બ્રહ્મવૈવર્ત પુરાણ · અધ્યાય 2.12

નારદ ઉવાચ ॥
લક્ષ્મીઃ સરસ્વતી ગંગા તુલસી લોકપાવની ॥
એતા નારાયણસ્યૈવ ચતસ્રશ્ચ પ્રિયા ઇતિ

ગંગા જગામ વૈકુણ્ઠમિદમેવ શ્રુતં મયા ॥
કથં સા તસ્ય પત્ની ચ બભૂવ બ્રૂહિ કેશવ

નારાયણ ઉવાચ ॥
ગંગા જગામ વૈકુણ્ઠં તત્પશ્ચાચ્ચ ગતો વિધિઃ ॥
ગત્વોવાચ તયા સાર્દ્ધં પ્રણમ્ય જગદીશ્વરમ્

બ્રહ્મોવાચ ॥
રાધાકૃષ્ણાગસંભૂતા યા દેવી દ્રવરૂપિણી ॥
તદધિષ્ઠાતૃદેવીયં રૂપેણાપ્રતિમા ભુવિ

નવયૌવનસમ્પન્ના સુશીલા સુન્દરી વરા ॥
શુદ્ધસત્ત્વસ્વરૂપા ચ ક્રોધાહઙ્કારવર્જિતા

યદઙ્ગસમ્ભવા નાન્યં વૃણોતીયં ચ તં વિના ॥
તત્રાપિ માનિની રાધા મહાતેજસ્વિની વરા

સમુદ્યતા પાતુમિમાં ભીતેયં બુદ્ધિપૂર્વકમ્ ॥
વિવેશ ચરણામ્ભોજે કૃષ્ણસ્ય પરમાત્મનઃ

સર્વં વિશુષ્કં ગોલોકં દૃષ્ટ્વાઽહમગમં તદા ॥
ગોલાકં યત્ર કૃષ્ણશ્ચ સર્વવૃત્તાન્તલબ્ધયે

સર્વાન્તરાત્મા સર્વં નો જ્ઞાત્વાઽભિપ્રાયમેવ ચ ॥
બહિશ્ચકાર ગંગાં ચ પાદાઙ્ગુષ્ઠનખાગ્રતઃ

દત્ત્વાઽસ્યૈ રાધિકામન્ત્રં પૂરયિત્વા ચ ગોલકમ્ ॥
સંપ્રણમ્ય ચ રાધેશં ગૃહીત્વાઽત્રાગમં વિભો

ગાન્ધર્વેણ વિવાહેન ગૃહાણેમાં સુરેશ્વરીમ્ ॥
સુરેશ્વરસ્ત્વં રસિકો રસિકાં રસભાવનઃ

પુંરત્નં પુંસુ દેવેષુ સ્ત્રીરત્નં સ્ત્રીષ્વિયં સતી ॥
વિદગ્ધાયા વિદગ્ધેન સઙ્ગમો ગુણવાન્ભવેત્

ઉપસ્થિતાં ચ યઃ કન્યાં ન ગૃહ્ણાતિ મદેન ચ ॥
તં વિહાય મહાલક્ષી રુષ્ટા યાતિ ન સંશયઃ ॥

યો ભવેત્પણ્ડિતઃ સોઽપિ પ્રકૃતિં નાવમન્યતે ॥
સર્વે પ્રાકૃતિકાઃ પુંસઃ કામિન્યઃ પ્રકૃતેઃ કલાઃ

ત્વમેવ ભગવા નાદ્યો નિર્ગુણઃ પ્રકૃતેઃ પરઃ ॥
અર્દ્ધાંગો દ્વિભુજઃ કૃષ્ણોઽપ્યર્ધાંગેન ચતુર્ભુજઃ

કૃષ્ણવામાંગસમ્ભૂતા પરમા રાધિકા પુરા ॥
દક્ષિણાઙ્ગાત્સ્વયં સા ચ વામાઙ્ગાત્કમલા યથા

તેન ત્વાં સા વૃણોત્યેવ યતસ્ત્વદ્દેહસમ્ભવા ॥
સ્ત્રીપુંસૌ વૈ તથૈકાઙ્ગૌ યથા પ્રકૃતિપૂરુષૌ

ઇત્યેવમુક્ત્વા ધાતા ચ તાં સમર્પ્ય જગામ સઃ ॥
ગાન્ધર્વેણ વિવાહેન તાં જગ્રાહ હરિઃ સ્વયમ્

શય્યાં રતિકરીં કૃત્વા પુષ્પચન્દનચર્ચિતામ્ ॥
રેમે રમાપતિસ્તત્ર ગઙ્ગયા સહિતો મુદા

ગાં પૃથ્વીં ચ ગતા યસ્માત્સ્વસ્થાનં પુનરાગતા ॥
નિર્ગતા વિષ્ણુપાદાચ્ચ ગઙ્ગા વિષ્ણુપદી સ્મૃતા

મૂર્ચ્છાં સમ્પ્રાપ સા દેવી નવસઙ્ગમમાત્રતઃ ॥
રસિકા સુખસમ્ભોગાદ્રસિકેશ્વરસંયુતા

તદ્દૃષ્ટ્વા દુઃખિતા વાણી સાપત્ન્યેર્ષ્યાવિવર્જિતા ॥
નિત્યમીર્ષ્યતિ તાં વાણી ન ચ ગંગા સરસ્વતીમ્

ગઙ્ગયા સહિતસ્યૈવ તિસ્રો ભાર્યા રમાપતેઃ ॥
સાર્દ્ધં તુલસ્યા પશ્ચાચ્ચ ચતસ્રો હ્યભવન્મુને

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે ગઙ્ગોપાખ્યાનં નામ દ્વાદશોઽધ્યાયઃ