બ્રહ્મવૈવર્ત પુરાણ · અધ્યાય 1.30

શ્રીનારાયણ ઉવાચ ॥
લમ્બોદરો હરિરુમાપતિરીશશેષા બ્રહ્માદયઃ સુરગણા મનવો મુનીન્દ્રાઃ ॥
વાણીશિવાત્રિપથગા કમલાદિકાશ્ચ સંચિન્તયેદ્ભગવતશ્ચરણારવિન્દમ્

સંસારસાગરમતીવ ગભીરઘોરં દાવાગ્નિસર્પપરિવેષ્ટિતચેષ્ટિતાઙ્ગમ્ ॥
સંલંઘ્ય ગન્તુમભિવાઞ્છતિ યો હિ દાસ્યં સંચિન્તયેદ્ભગવતશ્ચરણારવિન્દમ્

ગોવર્દ્ધનોદ્ધરણકીર્ત્તિરતીવ ખિન્ના ભૂર્ધારિતા ચ દશનાગ્રત એવ ચાર્દ્રા ॥
વિશ્વાનિ લોમવિવરેષુ બિભર્તુરાદેઃ સંચિન્તયેદ્ભગવતશ્ચરણારવિન્દમ્

વેદાઙ્ગવેદમુખનિઃસૃતકીર્ત્તિરંશૈર્વેદાઙ્ગવેદજનકસ્ય હરેર્વિધાતુઃ॥
જન્માન્તકાદિભયશોકવિદીર્ણદેહઃ સંચિન્તયેદ્ભગવતશ્ચરણારવિન્દમ્

ગોપાઙ્ગનાવદનપઙ્કજષટ્પદસ્ય રાસેશ્વરસ્ય રસિકારમણસ્ય પુંસઃ॥
વૃન્દાવને વિહરતો વ્રજવેષવિષ્ણોઃ સંચિન્તયેદ્ભગવતશ્ચરણારવિન્દમ્

ચક્ષુર્નિમેષપતિતો જગતાં વિધાતા તત્કર્મ વત્સ કથિતું ભુવિ કઃ સમર્થઃ॥
ત્વં ચાપિ નારદ મુને પરમાદરેણ સંચિન્તનં કુરુ હરેશ્ચરણારવિન્દમ્

યૂયં વયં તસ્ય કલાકલાંશાઃ કલાકલાંશા મનવો મુનીન્દ્રાઃ ॥
કલાવિશેષા ભવપારમુખ્યા મહાન્વિરાડ્ યસ્ય કલાવિશેષઃ

સહસ્રશીર્ષા શિરસઃ પ્રદેશે બિભર્ત્તિ સિદ્ધાર્થસમં ચ વિશ્વમ્ ॥
કૂર્મે ચ શેષો મશકો ગજે યથા કૂર્મશ્ચ કૃષ્ણસ્ય કલાકલાંશઃ

ગોલોકનાથસ્ય વિભોર્યશોઽમલં શ્રુતૌ પુરાણે નહિ કિંચન સ્ફુટમ્ ॥
ન પાદ્મમુખ્યાઃ કથિતું સમર્થાઃ સર્વેશ્વરં તં ભજ પાદ્મમુખ્યમ્

વિશ્વેષુ સર્વેષુ ચ વિશ્વધામ્નઃ સન્ત્યેવ શશ્વદ્વિધિવિષ્ણુરુદ્રાઃ ॥
તેષાં ચ સંખ્યાઃ શ્રુતયશ્ચ દેવાઃ પરં ન જાનન્તિ તમીશ્વરં ભજ

કરોતિ સૃષ્ટિં સ વિધેર્વિધાતા વિધાય નિત્યાં પ્રકૃતિં જગત્પ્રસૂમ્ ॥
બ્રહ્માદયઃ પ્રાકૃતિકાશ્ચ સર્વે ભક્તિપ્રદાં શ્રીપ્રકૃતિં ભજન્તિ

બ્રહ્મસ્વરૂપા પ્રકૃતિર્ન ભિન્ના યયા ચ સૃષ્ટિં કુરુતે સનાતનઃ ॥
શ્રિયશ્ચ સર્વાઃ કલયા જગત્સુ માયા ચ સર્વે ચ તયા વિમોહિતાઃ

નારાયણી સા પરમા સનાતની શક્તિશ્ચ પુંસઃ પરમાત્મનશ્ચ ॥
આત્મેશ્વરશ્ચાપિ યયા ચ શક્તિમાંસ્તયા વિના સ્રષ્ટુમશક્ત એવ

ગત્વા વિવાહં કુરુ વત્સ સામ્પ્રતં કર્તું પ્રયુક્તશ્ચ પિતુર્નિદેશઃ॥
ગુરોર્નિદેશપ્રતિપાલકો ભવેઃ સર્વત્ર પૂજ્યો વિજયી ચ સન્તતમ્

સ્વપત્નીં પૂજયેદ્યો હિ વસ્ત્રાલઙ્કારચન્દનૈઃ॥
પ્રકૃતિસ્તસ્ય સન્તુષ્ટા યથા કૃષ્ણો દ્વિજાર્ચ્ચને

સા ચ યોષિત્સ્વરૂપા ચ પ્રતિવિશ્વેષુ માયયા ॥
યોષિતામપમાનેન પરાભૂતા ચ સા ભવેત્

દિવ્યા સ્ત્રી પૂજિતા યેન પતિપુત્રવતી સતી ॥
પ્રકૃતિઃ પૂજિતા તેન સર્વમઙ્ગલદાયિની

મૂલપ્રકૃતિરેકા સા પૂર્ણબ્રહ્મસ્વરૂપિણી ॥
સૃષ્ટૌ પઞ્ચવિધા સા ચ વિષ્ણુમાયા સનાતની

પ્રાણાધિષ્ઠાતૃદેવી યા કૃષ્ણસ્ય પરમાત્મનઃ ॥
સર્વાસાં પ્રેયસી કાન્તા સા રાધા પરિકીર્તિતા

નારાયણપ્રિયા લક્ષ્મીઃ સર્વસમ્પત્સ્વરૂપિણી ॥
રાગાધિષ્ઠાતૃદેવી યા સા ચ પૂજ્યા સરસ્વતી

સાવિત્રી વેદમાતા ચ પૂજ્યરૂપા વિધેઃ પ્રિયા ॥
શઙ્કરસ્ય પ્રિયા દુર્ગા યસ્યાઃ પુત્રો ગણેશ્વરઃ

ઇતિ શ્રીબ્રહ્મવૈવર્ત્તે મહાપુરાણે બ્રહ્મખણ્ડે સૌતિશૌનકસંવાદે ભગવત્સ્તુતિતત્સ્વરૂપવર્ણનં નામ ત્રિંશત્તમો ઽધ્યાયઃ

॥ ઇતિ શ્રીબ્રહ્મવૈવર્તે મહાપુરાણે પ્રથમં બ્રહ્મખણ્ડં સમ્પૂર્ણમ્ ॥