બ્રહ્મવૈવર્ત પુરાણ · અધ્યાય 1.25

સૌતિરુવાચ ॥
ક્ષણેન વિપ્રપ્રવરો મુદાઽન્વિતો જગામ શમ્ભોઃ સદનં મનોહરમ્ ॥
ઊર્ધ્વં ધ્રુવાદ્યોજનલક્ષમીપ્સિતં મહાર્હરત્નૌઘવિનિર્મિતં મહત્

નિરાશ્રયે યોગબલેન શમ્ભુના ધૃતં વિચિત્રં વિવિધાલયાન્વિતમ્ ॥
દૃષ્ટં સુપુણ્યાશયસાધકૈર્વરૈર્મુનીન્દ્રવર્યૈઃ પરિપૂરિતં શુભમ્

મયૂખશૂન્યં રવિચન્દ્રયોર્મુને હુતાશનૈર્વેષ્ટિતમેવ કેવલમ્ ॥
પ્રાકારરૂપૈરતિરિક્તવર્દ્ધિતૈરુચ્ચૈરસંખ્યાપ્રમિતૈઃ શિખોજ્જ્વલૈઃ

પુરં વરં યોજનલક્ષવિસ્તૃતં ત્રિકોટિરત્નેન્દ્રગૃહાન્વિતં સદા ॥
વિરાજિતં હીરકસારનિર્મિતૈશ્ચિત્રૈર્વિચિત્રૈર્વિવિધૈર્મનોહરૈઃ

માણિક્યમુક્તામણિદર્પણૈર્યુતં નસ્વપ્નદૃષ્ટં દ્વિજ વિશ્વકર્મણઃ ॥
આકલ્પમેકૈઃ શિવસેવિતૈર્જનૈર્નિષેવિતં સન્તતમેવ શૌનક

સિદ્ધૈર્નિયુક્તં શતકોટિલક્ષૈકૈસ્ત્રિકોટિલક્ષૈશ્ચ યુતં સ્વપાર્ષદૈઃ ॥
યુક્તં ત્રિલક્ષૈર્વિકટૈશ્ચ ભૈરવૈઃ ક્ષેત્રૈશ્ચતુર્લક્ષશતૈશ્ચ વેષ્ટિતમ્

સુરદ્રુમૈર્વેષ્ટિતમેવ સન્તતં મન્દારવૃક્ષપ્રવરૈઃ સુપુષ્પિતૈઃ ॥
વિરાજિતં સુન્દરકામધેનુભિર્યથા બલાકાશતકૈર્નભસ્તલમ્

દૃષ્ટ્વા મુનિર્વિસ્મયમાપ માનસે કિં નાત્ર ચિત્રં સુરયોગિનાં ગુરૌ ॥
લોકં ત્રિલોકાચ્ચ વિલક્ષણં પરં ભીમૃત્યુરોગાર્ત્તિજરાહરં વરમ્

દૂરે સભામણ્ડલમધ્યગં શિવં દદર્શ શાન્તં શિવદં મનોહરમ્ ॥
પદ્મત્રિનેત્રં વિધુપઞ્ચવક્ત્રં ગઙ્ગાધરં નિર્મલચન્દ્રશેખરમ્

પ્રતપ્તહેમાભજટાધરં વિભું દિગમ્બરં શુભ્રમનન્તમક્ષરમ્ ॥
મન્દાકિનીપુષ્કરબીજમાલયા કૃષ્ણેતિ નામૈવ મુદા જપન્તમ્

સુનીલકણ્ઠં ભુજગેન્દ્રમણ્ડિતં યોગીન્દ્રસિદ્ધેન્દ્ર મુનીન્દ્રવન્દિતમ્ ॥
સિદ્ધેશ્વરં સિદ્ધવિધાનકારણં મૃત્યુંજયં કાલયમાન્તકારકમ્

પ્રસન્નહાસ્યાસ્યમનોહરં વરં વિશ્વાશ્રયાણાં શિવદં વરપ્રદમ્ ॥
સદાઽઽશુતોષં ભવરોગવર્જિતં ભક્તપ્રિયં ભક્તજનૈકબન્ધુમ્

ગત્વા સમીપં મુનિરેષ શૂલિનં નનામ મૂર્ધ્ના પુલકાઙ્કવિગ્રહઃ ॥
વીણાં ત્રિતન્ત્રીં ક્વણયન્પુનર્જગૌ કૃષ્ણં સ તુષ્ટાવ કલં સુકણ્ઠઃ

દૃષ્ટ્વા મુનીન્દ્રપ્રવરં ચ સસ્મિતં વિધેઃ સુતં વેદવિદાં વરિષ્ઠમ્ ॥
યોગીન્દ્રસિદ્ધેન્દ્રમહર્ષિભિઃ સમં હર્ષેણ પીઠાદુદપશ્યદીશ્વરઃ

દદૌ ચ તસ્મૈ મુનયે સ સંભ્રમાદાલિઙ્ગનં ચાશિષમાસનાદિકમ્ ॥
પપ્રચ્છ ભદ્રાગમનપ્રયોજનં તપોધનં તં તપસા ચ શૌનક

સદ્રત્નસિંહાસનસુન્દરે પરશ્ચોવાસ શમ્ભુર્વરપાર્ષદૈઃ સહ ॥
નોવાસ ધાતુસ્તનયઃ કૃતાઞ્જલિસ્તુષ્ટાવ ભક્ત્યા પ્રણતઃ પ્રભું દ્વિજ

ગન્ધર્વરાજેન કૃતેન નારદઃ સ્તોત્રેણ રમ્યેણ શુભપ્રદેન ચ ॥
સ્તુત્વા પ્રણામં પુનરેવ કૃત્વા ભવાજ્ઞયોવાસ ભવસ્ય વામતઃ

ચકાર તત્રૈવ નિવેદનં શિવે મનોઽભિલાષં નિજકામપૂરકે ॥
શ્રુત્વા મુનેસ્તદ્વચનં કૃપાનિધિર્દ્રુતં પ્રતિજ્ઞાય ચકાર ચોમિતિ

ઇતિ શ્રીબ્રહ્મવૈવર્તે મહાપુરાણે બ્રહ્મખણ્ડે સૌતિશૌનકસંવાદે કૈલાસં પ્રતિ નારદાગમનં નામ પઞ્ચવિંશતિતમોઽધ્યાયઃ