બોધસાર · અધ્યાય 10

[પ્. 98-]
અવિરોધબોધઃ
પ્રસઙ્ગાદવિરોધસ્ય બોધોઽપ્યત્ર નિરૂપ્યતે ।
વ્યવહારે દ્વૈતસત્વં દ્વૈતાદ્વૈતમતે સમમ્

અદ્વૈતકલ્પિતત્વં ચાવિરોધોઽતો મતદ્વયે ।
વિવદન્તિ મુહુર્વાદરસૈસ્તદ્વિવદન્તુ તે

યમાસ્ત્વહિંસાસત્યાદ્યા નિયમાઃ શુચિતાદયઃ ।
સુખાસને ચ સંસ્થાનં પ્રત્યાહારસ્તુ સર્વતઃ

ધારણા ચ તથા ધ્યાનં સમાધાનં ચ ચેતસઃ ।
યોગાઙ્ગસપ્તકં ત્વેતત્સર્વેષામપિ સંમતમ્

લયે મન્ત્રે હઠે રાજ્ઞિ ભક્તૌ સાંખ્યે હરેર્મતે ।
મતૈક્યમસ્તિ સર્વેષાં યે બુધા મોક્ષમાર્ગગાઃ

હઠિનામધિકસ્ત્વેકઃ પ્રાણાયામપરિશ્રમઃ ।
પ્રાણાયામે મનઃસ્થૈર્યં સ તુ કસ્ય ન સંમતઃ

વિમુક્તિર્વાદિનાં તસ્માન્મતભેદો ન કશ્ચન ।
કશ્ચિત્કશ્ચિન્મતે ભેદસ્ત્વસ્તિ વેદાન્તિનામપિ