બોધસાર · અધ્યાય 4.7

[પ્. 58-]
કર્મવિડમ્બના
વંશપાત્રમિવાપૂર્ણં પૂર્ણં ઘટશતૈરપિ ।
ક્રિયાજાલં કથં સાધો વિરાગાય ન જાયતે

બ્રહ્મણો દિનમારભ્ય યાવદદ્ય કૃતાઃ ક્રિયાઃ ।
મુહૂર્ત્તં હન્ત સંસારી નૈવ નિશ્ચિન્તતાઙ્ગતઃ

અભાગ્યં પરમં પુંસાં પરપિણ્ડોપજીવનમ્ ।
તત્કથં નામ સૌભાગ્યં પુત્રપિણ્ડોપજીવનમ્

મૃતશબ્દેન સમ્બોધ્ય મૃતપિણ્ડં મૃતાહનિ ।
મૃતાય દાસ્યતે પુત્રસ્તદ્વરં કિમુતામૃતમ્

અશનાયાં પિપાસાં ચ શોકં મોહં જરાં મૃતિમ્ ।
પ્રાપ્નુવઞ્ચ્છ્રુતિશાસ્ત્રેભ્યો મા ભવ શ્રાદ્ધભક્ષકઃ

દીર્ઘમાયુર્જરાભુક્ત્યૈ ધનં ભૂરિ દુરાધયે ।
પુત્રાઃ કલહદુઃખાય સંસારે દુઃખમદ્ભુતમ્

છાયાં પશ્યતિ કાયસ્ય રાયો ગર્વેણ મુહ્યતિ ।
જાયાં ભજતિ ભાવેન માયાં નો વેદ વૈષ્ણવીમ્

યાત્રાસમાગમસમે નતર્કિતગતાગતે ।
પશુપુત્રકલત્રાદૌ મમતા ન મતા સમા

સુતરાં ગુરવોઽસ્માકં વૈયાકરણસત્તમાઃ ।
આદિશ્ય મમતાસ્થાને સમતાં સાધયન્તિ યે

ત્યક્ષ્યંત્યવશ્યં ચ ત્વાન્ત્વં ચ ત્યક્ષ્યસિ યાનપિ ।
યેષાં ત્યાગે મહત્સૌખ્યં તેષાં ત્યાગેઽપિ કઃ શ્રમઃ

વ્યવહારવિમૂઢાનાં સ્તુતિનિન્દામયઃ ક્રમઃ ।
સોઽપિ તત્કાયપર્યન્તઃ કાયઃ કતિદિનાન્વયી

એકતઃ સકલા લોકા વિકર્ષન્તિ યથાબલમ્ ।
પદાર્થમાલાં બલવાનેકઃ કાલો ગિલત્યસૌ

લોલા લક્ષ્મીર્વયં લોલા લોલા વિષયવૃત્તયઃ ।
કિં સુખં તત્ર યત્રાઙ્ગ જીવનસ્યૈવ સંશયઃ

શોકમોહૌ ભયં દૈન્યમાધિર્વ્યાધિઃ ક્ષુધા તૃષા ।
ઇત્યાદિ વિવિધં દુઃખમિતિ સંક્ષેપકીર્ત્તનમ્