બોધસાર · અધ્યાય 19

[પ્. 509-]
શિલાષટ્કમ્
અનન્તકોટિચન્દ્રાણાં ચન્દ્રિકાભિઃ કૃતા કિમુ ।
આહ્લાદરૂપિણી દૃષ્ટા મયા ધેનુઃ શિલામયી

ન ધાવતિ ન હન્ત્યેવ ન ખાદતિ પિબત્યપિ ।
સ્વભાવનિર્મલા સેયં હૃષ્ટિપુષ્ટિમતી સ્થિતા

રોમરેખાસુ વિભ્રાન્તાસ્તસ્યા બ્રહ્માણ્ડકોટયઃ ।
અપર્યન્તા સ્થિતા ધેનુઃ સા કાશ્મીરશિલામયી

આયાન્તિ યાન્તિ ધાવન્તિ નૃત્યન્તિ ચ હસન્તિ ચ ।
પ્રતિબિમ્બા જીવરૂપાસ્તસ્યાઃ સા તુ યથા સ્થિતા

નીરસાઽપિ સુધામિષ્ટા નિર્ગુણાઽપિ પ્રિયા સતામ્ ।
નીરૂપાઽપ્યતિકાન્તા સા મયા દૃષ્ટા ન તુ શ્રુતા

સ્રવન્તીમમૃતં નિત્યં જિહ્વયા બ્રહ્મવિદ્યયા ।
વત્સઃ શિલામયો ભૂત્વા પિબ ધેનું શિલામયીમ્