બ્રહ્મવૈવર્ત પુરાણ · અધ્યાય 1.7

સૌતિરુવાચ ॥
તદા બ્રહ્મા તપઃ કૃત્વા સિદ્ધિં પ્રાપ્ય યથેપ્સિતામ્ ॥
સસૃજે પૃથિવીમાદૌ મધુકૈટભમેદસા

સસૃજે પર્વતાનષ્ટૌ પ્રધાનાન્સુમનોહરાન્ ॥
ક્ષુદ્રાનસંખ્યાન્કિં બ્રૂમઃ પ્રધાનાખ્યાં નિશામય

સુમેરું ચૈવ કૈલાસં મલયં ચ હિમાલયમ્॥
ઉદયં ચ તથાઽસ્તં ચ સુવેલં ગન્ધમાદનમ્

સમુદ્રાન્સસૃજે સપ્ત નદાન્કતિવિધા નદીઃ ॥
વૃક્ષાંશ્ચ ગ્રામનગરં સમુદ્રાખ્યા નિશામય

લવણેક્ષુસુરાસર્પિર્દધિદુગ્ધજલાર્ણવાન્ ॥
લક્ષયોજનમાનેન દ્વિગુણાંશ્ચ પરાત્પરાન્

સપ્તદ્વીપાંશ્ચ તદ્ભૂમિમણ્ડલે કમલાકૃતે ॥
ઉપદ્વીપાંસ્તથા સપ્તસીમાશૈલાંશ્ચ સપ્ત ચ

નિબોધ વિપ્ર દ્વીપાખ્યાં પુરા યા વિધિના કૃતા ॥
જમ્બૂશાકકુશપ્લક્ષક્રૌઞ્ચન્યગ્રોધપૌષ્કરાન્

મેરોરષ્ટસુ શૃઙ્ગેષુ સસૃજેઽષ્ટૌ પુરી પ્રભુઃ ॥
અષ્ટાનાં લોકપાલાનાં વિહારાય મનોહરાઃ

મૂલેઽનન્તસ્ય નગરીં નિર્માય જગતાં પતિઃ ॥
ઊર્ધ્વે સ્વર્ગાંશ્ચ સપ્તૈવ તેષામાખ્યા નિશામય

ભૂર્લોકં ચ ભુવર્લોકં સ્વર્લોકં સુમનોહરમ્ ॥
જનોલોકં તપોલોકં સત્યલોકં ચ શૌનક

શૃઙ્ગમૂર્ધ્નિ બ્રહ્મલોકં જરાદિપરિવર્જિતમ્ ॥
તદૂર્ધ્વે ધ્રુવલોકં ચ સર્વતઃ સુમનોહરમ્

તદધઃ સપ્ત પાતાલાન્નિર્મમે જગદીશ્વરઃ ॥
સ્વર્ગાતિરિક્તભોગાઢ્યાનધોધઃ ક્રમતો મુને

અતલં વિતલં ચૈવ સુતલં ચ તલાતલમ્ ॥
મહાતલં ચ પાતાલં રસાતલમધસ્તતઃ

સપ્તદ્વીપૈઃ સપ્તનાકૈઃ સપ્તપાતાલસંજ્ઞકૈઃ ॥
એભિર્લોકૈશ્ચ બ્રહ્માણ્ડં બ્રહ્માધિકૃતમેવ ચ

એવઞ્ચાસંખ્યબ્રહ્માણ્ડં સર્વં કૃત્રિમમેવ ચ ॥
મહાવિષ્ણોશ્ચ લોમ્નાં ચ વિવરેષુ ચ શૌનક

પ્રતિવિશ્વેષુ દિક્પાલા બ્રહ્મવિષ્ણુમહેશ્વરાઃ ॥
સુરા નરાદયઃ સર્વે સન્તિ કૃષ્ણસ્ય માયયા

બ્રાહ્માણ્ડગણનાં કર્તું ન ક્ષમો જગતાં પતિઃ ॥
ન શઙ્કરો ન ધર્મશ્ચ ન ચ વિષ્ણુશ્ચ કે સુરાઃ

સંખ્યાતુમીશ્વરઃ શક્તો ન સંખ્યાતું તથાપિ સઃ ॥
વિશ્વાકાશદિશાં ચૈવ સર્વતો યદ્યપિ ક્ષમઃ

કૃત્રિમાણિ ચ વિશ્વાનિ વિશ્વસ્થાનિ ચ યાનિ ચ ॥
અનિત્યાનિ ચ વિપ્રેન્દ્ર સ્વપ્નવન્નશ્વરાણિ ચ

વૈકુણ્ઠઃ શિવલોકશ્ચ ગોલોકશ્ચ તયોઃ પરઃ ॥
નિત્યો વિશ્વબહિર્ભૂતશ્ચાત્માકાશદિશો યથા

ઇતિ શ્રીબ્રહ્મવૈવર્તે મહાપુરાણે સૌતિશૌનકસંવાદે બ્રહ્મખણ્ડે સૃષ્ટિનિરૂપણં નામ સપ્તમોઽધ્યાયઃ