બોધસાર · અધ્યાય 14.8

[પ્. 288-]
અથ સપ્તમી
તતઃ ષષ્ઠીમતિક્રમ્ય તુરીયાં યાતિ સપ્તમીમ્ ।
મહાકક્ષેતિ સૈવોક્તા સૈવ ગૂઢસુષુપ્તિકા

યોગનિદ્રેતિ સા પ્રોક્તા પરા કાષ્ઠેતિ સા સ્મૃતા ।
અનુત્તરં ચ સહજં સ્વરૂપસ્થિતિરિત્યપિ

મૌનમેવાવલમ્બન્તે યસ્યાં હરિહરાદયઃ ।
સા તુ વર્ણયિતું શક્યા ન કેનાપિ કદાચન

ચિદઙ્ગે કોમલે લગ્નો દૈવાદજ્ઞાનકણ્ટકઃ ।
તં બોધકણ્ટકેનાયં વિનિવાર્ય સુખં સ્થિતઃ

અમૃતજલધૌ યસ્મિન્વાર્ત્તા ન મીનતરંગયોર્ ન ચ પરિચયઃ પારાવારસ્થિતેરપિ કુત્રચિત્ ।
સમરસપરબ્રહ્માનન્દપ્રણુન્નવિકલ્પનઃ સહજગલિતદ્વૈતજ્વાલઃ સ ભાતિ મહામુનિઃ

બંધધ્વંસમભીપ્સુના સુમનસા જિજ્ઞાસયા તીવ્રયા જ્ઞાતે બ્રહ્મણિ બાધિતાક્ષવિષયે બોધે ચમત્કુર્વતિ ।
સ્વાન્તર્મન્તૃવિમાનમાન્યવિવૃતિવ્યાવૃત્તિનિર્ભઙ્ગકો ભાતિ જ્ઞાનસુખાત્મકઃ સ્વયમયં યોગ્યાપગાનાં પતિઃ

વાચા મૌનમયી ગતિઃ સ્થિતિમયી નિદ્રામયો જાગરો નિદ્રા બોધમયી નિશા દિનમયી નક્તંમયો વાસરઃ ।
કર્મ બ્રહ્મમયં જગત્સુખમયં કિઞ્ચિન્ન કિઞ્ચિન્મયં દુર્લઙ્ઘ્યં ગુણવર્ત્મ લઙ્ઘિતવતો વાર્ત્તા કથં વર્ણ્યતામ્

અત્યન્તહીનો બલપૌરુષાભ્યામ્ અકિંચનો યો ગલિતાભિમાનઃ ।
તેનૈવ નીતા રિપવો વિનાશં ન યે હતાસ્તાત મહેન્દ્રમુખ્યૈઃ

બ્રહ્મવિદ્બ્રહ્મવિદ્યાયાં ભવાન્યાં પુત્રતાં ગતઃ ।
નિજાઙ્ગે લાલયત્યેનં પરમાત્મા સદાશિવઃ