૈતેન દીવ્યતિ

આત્મારામા ચ સા દેવી વૈષ્ણવી સિદ્ધયોગિની ॥
ત્રિયુગં ચ તપસ્તપ્ત્વા કૃષ્ણસ્ય પરમાત્મનઃ

જરત્કારુશરીરં ચ દૃષ્ટ્વા યાં ક્ષણમીશ્વરઃ ॥
ગોપીપતિર્નામ ચક્રે જરત્કારુરિતિ પ્રભુઃ

વાઞ્છિતં ચ દદૌ તસ્યૈ કૃપયા ચ કૃપાનિધિઃ ॥
પૂજાં ચ કારયામાસ ચકાર ચ પુનઃ સ્વયમ્

સ્વર્ગે ચ નાગલોકે ચ પૃથિવ્યાં બહ્મલોકતઃ ॥
ભૃશં જપત્સુ ગૌરી સા સુન્દરી ચ મનોહરા

જગદ્ગૌરીતિ વિખ્યાતા તેન સા પૂજિતા સતી ॥
શિવશિષ્યા ચ સા દેવી તેન શૈવીતિ કીર્ત્તિતા

વિષ્ણુભક્તાઽતીવ રમ્યા વૈષ્ણવી તેન નારદ ॥
નાગાનાં પ્રાણરક્ષિત્રી જનમેજયયજ્ઞકે

નાગેશ્વરીતિ વિખ્યાતા સા નાગભગિની તથા ॥
વિષં સંહર્ત્તુમીશા સા તેન સા વિષહારિણી ॥2.45.૧ ૦॥
સિદ્ધં યોગં હરાત્પ્રાપ તેનાસૌ સિદ્ધયોગિની॥
મહાજ્ઞાનં ચ ગોપ્યં ચ મૃતસઞ્જીવિનીં પરામ્ ॥૧ ૧॥
મહાજ્ઞાનયુતાં તાં ચ પ્રવદન્તિ મનીષિણઃ ॥
આસ્તીકસ્ય મુનીન્દ્રસ્ય માતા સા વૈ તપસ્વિનઃ

આસ્તીકમાતા વિખ્યાતા જરત્કારુરિતિ સ્મ સા ॥
પ્રિયા મુનેર્જરત્કારોર્મુનીન્દ્રસ્ય મહાત્મનઃ

યોગિનો વિશ્વપૂજ્યસ્ય જરત્કારોઃ પ્રિયા તતઃ

ૐ નમો મનસાયૈ ॥
જરત્કારુર્જગદ્ગૌરી મનસા સિદ્ધયોગિની ॥
વૈષ્ણવી નાગભગિની શૈવી નાગેશ્વરી તથા

જરત્કારુપ્રિયાઽઽસ્તીકમાતા વિષહરીતિ ચ ॥
મહાજ્ઞાનયુતા ચૈવ સા દેવી વિશ્વપૂજિતા

દ્વાદશૈતાનિ નામાનિ પૂજાકાલે ચ યઃ પઠેત્ ॥
તસ્ય નાગભયં નસ્તિ તસ્ય વંશોદ્ભવસ્ય ચ

નાગભીદે ચ શયને નાગગ્રસ્તે ચ મન્દિરે ॥
નાગક્ષતે નાગદુર્ગે નાગવેષ્ટિતવિગ્રહે

ઇદં સ્તોત્રં પઠિત્વા તુ મુચ્યતે નાત્ર સંશયઃ ॥
નિત્યં પઠેદ્યસ્તં દૃષ્ટ્વા નાગવર્ગઃ પલાયતે

દશલક્ષજપેનૈવ સ્તોત્રસિદ્ધિર્ભવેન્નૃણામ્ ॥
સ્તોત્રં સિદ્ધં ભવેદ્યસ્ય સ વિષં ભોક્તુમીશ્વરઃ

નાગૌઘં ભૂષણં કૃત્વા સ ભવેન્નાગવાહનઃ ॥
નાગાસનો નાગતલ્પો મહા સિદ્ધો ભવેન્નરઃ

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે મનસોપાખ્યાને મનસાસ્તોત્રાદિક થનં નામ પઞ્ચચત્વારિંશત્તમોઽધ્યાયઃ