બ્રહ્માંડ પુરાણ · અધ્યાય 3.43

ઇતિ શ્રીબ્રહ્માણ્ડમહાપુરાણે ઉત્તરભાગે લલિતોપાખ્યાને હયગ્રીવાગસ્ત્યસમ્વાદે દ્વાચત્વારિંશો ઽધ્યાયઃ
અગસ્ત્ય ઉવાચ
અશ્વાનન મહાપ્રાજ્ઞ કરુણામૃતવારિધે ।
શ્રીદેવીદર્શને દીક્ષા યાદૃશી તાં નિવેદય

હયગ્રીવ ઉવાચ
યદિ તે દેવતાભાવો યયા કલ્મષકર્દમાઃ ।
ક્ષાલ્યન્તે ચ તથા પુસાં દીક્ષામાચક્ષ્મહે ઽત્ર તામ્

હસ્તે શિવપુરન્ધ્યાત્વા જપેન્મૂલાઙ્ગમાલિનીમ્ ।
ગુરુઃ સ્પૃશેચ્છિષ્યતનું સ્પર્શદીક્ષેયમીરિતા

નિમીલ્ય નયને ધ્યાત્વા શ્રીકામાક્ષીં પ્રસન્નધીઃ ।
સમ્યક્પશ્યેદ્ગુરુઃ શિષ્યં દૃગ્દીક્ષા સેયમુચ્યતે

ગુરોરાલોકમાત્રેણ ભાષણાત્સ્પર્શનાદપિ ।
સદ્યઃ સઞ્જાયતે જ્ઞાનં સા દીક્ષા શામ્ભવી મતા

દેવ્યા દેહો યથા પ્રોક્તો ગુરુદેહસ્તથૈવ ચ ।
તત્પ્રસાદેન શિષ્યો ઽપિ તદ્રૂપઃ સમ્પ્રકાશતે

ચિરં શુશ્રૂષયા સમ્યક્તોષિતો દેશિકેશ્વરઃ ।
તૂષ્ણીં સંકલ્પયેચ્છિષ્યં સા દીક્ષા માનસી મતા

દીક્ષાણામપિ સર્વાસામિયમેવોત્તમોત્તમા ।
આદૌ કુર્યાત્ક્રિયાદીક્ષાં તત્પ્રકારઃ પ્રવક્ષ્યતે

શુક્લપક્ષે શુભદિને વિધાય શુચિમાનસમ્ ।
જિહ્વાસ્યમલશુદ્ધિં ચ કૃત્વા સ્નાત્વા યથાવિધિ

સંધ્યાકર્મ સમાપ્યાથ ગુરુદેહં પરં સ્મરન્ ।
એકાન્તે નિવસઞ્છ્રીમાન્મૌની ચ નિયતાશનઃ

ગુરુશ્ચ તાદૃશોભૂત્વા પૂજામન્દિરમાવિશેત્ ।
દેવીસૂક્તેન સંયુક્તં વિદ્યાન્યાસં સમાતૃકમ્

કૃત્વા પુરુષસૂક્તેન ષોડશૈરુપચારકૈઃ ।
આવાહના સને પાદ્યમર્ધ્યમાચમનં તથા

સ્નાનં વસ્ત્રં ચ ભૂષા ચ ગન્ધઃ પુષ્પં તથૈવ ચ ।
ધૂપદીપૌ ચ નૈવેદ્યં તામ્બૂલં ચ પ્રદક્ષિણા

પ્રણામશ્ચેતિ વિખ્યાતૈઃ પ્રીણયેત્ત્રિપુરાંબિકામ્ ।
અથ પુષ્પાઞ્જલિં દદ્યાત્સહસ્રાક્ષરવિદ્યયા

ઓં ઐં હ્રીં શ્રીં ઐં ક્લીં સૌઃ ઓં નમસ્ત્રિપુરસુન્દરિ હૃદયે દેવિ શિરોદેવિ શિખાદેવિ કવચદેવિ નેત્રદેવિ આસ્યદેવિ કામેશ્વરિ ભગમાલિનિ નિત્યક્લિન્નેં ભૈરુણ્ડે વહ્નિવાસિનિ મહાવજ્રેશ્વરિ વિદ્યેશ્વરિ પરશિવદૂતિ ત્વરિતે કુલસુંદરિ નિત્યે નીલપતાકે વિજયે સર્વમઙ્ગલે જ્વાલામાલિનિ ચિત્રે મહાનિત્યે પરમેશ્વરિ મન્ત્રેશમયિ ષષ્ઠીશમય્યુદ્યાનમયિ લોપામુદ્રામય્યગસ્ત્યમયિ કાલતાપનમયિ ધર્માચારમયિ મુક્તકે શીશ્વરમયિ દીપકલાનાથમયિ વિષ્ણુદેવમયિ પ્રભાકરદેવમયિ તેજોદેવમયિ મનોજદેવમયિ અણિમસિદ્ધે મહિમસિદ્ધે ગરિમ સિદ્ધે લઘિમસિદ્ધે ઈશિત્વસિદ્ધે વશિત્વસિદ્ધે પ્રાપ્તિસિદ્ધે પ્રાકામ્યસિદ્ધે રસસિદ્ધે મોક્ષસિદ્ધે બ્રાહ્મિ માહેશ્વરી કૌમારિ વૈષ્ણવિ વારાહિ ઇન્દ્રાણિ ચામુણ્ડે મહાલક્ષ્મિ સર્વસંક્ષોભિણિ સર્વવિદ્રાવિણિ સર્વાકર્ષિણિ સર્વવશઙ્કરિ સર્વોન્માદિનિ સર્વમહાઙ્કુશે સર્વખેચરિ સર્વબીજે સર્વયોને સર્વાસ્ત્રખણ્ડિનિ ત્રૈલોક્યમોહિનિ ચક્રસ્વામિનિ પ્રાટયોગિનિ બૌદ્ધદર્શનાઙ્ગિ કામાકર્ષિણિ બુદ્ધ્યાકર્ષિણિ અહઙ્કારાકર્ષિણિ શબ્દાકર્ષિણિ સ્પર્શાકર્ષિણિ રૂપાકર્ષિણિ રસાકર્ષિણિ ગન્ધાકર્ષિણિ ચિત્તાકર્ષિણિ ધૈર્યાકર્ષિણિ સ્મૃત્યાકર્ષિણિ નામાકર્ષિણિ બીજાકર્ષિણાત્માકિર્ષિણિ અમૃતાકર્ષિણિ શરીરાકર્ષિણિ ગુપ્તયોગિનિ સર્વાશાપરિપૂરકચક્રસ્વામિનિ અનઙ્ગકુસુમે અનઙ્ગમેખલે અનઙ્ગમાદિનિ અનઙ્ગમદનાતુરે ઽનઙ્ગરેખે ઽનઙ્ગવેગિન્યનઙ્ગાઙ્કુશે ઽનઙ્ગમાલિનિ ગુપ્તતરયોગિનિ વૈદિકદર્શનાઙ્ગિ સર્વસંક્ષોભકારક ચક્રસ્વામિનિ પૂર્વામ્નાયાધિદેવતે સૃષ્ટિરૂપે સર્વસંક્ષોભિણિ સર્વવિદ્રાવિણિ સર્વાકર્ષિણિ સર્વાહ્લાદિનિ સર્વસંમોહિનિ સર્વસ્તંભિણિ સર્વજૃંભિણિ સર્વવશઙ્કરિ સર્વરઞ્જિનિ સર્વોન્માદિનિ સર્વાર્થસાધિકે સર્વસંપત્પ્રપૂરિણિ સર્વમન્ત્રમયિ સર્વદ્વન્દ્વક્ષયકરિ સમ્પ્રદાયયોગિનિ સૌરદર્શનાઙ્ગિ સર્વસૌભાગ્યદાયકચક્રે સર્વસિદ્ધિપ્રદે સર્વસમ્પત્પ્રદે સર્વપ્રિયઙ્કરિ
સર્વમઙ્ગલકારિણિ સર્વકામપ્રદે સર્વદુઃખવિમોચિનિ સર્વમૃત્યુપ્રશમિનિ સર્વવિઘ્નનિવારિણિ સર્વાઙ્ગસુન્દરિ સર્વસૌભાગ્યદાયિનિ કુલોત્તીર્ણયોગિનિ સર્વાર્થસાધકચક્રેશિ સર્વજ્ઞે સર્વશક્તે સર્વૈશ્વર્યફલપ્રદે સર્વજ્ઞાનમયિ સર્વવ્યાધિનિવારિણિ સર્વાધારસ્વરૂપે સર્વપાપહરે સર્વાનન્દમયિ સર્વરક્ષાસ્વરૂપિણિ સર્વેપ્સિત ફલપ્રદે નિયોગિનિ વૈષ્ણવદર્શનાઙ્ગિ સર્વરક્ષાકરચક્રસ્થે દક્ષિણામ્નાયેશિ સ્થિતિરૂપે વશિનિ કામેશિ મોદિનિ વિમલે અરુણે જયિનિ સર્વેશ્વરિ કૌલિનિ રહસ્યયોગિનિ રહસ્યભોગિનિ રહસ્યગોપિનિ શાક્તદર્શનાઙ્ગિ સર્વરોગહરચક્રેશિ પશ્ચિમામ્નાયે ધનુર્બાણપાશાઙ્કુશદેવતે કામેશિ વજ્રેશિ ફગમાલિનિ અતિરહસ્યયોગિનિ શૈવદર્શનાઙ્ગિ સર્વસિદ્ધિપ્રદચક્રગે ઉત્તરામ્નાયેશિ સંહારરૂપે શુદ્ધપરે વિન્દુપીઠગતે મહારાત્રિપુરસુન્દરિ પરાપરાતિરહસ્યયોગિનિ શાંભવદર્શનાઙ્ગિ સર્વાનન્દમયચક્રેશિ ત્રિપુરસુંદરિ ત્રિપુરવાસિનિ ત્રિપુરશ્રીઃ ત્રિપુરમાલિનિ ત્રિપુરસિદ્ધે ત્રિપુરાંબ સર્વચક્રસ્થે અનુત્તરામ્નાયાખ્યસ્વરૂપે મહાત્રિપુરભૈરવિ ચતુર્વિધગુણરૂપે કુલે અકુલે કુલાકુલે મહાકૌલિનિ સર્વોત્તરે સર્વદર્શનાઙ્ગિ નવાસનસ્થિતે નવાક્ષરિ નવમિથુનાકૃતે મહેશમાધવવિધાતૃમન્મથસ્કન્દનન્દીન્દ્રમનુચન્દ્રકુબેરાગસ્ત્યદુર્વાસઃક્રોધભટ્ટારકવિદ્યાત્મિકે કલ્યાણતત્ત્વત્રયરૂપે શિવશિવાત્મિકે પૂર્મબ્રહ્મશક્તે મહાપરમેશ્વરિ મહાત્રિપુરસુન્દરિ તવ શ્રીપાદુકાં પૂજયામિ નમઃ ।
ક એં ઈલ હ્રીં હસ કહલ હ્રીં ઐં ક્લીં સૌઃ સૌઃ ક્લીં ઐં શ્રીં ।
દેવ્યાઃ પુષ્પાઞ્જલિં દદ્યાત્સહસ્રાક્ષરવિદ્યાયા ।
નોચેત્તત્પૂજનં વ્યર્થમિત્યાહુર્વેદવાદિનઃ

તતો ગોમયસંલિપ્તે ભૂતલે દ્રોણશાલિભિઃ ।
તાવદ્ભિસ્તણ્ડુલૈઃ શુદ્ધૈઃ શસ્તાર્ણૈસ્તત્ર નૂતનમ્

દ્રોણોદપૂરિતં કુંભં પઞ્ચરત્નૈર્નવૈર્યુતમ્ ।
ન્યગ્રોધાશ્વત્થમાકન્દજંબૂદુમ્બરશાખિનામ્

ત્વગ્ભિશ્ચ પલ્લવૈશ્ચૈવ પ્રક્ષિપ્તૈરધિવાસિનમ્ ।
કુમ્ભાગ્રે નિક્ષિપેત્પક્વં નારિકેલફલં શુભમ્

અભ્યર્ચ્ય ગન્ધપુષ્પાદ્યૈર્ધૂપદીપાદિ દર્શયેત્ ।
શ્રીચિન્તામણિમન્ત્રં તુ હૃદિ માતૃકમાજપેત્

કુમ્ભ સ્પૃશઞ્છ્રીકામાપ્તિરૂપીકૃતકલેવરમ્ ।
અષ્ટોત્તરશતે જાતે પુનર્દીપં પ્રદર્શયેત્

શિષ્યમાહૂય રહસિ વાસસા બદ્ધલોચનમ્ ।
કારયિત્વા પ્રણામાનાં સાષ્ટાઙ્ગાનાં ત્રયં ગુરુઃ

પુષ્પાણિ તત્કરે દત્ત્વા કારયે ત્કુસુમાઞ્જલિમ્ ।
શ્રીનાથકરુણારાશે પરઞ્જ્યોતિર્મયેશ્વરિ

પ્રસૂનાઞ્જલિરેષા તે નિક્ષિપ્તા ચરણાંબુજે ।
પરં ધામ પરં બ્રહ્મ મમ ત્વં પરદેવતા

અદ્યપ્રભૃતિ મે પુત્રાન્રક્ષ માં શારણાગતમ્ ।
ઇત્યુક્ત્વા ગુરુપાદાવ્જે શિષ્યો મૂર્ધ્નિ વિધારયેત્

જન્માન્તર સુકૃતત્વં સ્યાન્ન્યસ્તે શિરસિ પાદુકે ।
ગુરુણા કમલાસનમુરશાસનપુરશાસનસેવયા લબ્ધે

ઇત્યુક્ત્વા ભક્તિભરિતઃ પુનરુત્થાય શાન્તિમાન્ ।
વામપાર્શ્વે ગુરોસ્તિષ્ઠેદમાની વિનયાન્વિતઃ

તતસ્તુંબીજલૈઃ પ્રોક્ષ્ય વામભાગે નિવેદયેત્ ।
વિમુચ્ય નેત્રબન્ધં તુ દર્શયેદર્ચનક્રમમ્

સિતામધ્વાજ્યકદલીફલપાયસરૂપકમ્ ।
મહાત્રિપુરસુન્દર્યા નૈવેદ્યમિતિ ચાદિશેત્

ષોડશર્ણમનું તસ્ય વદેદ્વામશ્રુતૌ શનૈઃ ।
તતો બહિર્વિનિર્ગત્ય સ્થાપ્ય દાર્વાસને શુચિમ્

નિવેશ્ય પ્રાઙ્મુખં તત્ર પટ્ટવસ્ત્રસમાસ્તૃતે ।
શિષ્યં શ્રીકુમ્ભસલિલૈરભિષિઞ્ચેત્સમન્ત્રકમ્

પુનઃ શુદ્ધોદકૈઃ સ્નાત્વા વાસસી પરિગૃહ્ય ચ ।
અષ્ટોત્તરશતં મન્ત્રં જપ્ત્વા નિદ્રામથાવિશેત્

શુભે દૃષ્ટે સતિ સ્વપ્ને પુણ્યં યોજ્યં તદોત્તમમ્ ।
દુઃસ્વપ્ને તુ જપં કુર્યાદષ્ટોત્તરસહસ્રકમ્

કારયેત્ત્રિપુરાંબાયાઃ સપર્યાં મુક્તમાર્ગતઃ ।
યદા ન દૃષ્ટઃ સ્વપ્નો ઽપિ તદા સિદ્ધિશ્ચિરાદ્ભવેત્

સ્વીકુર્યાત્પરયા ભક્ત્યા દેવી શેષ કલાધિકમ્ ।
સદ્ય એવ સ શિષ્યઃ સ્યાત્પઙ્ક્તિપાવનપાવનઃ

શરીરમર્થં પ્રાણં ચ તસ્મૈ શ્રીગુરવે દિશેત્ ।
તદધીનશ્ચ રેન્નિત્યં તદ્વાક્યં નૈવ લઘયેત્

યઃ પ્રસન્નઃ ક્ષણાર્ધેન મોક્ષલક્ષ્મીં પ્રયચ્છતિ ।
દુર્લભં તં વિજાનીયાદ્ગુરું સંસારતારકમ્

ગુકારસ્યાન્ધકારોર્ઽથો રુકારસ્તન્નિરોધકઃ ।
અન્ધકારનિરોધિત્વાદ્ગુરુરિત્યભિધીયતે

બોધરૂપં ગુરું પ્રાપ્ય ન ગુર્વન્તરમાદિશેત્ ।
ગુરુક્તં પરુષં વાક્યમાશિષં પરિચિન્તયેત્

લૌકિકં વૈદિકં વાપિ તથાધ્યાત્મિકમેવ ચ ।
આદદીત તતો જ્ઞાનં પૂર્વં તમભિવાદયેત્

એવં દીક્ષાત્રયં કૃત્વા વિધેયં બૌધયેત્પુનઃ ।
ગુરુભક્તિસ્સદાચારસ્તદ્દ્રોહસ્તત્ર પાતકમ્

તત્પદસ્મરણં મુક્તિર્યાવદ્દેહમયં ક્રમઃ ।
યત્પાપં સમવાપ્નોતિ ગુર્વગ્રે ઽનૃતભાષણત્

ગોબ્રાહ્મણાવધં કૃત્વા ન તત્પાપં સમાશ્રયેત્ ।
બ્રહ્માદિસ્તંબ પર્યતં યસ્ય મે ગુરુસંતતિઃ

તસ્ય મે સર્વપૂજ્યસ્ય કો ન પૂજ્યો મહીતલે ।
ઇતિ સર્વાનુકૂલો યઃ સ શિષ્યઃ પરિકીર્તિતઃ

શીલાદિવિમલાનેકગુણસંપન્નભાવનઃ ।
ગુરુશાસનવર્તિત્વાચ્છિષ્ય ઇત્યભિધીયતે

જપાચ્છ્રાન્તઃ પુનર્ધ્યાયેદ્ધ્યાનાચ્છ્રાન્તઃ પુનર્જપેત્ ।
જપધ્યાનાદિયુક્તસ્ય ક્ષિપ્રં મન્ત્રઃ પ્રસિધ્યતિ

યથા ધ્યાનસ્ય સામર્થ્યાત્કીટો ઽપિ ભ્રમરાયતે ।
તથા સમાધિસા મર્થ્યાદ્બ્રહ્મીભૂતો ભવેન્નરઃ

યથા નિલીયતે કાલે પ્રપઞ્ચો નૈવ દૃશ્યતે ।
તથૈવ મીલયેન્નેત્રે એતદ્ધ્યાનસ્ય લક્ષણમ્

વિદિતે તુ પરે તત્ત્વે વર્ણાતીતે હ્યવિક્રિયે ।
કિઙ્કરત્વં ચ ગચ્છન્તિ મન્ત્રા મન્ત્રાધિપૈઃ સહ

આત્મૈક્યભાવનિષ્ઠસ્ય યા ચેષ્ટા સા તુ દર્શનમ્ ।
યોગસ્તપઃ સ તન્મન્ત્રસ્તદ્ધનં યન્નિરીક્ષણમ્

દેહાભિમાને ગલિતે વિજ્ઞાતે પરમાત્મનિ ।
યત્રયત્ર મનો યાતિ તત્રતત્ર સમાધયઃ

યઃ પશ્યેત્સર્વગં શાંમાનન્દાત્માનમદ્વયમ્ ।
ન તસ્ય કિઞ્ચિદાપ્તવ્યં જ્ઞાતવ્યં વાવશિષ્યતે

પૂજાકોટિસમં સ્તોત્રં સ્તોત્રકોટિસમોજપઃ ।
જપકોટિસમં ધ્યાનં ધ્યાનકોટિસમો લયઃ

દેહો દેવાલયઃ પ્રોક્તો જીવ એવ મહેશ્વરઃ ।
ત્યજેદજ્ઞાનનિર્માલ્યં સોહંભાવેન યોજયેત્

તુષેણ બદ્ધો વ્રીહિઃ સ્યાત્તુષાભાવે તુ તણ્ડુલઃ ।
પાશબદ્ધઃ સ્મૃતો જીવઃ પાશમુક્તો મહેશ્વરઃ

આકાશે પક્ષિજાતીનાં જલેષુ જલચારિણામ્ ।
યથા ગતિર્ન દૃશ્યેત મહાવૃત્તં મહાત્મનામ્

નિત્યાર્ચનં દિવા કુર્યાદ્રાત્રૌ નૈમિત્તિકાર્ચનમ્ ।
ઉભયોઃ કામ્યકર્મા સ્યાદિતિ શાસ્ત્રસ્ય નિશ્ચયઃ

કોટિકોટિમહાદાનાત્કોટિકોટિમહાવ્રતાત્ ।
કોટિકોટિમહાયજ્ઞાત્પરા શ્રીપાદુકા સ્મૃતિઃ

જ્ઞાનતો ઽજ્ઞાનતો વાપિ યાવદ્દેહસ્ય ધારણમ્ ।
તાવદ્વર્ણાશ્રમાચારઃ કર્તવ્યઃ કર્મમુક્તયે

નિર્ગતં યદ્ગુરોર્વક્ત્રાત્સર્વં શાસ્ત્રં તદુચ્યતે ।
નિષિદ્ધમપિ તત્કુર્યાદ્ગુર્વાજ્ઞાં નૈવ લઙ્ઘયેત્

જાતિવિદ્યાધનાઢ્યો વા દૂરે દૃષ્ટ્વા ગુરું મુદા ।
દણ્ડપ્રમાણં કૃત્વૈકં ત્રિઃ પ્રદક્ષિણામાચરેત્

ગુરુબુદ્ધ્યા નમેત્સર્વં દૈવતં તૃણમેવ વા ।
પ્રણમેદ્દેવબુદ્ધ્યા તુ પ્રતિમાં લોહમૃન્મયીમ્

ગુરું હુઙ્કૃત્ય તુઙ્કૃત્ય વિપ્રં વાદૈર્વિજિત્ય ચ ।
વિકાસ્ય ગુહ્યશાસ્ત્રાણિ ભવન્તિ બ્રહ્મરાક્ષસાઃ

અદ્વૈતં ભાવ યેન્નિત્યં નાદ્વૈતં ગુરુણા સહ ।
ન નિન્દેદન્યસમયાન્વેદશાસ્ત્રાગમાદિકાન્

એકગ્રામસ્થિતઃ શિષ્યસ્ત્રિસંધ્યં પ્રણમેદ્ગુરુમ્ ।
ક્રોશ માત્રસ્થિતો ભક્ત્યા ગુરું પ્રતિદિનં નમેત્

અર્થયોજનગઃ શિષ્યઃ પ્રણમેત્પઞ્ચપર્વસુ ।
એકયોજનમારભ્ય યોજનદ્વાદશાવધિ

તત્તદ્યોજનસંખ્યાતમાસેષુ પ્રણમેદ્ગુરુમ્ ।
અતિદૂરસ્થિતઃ શિષ્યો યદેચ્છા સ્યાત્તદા વ્રજેત્

રિક્તપાણિસ્તુ નોપેયાદ્રાજાનં દેવતાં ગુરુમ્ ।
ફલપુષ્પાંબરાદીનિ યથાશક્તિ સમર્પયેત્

મનુષ્યચર્મણા બદ્ધઃ સાક્ષાત્પરશિવઃ સ્વયમ્ ।
સચ્છિષ્યાનુગ્રહાર્થાય ગૂઢં પર્યટતિ ક્ષિતૌ

સદ્ભક્તરક્ષણાયૈવ નિરાકારો ઽપિ સાકૃતિઃ ।
શિવઃ કૃપાનિધિર્લોકે સંસારીવ હિ ચેષ્ટતે

અત્રિનેત્રઃ શિવઃ સાક્ષાદચતુર્બાહુરચ્યુતઃ ।
અચતુર્વદનો બ્રહ્મા શ્રીગુરુઃ પરિકીર્તિતઃ

શ્રીગુરું પરતત્ત્વાખ્યં તિષ્ઠન્તં ચક્ષુરગ્રતઃ ।
ભાગ્યહીના ન પશ્યન્તિ સૂર્યમન્ધા ઇવોદિતમ્

ઉત્તમા તત્ત્વચિન્તા સ્યાજ્જપચિન્તા તુ મધ્યમા ।
અધમા શાસ્ત્રચિન્તા સ્યાલ્લોકચિન્તાધમાધમા

નાસ્થિ ગુર્વધિકં તત્ત્વં નાસ્તિ જ્ઞાનાધિકં સુખમ્ ।
નાસ્તિ ભક્ત્યધિકા પૂજા ન હિ મોક્ષાધિકં ફલમ્

સર્વવેદેષુ શાસ્ત્રેષુ બ્રહ્મવિષ્ણુશિવાદિષુ ।
તત્ર તત્રોચ્યતે શબ્દૈઃ શ્રીકામાક્ષી પરાત્પરા

શચીન્દ્રૌ સ્વાહાગ્ની ચ પ્રભારવી ।
લક્ષ્મીનારાયણૌ વાણીધાતારૌ ગિરિજાશિવૌ

અગ્નીષોમૌ બિન્દુનાદૌ તથા પ્રકૃતિપૂરુષૌ ।
આધારાધેયનામાનૌ ભોગમોક્ષૌ તથૈવ ચ

પ્રાણાપનૌ ચ શબ્દાર્થૌં તથા વિધિનિષેધકૌ ।
સુખદુઃખાદિ યદ્દ્વન્દ્વં દૃશ્યતે શ્રૂયતે ઽપિ વા

સર્વલોકેષુ તત્સર્વં પરં બ્રહ્મ ન સંશયઃ ।
ઉત્તીર્મમપરં જ્યોતિઃ કામાક્ષીનામકં વિદુઃ

યદેવ નિત્યં ધ્યાયન્તિ બ્રહ્મવિષ્ણુશિવાદયઃ ।
ઇત્થં હિ શક્તિમાર્ગે ઽસ્મિન્યઃ પુમાનિહ વર્તતે

પ્રસાદભૂમિઃ શ્રીદેવ્યા ભુક્તિમુક્ત્યોઃ સ ભાજનમ્ ।
અમન્ત્રં વા સમત્રં વા કામાક્ષીમર્ચયન્તિ યે

સ્ત્રિયો વૈશ્યાશ્ચ શૂદ્રાશ્ચ તે યાન્તિ પરમાં ગતિમ્ ।
કિં પુનઃ ક્ષત્ત્રિયા વિપ્રા મન્ત્રપૂર્વં યજન્તિ યે

સંસારિણો ઽપિ તે નૂનં વિમુક્તા નાત્ર સંશયઃ ।
સિતામધ્વાજ્યકદલીફલપાયસરૂપકમ્

પઞ્ચપર્વસુ નૈવેદ્યં સર્વદૈવ નિવેદયેત્ ।
યોનાર્ચયતિ શક્તો ઽપિ સ દેવીશાપમાપ્નુયાત્

અશક્તૌ ભાવનાદ્રવ્યૈરર્ચયેન્નિત્યમંબિકામ્ ।
ગૃહસ્થસ્તુ મહાદેવીં મઙ્ગલાચારસંયુતઃ

અર્ચયેત મહાલક્ષ્મીમનુકૂલાઙ્ગનાસખઃ ।
ગુરુસ્ત્રિવારમાચારં કથયેત્કલશોદ્ભવ

શિષ્યો યદિ ન ગૃહ્ણીયા ચ્છિષ્યે પાપં ગુરોર્ન હિ ।
લક્ષ્મીનારાયણૌ વાણીધાતારૌ ગિરિજાશિવૌ

શ્રીગુરું ગુરુપત્નીં ચ પિતરૌ ચિન્તયેદ્ધિયા ।
ઇતિ સર્વં મયા પ્રોક્તં સમાસેન ઘટોદ્ભવ

એતાવદવધાનેન સર્વજ્ઞો મતિમાન્ભવેત્