બ્રહ્મવૈવર્ત પુરાણ · અધ્યાય 2.44

નારાયણ ઉવાચ ॥
કથિતં ષષ્ઠ્યુપાખ્યાનં બ્રહ્મપુત્ર યથાગમમ્॥
દેવી મઙ્ગલચણ્ડી ચ તદાખ્યાનં નિશામય

તસ્યાઃ પૂજાદિકં સર્વં ધર્મવક્ત્રાચ્ચ યચ્છ્રુતમ્ ॥
શ્રુતિસમ્મતમેવેષ્ટં સર્વેષાં વિદુષામપિ

ચણ્ડાયાં વર્ત્તતે ચણ્ડી જાગ્રતી શત્રુમણ્ડલે ॥
મઙ્ગલેષુ ચ યા દક્ષા મઙ્ગલા સૈવ ચણ્ડિકા

દુર્ગાયાં વિદ્યતે ચણ્ડી મઙ્ગલોઽપિ મહીસુતે ॥
મઙ્ગલાઽભીષ્ટદેવી યા સા સ્યાન્મઙ્ગલચણ્ડિકા

મંગલો મનુવંશશ્ચ સપ્તદ્વીપાવનીપતિઃ ॥
તસ્ય પૂજ્યાઽભીષ્ટદેવી તેન મંગલચણ્ડિકા

મૂર્ત્તિભેદેન સા દુર્ગા મૂલપ્રકૃતિરીશ્વરી ॥
કૃપારૂપાઽતિપ્રત્યક્ષા યોષિતામિષ્ટદેવતા

પ્રથમે પૂજિતા સા ચ શઙ્કરેણ પુરા પરા ॥
ત્રિપુરસ્ય વધે ઘોરં વિષ્ણુના પ્રેરિતેન ચ

બ્રહ્મન્બ્રહ્મોપદેશેન દુર્ગપ્રસ્થે ચ સઙ્કટે ॥
આકાશાત્પતિતે યાને રુષા દૈત્યેન પાતિતે

બ્રહ્મવિષ્ણૂપદિષ્ટશ્ચ દુર્ગાં તુષ્ટાવ શઙ્કરઃ ॥
સા ચ મંગલચણ્ડીયમભવદ્રૂપભેદતઃ

ઉવાચ પુરતઃ શમ્ભોર્ભયં નાસ્તીતિ તે પ્રભો ॥
ભગવાન્વૃષરૂપશ્ચ સર્વેશશ્ચ બભૂવ હ

યુદ્ધશક્તિસ્વરૂપાઽહં ભવિષ્યામિ તદાજ્ઞયા ॥
મયાઽઽત્મના ચ હરિણા સહાયેન વૃષધ્વજ

જહિ દૈત્યં ચ દેવેશ સુરાણાં પદઘાતકમ્ ॥
ઇત્યુક્ત્વાઽન્તર્હિતા દેવી શમ્ભોઃ શક્તિર્બભૂવ સા

વિષ્ણુદત્તેન શસ્ત્રેણ જઘાન તમુમાપતિઃ ॥
મુનીન્દ્ર પતિતે દૈત્યે સર્વે દેવા મહર્ષયઃ

તુષ્ટુવુઃ શંકરં દેવા ભક્તિનમ્રાત્મકન્ધરાઃ ॥
સદ્યઃ શિરસિ શમ્ભોશ્ચ પુષ્પવૃષ્ટિર્બભૂવ હ

બ્રહ્મા વિષ્ણુશ્ચ સન્તુષ્ટો દદૌ તસ્મૈ શુભાશિષમ્ ॥
બ્રહ્મવિષ્ણૂપદિષ્ટશ્ચ સુસ્નાતઃ શઙ્કરઃ શુચિઃ

પૂજયામાસ તાં શક્તિં દેવીં મઙ્ગલચણ્ડિકામ્ ॥
પાદ્યાર્ઘ્યાચમનીયૈશ્ચ બલિભિર્વિવિધૈરપિ

પુષ્પચન્દનનૈવેદ્યૈર્ભક્ત્યા નાનાવિધૈર્મુને ॥
છાગૈર્મેષૈશ્ચ મહિષૈર્ગણ્ડૈર્માયાવિભિર્વરૈઃ

વસ્ત્રાલઙ્કારમાલ્યૈશ્ચ પાયસૈઃ પિષ્ટકૈરપિ ॥
મધુભિશ્ચ સુધાભિશ્ચ પક્વૈર્નાનાવિધૈઃ ફલૈઃ

સઙ્ગીતૈર્નર્ત્તનૈર્વાદ્યૈરુત્સવૈઃ કૃષ્ણકીર્ત્તનૈઃ ॥
ધ્યાત્વા માધ્યન્દિનોક્તેન ધ્યાનેન વિધિપૂર્વકમ્

દદૌ દ્રવ્યાણિ મૂલેન મન્ત્રેણૈવ ચ નારદ ॥
ૐ હ્રીં શ્રીં ક્લીં સર્વપૂજ્યે દેવિ મઙ્ગલચણ્ડિકે ॥
ઐં ક્રૂં ફટ્સ્વાહેત્યેવં ચાપ્યેકવિંશાક્ષરો મનુઃ॥

પૂજ્યઃ કલ્પતરુશ્ચૈવ ભક્તાનાં સર્વકામદઃ ॥
દશલક્ષજપેનૈવ મન્ત્રસિદ્ધિર્ભવેન્નૃણામ્

મન્ત્રસિદ્ધિર્ભવેદ્યસ્ય સ વિષ્ણુઃ સર્વકામદઃ ॥
ધ્યાનં ચ શ્રૂયતાં બ્રહ્મન્વેદોક્તં સર્વસમ્મતમ્

દેવીં ષોડશવર્ષીયાં રમ્યાં સુસ્થિરયૌવનામ્ ॥
સર્વરૂપગુણાઢ્યાં ચ કોમલાંગીં મનોહરામ્

શ્વેતચમ્પકવર્ણાભાં ચન્દ્રકોટિસમપ્રભામ્ ॥
વહ્નિશુદ્ધાંશુકાધાનાં રત્નભૂષણભૂષિતામ્ ॥

બિભ્રતીં કબરીભારં મલ્લિકામાલ્યભૂષિતમ્॥
બિમ્બોષ્ઠીં સુદતીં શુદ્ધાં શરત્પદ્મનિભાનનામ્

ઈષદ્ધાસ્યપ્રસન્નાસ્યાં સુનીલોત્પલલોચનામ્ ॥
જગદ્ધાત્રીં ચ દાત્રીં ચ સર્વેભ્યઃ સર્વસમ્પદામ્

સંસારસાગરે ઘોરે પોતરૂપાં વરાં ભજે

દેવ્યાશ્ચ ધ્યાનમિત્યેવં સ્તવનં શ્રૂયતાં મુને ॥
પ્રયતઃ સઙ્કટગ્રસ્તો યેન તુષ્ટાવ શઙ્કરઃ

શઙ્કર ઉવાચ ॥
રક્ષ રક્ષ જગન્માતર્દેવિ મંગલચણ્ડિકે ॥
સંહર્ત્રિ વિપદાં રાશેર્હર્ષમંગલકારિકે

હર્ષમંગલદક્ષે ચ હર્ષમંગલચણ્ડિકે ॥
શુભે મંગલદક્ષે ચ શુભમંગલ ચણ્ડિકે

મંગલે મઙ્ગલાર્હે ચ સર્વમંગલમંગલે ॥
સતાં મંગલદે દેવિ સર્વેષાં મંગલાલયે

પૂજ્યા મંગલવારે ચ મંગલાભીષ્ટદૈવતે ॥
પૂજ્યે મંગલભૂપસ્ય મનુવંશસ્ય સન્તતમ્

મંગલાધિષ્ઠાતૃદેવિ મંગલાનાં ચ મંગલે ॥
સંસારે મંગલાધારે મોક્ષમંગલદાયિનિ

સારે ચ મંગલાધારે પારે ત્વં સર્વકર્મણામ્ ॥
પ્રતિમંગલવારં ચ પૂજ્યે ત્વં મંગલપ્રદે

સ્તોત્રેણાનેન શમ્ભુશ્ચ સ્તુત્વા મગલચણ્ડિકામ્ ॥
પ્રતિમંગલવારે ચ પૂજાં કૃત્વા ગતઃ શિવઃ

દેવ્યાશ્ચ મંગલસ્તોત્રં યઃ શૃણોતિ સમાહિતઃ ॥
તન્મંગલં ભવેચ્છશ્વન્ન ભવેત્તદમંગલમ્

પ્રથમે પૂજિતા દેવી શમ્ભુના સર્વમંગલા ॥
દ્વિતીયે પૂજિતા દેવી મંગલેન ગ્રહેણ ચ

તૃતીયે પૂજિતા ભદ્રા મંગલેન નૃપેણ ચ ॥
ચતુર્થે મંગલે વારે સુન્દરીભિશ્ચ પૂજિતા ॥
પઞ્ચમે મઙ્ગલાકાંક્ષૈર્નરૈર્મંગલચણ્ડિકા

પૂજિતા પ્રતિવિશ્વેષુ વિશ્વેશૈઃ પૂજિતા સદા ॥
તતઃ સર્વત્ર સંપૂજ્ય સા બભૂવ સુરેશ્વરી

દેવાદિભિશ્ચ મુનિભિર્મનુભિર્માનવૈર્મુને ॥
દેવ્યાશ્ચ મઙ્ગલસ્તોત્રં યઃ શૃણોતિ સમાહિતઃ

તન્મંગલં ભવેચ્છશ્વન્ન ભવેત્તદમંગલમ્ ॥
વર્દ્ધન્તે તત્પુત્રપૌત્રા મંગલં ચ દિને દિને

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે મઙ્ગલોપાખ્યાને તત્સ્તોત્રાદિકથનં નામ ચતુશ્ચત્વારિંશત્તમોઽધ્યાયઃ