બોધસાર · અધ્યાય 21

[પ્. 517-]
અનુભવનવકમ્
સ્વાનન્દબોધગુરુભિર્ગુરુભિર્નિરુક્તં સ્વાનન્દબોધઘનમેવ મમ સ્વરૂપમ્ ।
સ્વાનન્દબોધઘનયા કલયા કયા ચિત્ સ્વાનન્દબોધઘનમેવ મયાઽનુભૂતમ્

શ્રદ્ધાભક્તિભૃતાં વિશેષવિદુષાં શિક્ષાવતાં યોગિનાં મિથ્યાવસ્તુનિ વસ્તુતાં વિજહતાં ત્યાગે ગતે ગાઢતામ્ ।
સત્યે સત્યતયા સ્ફુરત્યવિરતં ચિત્તે ચમત્કારિણિ સ્વૈરં સ્ફૂર્જતિ નિર્વિકલ્પપરમાનન્દસ્વરૂપો હરિઃ

તૃષ્ણાં સંહર સંહરેન્દ્રિયચયં સંહૃત્ય સર્વાઃ ક્રિયાશ્ ચેતઃ સંહર સંહરાન્યધિષણાં ખાદપ્યણુસ્ત્વં ભવ ।
અન્તઃ સંપ્રવિશાત્મધામનિ મનાગાસાદિતે તત્પદે સર્વાજ્ઞાનકપાટભઞ્જનપટુર્ભાવઃ સ્થિરઃ સ્થાસ્યતિ

કિં માં પૃચ્છસિ સાદરેણ મનસા સાધો સમાધિક્રમં નૂનં નિર્ગતમેવ મોહતિમિરં જાતઃ પ્રકાશો મહાન્ ।
આત્મસ્નેહઘનાં દશામુપગતે બોધપ્રદીપે મયિ દ્રાગુડ્ડીય પતન્તિ વૃત્તિનિવહા નષ્ટું પતઙ્ગા ઇવ

ગાઢં વાઽસ્તુ વિલીનમસ્તુ ન ઘૃતં સાધો ઘૃતત્વાદ્ગતં ચૈતન્યસ્ય ચમત્કૃતિઃ કિલ તથા ચિત્તં તદેવાદ્વયમ્ ।
તસ્માચ્ચિત્તલયસ્ય સાધનમસૌ તત્ત્વે તુ સાક્ષાત્કૃતે પ્રત્યાહારપરિશ્રમોઽપિ સ મયા સંત્યક્ત એવાધુના

જાતે વિદ્વદનુગ્રહેણ સહજાનન્દાગમે સાધકૈર્ ઔદાસ્યેન યથા યથા પરિહૃતઃ કષ્ટઃ સ યોગોદ્યમઃ ।
આશ્ચર્યં ન મનીષિતાઽપિ નિબિડા નિદ્રા યથેયં બલાદ્ આયાત્યેવ તથા તથા મુનિમતો ગાઢઃ સમાધિક્રમઃ

ધ્યાનામૃતાર્ણવનિમગ્નસમસ્તમૂર્ત્ત્યા તન્વ્યા ધિયા નિગમિતે નિગમાન્તતત્ત્વે ।
આલોકિતેષ્વથ તટસ્થધિયાઽખિલેષુ ભાવેષુ બોધઘનતા સહજાઽભ્યુપૈતિ

એષા મધુમતી વિદ્યા સર્વત્ર મધુદર્શનાત્ ।
સ્વશરીરાર્કવૃક્ષેઽપિ દૃષ્ટં યત્પુષ્કલં મધુ

વિષ્ણોર્મે દર્શનં ભૂયાદેવમાસીન્મનોરથઃ ।
ઇદાનીં કૃપયા વિષ્ણોઃ સર્વં વિષ્ણુમયં જગત્