ભૈરવાનુકરણસ્તોત્ર · શ્લોક 21-40

વરદેન પાણિના ત્વં વિશ્વવિભૂતિપ્રદત્વમ્ અભિનયસિ ।
ન ખલુ પરતત્ત્વનિષ્ઠો વિભવમલૈઃ સ્પૃશ્યતે જાતુ ॥

અભયેન ચ ભવભયાનિ ઉન્મૂલયતા પ્રકાશ્યતે સતતમ્ ।
વિશ્વાનુગ્રહકારણસ્વભાવતા તવ કરતલેન ॥

અખ્યાતિરૂપમ્ અસમં માયાયાઃ શકલિતં શિરો ઽત્રૈતત્ ।
પરબોધમયેન મયા મુણ્ડં બિભ્રત્ પ્રકાશયસ્ય્ એવમ્ ॥

નિઃશેષહૃતસારા મય્ય્ એવ જગત્સ્થિતિશ્ ચિદેકઘને ।
ઇતિ ખટ્વાઙ્ગકરઙ્કોદ્વહનચ્છલતો દદાસ્ય્ આજ્ઞામ્ ॥

વીણાઘણ્તાડમરૂન્ ઉડ્ડામર વાદયન્ન્ ઇદં દિશસિ ।
વૃત્તિત્રિભેદભિન્નં નાદં શૃણ્વન્ સ્થિતો ઽસ્મીતિ ॥

કિં ચ પરાદિકશક્તિત્રિતયારાસુન્દરામ્ મહાશક્તિમ્ ।
દેવાનુકરોષિ બહિસ્ ત્રિશૂલધારણમિષેણ નિત્યં ત્વમ્ ॥

ઇચ્છાદિકનિજશક્તિપ્રકાશિતાધઃસ્થગોચરત્રિતયામ્ ।
સ્વામ્ એવ પરાં શક્તિં વજ્રમયીં વહસિ ષડરાં ત્વમ્ ॥

જગદ્ અખિલં મચ્છક્ત્યા દમિતં સર્વવ્યાવસ્થિતીર્ ધત્તે ।
ઇતિ દણ્ડધારણવશાદ્ વ્યનક્ષિ ચિદ્ભૈરવાસ્માકમ્ ॥

મુદ્ગરપરશૂ બિભ્રદ્ બૈન્દવનાદાનુકારરૂપૌ ત્વમ્ ।
ભેદવિભેદનશકલનપરત્વમ્ ઈશાન નિર્દિશસિ ॥

દર્શનભેદાત્ સ્વામિન્ન્ અન્યાન્યામ્ આહૃતિં દધાનસ્ ત્વમ્ ।
ભૈરવપરબોધમયં પ્રથયસિ નિજધામ સર્વત્ર ॥

શાક્તાણ્ડખણ્ડમધ્યે વિશ્વરસાઃ સર્વમ્ અહં પિબામિ સદા ।
વ્યઞ્જયસિ નરકપાલગરુધિરમિષાદ્ એતદ્ ઇવ મે ઽન્તઃ ॥

અભિમાનહૃદયબન્ધાનુત્ખાતૌ તાવ્ ઇમૌ સશિખૌ ।
મૂર્તાવ્ ઇવ મુણ્દાબ્જૌ પ્રથયન્ ધત્સે મહાકાલઃ ॥

અખિલજગદ્બીજભુવં પ્રથમસ્થામ્ અનુકરોષિ બોધનિધે ।
કરતલગબીજપૂરકદર્શનલીલાયિતાદ્ દેવ ॥

ભૈરવરૂપો ઽપ્ય્ અસિ યત્ તત્રાપિ કરે ઽક્ષમાલિકાં ધત્સે ।
તત્ સર્વાક્ષવિકાસાદ્ વિશ્વં પરિવર્તયસ્ય્ અન્તઃ ॥

અસ્થિકરમુણ્ડમાલાભસ્માભરણો નૃરક્તરુચિઃ ।
વિશ્વં બ્રહ્મમયત્વાચ્ છુદ્ધમ્ ઇતીશઃ સમાદિશસિ ॥

સ્વાત્મારામમયાનાં વિષમા અપિ વિષયબુદ્બુધાઃ કિમ્ અમી ।
સ્મરદહનમ્ અલિકનયનમ્ પ્રથયન્ પરમાગ્નિરૂપમ્ આદિશસિ ॥

અન્તર્નિબદ્ધલક્ષ્યઃ પ્રવિકાસિકરણો ઽપિ યત્ સદા ભવસિ ।
તત્ પ્રથયસિ સર્વદશં ગતમોહકલઙ્કમ્ આત્માનમ્ ॥

દેવ દિગમ્બરતા તે વદતિ નિરાવરણમ્ આત્મનો રૂપમ્ ।
પરમબ્રહ્મમયાર્કાન્ માયાવરણમ્ કથં વૃણુયાત્ ॥

સંહર્તા સર્વેષામ્ અર્કાદીનામ્ અહં તમોભૂમિઃ ।
નિર્મલશારદગગનપ્રભેણ વપુષેતિ દર્શયસિ ॥

પરમબ્રહ્મમયસ્ ત્વં દેવ યદાશ્રયસિ ભૈરવાકારમ્ ।
તત્ પ્રથયસિ તત્ત્વજ્ઞઃ સત્ય્ અપિ ભેદે વિમુક્ત ઇતિ ॥