બ્રહ્મવૈવર્ત પુરાણ · અધ્યાય 1.29

સૌતિરુવાચ ॥
દદર્શાશ્રમમાશ્ચર્ય્યં દેવર્ષિર્નારદસ્તથા ॥
ઋષિર્નારાયણસ્યૈવ બદરીવનસંયુતમ્

નાનાવૃક્ષફલાકીર્ણં પુંસ્કોકિલરુતશ્રુતમ્ ॥
શરભેન્દ્રૈઃ કેસરીન્દ્રૈર્વ્યાઘ્રૌઘૈઃ પરિવેષ્ટિતમ્

ઋષીન્દ્રસ્ય પ્રભાવેણ હિંસાભયવિવર્જિતમ્ ॥
મહારણ્યમગમ્યં ચ સ્વર્ગાદપિ મનોહરમ્

સિદ્ધેન્દ્રાણાં મુનીન્દ્રાણામાશ્રમાણાં ત્રિકોટિભિઃ ॥
આવૃતં ચન્દનારણ્યૈઃ પારિજાતવનાન્વિતમ્

દદર્શ તમૃષીન્દ્રં ચ સભામધ્યે મનોહરમ્ ॥
રત્નસિંહાસનસ્થં ચ વસન્તં યોગિનાં ગુરુમ્

જપન્તં પરમં બ્રહ્મ કૃષ્ણમાત્માનમીશ્વરમ્ ॥
પ્રણનામ ચ તં દૃષ્ટ્વા બ્રહ્મપુત્રશ્ચ શૌનક

ઉત્થાય સહસાઽઽલિઙ્ગ્ય યુયુજે પરમાશિષમ્ ॥
પપ્રચ્છ કુશલં સ્નેહાચ્ચકારાતિથિપૂજનમ્

રત્નસિંહાસને રમ્યે વાસયામાસ નારદમ્ ॥
નિવસન્નાસને રમ્યે વર્ત્મશ્રમવિવર્જિતઃ

ઉવાચ તમૃષિશ્રેષ્ઠં ભગવન્તં સનાતનમ્ ॥
અધીત્ય વેદાન્સર્વાંશ્ચ પિતુઃ સ્થાને સુદુર્ગમાન્

જ્ઞાનં સમ્પ્રાપ્ય યોગીન્દ્રાન્મન્ત્રં વૈ શઙ્કરાદ્વિભો ॥
મનો મે ન હિ તૃપ્નોતિ દુર્નિવારં ચ ચંચલમ્

દૃષ્ટં મયા ત્વત્પદાબ્જં મનસા પ્રેરિતેન ચ ॥
કિંચિજ્જ્ઞાનવિશેષં ચ લબ્ધુમિચ્છામિ સામ્પ્રતમ્

યત્ર કૃષ્ણગુણાખ્યાનં જન્મમૃત્યુજરાપહમ્

બ્રહ્મવિષ્ણુશિવાદ્યાશ્ચ સુરેન્દ્રશ્ચ સુરા વિભો ॥
કં ચિન્તયન્તિ મુનયો મનવશ્ચ વિચક્ષણાઃ

કસ્માત્સૃષ્ટિશ્ચ ભવતિ કુત્ર વા સંપ્રલીયતે॥
કો વા સર્વેશ્વરો વિષ્ણુઃ સર્વકારણકારકઃ

તસ્યેશ્વરસ્ય કિં રૂપં કર્મ વા કિં જગત્પતે ॥
વિચાર્ય્ય મનસા સર્વં તદ્ભવાન્વક્તુમર્હતિ

નારદસ્ય વચઃ શ્રુત્વા પ્રહસ્ય ભગવાનૃષિઃ॥
કથાં કથિતુમારેભે પુણ્યાં ભુવનપાવનીમ્

ઇતિ શ્રીબ્રહ્મવૈવર્ત્તે મહાપુરાણે બ્રહ્મખણ્ડે સૌતિશૌનકસંવાદે નારાયણં પ્રતિ નારદપ્રશ્નો નામૈકોનત્રિંશત્તમોઽધ્યાયઃ