બોધસાર · અધ્યાય 16.28.4.6

[પ્. 442-]
અથ મીમાંસાનિર્ણયઃ ।
કષ્ટં કર્મેત્યયં ન્યાયો મતો મીમાંસકસ્ય ચેત્ ।
આત્મનઃ ક્લેશભાગિત્વં તેનૈવાંગીકૃતં તદા

મીમાંસકઃ સત્યમાહ કષ્ટં કર્મેતિ કર્મવિત્ ।
તર્હિ તસ્યાપિ જિજ્ઞાસ્યં બ્રહ્માનિષ્ટનિવૃત્તયે

કર્મણા સંભવેજ્જન્મ જન્મના કર્મસંભવઃ ।
તર્હિ કર્મજડસ્યાસ્ય જન્મમુક્તિઃ કથં ભવેત્

મુક્તિપ્રાધાન્યમેવાસ્તિ બોધપ્રાધાન્યવાદિનામ્ ।
જન્મપ્રાધાન્યમેવાસ્તિ કર્મપ્રાધાન્યવાદિનામ્

યઃ સ્વયં કર્મજાડ્યેન યજ્ઞેષ્વનધિકારતઃ ।
નિષ્કામમશુચિપ્રાયં જગાદ સ કથં શુચિઃ

શુદ્ધિકૃત્કામનિર્મુક્તં કર્મ મીમાંસિતં વદેત્ ।
તત્કામ્યકર્મમીમાંસા કેવલં કષ્ટરૂપિણી

કર્મભિશ્ચેતસઃ શુદ્ધિઃ શુદ્ધ્યા વિજ્ઞાનમાપ્યતે ।
ઇતિ ચેત્કર્મઠઃ પ્રાહ તર્હીદં મમ સંમતમ્